Nɔkwɛlɔi Kpawo, Lumɛi Kpaanyɔ—Bɔ Ni Amɛyeɔ Amɛbuaa Wɔ Ŋmɛnɛ

1. Mɛni hewɔ oti ni ma Arambii lɛ kɛ Israelbii lɛ ahiɛ lɛ yeŋ omanye lɛ?

AAAFEE afi 762 D.Ŋ.B. kɛmiimɔ afi 759 D.Ŋ.B. lɛ, Israel maŋtsɛ lɛ kɛ Aram maŋtsɛ lɛ fã ta amɛshi Yuda maŋtsɛyeli lɛ. Mɛni ji oti ni ma amɛhiɛ? Amɛmiitao amɛyatutua Yerusalem, ni amɛkpa Ahaz maŋtsɛ, ni amɛwo mɔ kroko ni jɛɛɛ Maŋtsɛ David wekutɔkpaa lɛ mli lɛ maŋtsɛ. (Yes. 7:5, 6) Kulɛ esa akɛ Israel maŋtsɛ lɛ ale akɛ nɔ ni amɛyaafee lɛ yeŋ omanye. Ejaakɛ Yehowa ewo shi akɛ, David seshibii lɛ pɛ baata E-maŋtsɛsɛi lɛ nɔ kɛya naanɔ, ni Nyɔŋmɔ wiemɔ ko ekako shi pɛŋ.—Yosh. 23:14; 2 Sam. 7:16.

2-4. Tsɔɔmɔ bɔ ni Yesaia 7:14, 16 lɛ ba mli (a) yɛ afi 700 D.Ŋ.B. afii lɛ amli (b) yɛ klɛŋklɛŋ afii 100 Ŋ.B.

² Beni ta lɛ je shishi lɛ, efee tamɔ nɔ ni Israelbii kɛ Arambii ni efee ekome lɛ miiye kunim. Yɛ ta kome pɛ mli lɛ, agbe Ahaz asraafoi 120,000 sɔŋŋ! Agbe Maaseia, ni ji “maŋtsɛ bi lɛ.” (2 Kron. 28:6, 7) Shi no mli lɛ, Yehowa miikwɛ nɔ ni yaa nɔ lɛ fɛɛ. Ekai shi ni ewo David lɛ; no hewɔ lɛ, ekɛ hewalɛwoo wiemɔi tsu gbalɔ Yesaia.

³ Yesaia wie akɛ: “Naa, oblayoo fro aaaná musu ni eeefɔ́ binuu, ni eeetsɛ́ egbɛ́i Imanuel. . . . Shi dani gbekɛ nuu lɛ aaale efɔŋ kwamɔ kɛ ekpakpa kɔmɔ lɛ, aaashi maŋtsɛmɛi enyɔ [Aram kɛ Israel] ní osheɔ amɛ gbeyei lɛ ashikpɔŋ lɛ afɔ̃ shi.” (Yes. 7:14, 16) Bei pii lɛ, akɛ gbalɛ nɛɛ klɛŋklɛŋ fã lɛ tsuɔ nii kɛkɔɔ Mesia lɛ fɔmɔ he, ni eja nakai. (Mat. 1:23) Shi akɛni beni shɛɔ klɛŋklɛŋ afii 100 Ŋ.B. lɛ, “maŋtsɛmɛi enyɔ” nɛɛ, ni ji Aram maŋtsɛ lɛ kɛ Israel maŋtsɛ lɛ eyatutuaaa Yuda hewɔ lɛ, eeenyɛ efee akɛ gbalɛ ni kɔɔ Imanuel he lɛ ba mli klɛŋklɛŋ kwraa yɛ Yesaia gbii lɛ amli.

