SANEBIMƆI NI BIBLIA LƐ EHA HETOO

Mɛni hewɔ atsɛɔ Yesu akɛ Nyɔŋmɔ Bi?

Nyɔŋmɔ bɛ ŋa diɛŋtsɛ ni ekɛ lɛ fɔ bii. Nyɔŋmɔ ji nibii fɛɛ ni wala yɔɔ amɛmli lɛ a-Bɔlɔ. Abɔ adesai kɛ nyɛmɔ ni baaha amɛnyɛ amɛkase Nyɔŋmɔ sui lɛ. No hewɔ ni atsɛɔ klɛŋklɛŋ adesa ni Nyɔŋmɔ bɔ, Adam, akɛ “Nyɔŋmɔ bi” ko lɛ. Nakai nɔŋŋ atsɛɔ Yesu hu akɛ “Nyɔŋmɔ Bi lɛ,” ejaakɛ abɔ lɛ kɛ e-Tsɛ lɛ sui lɛ nɔŋŋ eko.—Kanemɔ Luka 3:38; Yohane 1:14, 49.

Mɛɛ be abɔ Yesu?

Nyɔŋmɔ bɔ Yesu dani ebɔ Adam. Anɔkwa, Nyɔŋmɔ bɔ Yesu ni no sɛɛ lɛ, ekɛ lɛ tsu nii kɛfee nibii krokomɛi fɛɛ, ni ŋwɛi bɔfoi lɛ hu fata he lɛ. No hewɔ ni Biblia lɛ tsɛɔ Yesu akɛ Nyɔŋmɔ “bɔɔ nii fɛɛ ateŋ kromɔbi lɛ.”—Kanemɔ Kolosebii 1:15, 16.

Yesu hi shi yɛ ŋwɛi akɛ mumɔŋ bɔɔnɔ dani abafɔ lɛ yɛ Betlehem. Beni be bashɛ lɛ, Nyɔŋmɔ jie Yesu wala kɛjɛ ŋwɛi kɛbawo Maria musuŋ bɔni afee ni anyɛ afɔ lɛ akɛ adesa.—Kanemɔ Luka 1:30-32; Yohane 6:38; 8:23.

Mɛni hewɔ Nyɔŋmɔ ha afɔ Yesu yɛ shikpɔŋ lɛ nɔ akɛ adesa lɛ? Mɛɛ gbɛfaŋnɔ krɛdɛɛ Yesu tsu he nii? Obaanyɛ oná nakai sanebimɔi lɛ ahetoo yɛ Biblia lɛ mli, ni ebaaha hiɛsɔɔ ni oyɔɔ yɛ nɔ ni Nyɔŋmɔ kɛ Yesu efee eha bo lɛ he lɛ aya hiɛ waa.