‘Nyɛhaa Wɔkɛ Yehowa Nikeenii Abaa’

KƐ́ MƆ ko jie mlihilɛ kpo etsɔɔ bo lɛ, mɛni ofeɔ kɛtsɔɔ akɛ ohiɛ esɔ? Susumɔ bɔ ni Israel tatsɛmɛi lɛ jie hiɛsɔɔ kpo amɛha beni amɛkɛ Midianbii lɛ wu ta lɛ sɛɛ lɛ he okwɛ. Awu ta lɛ beni Israelbii lɛ fee esha, kɛtsɔ amɛhe ni amɛkɛyakpɛtɛ Baal-Peor he lɛ nɔ lɛ sɛɛ. Nyɔŋmɔ ha ewebii lɛ ye kunim, ni aja haanii lɛ aha asraafoi 12,000 lɛ kɛ Israelbii krokomɛi ni eshwɛ lɛ. Yɛ Yehowa gbɛtsɔɔmɔ naa lɛ, asraafoi lɛ kɛ nɔ ni amɛná lɛ mlijaa fã ko ha osɔfoi lɛ, ni Israelbii krokomɛi ni eshwɛ lɛ hu kɛ amɛnɔ lɛ mlijaa fã ko ni tamɔ nakai nɔŋŋ ha Levibii lɛ.—4 Mose 31:1-5, 25-30.

Shi tatsɛmɛi lɛ miisumɔ ni amɛfee fe nakai. Amɛkɛɛ Mose akɛ: “Otsuji ekane tabilɔi ni wɔhiɛ lɛ, ni amɛteŋ mɔ ko mɔ ko ekaaa.” Amɛkpɛ mli akɛ amɛkɛ shika jwinei kɛ hewulamɔ nibii srɔtoi baaha Yehowa akɛ nikeenii. Shika jwinei ni amɛná lɛ fɛɛ tsii fe kilogram 190.—4 Mose 31:49-54.

Ŋmɛnɛ hu lɛ, mɛi babaoo jieɔ hiɛsɔɔ kpo yɛ nibii ni Yehowa efee eha amɛ lɛ he. Kɛfata he lɛ, jeee Nyɔŋmɔ tsuji ni ejɔɔ amɛhe nɔ amɛha lɛ lɛ pɛ jieɔ hiɛsɔɔ ni tamɔ nɛkɛ kpo. Ákɛ nɔkwɛmɔnɔ lɛ, susumɔ bɔs kudɔlɔ ko ni hole nyɛmimɛi komɛi kɛtee he ni afee afi 2009 majimaji ateŋ kpee lɛ yɛ Bologna, yɛ Italy, ni esaa ekɛ amɛ ku sɛɛ lɛ niiashikpamɔ lɛ he okwɛ. Akɛni ekudɔɔɔ tsɔne lɛ basabasa, ni ehe jɔ hu hewɔ lɛ, mɛi ni ta etsɔne lɛ mli lɛ ŋma wolo kuku ko kɛda lɛ shi, ni amɛkɛ shika fioo kɛ Mɛni Biblia lɛ Tsɔɔ Diɛŋtsɛ? wolo lɛ fata he amɛha lɛ. No sɛɛ lɛ, nɔ ni tsɔne kudɔlɔ lɛ kɛɛ nɛ: “Mikɛ miishɛɛ miikpɛlɛ shidaa kaadi lɛ kɛ wolo lɛ nɔ, shi mikɛ shika lɛ miiku sɛɛ kɛha nyɛ ejaakɛ miisumɔ ni mikɛye mabua koni nyɛnyɛ nyɛkɛtsa nitsumɔ ni nyɛtsuɔ lɛ nɔ. Eyɛ mli akɛ jeee Yehowa Odasefonyo ji mi moŋ, shi miisumɔ ni mikɛ shika nɛɛ aye abua, ejaakɛ mina akɛ suɔmɔ ji nɔ ni tsirɛɔ nyɛ yɛ nibii ni nyɛfeɔ lɛ mli.”

Kɛ́ ohiɛ esɔ nibii ni Yehowa efee eha bo lɛ, shika ni okɛaafi Yehowa Odasefoi a-jeŋ muu fɛɛ nitsumɔ lɛ sɛɛ lɛ ji gbɛ kome ni obaanyɛ otsɔ nɔ ojie hiɛsɔɔ kpo. (Mat. 24:14) Akrabatsa ni fata he nɛɛ tsɔɔ gbɛi komɛi anɔ ni obaanyɛ otsɔ ofee enɛ.