⁴ Beni Yesaia wie nɛkɛ lɛ sɛɛ etsɛɛɛ lɛ, eŋa ná musu, ni efɔ binuu ni ewo lɛ Maher-shalal hash-baz. Eeenyɛ efee akɛ gbekɛ nuu nɛɛ ji “Imanuel” ni Yesaia tsĩ etã lɛ.a Yɛ blema lɛ, kɛ́ afɔ abifao lɛ, abaanyɛ aha lɛ gbɛ́i ko ni baaha akai nifeemɔ krɛdɛɛ ko ni tee nɔ yɛ nakai beaŋ, shi ekolɛ efɔlɔi kɛ ewekumɛi kɛ gbɛ́i kroko baatsɛ lɛ. (2 Sam. 12:24, 25) Wɔnyɛŋ wɔkɛɛ kɛ nɔmimaa akɛ akɛ gbɛ́i Imanuel lɛ tsɛ Yesu.—Nyɛkanea Yesaia 7:14; 8:3, 4.

5. Mɛɛ yiŋ ni nilee bɛ mli Maŋtsɛ Ahaz kpɛ?

⁵ Beni Israel kɛ Aram ejie amɛhiɛ amɛka Yuda lɛ, Ashur hu miito ni eyatutua amɛ, kɛ Yuda kɛ maji krokomɛi ni bɔle amɛ lɛ. Nakai beaŋ lɛ, Ashur miihe atsɔ jeŋ hewalɛ. Yesaia 8:3, 4 lɛ tsɔɔ akɛ, Ashur “aaaloo Damasko nii lɛ” kɛ “Samaria nomŋɔɔ nii lɛ” dani ebaayatutua Yuda, ni ji wuoyigbɛ maŋtsɛyeli lɛ. Yɛ nɔ najiaŋ ni Ahaz kɛ ehe aaafɔ̃ Nyɔŋmɔ wiemɔ ni ekɛtsɔ Yesaia nɔ lɛ nɔ lɛ, hemɔkɛyeli ni ebɛ lɛ ha ekɛ Ashur yafee kpaŋmɔ, ni no ha sɛɛ mli lɛ Ashur ye amɛnɔ dɛŋdɛŋ. (2 Maŋ. 16:7-10) Ahaz eyabɔɔɔ mɔdɛŋ yɛ enitsumɔ akɛ Yudabii lɛ ahiɛnyiɛlɔ, loo tookwɛlɔ lɛ mli kwraa! Wɔbaanyɛ wɔbi wɔhe akɛ, ‘Kɛ́ ehe bahia ni makpɛ yiŋ ko ni he hiaa lɛ, namɔ nɔ mikɛ mihe fɔ̃ɔ, Nyɔŋmɔ aloo gbɔmɛi?’—Abɛi 3:5, 6.

TOOKWƐLƆ KROKO BATSAKE NIBII AHIƐ

6. Mɛɛ gbɛ nɔ esoro Hezekia yɛ Ahaz he?

⁶ Ahaz gbo yɛ afi 746 D.Ŋ.B., ni ebinuu Hezekia baye esɛɛ, shi nakai beaŋ lɛ, Yudabii lɛ miiye ohia waa, ni amɛkpa Yehowa jamɔ. Akɛ maŋtsɛ ni edako lɛ, mɛni ji nɔ klɛŋklɛŋ ni Hezekia baafee? Ani ebaabɔ mɔdɛŋ ni eha maŋ lɛ aná nii ekoŋŋ? Dabi. Hezekia sumɔɔ Yehowa waa, ni eji tookwɛlɔ kpakpa kɛha maŋ lɛ hu. Nɔ klɛŋklɛŋ ni efee ji akɛ, esaa eto anɔkwa jamɔ shishi, ni eye ebua emaŋbii lɛ ni amɛsaa amɛ kɛ Yehowa teŋ ekoŋŋ. Beni ená ele nɔ ni Nyɔŋmɔ taoɔ ni efee lɛ, etsu he nii oya nɔŋŋ. Enɛ ji nɔkwɛmɔnɔ ni sa jogbaŋŋ kɛha wɔ!—2 Kron. 29:1-19.

