Mɛi Ni Sumɔɔ Yehowa Lɛ, “Nɔ Ko Nɔ Ko Bɛ Ni Woɔ Amɛnajiaŋ”
“Mɛi ni sumɔɔ omla lɛ yɛ hejɔlɛ babaoo, ni nɔ ko nɔ ko bɛ ni woɔ amɛnajiaŋ.”—LALA 119:165.
1. Mɛɛ gbɛ nɔ bɔ ni foidalɔ ko fee enii lɛ feɔ bɔ ni esaaa akɛ wɔnijiaŋ jeɔ wui lɛ he nɔkwɛmɔnɔ?
MARY DECKER bɔi foidamɔ he akaŋshii beni ená kɛjɛ afii 13 kɛyaa lɛ. Yɛ afi 1984 Olimpis akaŋshii lɛ mli lɛ, mɔ fɛɛ mɔ susu akɛ lɛ ebaaye klɛŋklɛŋ gbɛhe yɛ foidamɔ lɛ mli. Shi enáaa egbe efoidamɔ lɛ naa. Beni amɛdaa foi ni jɛkɛmɔ ji mitai 3,000 lɛ, etɛ foidalɔ ko nane sɛɛ ni egbee shi. Epila ni ebɔi yaafo, ni awo lɛ kɛje foidamɔ lɛ mli. Shi Mary kpaaa foidamɔ. Eshɛɛɛ afi ni eyashi akaŋ ko ni jɛkɛmɔ ji shitoo kome, ni egbe foidamɔ lɛ naa mra yɛ be ni yoo ko nyɛko afee nakai dã yɛ ebeaŋ lɛ mli.
2. Mɛɛ foi Kristofoi daa, ni te esa akɛ wɔda lɛ wɔha tɛŋŋ?
2 Akɛ Kristofoi lɛ, wɔ hu wɔmiida naanɔ wala he foi. Esa akɛ wɔbɔ mɔdɛŋ akɛ wɔbaaye kunim yɛ foidamɔ nɛɛ mli. Wɔfoidamɔ lɛ jeee be kukuoo foidamɔ ni biɔ ni foidalɔi lɛ ajo foi oyayaayai kɛye kunim. Ni ejeee foidamɔ hu ni ayaa lɛ blɛooblɛoo, ní bei komɛi lɛ adamɔɔ shi fioo kɛkɛ atsa nɔ. Moŋ lɛ, abaanyɛ akɛto gbɛ kakadaŋŋ foidamɔ ni ebiɔ hiɛmiamɔ dani abaanyɛ agbe naa lɛ he. Bɔfo Paulo kɛ foidamɔ fee nɔkwɛmɔnɔ beni eŋmaa wolo eyaha Kristofoi ni yɔɔ Korinto, ni ji maŋ ko ni afɔɔ foidamɔ yɛ mli lɛ. Eŋma akɛ: “Ani nyɛleee akɛ mɛi ni daa foi lɛ, amɛ fɛɛ amɛdaa moŋ, shi mɔ kome kɛkɛ náa emli juromɔnɔ lɛ? Nyɛdaa foi lɛ nakai, koni nyɛnine ashɛ nɔ.”—1 Kor. 9:24.
3. Namɛi anine baanyɛ ashɛ juromɔnɔ lɛ nɔ yɛ naanɔ wala he foidamɔ lɛ mli?
3 Biblia lɛ kɛɔ wɔ ni wɔkɛ wɔhe awo foidamɔ nɛɛ mli. (Nyɛkanea 1 Korintobii 9:25-27.) Juromɔnɔ lɛ ji naanɔ wala, ni Kristofoi ni afɔ amɛ mu lɛ baaná yɛ ŋwɛi, ni mɛi krokomɛi ni eshwɛ lɛ baaná yɛ shikpɔŋ lɛ nɔ. Yɛ foidamɔ he akaŋshii mli lɛ, mɔ kome pɛ náa juromɔnɔ lɛ, shi yɛ wala he foidamɔ nɛɛ mli lɛ, mɛi fɛɛ ni kɛ amɛhe woɔ mli ni amɛmiaa amɛhiɛ kɛgbeɔ naa lɛ baaná juromɔnɔ lɛ. (Mat. 24:13) Kɛ́ mɔ ko daaa foi nɛɛ yɛ bɔ ni akpaa gbɛ lɛ naa loo egbeee naa lɛ, enine shɛŋ juromɔnɔ lɛ nɔ. Kɛfata he lɛ, foidamɔ nɛɛ pɛ ji foidamɔ ni akɛ naanɔ wala baajuro foidalɔi lɛ.