GBƐI NI MƐI KOMƐI TSƆƆ NƆ AMƐKEƆ NII

ONIATSUMƆI KƐHA JEŊ MUU FƐƐ NITSUMƆ LƐ

Mɛi pii kɛ shika ko fɔ̃ɔ shi, loo amɛtoɔ he gbɛjianɔ ni amɛkɛwoɔ oniatsumɔ adekai ni akadi amɛ akɛ “Jeŋ Muu Fɛɛ Nitsumɔ Lɛ” amli.

Daa nyɔɔŋ nɔ lɛ, asafoi kɛ shika nɛɛ majeɔ Yehowa Odasefoi anitsumɔhe ni yɔɔ maŋ nɔ he ni amɛyɔɔ lɛ. Abaanyɛ akɛ shika ni ataoɔ akɛke lɛ hu amaje tɛ̃ɛ kɛyaha Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, aloo abaanyɛ akɛya Yehowa Odasefoi anitsumɔhe nine ni kwɛɔ maŋ ni oyɔɔ mli lɛ nɔ lɛ. (Abaanyɛ akɛ shika ni ataoɔ akɛke ní abaatsĩ tã kɛnyiɛ sɛɛ nɛɛ hu amaje Yehowa Odasefoi anitsumɔhe nine ni kwɛɔ maŋ ni oyɔɔ mli lɛ nɔ lɛ.) Kɛ́ akɛ tsɛk miitsɔ adrɛs ni yɔɔ yiteŋgbɛ lɛ nɔ kɛmiiha lɛ, esa akɛ aŋma “Watchtower” yɛ nɔ ákɛ mɛi ni aawo shika lɛ aaha. Abaanyɛ akɛ jwetrii aloo ojarawa nibii krokomɛi hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ akɛ amɛji nibii ni akɛmiike kwraa.

NIBII NI AKƐHA SHI AKƐKEKO LƐ AHE GBƐJIANƆTOO

Abaanyɛ akɛ shika aha Watch Tower Bible and Tract Society of Pennsylvania koni ekɛtsu enibii ahe nii yɛ jeŋ fɛɛ. Shi kɛ mɔ ni kɛha lɛ miitao lɛ, akɛbaaha lɛ. Bɔni afee ni oná sane nɛɛ mlitsɔɔmɔ lolo lɛ, ofainɛ ŋmaa kɛyabi yɛ Treasurer’s Office lɛ kɛtsɔ adrɛs ni atsɔɔ yɛ yiteŋgbɛ lɛ nɔ loo obaanyɛ otswa tɛlifoŋ kɛya (718) 560-7500.

EJURƆFEEMƆ NI AKPƐ YIŊ YƐ HE

Kɛfata shika ni akɛkeɔ kwraa lɛ he lɛ, ayɛ gbɛi krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ateŋ ekomɛi ji:

Inshɔɔrans:

Abaanyɛ aŋma Watch Tower Bible and Tract Society of Pennsylvania gbɛ́i akɛ mɛi ni baaná inshuɔrans gbɛjianɔtoo lɛ he sɛɛ yɛ mɔ ni kɛhaa lɛ gbele sɛɛ, aloo mɛi ni baaná enitsumɔ hejɔɔmɔ mli gbɛjianɔtoo lɛ he sɛɛ.

Shika ni Akɛtoɔ Shikatoohe:

Abaanyɛ aha shika ni akɛto, shika nɔ woji, aloo akɛ nitsumɔ mli hejɔɔmɔ mli shika ato aloo akɛha Watch Tower Bible and Tract Society of Pennsylvania yɛ mɔ lɛ gbele sɛɛ, yɛ bɔ ni nyɛmaŋ lɛ shikatoohei ŋmɛɔ gbɛ ni afee lɛ naa.

Nitsumɔi Amli Gbɛfaŋnɔ kɛ Shika ni Akɛfaa Shikatoohei kɛ Ehe Kpá:

Obaanyɛ okɛ nitsumɔi amli gbɛfaŋnɔ ni oyɔɔ kɛ shika ni okɛfa shikatoohei kɛ ehe kpá lɛ aha Watch Tower Bible and Tract Society of Pennsylvania akɛ nibii ni okɛmiike kwraa loo obaanyɛ ofee shamaŋsheo ákɛ akɛ nibii nɛɛ ahã Watch Tower Bible and Tract Society of Pennsylvania yɛ ogbele sɛɛ.

Shikpɔji kɛ Tsũi:

Abaanyɛ akɛ shikpɔji kɛ tsũi ni baahi hɔɔmɔ, loo shĩa ko ni mɔ ko yɔɔ mli lɛ aha kɛtsɔ ke kwraa ni akɛaake nɔ, aloo ni abaashi shikpɔŋ loo tsũ lɛ yɛ mɔ ni kɛke lɛ dɛŋ, koni ehi tsũ lɛ mli aloo ekwɛ nɔ aahu kɛyashi be mli ni ebaagbo. Ha nitsumɔhe nine ni yɔɔ maŋ mli he ni oyɔɔ lɛ ale dani okɛ shikpɔŋ loo tsũ ko aha.