7. Mɛni hewɔ maŋtsɛ hee lɛ wo shi akɛ ebaafĩ Levibii lɛ asɛɛ lɛ?

⁷ Eji Levibii lɛ asɔ̃ akɛ amɛye amɛbua kɛto anɔkwa jamɔ shishi ekoŋŋ. No hewɔ lɛ, Hezekia kɛ amɛkpe, ni ewo amɛ shi akɛ ebaafĩ amɛsɛɛ. Beni Levibii anɔkwafoi lɛ tee nakai kpee lɛ, eeenyɛ efee akɛ beni maŋtsɛ lɛ kɛɛ amɛ akɛ: “Yehowa ehala nyɛ ní nyɛdamɔ ehiɛ ní nyɛsɔmɔ lɛ” lɛ, amɛmii shɛ amɛhe aahu akɛ amɛhiŋmɛiiaŋ kpala nu. (2 Kron. 29:11) Afã Levibii lɛ ni amɛye amɛbua maŋbii lɛ yɛ anɔkwa Nyɔŋmɔ lɛ jamɔ mli!

8. Mɛɛ nibii krokomɛi Hezekia fee kɛye ebua emaŋbii lɛ koni amɛsɔmɔ Yehowa ekoŋŋ, ni mɛni jɛ mli kɛba?

⁸ Hezekia fɔ̃ Yudabii kɛ Israelbii lɛ fɛɛ nine kɛha Hehoo gbijurɔyeli wulu ko, ni no sɛɛ lɛ amɛye Asesei Agbi Jurɔ ni heɔ gbii kpawo lɛ. Amɛná miishɛɛ aahu akɛ, asaa akɛ gbii kpawo fata he. Biblia lɛ bɔ amaniɛ akɛ: “Anya babaoo yɛ Yerusalem; ejaakɛ kɛjɛ Salomo, David bi ní ji Israel maŋtsɛ lɛ, yinɔ lɛ, anako eko ní tamɔ no yɛ Yerusalem dã.” (2 Kron. 30:25, 26) Gbijurɔyeli nɛɛ wo maŋbii lɛ hewalɛ waa! Abɔ amaniɛ yɛ 2 Kronika 31:1 lɛ akɛ: “Beni agbe enɛ fɛɛ naa lɛ, . . . amɛyakumɔ amagai lɛ, ni amɛgba wɔŋ kooi lɛ, ni amɛjwara hei grɔŋŋi lɛ kɛ afɔleshaa latɛi lɛ.” Yudabii lɛ ku amɛsɛɛ kɛba Yehowa ŋɔɔ ekoŋŋ. Enɛ waje amɛ kɛha jaramɔ shihilɛi ni etsɛŋ ni amɛkɛbaakpe lɛ.

MAŊTSƐ LƐ KƐ EHE FƆ̃ YEHOWA NƆ

9. (a) Mɛɛ gbɛ nɔ yiŋ ni Israelbii lɛ to lɛ fee yaka? (b) Mɛɛ omanye Sanherib ye yɛ shishijee mli yɛ Yuda?

⁹ Taakɛ Yesaia gba lɛ, Ashurbii lɛ ye Israel kooyigbɛ maŋtsɛyeli lɛ nɔ, ni amɛŋɔ amɛ nom, ni no ha yiŋ ni Israel kooyigbɛ maŋtsɛyeli lɛ to akɛ ebaawo mɔ ko ni jɛɛɛ David weku lɛ mli maŋtsɛ yɛ Yuda lɛ fee yaka. Shi mɛni Ashurbii lɛ hu to akɛ amɛbaafee Yuda? Amɛto akɛ amɛbaayatutua Yuda. Biblia lɛ kɛɔ akɛ: “Maŋtsɛ Hezekia yinɔ afi ni ji nyɔŋma kɛ ejwɛ lɛ nɔ lɛ Sanherib, Ashur maŋtsɛ lɛ, fã batua Yuda maji ni atswa gbogboi awo he lɛ fɛɛ ni eŋɔ amɛ.” Sanherib ye Yuda maji 46 nɔ kunim. Eji oyɛ Yerusalem beni Ashur asraafoi lɛ butuɔ Yuda maji lɛ ekomekomei, ni eshwɛ fioo ni amɛbaashɛ Yerusalem lɛ kulɛ, te obaanu he oha tɛŋŋ?—2 Maŋ. 18:13.

