Nɔ ni Yesu Tsɔɔ yɛ Nyɔŋmɔ Maŋtsɛyeli lɛ He

“Eyakpa maji kɛ akrowai amli eshiɛ Nyɔŋmɔ maŋtsɛyeli lɛ he sanekpakpa lɛ.”—LUKA 8:1.

WƆSUMƆƆ akɛ wɔwie nibii ni he hiaa wɔ, kɛ nibii ni kã wɔtsui nɔ lɛ ahe. Taakɛ Yesu diɛŋtsɛ wie lɛ, “nɔ ni eyi tsui obɔ kɛteke nɔ lɛ, no nɔŋŋ naabu wieɔ.” (Mateo 12:34) Kɛ́ wɔsusu nibii ni Yesu wie yɛ esɔɔmɔ nitsumɔ lɛ mli lɛ ahe lɛ, wɔbaanyɛ wɔmu sane naa akɛ no mli lɛ, Nyɔŋmɔ Maŋtsɛyeli lɛ kã etsui nɔ waa.

Mɛni ji Nyɔŋmɔ Maŋtsɛyeli lɛ? Maŋtsɛyeli ji nɔyeli ni maŋtsɛ ko yeɔ nɔ. No hewɔ lɛ, Nyɔŋmɔ Maŋtsɛyeli lɛ ji nɔyeli ni Nyɔŋmɔ diɛŋtsɛ to shishi. Yesu wie Nyɔŋmɔ Maŋtsɛyeli lɛ he shii abɔ ni ekɛfee eshɛɛ sane lɛ yitso. Awie Nyɔŋmɔ Maŋtsɛyeli lɛ he fe shii 110 yɛ Sanekpakpai ejwɛ lɛ amli. Jeee wiemɔi anɔ pɛ Yesu tsɔ etsɔɔ nii. Enifeemɔi hu ha ale nibii babaoo ni kɔɔ Nyɔŋmɔ Maŋtsɛyeli lɛ kɛ nibii ni Maŋtsɛyeli lɛ baafee lɛ he.

Namɔ ji Maŋtsɛ lɛ? Jeee adesai ni fɔ̃ oshiki ni amɛkɛhala Maŋtsɛ ni baaye Nyɔŋmɔ Maŋtsɛyeli lɛ nɔ lɛ. Shi moŋ Nyɔŋmɔ diɛŋtsɛ ji mɔ ni hala Nɔyelɔ nɛɛ. Beni Yesu tsɔɔ nii lɛ eha efee faŋŋ akɛ, lɛ ji mɔ ni Nyɔŋmɔ ehala lɛ akɛ Maŋtsɛ.

Yesu le akɛ Biblia lɛ egba efɔ̃ shi akɛ shiwoo Mesia lɛ baaye Maŋtsɛyeli ko ni baahi shi kɛya naanɔ lɛ nɔ. (2 Samuel 7:12-14; Daniel 7:13, 14; Mateo 26:63, 64) Kaimɔ akɛ Yesu wie yɛ faŋŋ mli akɛ lɛ ji Mesia ni agba ehe sane lɛ. Yesu kɛ enɛ ni efee lɛ tsɔɔ akɛ lɛ ji Maŋtsɛ ni Yehowa ehala lɛ lɛ. (Yohane 4:25, 26) Esa jogbaŋŋ akɛ Yesu kɛ wiemɔ ni ji “mimaŋtsɛyeli” lɛ tsu nii shii abɔ.—Yohane 18:36.

Yesu tsɔɔ hu akɛ mɛi krokomɛi hu kɛ lɛ baaye nɔ yɛ Maŋtsɛyeli lɛ mli. (Luka 22:28-30) Etsɛ mɛi ni ekɛ amɛ baaye nɔ lɛ akɛ, “asafoku bibioo” ejaakɛ amɛyi ebafaŋ. Ekɛɛ yɛ amɛhe akɛ: “Nyɛtsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.” (Luka 12:32) Naagbee wolo kwraa ni yɔɔ Biblia lɛ mli lɛ tsɔɔ akɛ, mɛi ni amɛyifalɛ shɛɔ 144,000 baaná hegbɛ amɛkɛ Kristo aye nɔ.—Kpojiemɔ 5:9, 10; 14:1.