4. Mɛni hewɔ naanɔ wala he foidamɔ lɛ bɛ mlɛo lɛ?
4 Naanɔ wala he foidamɔ lɛ bɛ mlɛo. Ebiɔ ni mɔ atsɔse ehe, ni etswa efai shi akɛ ebaagbe naa. Yesu Kristo pɛ ji mɔ ni enyɛ eda foi nɛɛ ni nɔ ko nɔ ko wooo enajiaŋ shi kome po. Shi kaselɔ Yakobo ŋma akɛ, Kristo sɛɛnyiɛlɔi lɛ ‘fɛɛ tɔ̃ɔ babaoo.’ (Yak. 3:2) Kwɛ bɔ ni sane nɛɛ ji anɔkwale ha! Wɔ diɛŋtsɛ wɔfatɔi kɛ mɛi krokomɛi afatɔi baanyɛ awo wɔnajiaŋ ní wɔfoidamɔ lɛ naa aba shi loo wɔgbee shi. Kɛ́ eba lɛ nakai lɛ, esaaa akɛ wɔkɛ wɔshigbeemɔhe feɔ wɔwɔɔhe. Mɛi komɛi egbee shi waa bɔ ni ebiɔ ni aye abua amɛ ni amɛsaa amɛtsa foidamɔ lɛ nɔ kɛyagbe naa. Ni tsɔɔ akɛ, wɔ hu wɔbaanyɛ wɔtɛ wɔgbee shi, shi kome loo shii abɔ po.—1 Maŋ. 8:46.
KƐ́ OGBEE SHI PO LƐ, KAAJE FOIDAMƆ LƐ MLI
5, 6. (a) Mɛni hewɔ ‘nɔ ko nɔ ko bɛ ni baanyɛ awo Kristofonyo ko najiaŋ’ lɛ, ni kɛ́ egbee shi lɛ, mɛni baaye abua lɛ ni ‘ete shi’? (b) Mɛni hewɔ kɛ́ mɛi komɛi gbee shi lɛ, amɛteee shi lɛ?
5 Ekolɛ okɛ wiemɔi ni ji “nanetɔtɔmɔ” kɛ “shigbeemɔ” etsu nii kɛkɔ mɔ ko ni wekukpaa kpakpa bɛ ekɛ Yehowa teŋ lɛ he pɛŋ. Bei komɛi lɛ, Biblia mli wiemɔi nɛɛ baanyɛ ahiɛ shishinumɔ kome, shi jeee be fɛɛ be amɛtsɔɔ nɔ kome. Akɛ nɔkwɛmɔnɔ lɛ, Abɛi 24:16 lɛ kɛɔ akɛ: “Ejaakɛ jalɔ gbeɔ shi shii kpawo ni eteɔ shi ekoŋŋ; shi efɔŋfeelɔi gbeɔ shi kwraa, kɛ́ amanehulu ba lɛ.”