10. Mɛni hewɔ Mika 5:4, 5 lɛ waje Hezekia lɛ?

¹⁰ Anɔkwa, Hezekia le oshara ni baa lɛ, shi yɛ nɔ najiaŋ ni etsui aaafã ni eyatao yelikɛbuamɔ kɛjɛ maŋ ko ni jáaa Yehowa dɛŋ taakɛ etsɛ Ahaz ní kpa yɛ Yehowa sɛɛ lɛ fee lɛ, Hezekia kɛ ehe fɔ̃ Yehowa nɔ. (2 Kron. 28:20, 21) Ekolɛ ele nɔ ni eyinɔbii lɛ ateŋ mɔ kome ni ji gbalɔ Mika, gba yɛ Ashur he lɛ. Egba akɛ: ‘Ashur lɛ, wɔɔtée nɔkwɛlɔi kpawo, hɛɛ, lumɛi kpaanyɔ shi wɔwo lɛ. Ni amɛkɛ klante aaalɛ Ashur shikpɔŋ lɛ.’ (Mika 5:4, 5) Ekã shi faŋŋ akɛ wiemɔi ni ajɛ mumɔŋ aŋma nɛɛ waje Hezekia waa, ejaakɛ no ha ena akɛ Yehowa baatee ta srɔto ko shi ewo Ashurbii lɛ, ni ebaakpata amɛhiɛ.

11. Mɛɛ be gbalɛ ni kɔɔ nɔkwɛlɔi kpawo kɛ lumɛi kpaanyɔ lɛ he lɛ baaba mli yɛ gbɛ ni he hiaa waa nɔ?

¹¹ Gbalɛ ni kɔɔ nɔkwɛlɔi kpawo kɛ lumɛi kpaanyɔ lɛ he lɛ baaba mli yɛ gbɛ ni he hiaa waa nɔ yɛ Yesu, “mɔ ni ekpojeei jɛ blema beebe” lɛ fɔmɔ sɛɛ kwraa. (Nyɛkanea Mika 4:14–5:1.) Enɛ baaba mli beni ŋmɛnɛŋmɛnɛ beaŋ “Ashur” baabatutua Yehowa tsuji lɛ. Mɛɛ tabilɔi anɔ Yehowa baatsɔ e-Bi ni yeɔ maŋtsɛ amrɔ nɛɛ nɔ ekɛ amɛ atsu nii kɛkpata henyɛlɔ nɛɛ hiɛ? Wɔbaana yɛ sɛɛ mli. Shi klɛŋklɛŋ lɛ, nyɛhaa wɔkwɛa nɔ ni wɔbaanyɛ wɔkase kɛjɛ nɔ ni Hezekia fee beni Ashurbii lɛ batutua lɛ lɛ mli.

