Wɔnifeemɔi Baanyɛ Adɔ Nyɔŋmɔ—​Bɔ ni Wɔbaafee Wɔha Ená Miishɛɛ

Ani mɔ ko efee bo nɔ ko pɛŋ ni edɔ bo aahu akɛ ofo?​—a Ekolɛ wɔ fɛɛ wɔkɛ eko ekpe pɛŋ. Shi bei komɛi lɛ, wɔfoɔ akɛni wɔwerɛ eho wɔhe lɛ hewɔ. Ekolɛ mɔ ko baawie nibii gbohii yɛ wɔhe ni jeee anɔkwale. Enɛ baanyɛ adɔ mɔ waa, aloo jeee nakai?​— Kɛ́ awie Nyɔŋmɔ he amalei lɛ, ebaanyɛ edɔ lɛ. Ha wɔsusu enɛ he ni wɔkwɛ bɔ ni wɔbaafee wɔha Nyɔŋmɔ aná miishɛɛ moŋ fe ni wɔbaafee nɔ ko ni baadɔ lɛ.

Biblia lɛ kɛɔ akɛ, mɛi komɛi ni kɛɛ amɛsumɔɔ Nyɔŋmɔ lɛ ‘fee lɛ nidɔɔnii.’ Hɛɛ, ‘amɛwo Nyɔŋmɔ mli la’! Belɛ ha wɔkwɛ nɔ hewɔ ni kɛ́ wɔfeee nibii ni Yehowa kɛɔ akɛ wɔfee lɛ edɔɔ lɛ lɛ.

Klɛŋklɛŋ mɛi enyɔ ni Yehowa bɔ yɛ shikpɔŋ nɔ lɛ fee nɔ ko ni ha edɔ lɛ waa diɛŋtsɛ. Akɛ mɛi enyɔ nɛɛ wo Paradeiso yɛ shikpɔŋ lɛ nɔ, atsɛɔ he ni akɛ amɛwo lɛ akɛ “Eden abɔɔ.” Namɛi ji mɛi enyɔ nɛɛ?​— Amɛji Adam kɛ Hawa; abɔ Adam sɛɛ mli dani abɔ Hawa. Ha wɔkwɛ nɔ ni amɛfee ni dɔ Yehowa waa lɛ.

Beni Yehowa kɛ amɛwo nakai abɔɔ lɛ mli sɛɛ lɛ, ekɛɛ amɛ akɛ amɛkwɛ nɔ. Kɛfata he lɛ, ekɛɛ amɛ akɛ amɛbaanyɛ amɛfɔ bii ni amɛ fɛɛ amɛhi abɔɔ lɛ mli ni amɛgbooo. Shi amɛbɔiko bii afɔmɔ ni naagba wulu ko ba. Ani ole naagba ni ba lɛ?​— Ŋwɛi bɔfo ko haaa Hawa abo Yehowa toi, ni sɛɛ mli lɛ Adam hu booo Yehowa toi. Ha wɔkwɛ bɔ ni fee ni ebalɛ nakai.

Bɔfo lɛ ha onufu ko kwa efee tamɔ eewie. Nɔ ni onufu lɛ wie lɛ ŋɔɔ Hawa naa​—onufu lɛ kɛɛ lɛ akɛ ebaatsɔ “tamɔ Nyɔŋmɔ.” No hewɔ lɛ, efee nɔ ni onufu lɛ kɛɛ lɛ akɛ efee lɛ. Ani ole nɔ ni Hawa fee?​—

Hawa ye tso yibii ni Yehowa kɛɛ Adam akɛ amɛkaye lɛ. Dani Nyɔŋmɔ baabɔ Hawa lɛ, no mli lɛ ekɛɛ Adam akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!”

Hawa le nakai mla lɛ. Kɛlɛ beni etee nɔ ekwɛ tso lɛ ni ena akɛ “tso lɛ hi ha yeli, ni efeɔ hiŋmɛii akɔnɔ lɛ . . . etse enɔ yibii lɛ eko ni eye.” Sɛɛ mli lɛ, eha Adam hu tso yibii lɛ eko “ni eye.” Mɛni osusuɔ akɛ no ha Adam fee nakai?​— Efee nakai ejaakɛ ebasumɔ Hawa kwraa fe bɔ ni esumɔɔ Yehowa. Ehala akɛ ebaasa Hawa hiɛ moŋ fe ni ebaasa Nyɔŋmɔ hiɛ. Shi Yehowa toi ni abaabo lɛ he hiaa kwraa fe ni abaabo mɔ kroko toi!

Ani okaiɔ onufu lɛ ni kɛ Hawa wie lɛ? Taakɛ bɔ ni mɔ ko baanyɛ eha tsobi loo koliko ko afee tamɔ eewie lɛ, nakai nɔŋŋ mɔ ko ha onufu lɛ kwa efee tamɔ eewie. Namɔ gbee no mli lɛ anuɔ yɛ onufu lɛ naa lɛ?​— “Blema onufu lɛ, ní atsɛɔ lɛ Abonsam loo Satan lɛ” gbee anu lɛ.

Ani ole nɔ ni obaafee ni oha Yehowa mii ashɛ ehe?​— No ji, bɔɔ mɔdɛŋ ni ofee nɔ ni esumɔɔ be fɛɛ be. Satan kɛɛ ebaanyɛ eha mɛi fɛɛ afee nɔ ni etaoɔ ni amɛfee. No hewɔ lɛ, Yehowa kɛɔ akɛ: “Mibi, feemɔ ohe nilelɔ, ní oha mitsui anyɔ mimli, ní maná hetoo maha mɔ ni bɔɔ mi ahora lɛ.” Satan bɔɔ Yehowa ahora loo eyeɔ Yehowa he fɛo. Ekɛɛ ebaanyɛ eha mɛi fɛɛ akpa Yehowa jamɔ. No hewɔ lɛ, bo Yehowa toi ni osɔmɔ lɛ koni oha emii ashɛ ehe! Ani obaabɔ mɔdɛŋ ni ofee nakai?​—