SANEBIMƆI NI BIBLIA LƐ EHA HETOO
Namɛi baaya ŋwɛi, ni mɛni hewɔ?
Mɛi akpekpei abɔ miikpa gbɛ akɛ kɛ́ amɛgbo lɛ, amɛbaaya ŋwɛi. Yesu wie akɛ, ebɔfoi loo ekaselɔi anɔkwafoi lɛ baahi jɛmɛ. Dani Yesu baagbo lɛ, ewo shi akɛ ebaasaa he ko eto amɛ yɛ eŋwɛi Tsɛ lɛ ŋɔɔ.—Kanemɔ Yohane 14:2.
Mɛni hewɔ esa akɛ atee mɛi komɛi ashi yɛ shikpɔŋ nɛɛ nɔ kɛya ŋwɛi? Mɛni amɛbaafee yɛ jɛi? Yesu kɛɛ ebɔfoi loo kaselɔi lɛ akɛ amɛbaaye nɔ akɛ maŋtsɛmɛi. Amɛbaaye shikpɔŋ lɛ nɔ.—Kanemɔ Luka 22:28-30; Kpojiemɔ 5:10.
Ani gbɔmɛi kpakpai fɛɛ yaa ŋwɛi?
Yɛ shikpɔji pii anɔ lɛ, mɛi fioo ko pɛ ji maŋtsɛmɛi. Akɛni Yesu baatee mɛi ashi koni amɛyahi ŋwɛi bɔni afee ni amɛnyɛ amɛye shikpɔŋ lɛ nɔ hewɔ lɛ, wɔbaakpa gbɛ akɛ mɛi fioo ko pɛ abaahala. (Luka 12:32) Biblia lɛ tsɔɔ mɛi abɔ ni kɛ Yesu baaye nɔ lɛ.—Kanemɔ Kpojiemɔ 14:1.
Yesu esaa hei eto yɛ ŋwɛi eha esɛɛnyiɛlɔi ateŋ mɛi komɛi. Ani ole nɔ ni amɛbaafee yɛ jɛmɛ?
Mɛi ni baaya ŋwɛi lɛ efeŋ mɛi pɛ ni abaajuro. Yesu Maŋtsɛyeli lɛ shishibii anɔkwafoi lɛ baaná naanɔ wala yɛ shikpɔŋ nɔ paradeiso ni akɛbaaba ekoŋŋ lɛ nɔ. (Yohane 3:16) Mɛi komɛi baaje nibii agbɛjianɔtoo ni yɔɔ amrɔ nɛɛ hiɛkpatamɔ lɛ mli kɛya Paradeiso. Abaatee mɛi komɛi hu shi kɛya jɛmɛ.—Kanemɔ Lala 37:29; Yohane 5:28, 29.