Nɛgbɛ ato Maŋtsɛyeli lɛ shishi yɛ? Yesu kɛɛ Roma nɔyelɔ Pontio Pilato akɛ, “Mimaŋtsɛyeli lɛ jɛɛɛ je nɛŋ.” (Yohane 18:36) Nyɔŋmɔ Maŋtsɛyeli ni Kristo baaye nɔ lɛ kɛ adesai tsuŋ nii akɛ enajiaŋdamɔlɔi. Yesu tsɛ́ Nyɔŋmɔ Maŋtsɛyeli lɛ shii abɔ akɛ “ŋwɛi maŋtsɛyeli lɛ.”a (Mateo 4:17; 5:3, 10, 19, 20) No hewɔ lɛ, Nyɔŋmɔ Maŋtsɛyeli lɛ ji ŋwɛi nɔyeli.

Yesu kpa gbɛ akɛ yɛ eshihilɛ yɛ shikpɔŋ lɛ nɔ lɛ sɛɛ lɛ, ebaaku esɛɛ kɛya ŋwɛi. Ewie akɛ, ebaaya ‘eyasaa gbɛhe’ eto amɛ yɛ jɛmɛ, koni no aha mɛi ni baafata ehe kɛye nɔ lɛ aná hegbɛ amɛbafata ehe.—Yohane 14:2, 3.

Mɛni Maŋtsɛyeli lɛ baatsu? Yesu tsɔɔ etoibolɔi lɛ ni amɛsɔle amɛha Nyɔŋmɔ akɛ: “Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:9, 10) Aafee Nyɔŋmɔ suɔmɔnaa nii yɛ ŋwɛi. Maŋtsɛyeli lɛ nɔ abaatsɔ atsu Nyɔŋmɔ yiŋtoo kɛha shikpɔŋ lɛ he nii. Bɔni afee ni enɛ anyɛ aba mli lɛ, Maŋtsɛyeli lɛ baafee tsakemɔ kple yɛ shikpɔŋ nɛɛ nɔ.

Mɛni Maŋtsɛyeli lɛ baafee yɛ shikpɔŋ lɛ nɔ? Yesu tsɔɔ akɛ Nyɔŋmɔ Maŋtsɛyeli lɛ baakpãta efɔŋfeelɔi ni tsakeee amɛtsui lɛ ahiɛ ni ekɛjie efɔŋfeemɔ yɛ shihilɛ mli. (Mateo 25:31-34, 46) No baafo juu kɛ fɔ̃ kɛ efɔŋfeemɔi srɔtoi fɛɛ asɛɛ. Yesu tsɔɔ akɛ shikpɔŋ lɛ nɔ baayi obɔ kɛ “mɛi ni he jɔ,” jalɔi, mɛi ni naa mɔbɔ, “mɛi ni tsuii amli tse,” kɛ mɛi ni kpãtaa.—Mateo 5:5-9.

Ani esa akɛ anɔkwafoi nɛɛ ahi shi yɛ jeŋ ni mli ewo muji mli? Dabi kwraa! Yesu tsɔɔ akɛ shikpɔŋ lɛ nɔ baatsake kwraa yɛ Nyɔŋmɔ Maŋtsɛyeli lɛ shishi. Nuu ko ni ayaagbe lɛ kɛ Yesu fɛɛ lɛ kɛɛ akɛ, “Nuŋtsɔ [Yesu], kaimɔ mi, beni oooba yɛ omaŋtsɛyeli lɛ mli lɛ!” Yesu ha lɛ hetoo akɛ: “Lɛɛlɛŋ, miikɛɛo ŋmɛnɛ akɛ, okɛ mi aaahi Paradeiso!” (Luka 23:42, 43 NW) Hɛɛ Nyɔŋmɔ Maŋtsɛyeli lɛ baasaa shikpɔŋ lɛ nɔ ni efee lɛ paradeiso tamɔ Eden abɔɔ lɛ.

Mɛni hu Maŋtsɛyeli lɛ baafee eha adesai? Yesu fee babaoo fe nɔ ni Nyɔŋmɔ Maŋtsɛyeli lɛ baafee lɛ he shiwoo ni ekɛha lɛ kɛkɛ. Etsɔɔ nɔ ni Maŋtsɛyeli lɛ baafee hu. Yesu tsa helai babaoo yɛ naakpɛɛ gbɛ nɔ, ni enɛ tsɔɔ nibii wuji ni ebaafee wɔsɛɛ beni eba e-Maŋtsɛyeli lɛ mli lɛ he nɔ ko fioo kɛkɛ. Sanekpakpa lɛ ni ajɛ mumɔŋ aŋma lɛ wie yɛ Yesu he akɛ: “Yesu kpa Galilea muu lɛ fɛɛ, etsɔɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ etsɔɔ, ni etsaa hela fɛɛ hela kɛ hejaramɔ fɛɛ hejaramɔ yɛ maŋ lɛŋ.”—Mateo 4:23.