HEZEKIA FEE ENII YƐ NILEE MLI

12. Mɛni Hezekia kɛ mɛi ni fata ehe lɛ fee kɛbu Nyɔŋmɔ webii lɛ ahe?

¹² Yehowa efee klalo be fɛɛ be akɛ ebaatsu naagbai ni wɔnyɛɛɛ wɔtsu he nii lɛ ahe nii eha wɔ, shi eekpa gbɛ akɛ wɔbaafee nɔ fɛɛ nɔ ni wɔbaanyɛ yɛ naagbai lɛ ahe. Hezekia kɛ “enukpai lɛ kɛ ehii kãkãlɔi lɛ” tee ajina, ni amɛkpɛ mli akɛ amɛbaatsimɔ “nu bui ní yɔɔ maŋ lɛ hewɔ lɛ ahiŋmɛii; . . . Ni [Hezekia ná] ekãa, ni esaa gbogboi ní ekumɔ lɛ fɛɛ, ni eha kwɔ kɛshɛ mɔji ní kwɔlɔ lɛ ahe, ni etswa gbogbo kroko hu ewo maŋ lɛ he, . . . ni efee tawuu nii kɛ tsɛ̃ŋi babaoo.” (2 Kron. 32:3-5) Yehowa kɛ Hezekia, enukpai lɛ, kɛ gbalɔi anɔkwafoi lɛ tsu nii kɛbu ewebii lɛ ahe, ni ekwɛ amɛnɔ.

13. Mɛni ji nɔ ni he hiaa fe fɛɛ ni Hezekia fee kɛsaa emaŋbii lɛ eto tutuamɔ ni Ashurbii lɛ baaba abatutua amɛ lɛ? Tsɔɔmɔ mli.

¹³ Nɔ ni Hezekia fee yɛ enɛ sɛɛ lɛ he miihia po fe nui lɛ ahiŋmɛii ni etsimɔ kɛ maŋtiase lɛ gbogboi lɛ ni esaa lɛ. Akɛni Hezekia ji tookwɛlɔ kpakpa hewɔ lɛ, ebua maŋbii lɛ anaa, ni ewo amɛ hewalɛ akɛ: “Nyɛkashea gbeyei ni nyɛtsui akafãa yɛ Ashur maŋtsɛ . . . lɛ hewɔ! Shi mɔ ni kɛ wɔ yɔɔ lɛ da fe mɔ ni kɛ lɛ yɔɔ lɛ: Lɛ lɛ heloo nine kɛ lɛ yɔɔ lɛ; shi wɔ lɛ, Yehowa, wɔ-Nyɔŋmɔ lɛ, kɛ wɔ yɔɔ, koni eye ebua wɔ, ní ewu wɔtai eha wɔ!” Kwɛ bɔ ni wiemɔi nɛɛ baawaje amɛ eha—Yehowa baawu eha ewebii lɛ! Beni Yudabii lɛ nu wiemɔi nɛɛ, “maŋ lɛ ŋɔ amɛhiɛ amɛfɔ̃ Yuda maŋtsɛ Hezekia wiemɔi lɛ anɔ.” Kadimɔ akɛ, “Hezekia wiemɔi lɛ” ji nɔ ni waje maŋbii lɛ. Lɛ kɛ enukpai lɛ kɛ hii kãkãlɔi lɛ, kɛ agbɛnɛ gbalɔ Mika kɛ gbalɔ Yesaia fɛɛ ha ana akɛ amɛji tookwɛlɔi kpakpai taakɛ Yehowa etsɔ egbalɔ lɛ nɔ egba lɛ.—2 Kron. 32:7, 8; nyɛkanea Mika 5:4, 5.

14. Mɛni Rabshake kɛɛ, ni te maŋbii lɛ fee amɛnii amɛha tɛŋŋ?

¹⁴ Ashur maŋtsɛ lɛ kɛ etabilɔi lɛ yabɔ nsara yɛ Lakish, yɛ Yerusalem wuoyi-anaigbɛ. Ejɛ jɛmɛ etsu mɛi etɛ kɛtee Yerusalem koni amɛyakɛɛ amɛ ni amɛŋmɛɛ amɛhe amɛha Ashurbii lɛ. Enaawielɔ ni ale lɛ akɛ Rabshake lɛ kɛ Yerusalembii lɛ wie yɛ amɛ diɛŋtsɛ amɛwiemɔ ni ji Hebri lɛ mli. Klɛŋklɛŋ lɛ, ewo maŋbii lɛ ayiŋ ni amɛkabo Hezekia toi, shi moŋ lɛ, amɛbo Ashurbii lɛ atoi. No sɛɛ lɛ, elaka amɛ akɛ ekɛ amɛ baaya shikpɔŋ ko ni amɛbaaná hejɔlɛ babaoo yɛ nɔ lɛ nɔ. (Nyɛkanea 2 Maŋtsɛmɛi 18:31, 32.) Rabshake kɛshi sɛɛ akɛ, taakɛ jeŋmaji lɛ anyɔŋmɔi lɛ nyɛɛɛ ajie amɛmaji lɛ kɛjɛ Ashurbii lɛ adɛŋ lɛ, nakai nɔŋŋ Yehowa hu nyɛŋ ejie Yudabii lɛ kɛjɛ Ashurbii lɛ adɛŋ. Yudabii lɛ ejieee mpoatswai nɛɛ ekome folo po naa, ni nakai nɔŋŋ bei pii lɛ, Yehowa tsuji ni yɔɔ ŋmɛnɛ lɛ hu feɔ.—Nyɛkanea 2 Maŋtsɛmɛi 18:35, 36.