6 Kɛ́ wɔnane tɔtɔ loo wɔgbee shi lɛ, wɔbaanyɛ wɔte shi ekoŋŋ, ejaakɛ Yehowa yeɔ ebuaa mɛi ni kɛ amɛhe fɔ̃ɔ enɔ lɛ kɛ́ amɛkɛ naagba ko kpe loo amɛtɔ̃. Wɔyɛ nɔmimaa akɛ ebaaye ebua wɔ ni ‘wɔte shi’ koni wɔnyɛ wɔya nɔ wɔjá lɛ. Kwɛ bɔ ni enɛ shɛjeɔ mɛi fɛɛ ni sumɔɔ Yehowa kɛ amɛtsui fɛɛ lɛ amii! Shi efɔŋfeelɔi lɛ sumɔɔɔ akɛ amɛteɔ shi kɛ́ amɛgbee shi. Amɛkpɛlɛɛɛ ni Nyɔŋmɔ kɛ emumɔ krɔŋkrɔŋ lɛ loo ewebii lɛ yeɔ ebuaa amɛ. Shi ‘mɛi ni sumɔɔ Yehowa mla lɛ,’ nɔ ko nɔ ko bɛ ni baanyɛ awo amɛnajiaŋ koni amɛje naanɔ wala he foidamɔ lɛ mli kwraa.—Nyɛkanea Lala 119:165.
7, 8. Kɛ́ mɔ ko tɛ ‘egbee shi’ lɛ, mɛni esa akɛ efee koni eya nɔ ená Nyɔŋmɔ hiɛ duromɔ?
7 Mɛi komɛi feɔ esha ni bɛ hiɛdɔɔ shi kome loo shii abɔ, yɛ gbɔjɔmɔ ko hewɔ. Shi kɛ́ be fɛɛ be lɛ ‘amɛteɔ shi,’ ni tsɔɔ akɛ amɛtsakeɔ amɛtsui ni amɛbɔɔ mɔdɛŋ amɛfeɔ nɔ ni ja lɛ, Yehowa baabu amɛ jalɔi. Wɔnaa enɛ he nɔkwɛmɔnɔ yɛ bɔ ni Nyɔŋmɔ kɛ blema Israelbii lɛ ye ha lɛ mli. (Yes. 41:9, 10) Yɛ nɔ najiaŋ ni Abɛi 24:16 lɛ ni atsɛ yisɛɛ kɛtsɔ hiɛ lɛ aaama tɔmɔ ni wɔtɔ̃ lɛ nɔ mi lɛ, egbalaa jwɛŋmɔ kɛyaa yelikɛbuamɔ ni mɔbɔnalɛ Nyɔŋmɔ lɛ kɛhaa wɔ koni ‘wɔte shi’ ekoŋŋ lɛ nɔ. (Nyɛkanea Yesaia 55:7.) Yehowa Nyɔŋmɔ kɛ Yesu Kristo yɛ hekɛnɔfɔɔ yɛ wɔmli akɛ wɔbaanyɛ ‘wɔte shi,’ ni amɛwoɔ wɔ hewalɛ ni wɔfee nakai.—Lala 86:5; Yoh. 5:19.
8 Yɛ gbɛ kakadaŋŋ foidamɔ mli lɛ, kɛ́ foidalɔ ko tɛ egbee shi po lɛ, eyɛ be ni ebaanyɛ ekɛte shi, ni eye ehe oyai kɛyagbe foidamɔ lɛ naa. Yɛ naanɔ wala he foidamɔ lɛ mli lɛ, wɔleee ‘gbi kɛ ŋmɛlɛtswaa’ nɔ ni foidamɔ lɛ baaba naagbee. (Mat. 24:36) Shi kɛ́ wɔbɔ mɔdɛŋ akɛ wɔhaŋ nɔ ko awo wɔnajiaŋ lɛ, wɔbaanyɛ wɔkɛ ekãa ada foi lɛ kɛyashi naagbee. Belɛ, mɛni esa akɛ wɔfee koni nɔ ko akawo wɔnajiaŋ?