Yesu tsa helai srɔtoi babaoo. “Egbele mɔ ni afɔ lɛ shwilafo hiŋmɛi.” (Yohane 9:1-7, 32, 33) Yesu kpã enine mli eta nuu ko ni miiye kpiti ni ji hela ko ni anyaŋeɔ lɛ he, ni etsa lɛ. (Marko 1:40-42) Beni akɛ “mɔ ko ni emu toi ni mumui hu ji lɛ” lɛ ba Yesu ŋɔɔ lɛ, etsɔɔ akɛ enyɛɔ ehaa “toimulɔi nuɔ nii, ni mumuii hu wieɔ.”—Marko 7:31-37.

Gbele tete po bɛ hewalɛ ko kwraa yɛ Maŋtsɛ ni Nyɔŋmɔ ehala lɛ lɛ nɔ. Yesu tee gbohii ashi yɛ shihilɛi srɔtoi etɛ mli, ni aŋmala enɛ he saji afɔ shi. Yesu tee yoo okulafo ko binuu kome too pɛ ni gbo lɛ shi, ni etee oblayoo ko ni eye afii 12 lɛ, kɛ lɛ diɛŋtsɛ enaanyo ni esumɔɔ esane ni ji Lazaro lɛ shi.—Luka 7:11-15; 8:41-55; Yohane 11:38-44.

Beni Yesu tsɔɔ wɔsɛɛ be ni yɔɔ miishɛɛ ni mɛɔ Nyɔŋmɔ Maŋtsɛyeli lɛ shishibii lɛ, Yesu tsɔ bɔfo Yohane nɔ egba akɛ, “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 1:1; 21:3, 4) Bo lɛ susumɔ he okwɛ—jeŋ ni mɔ ko werɛ hoŋ ehe ni ebaafo, piŋmɔ, kɛ gbele bɛ dɔŋŋ! Nakai beaŋ ji be ni sɔlemɔ akɛ afee Nyɔŋmɔ suɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ baaba mli kɛmɔ shi.

Mɛɛ be Nyɔŋmɔ Maŋtsɛyeli lɛ baaba? Yesu tsɔɔ akɛ enɔyeli lɛ, kɛ be krɛdɛɛ ko ni atsɛɔ lɛ “ebaa” lɛ, baaje shishi yɛ be kometoo lɛ nɔŋŋ mli. Yesu kɛ gbalɛ ni mli kã shi fitsofitso ha, ni ekɛtsɔɔ beni eba ni eba yɛ emaŋtsɛyeli lɛ mli lɛ baaje shishi lɛ mli. Naagbai ni baaya nɔ yɛ jeŋ fɛɛ lɛ ji nɔ ni kadiɔ be nɛɛ, ni nɔ fata he ji tai, hɔmɔ, shikpɔŋhosomɔi, tsɛŋemɔ helai, kɛ mlakwamɔ ni baafa babaoo. (Mateo 24:3, 7-12; Luka 21:10, 11) Enɛɛmɛi kɛ okadii krokomɛi ni Yesu gba fɔ̃ shi lɛ bafee faŋŋ diɛŋtsɛ kɛjɛ afi 1914, ni ji afi nɔ ni Jeŋ Ta 1 fɛ lɛ. Enɛ tsɔɔ akɛ, amrɔ nɛɛ Yesu miiye nɔ akɛ Maŋtsɛ. Etsɛŋ ni be ni Maŋtsɛyeli lɛ baaba lɛ baashɛ, ni ebaaha afee Nyɔŋmɔ suɔmɔnaa nii yɛ shikpɔŋ lɛ nɔ.b

Mɛni Nyɔŋmɔ Maŋtsɛyeli lɛ baa lɛ tsɔɔ kɛha bo akɛ aŋkro? Fɛɛ damɔ bɔ ni ohereɔ Yesu shɛɛ sane lɛ nɔ ohaa lɛ nɔ.

[Shishigbɛ niŋmai]