15. Mɛni ehe bahia ni Yerusalembii lɛ afee, ni mɛɛ gbɛ nɔ Yehowa tsɔ ehere amɛyiwala?

¹⁵ Eyɛ mli akɛ sane nɛɛ hao Hezekia moŋ, shi yɛ nɔ najiaŋ ni ebaayatao yelikɛbuamɔ kɛjɛ jeŋ hewalɛ ko dɛŋ lɛ, etsu ni ayatsɛ gbalɔ Yesaia kɛba. Yesaia kɛɛ Hezekia akɛ: “[Sanherib baŋ] maŋ nɛŋ ni etsɛ̃ŋ gãi ko kɛbaŋ mli.” (2 Maŋ. 19:32) Nɔ pɛ ni ehe bahia ni Yerusalembii lɛ afee ji akɛ, amɛfee ekãa, ni amɛnijiaŋ akaje wui. Yehowa baawu eha amɛ. Ni efee nakai hu! Biblia lɛ bɔ amaniɛ akɛ: “Eba mli akɛ nakai nyɔɔŋ lɛŋ nɔŋŋ lɛ Yehowa bɔfo lɛ je kpo tee ni eyagbe Ashur nsara lɛŋ mɛi akpei oha kɛ nyɔŋmai kpaanyɔ kɛ enumɔ.” (2 Maŋ. 19:35) Jeee nui lɛ ahiŋmɛii ni Hezekia tsimɔ kɛ maŋtiase lɛ gbogboi lɛ ni esaa lɛ nɔ atsɔ ahere Yudabii lɛ ayiwala, shi moŋ atsɔ Yehowa hewalɛ nɔ.