Daa Afi Shika ni Anáa yɛ Nikeenii Ahe:

Daa afi shika ni anáa yɛ nikeenii ahe ji gbɛjianɔ ko ni atoɔ ni mɔ ko kɛ shika loo nibii ni jara wawai haa koni nitsumɔhe nine pɔtɛɛ ko ní Yehowa Odasefoi kɛtsuɔ nii lɛ akwɛ nɔ. Yɛ no najiaŋ lɛ, mɔ ni kɛha lɛ, loo mɔ ko ni mɔ ni kɛha lɛ ehala lɛ lɛ nine shɛɔ shika falɛ pɔtɛɛ ko nɔ daa afi yɛ ewala be fɛɛ mli. Atseɔ tóo yɛ shika ni mɔ ni kɛha lɛ nine shɛɔ nɔ lɛ nɔ yɛ afi mli ni daa afi shika ni anáa lɛ jeɔ nitsumɔ shishi lɛ.

Shamaŋsheo kɛ Nii ni Ahaa Mɔ Kroko Gbɛ́i Kãa Nɔ:

Abaanyɛ akɛ nibii ni ayɔɔ loo shika ake Watch Tower Bible and Tract Society of Pennsylvania kɛtsɔ shamaŋsheo ni aŋma yɛ mla naa lɛ nɔ, aloo abaanyɛ aha Watch Tower Bible and Tract Society of Pennsylvania gbɛ́i akã shika ni akɛto lɛ nɔ akɛ mɔ ni baaná he sɛɛ. Bei komɛi lɛ, jamɔ gbɛjianɔtoo ko gbɛ́i ni kãa shika ko nɔ lɛ haa enáa toowoo mli heyelii komɛi.

Taakɛ gbɛ́i “charitable planning” (ejurɔfeemɔ ni akpɛ yiŋ yɛ he) lɛ tsɔɔ lɛ, nɛkɛ nikeei henɔi nɛɛ biɔ gbɛjianɔtoo yɛ mɔ ni kɛ nii keɔ lɛ gbɛfaŋ. Bɔni afee ni akɛye abua aŋkroaŋkroi ni miisumɔ koni amɛye amɛbua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ ejurɔfeemɔ ni akpɛ yiŋ yɛ he nɛɛ ateŋ eko nɔ lɛ, afee wolo bibioo ko yɛ Blɔfo wiemɔ kɛ Spain wiemɔ mli ni yitso ji Charitable Planning to Benefit Kingdom Service Worldwide (Ejurɔfeemɔ ni Akpɛ Yiŋ yɛ He Koni Ehe Aba Sɛɛnamɔ Kɛha Maŋtsɛyeli Nitsumɔ yɛ Jeŋ Fɛɛ). Aŋma wolo bibioo nɛɛ koni eha ale gbɛi srɔtoi anɔ ni abaanyɛ atsɔ ni akɛ nibii kɛ shika ake amrɔ nɛɛ loo bɔ ni mɔ aaafee eha nine ashɛ shika loo jwetri ko ni ekɛke yɛ mla naa lɛ nɔ yɛ egbele sɛɛ. Mɛi babaoo enyɛ eye ebua kɛfi Yehowa Odasefoi ajamɔ lɛ kɛ nitsumɔi ni amɛtsuɔ kɛyeɔ buaa adesai lɛ asɛɛ yɛ jeŋ fɛɛ, yɛ be mli ni amɛkane wolo bibioo lɛ ni amɛkɛ amɛ diɛŋtsɛ amɛmla kɛ toowoo he ŋaawolɔi esusu he lɛ sɛɛ, ni yɛ nakai beaŋ nɔŋŋ lɛ, amɛha sɛɛnamɔi ni amɛnáa yɛ toowoo mli yɛ enɛ feemɔ mli lɛ etee hiɛ. Nine baanyɛ ashɛ wolo bibioo nɛɛ nɔ kɛtsɔ eko ni aaashɛ kɛjɛ Charitable Planning Office (Nitsumɔhe ni Kwɛɔ Ejurɔfeemɔ ni Akpɛ Yiŋ yɛ He lɛ Nɔ) lɛ dɛŋ tɛ̃ɛ lɛ nɔ.

Bɔni afee ni oná enɛ mlitsɔɔmɔ lolo lɛ, obaanyɛ obi kɛjɛ Charitable Planning Office lɛ, kɛtsɔ woloŋmaa loo tɛlifoŋ tswaa nɔ, kɛtsɔ adrɛs ni atsɔɔ yɛ shishigbɛ lɛ loo nitsumɔhe nine ni sɔmɔɔ maŋ ni oyɔɔ mli lɛ nɔ.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707