NIBII NI BAANYƐ AWO WƆNAJIAŊ
9. Mɛɛ nibii enumɔ ni baanyɛ awo wɔnajiaŋ ahe wɔbaasusu?
9 Nyɛhaa wɔsusua nibii enumɔ komɛi ni baanyɛ awo wɔnajiaŋ lɛ ahe, nomɛi ji: wɔ diɛŋtsɛ wɔgbɔjɔmɔi, heloo lɛ akɔnɔi, beni aye wɔ sane fɔŋ yɛ asafo lɛ mli, amanehulu loo yiwaa, kɛ mɛi ni yɔɔ asafo lɛ mli lɛ afatɔi. Kɛ́ nɔ ko ewo onajiaŋ lɛ, kaimɔ akɛ, Yehowa toɔ etsui shi. Ebuŋ bo amrɔ nɔŋŋ akɛ mɔ ni yeee anɔkwa.
10, 11. Mɛɛ gbɔjɔmɔ David yɔɔ?
10 Wɔ diɛŋtsɛ wɔgbɔjɔmɔi lɛ tamɔ ŋmilitsa yɛ foidamɔ gbɛ nɔ. Maŋtsɛ David kɛ bɔfo Petro shihilɛi amli niiashikpamɔi baanyɛ aha wɔyɔse gbɔjɔmɔi nɛɛ ateŋ enyɔ—henɔyeli ni abɛ kɛ gbɔmɔ shemɔ.
11 Maŋtsɛ David eyanyɛɛɛ ehe nɔ eye, taakɛ eji yɛ ekɛ Batsheba sane lɛ mli lɛ. Ni beni Nabal sopa lɛ hu lɛ, shwɛ sharao ni eyatutua lɛ. Hɛɛ, eyanyɛɛɛ ehe nɔ eye moŋ, shi etee nɔ efee nibii ni ha esa Yehowa hiɛ. Mɛi krokomɛi ye amɛbua lɛ ni ‘ete shi’ ekoŋŋ beni etɔ̃ lɛ.—1 Sam. 25:5-13, 32, 33; 2 Sam. 12:1-13.
12. Yɛ nibii ni wo Petro najiaŋ lɛ fɛɛ sɛɛ, mɛɛ gbɛ nɔ etee nɔ eda foi lɛ?
12 Eyɛ mli akɛ gbɔmɔ shemɔ ná Petro nɔ hewalɛ, ni etɔ̃ shii abɔ moŋ, shi etee nɔ eye Yesu kɛ Yehowa fɛɛ anɔkwa. Akɛ nɔkwɛmɔnɔ lɛ, ekwa e-Nuŋtsɔ lɛ yɛ faŋŋ shii etɛ sɔŋŋ. (Luka 22:54-62) Sɛɛ mli lɛ, Petro eyafeee enii akɛ Kristofonyo, ni ekɛ Jeŋmajiaŋbii ni ebatsɔmɔ héyelilɔi lɛ ye oookɛɛ amɛbaa shi fe Yudafoi ni afolɔ amɛ ketia ni ebatsɔmɔ Kristofoi lɛ. Shi bɔfo Paulo na akɛ Petro nifeemɔ lɛ kɛ mligbalamɔ baanyɛ aba asafo lɛ mli. Nɔ ni Petro fee lɛ ejaaa. No hewɔ lɛ, Paulo kã ehiɛ koni sane nɛɛ akafite nyɛmimɛi lɛ ateŋ. (Gal. 2:11-14) Ani Petro mli fu ni ekpa naanɔ wala he foi lɛ damɔ? Dabi. Ekpɛlɛ Paulo ŋaawoo lɛ nɔ, etsake esu, ni etee nɔ eda foi lɛ.
