SANEBIMƆI NI BIBLIA LƐ EHA HETOO

Te fee tɛŋŋ ni Abonsam ba shihilɛ mli?

Nyɔŋmɔ ebɔɔɔ Abonsam. Moŋ lɛ, Nyɔŋmɔ bɔ bɔfo ni sɛɛ mli lɛ ebatsɔ Abonsam, ni ale lɛ hu akɛ Satan lɛ. Yesu tsɔɔ mli akɛ, kulɛ bɔfo ni batsɔ Abonsam nɛɛ ji anɔkwafo, ni tɔmɔ ko kwraa bɛ ehe. Belɛ, no tsɔɔ akɛ no mli lɛ bɔfo ni batsɔ Abonsam lɛ ji Nyɔŋmɔ bii ni yeɔ anɔkwa lɛ ateŋ mɔ ko.—Kanemɔ Yohane 8:44.

Te fee tɛŋŋ ni bɔfo kpakpa batsɔ Abonsam lɛ?

Bɔfo ni batsɔ Abonsam lɛ hala akɛ ebaate shi ewo Nyɔŋmɔ, ni ewo klɛŋklɛŋ adesai enyɔ lɛ ayiŋ ni amɛfata ehe kɛte shi amɛwo Nyɔŋmɔ. Enɛ ha ebatsɔ ehe Satan, ni eshishi ji “Shiteekɛwolɔ.”—Kanemɔ 1 Mose 3:1-5; Kpojiemɔ 12:9.

Taakɛ eji yɛ Nyɔŋmɔ bɔɔ nii ni yɔɔ nilee krokomɛi lɛ agbɛfaŋ lɛ, kulɛ bɔfo ni batsɔ Abonsam lɛ yɛ hegbɛ akɛ ehalaa akɛ ebaafee nɔ ni ja loo nɔ ni ejaaa, shi ená shwelɛ akɛ esa akɛ ajá lɛ. Shwelɛ ni ená kɛha anunyam taomɔ lɛ mli yawa kwraa fe shwelɛ ni eyɔɔ akɛ ebaafee Nyɔŋmɔ suɔmɔnaanii.—Kanemɔ Mateo 4:8, 9; Yakobo 1:13, 14.

Mɛɛ gbɛ nɔ Abonsam etee nɔ ená adesai anɔ hewalɛ? Ani esa akɛ oshe lɛ gbeyei? Obaanyɛ oná sanebimɔi nɛɛ ahetoi yɛ Biblia lɛ mli.