Ha Onikasemɔ Be lɛ Afee nɔ ni Yɔɔ Miishɛɛ ni Woɔ Yibii
Te wɔɔfee tɛŋŋ wɔha wɔ-Biblia kasemɔ afee nɔ ni yɔɔ miishɛɛ lɛ? Te wɔɔfee tɛŋŋ wɔha be ni wɔkɛkaseɔ nii lɛ awo yibii lɛ? Nyɛhaa wɔsusua nibii etɛ ni he hiaa ni baaye abua wɔ koni wɔná wɔ-Biblia kasemɔ he sɛɛ lɛ he kuku.
1 SƆLEMƆ: Nɔ klɛŋklɛŋ ni esa akɛ wɔfee ji, ni wɔsɔle. (Lala 42:9) Mɛni hewɔ? Esa akɛ wɔbu Nyɔŋmɔ Wiemɔ lɛ kasemɔ akɛ wɔjamɔ lɛ fã. No hewɔ lɛ, esa akɛ wɔbi Yehowa ni eha wɔná jwɛŋmɔ ni ja, ni eha wɔ emumɔ krɔŋkrɔŋ lɛ hu. (Luka 11:13) Barbara, ni kɛ afii babaoo esɔmɔ akɛ maŋsɛɛ shiɛlɔ lɛ kɛɛ akɛ: “Misɔleɔ be fɛɛ be dani mikaneɔ loo mikaseɔ Biblia lɛ. Kɛ́ misɔle lɛ, minuɔ he akɛ Yehowa kɛ mi yɛ, ni ekpɛlɛɔ nɔ ni mifeɔ lɛ nɔ.” Kɛ́ wɔsɔle kɛje nikasemɔ shishi lɛ, egbeleɔ wɔjwɛŋmɔ kɛ wɔtsui mli bɔni afee ni mumɔŋ niyenii babaoo ni wɔbaaye lɛ aná wɔnɔ hewalɛ.
2 JWƐŊMƆ SANE NƆ: Akɛni be bɛ hewɔ lɛ, mɛi komɛi kaneɔ Nyɔŋmɔ Wiemɔ lɛ hiɛaŋhiɛaŋ kɛkɛ. Shi nakai feemɔ haa sɛɛnamɔi ni kulɛ amɛbaaná kɛjɛ Biblia lɛ kasemɔ mli lɛ ŋmɛɔ amɛ. Carlos, ni kɛ nɔ ni fe afii 50 esɔmɔ Yehowa lɛ eyɔse akɛ, kɛ́ ato be kɛha sanenɔjwɛŋmɔ lɛ, ehaa nikasemɔ lɛ he baa sɛɛnamɔ waa. Ekɛɛ akɛ: “Amrɔ nɛɛ mikaneɔ Biblia lɛ baafai fioo ko pɛ daa gbi—aaafee baafai enyɔ. No haa mináa be babaoo kɛjwɛŋɔ nɔ ni mikaneɔ lɛ nɔ, ni mikaseɔ nibii babaoo kɛjɛɔ mli.” (Lala 77:13) Kɛ́ wɔhé be kɛjwɛŋ nɔ ni wɔkaneɔ lɛ nɔ lɛ, ehaa Nyɔŋmɔ suɔmɔnaa nii lɛ he nilee kɛ shishinumɔ ni wɔyɔɔ lɛ yaa hiɛ.—Kol. 1:9-11.
3 OKƐTSU NII: Kɛ́ wɔyɔse sɛɛnamɔ ni yɔɔ nifeemɔ ko he lɛ, wɔnáa he sɛɛ babaoo fe tsutsu lɛ. Nakai pɛpɛɛpɛ eji yɛ Biblia kasemɔ he. Nyɛmi nuu fioo ko ni atsɛɔ lɛ Gabriel, ni kaseɔ Biblia lɛ be fɛɛ be lɛ kɛɛ akɛ: “Nikasemɔ yeɔ ebuaa mi ni midamɔɔ daa gbi shihilɛ mli naagbai anaa, ni ehaa minyɛɔ miyeɔ mibuaa mɛi krokomɛi.” Ekɛfata he akɛ: “Mibɔɔ mɔdɛŋ akɛ mikɛ nɔ fiaa nɔ ni mikaseɔ lɛ atsu nii.” (5 Mose 11:18; Yosh. 1:8) Hɛɛ, wɔbaanyɛ wɔná Nyɔŋmɔ he nilee babaoo ni wɔkɛtsu nii yɛ wɔshihilɛ mli.—Abɛi 2:1-5.
MLITĨI: Kwɛ hegbɛ kpele ni wɔná akɛ wɔɔpɛi nilee ni jɛ Yehowa, ni ji nilee fɛɛ Jɛɛhe lɛ ŋɔɔ lɛ mli! (Rom. 11:33) No hewɔ lɛ, be kroko kɛ́ obaakase nii lɛ, sɔlemɔ oha Yehowa kɛje shishi, ni obi ni eha oná jwɛŋmɔ ni ja kɛ emumɔ krɔŋkrɔŋ lɛ. No sɛɛ lɛ, kɛ́ okane fioo lɛ, wa ní ojwɛŋ nɔ ni okane lɛ nɔ dani otsa nɔ. Agbɛnɛ lɛ, bɔɔ mɔdɛŋ ni okɛ nɔ ni okase lɛ atsu nii yɛ odaa gbi shihilɛ mli. Kɛ́ ofee nibii ni he hiaa nɛɛ, obaana akɛ o-Biblia kasemɔ lɛ baafee nɔ ni yɔɔ miishɛɛ, ni woɔ yibii waa.