13. Mɛɛ gbɛ nɔ gbɔmɔtsoŋ hewalɛnamɔ baanyɛ awo wɔnajiaŋ?
13 Bei komɛi lɛ, mɔ ko gbɔjɔmɔ ji hela. Enɛ hu baanyɛ awo wɔnajiaŋ. Ebaanyɛ esa hiɛdɔɔ ni wɔkɛdaa foi lɛ he, ni ebaanyɛ eha wɔkpa foidamɔ lɛ po. Akɛ nɔkwɛmɔnɔ lɛ, hela ko mɔ nyɛmi yoo ko ni yɔɔ Japan lɛ yɛ ebaptisimɔ sɛɛ afii 17. Ejwɛŋ hela lɛ he aahu akɛ eha ehe jɔ yɛ mumɔŋ. Sɛɛ mli lɛ, ekpa shiɛmɔ yaa. Asafoŋ onukpai enyɔ yasara lɛ. Yɛ hewalɛwoo ni amɛkɛha lɛ lɛ naa lɛ, ebɔi asafoŋ kpeei yaa ekoŋŋ. Nyɛmi yoo lɛ kɛɛ akɛ, “Bɔ ni nyɛmimɛi lɛ jɛ mlihilɛ mli amɛhere mi lɛ ha mihiŋmɛiiaŋ tɛo nu.” Amrɔ nɛɛ wɔnyɛmi yoo lɛ ebɔi foidamɔ lɛ ekoŋŋ.
14, 15. Mɛni esa akɛ wɔfee kɛji heloo akɔnɔi lɛ miika wɔ? Okɛ enɛ he nɔkwɛmɔnɔ aha.
14 Heloo lɛ akɔnɔi lɛ ewo mɛi pii anajiaŋ. Kɛ́ heloo akɔnɔi lɛ miika wɔ lɛ, esa akɛ wɔfee bɔ fɛɛ bɔ ni wɔɔnyɛ ni wɔha wɔsusumɔi kɛ wɔnifeemɔi ahe atse. Kaimɔ akɛ Yesu wo wɔ ŋaa akɛ, kɛ́ wɔhiŋmɛi loo wɔnine po miitɔtɔ wɔnane lɛ, ‘wɔshɛ wɔfɔ̃.’ Ani esaaa akɛ wɔshɛɔ jeŋba sha he susumɔi kɛ nifeemɔi ni baanyɛ aha wɔje foidamɔ lɛ mli lɛ wɔfɔ̃ɔ?—Nyɛkanea Mateo 5:29, 30.
15 Nyɛmi nuu ko ni atsɔse lɛ yɛ Kristofoi aweku mli lɛ wie akɛ, nɔ ko ni hao lɛ waa ji henumɔ ni enáa akɛ ekɛ nuu aná bɔlɛ lɛ. Ekɛɛ akɛ: “Minu he akɛ esoro mi. Ni mihe ejɔɔɔ mi kɛ́ miyɛ mɛi ateŋ.” Beni enáa afii 20 lɛ, etsɔ daa gbɛgbalɔ kɛ asafoŋ sɔɔlɔ yɛ esafo lɛ mli. Kɛkɛ ni trukaa lɛ, etɔ̃ tɔmɔ ko ni yɔɔ hiɛdɔɔ waa, asafoŋ onukpai lɛ jɛ Ŋmalɛ lɛ mli amɛtsɔse lɛ, ni amɛye amɛbua lɛ. Nɔ ni ye ebua lɛ ni ebɔi foidamɔ lɛ ekoŋŋ ji sɔlemɔ, Biblia lɛ kasemɔ, kɛ oti ni ekɛma ehiɛ akɛ ebaaye ebua mɛi krokomɛi lɛ. Afii komɛi asɛɛ lɛ, ekɛɛ akɛ: “Bei komɛi lɛ, mináa henumɔ gbonyo nɛɛ moŋ, shi mihaaa eye minɔ. Miyɔse akɛ Yehowa haŋ aka bo fe bɔ ni ooonyɛ. No hewɔ lɛ, miheɔ miyeɔ akɛ, Nyɔŋmɔ le akɛ manyɛ maye nɔ.” Nyɛmi nuu nɛɛ mu naa akɛ: “Mile akɛ maná mimɔdɛŋbɔɔ lɛ fɛɛ he sɛɛ yɛ jeŋ hee lɛ mli. Miisumɔ lɛ nakai! Maya nɔ mawu ta lɛ kɛyashi jeŋ hee lɛ baaba.” Etswa efai shi akɛ ejeŋ foidamɔ lɛ mli dɔŋŋ.
