Mɛni Wɔbaanyɛ Wɔkase Kɛjɛ Ojotswalɔ ko Dɛŋ?

Ojotswalɔ ni wɔbaanyɛ wɔkase ehe nii lɛ ji mɔ ni Yesu kɛ lɛ wieɔ yɛ mfoniri lɛ mli lɛ. Nakai ojotswalɔ lɛ shwa ehe yɛ nibii fɔji ni efee lɛ ahe. Ekɛɛ Yesu akɛ: “Kaimɔ mi, beni oooba yɛ omaŋtsɛyeli lɛ mli lɛ.” Ni taakɛ onaa yɛ mfoniri lɛ mli lɛ, Yesu kɛ ojotswalɔ lɛ miiwie. Ani ole nɔ ni Yesu kɛɔ lɛ lɛ?—a Yesu miiwo lɛ shi akɛ: ‘Lɛɛlɛŋ, miikɛɛ bo ŋmɛnɛ akɛ okɛ mi baahi Paradeiso.’

Te osusuɔ akɛ nakai Paradeiso lɛ baatamɔ aha tɛŋŋ?— Bɔni afee ni wɔná hetoo ni ja lɛ, ha wɔsusu Paradeiso ni Nyɔŋmɔ fee eha klɛŋklɛŋ nuu kɛ yoo ni ji Adam kɛ Hawa lɛ he wɔkwɛ. Nɛgbɛ nakai Paradeiso lɛ hi? Ani ehi ŋwɛi, aloo shikpɔŋ lɛ nɔ?—

Kɛ́ okɛɛ akɛ ehi shikpɔŋ lɛ nɔ lɛ osane ja. No hewɔ lɛ, kɛ́ wɔsusumɔ ji akɛ ojotswalɔ lɛ “baahi Paradeiso” lɛ, esa akɛ wɔsusu ehe akɛ ebaahi shikpɔŋ nɛɛ nɔ beni etsɔ Paradeiso lɛ. Te nakai Paradeiso lɛ baatamɔ aha tɛŋŋ?— Ha wɔkwɛ.

Beni Yehowa Nyɔŋmɔ bɔ klɛŋklɛŋ adesai enyɔ, ni ji Adam kɛ Hawa sɛɛ lɛ, Biblia lɛ tsɔɔ akɛ, ekɛ amɛwo paradeiso ko mli yɛ shikpɔŋ nɛɛ nɔ. Atsɛ lɛ akɛ “Eden abɔɔ.” Ani obaanyɛ ofee bɔ ni “Eden abɔɔ” lɛ mli yɔɔ fɛo ha lɛ he mfoniri okwɛ?— Lɛɛlɛŋ, eji shihilɛhe ko ni yɔɔ fɛo jogbaŋŋ ni mɔ ko kwraa enako eko pɛŋ ŋmɛnɛ!

Te osusuɔ tɛŋŋ? Ani Yesu kɛ ojotswalɔ ni shwa ehe lɛ fɛɛ baahi biɛ yɛ shikpɔŋ nɛɛ nɔ?— Dabi, Yesu baahi ŋwɛi ni ebaaye shikpɔŋ ni etsɔ Paradeiso lɛ nɔ akɛ Maŋtsɛ. No hewɔ lɛ, Yesu kɛ ojotswalɔ lɛ baahi shi kɛ shishinumɔ lɛ akɛ, ebaatee lɛ shi kɛba shikpɔŋ nɔ Paradeiso lɛ mli, ni ebaatsu ehiamɔ nii ahe nii. Shi mɛni hewɔ Yesu baaŋmɛ nuu ko ni ji ojotswalɔ lɛ gbɛ koni ehi Paradeiso lɛ?— Ha wɔsusu enɛ he.

Anɔkwa, ojotswalɔ nɛɛ fee nibii ni ehiii kwraa. Ni nakai nɔŋŋ hu eji yɛ gbɔmɛi akpekpei akpei abɔ ni ehi shikpɔŋ nɛɛ nɔ lɛ agbɛfaŋ. Kɛlɛ, amɛteaŋ mɛi babaoo fee nibii gbohii ejaakɛ atsɔɔɔ amɛ Yehowa he nii kɛ nɔ ni Yehowa taoɔ akɛ amɛfee.

No hewɔ lɛ, abaatee gbɔmɛi ni tamɔ nakai, ni ojotswalɔ ni Yesu kɛ lɛ wie yɛ sɛŋmɔtso lɛ nɔ lɛ fata he lɛ ashi kɛba wala mli yɛ Paradeiso mli yɛ shikpɔŋ nɛɛ nɔ. Abaatsɔɔ amɛ nɔ ni Nyɔŋmɔ suɔmɔnaa nii ji. Ni no sɛɛ lɛ, amɛbaanyɛ amɛtsɔɔ akɛ amɛsumɔɔ Yehowa.

Ani ole gbɛ nɔ ni amɛbaatsɔ amɛfee nakai?— Kɛtsɔ nɔ ni Nyɔŋmɔ taoɔ ni amɛbaafee lɛ nɔ. Kwɛ miishɛɛ ni ebaaji ákɛ akɛ gbɔmɛi ni sumɔɔ Yehowa, ni amɛsumɔɔ amɛhe hu lɛ baafee ekome kɛhi Paradeiso lɛ mli daa!