16, 17. (a) Mɛni ye ebua nyɛmi nuu ko ni susu akɛ aye lɛ sane fɔŋ lɛ? (b) Mɛni nɔ esa akɛ wɔkɛ wɔjwɛŋmɔ ama koni nɔ ko akawo wɔnajiaŋ?
16 Kɛ́ aye wɔ sane fɔŋ yɛ asafo lɛ mli lɛ, ebaanyɛ ewo wɔnajiaŋ. Nyɛmi nuu ko ni kulɛ eji asafoŋ onukpa yɛ France lɛ yasusu akɛ aye lɛ sane fɔŋ, ni emli fu. Enɛ hewɔ lɛ, efɔ̃ɔ asafoŋ kpeei yaa ni ekpa shiɛmɔ yaa. Asafoŋ onukpai enyɔ yasara lɛ ni amɛbo lɛ toi jogbaŋŋ, ni amɛfooo ewiemɔ lɛ mli beni ekɔlɔɔ esane lɛ. Amɛwo lɛ hewalɛ ni eshɛ ejatsu lɛ efɔ̃ Yehowa nɔ, ni amɛha ele akɛ nɔ ni he hiaa fe fɛɛ ji, ni esa Nyɔŋmɔ hiɛ. Ekpɛlɛ amɛŋaawoo lɛ nɔ, ni ebɔi foidamɔ lɛ ekoŋŋ.
17 Esa akɛ Kristofoi fɛɛ aha ehi amɛjwɛŋmɔŋ akɛ Yesu Kristo ji mɔ ni Nyɔŋmɔ ehala akɛ asafo lɛ Yitso, shi jeee adesa ko ni yeee emuu. Yesu, mɔ ni hiŋmɛii “tamɔ lalilɛi” lɛ, naa nɔ fɛɛ nɔ ni yaa nɔ lɛ, ni no hewɔ lɛ enaa nibii jogbaŋŋ fe bɔ ni wɔnaa lɛ. (Kpoj. 1:13-16) Akɛ nɔkwɛmɔnɔ lɛ, ele akɛ akɛni wɔleee sane ko mli jogbaŋŋ loo wɔnuuu shishi hewɔ lɛ, ekolɛ wɔbaasusu akɛ aye wɔ sane fɔŋ. Yesu baatsu asafo lɛ mli naagbai lɛ ahe nii yɛ be ni sa mli. No hewɔ lɛ, esaaa akɛ wɔhaa Kristofonyo ko nifeemɔ woɔ wɔnajiaŋ ni wɔjeɔ foidamɔ lɛ mli.
18. Te wɔɔfee tɛŋŋ wɔkpee jaramɔ shihilɛi anaa?
18 Nibii enyɔ krokomɛi ni baanyɛ awo wɔnajiaŋ ji amanehulu loo yiwaa, kɛ mɛi ni yɔɔ asafo lɛ mli lɛ afatɔi. Yɛ Yesu abɛbua ni kɔɔ nidulɔ lɛ he lɛ mli lɛ, ewie akɛ, ‘haomɔ loo yiwaa’ baanyɛ atɔtɔ mɔ ko nane. Kɛ́ yiwaa lɛ jɛ wekumɛi aŋɔɔ jio, nanemɛi aŋɔɔ jio, loo amralofoi aŋɔɔ jio lɛ, ebaanyɛ etɔtɔ mɔ ni ‘bɛ shishifã yɛ emli,’ ni ji mɔ ni he waa yɛ mumɔŋ lɛ nane. (Mat. 13:21) Shi kɛ́ wɔtswa wɔfai shi akɛ wɔshiŋ Yehowa masɛi lɛ, Maŋtsɛyeli dumɔwu lɛ baaye abua wɔ ni wɔná shishifãi ni baaha wɔhemɔkɛyeli lɛ mli awa. Kɛ́ okɛ jaramɔ shihilɛ kpe lɛ, bɔɔ mɔdɛŋ ni ojwɛŋ nibii ni sa yijiemɔ lɛ anɔ. (Nyɛkanea Filipibii 4:6-9.) Yehowa baawaje wɔ ni wɔkpee jaramɔ shihilɛi anaa koni amɛkawo wɔnajiaŋ.
19. Mɛni esa akɛ wɔfee koni mɔ ko nifeemɔ akawo wɔnajiaŋ?
19 Dɔlɛ sane ji akɛ, mɛi komɛi eha nyɛmimɛi komɛi afatɔi ewo amɛnajiaŋ ni amɛkpa foidamɔ lɛ. Kɛ́ mɔ ko fee nɔ ko ni kɛ wɔhenilee kpãaa gbee lɛ, ebaanyɛ ewo wɔnajiaŋ. (1 Kor. 8:12, 13) Kɛ́ mɔ ko tɔ̃ wɔnɔ lɛ, ani wɔmli baafu aahu akɛ wɔbaashi anɔkwale lɛ? Biblia lɛ kɛɔ wɔ akɛ wɔkpa mɛi akojomɔ, ni wɔkɛfa mɛi kɛ́ wɔsusuɔ akɛ wɔsane ja po. (Luka 6:37) Kɛ́ onu he akɛ atɔ̃ onɔ lɛ, bi ohe akɛ: ‘Ani midamɔɔ bɔ ni misumɔɔ ni mafee nii lɛ nɔ mikojoɔ mɛi? Ani maŋmɛ gbɛ ni mɔ ko fatɔɔ aha mashi anɔkwale lɛ?’ Suɔmɔ ni wɔyɔɔ kɛha Yehowa lɛ baanyɛ aye abua wɔ koni wɔkpɛ mli akɛ wɔhaŋ nɔ ko ni adesa ko baafee lɛ awo wɔnajiaŋ ni wɔkayatse kpãa lɛ.
OKƐ HIƐMIAMƆ ADA FOI LƐ—KAAHA NƆ KO MIIWO ONAJIAŊ
20, 21. Mɛni otswa ofai shi akɛ obaafee yɛ naanɔ wala he foidamɔ lɛ mli?
20 Ani otswa ofai shi akɛ ‘obaada foi lɛ kɛyagbe naa’? (2 Tim. 4:7, 8) Belɛ, esa akɛ ofee aŋkro nikasemɔ daa. Taomɔ nii amli kɛjɛ Biblia lɛ kɛ asafo lɛ woji lɛ amli, jwɛŋmɔ nibii ni okaseɔ lɛ anɔ, ni okadi nibii ni baanyɛ awo onajiaŋ lɛ. Kpa Yehowa fai ni eha bo emumɔ krɔŋkrɔŋ lɛ koni onyɛ ofi shi okɛ lɛ teŋ wekukpaa lɛ mli. Kaimɔ akɛ, kɛ́ otɛ ogbee shi lɛ, obaanyɛ ote shi ni otsa foidamɔ lɛ nɔ kɛyashi obaagbe naa. Wɔbaanyɛ wɔkase nii po kɛjɛ wɔtɔmɔi lɛ amli koni eye ebua wɔ ni wɔjo foi lɛ jogbaŋŋ.
21 Biblia lɛ tsɔɔ akɛ, kɛ́ wɔnine baashɛ juromɔnɔ ni ji naanɔ wala lɛ nɔ lɛ, ja wɔ diɛŋtsɛ wɔda foi lɛ kɛyagbe naa. Ebɛ lɛ tamɔ nɔ ni wɔta tsɔne mli ni wɔmiimɛ ni ekɛ wɔ ayashɛ he ni atseɔ kpãa lɛ yɛ lɛ. Beni wɔyaa nɔ wɔdaa wala he foi lɛ, Yehowa baaha wɔ “hejɔlɛ babaoo.” (Lala 119:165) Wɔyɛ nɔmimaa akɛ ebaaya nɔ eye ebua wɔ amrɔ nɛɛ, ni kɛ́ wɔgbe foidamɔ lɛ naa lɛ, ebaajɔɔ wɔ kɛya naanɔ hu.—Yak. 1:12.