NƆ NI WƆKASEƆ KƐJƐƆ MLI ŊMƐNƐ

16. Namɛi ahe mfoniri (a) Yerusalembii lɛ (b) “Ashur” (d) nɔkwɛlɔi kpawo kɛ lumɛi kpaanyɔ lɛ feɔ ŋmɛnɛ?

¹⁶ Gbalɛ ni kɔɔ nɔkwɛlɔi kpawo kɛ lumɛi kpaanyɔ lɛ he lɛ baaba mli yɛ gbɛ ni he hiaa waa nɔ yɛ wɔbe nɛɛ mli. Yɛ blema lɛ, Ashurbii lɛ yatutua Yerusalembii lɛ. Etsɛŋ, ŋmɛnɛŋmɛnɛ beaŋ “Ashur” baatutua Yehowa webii, ní etamɔ nɔ ni amɛbɛ hebuu ko lɛ, kɛjwɛŋmɔ lɛ akɛ amɛbaabule amɛshishi kwraa. Biblia lɛ wieɔ tutuamɔ nɛɛ kɛ nɔ ni “Gog ní yɔɔ Magog shikpɔŋ lɛ nɔ” lɛ kɛbaaba lɛ, nɔ ni “kooyigbɛ maŋtsɛ” lɛ kɛbaaba lɛ, kɛ nɔ ni “shikpɔŋ lɛ nɔ maŋtsɛmɛi lɛ” kɛbaaba lɛ fɛɛ he. (Ezek. 38:2, 10-13; Dan. 11:40, 44, 45; Kpoj. 17:14; 19:19) Ani esoro tutuamɔi nɛɛ eko fɛɛ eko? Wɔleee. Eeenyɛ efee akɛ Biblia lɛ kɛ gbɛ́i srɔtoi miitsu nii kɛha tutuamɔ kome too lɛ nɔŋŋ. Mɛɛ tabilɔi Mika gbalɛ lɛ haa wɔnaa akɛ Yehowa baatsɔ amɛnɔ ekɛ henyɛlɔ ni yitsoŋ wa, ni atsɛɔ lɛ “Ashur” lɛ awu? Tabilɔi ni yɔɔ srɔto kwraa—‘nɔkwɛlɔi kpawo, hɛɛ, lumɛi kpaanyɔ’! (Mika 5:4) Nɔkwɛlɔi kɛ lumɛi nɛɛ ji asafoŋ onukpai lɛ. (1 Pet. 5:2) Ŋmɛnɛ lɛ, Yehowa miitsɔ asafoŋ onukpai anɔkwafoi babaoo ni yɔɔ esafo lɛ mli lɛ anɔ eekwɛ etooi lɛ, ni eetsɔ amɛnɔ eewaje ewebii lɛ kɛha tutuamɔ ni ŋmɛnɛŋmɛnɛ beaŋ “Ashur” kɛbaaba amɛnɔ wɔsɛɛ lɛ.b Mika gbalɛ lɛ tsɔɔ akɛ, “amɛkɛ klante aaalɛ Ashur shikpɔŋ lɛ.” (Mika 5:5) ‘Amɛtawu nii’ lɛ ateŋ ekome ji, “mumɔŋ klante,” ni ji Nyɔŋmɔ Wiemɔ lɛ.—2 Kor. 10:4; Efe. 6:17.

17. Mɛɛ nibii ejwɛ komɛi asafoŋ onukpai baanyɛ akase kɛjɛ sane ni wɔsusu he nɛɛ mli?

¹⁷ Asafoŋ onukpai, nyɛbaanyɛ nyɛkase nibii komɛi ni he hiaa waa kɛjɛ nɔ ni wɔsusu he nɛɛ mli: (1) Nɔ ni fe fɛɛ ni wɔbaanyɛ wɔfee kɛsaa wɔhe kɛha tutuamɔ ni “Ashur” kɛbaaba lɛ ji, ni wɔwaje hemɔkɛyeli ni wɔyɔɔ yɛ Nyɔŋmɔ mli lɛ, ni wɔye wɔbua mɛi krokomɛi ni amɛ hu amɛfee nakai. (2) Kɛ́ “Ashur” ba ebatutua wɔ lɛ, esa akɛ asafoŋ onukpai lɛ aná nɔmimaa ni mli wa akɛ Yehowa baakpɔ̃ wɔ. (3) Kɛ́ nakai be lɛ shɛ lɛ, gbɛtsɔɔmɔ ni Yehowa asafo lɛ kɛhaa wɔ lɛ baafee tamɔ nɔ ni nilee bɛ mli yɛ adesai asusumɔ naa. Esa akɛ wɔ fɛɛ wɔfee klalo akɛ wɔbaabo gbɛtsɔɔmɔi fɛɛ ni wɔnine baashɛ nɔ lɛ atoi, kɛ́ wɔnuɔ shishi jio, wɔnuuu shishi jio, ejaakɛ nakai feemɔ baahere wɔyiwala. (4) Amrɔ nɛɛ ji be ni esa akɛ mɔ fɛɛ mɔ ni kɛ ehe fɔ̃ɔ je lɛŋ wolokasemɔ, heloonaa nibii, loo adesai agbɛjianɔtoi anɔ lɛ atsake esusumɔ. Esa akɛ asafoŋ onukpai lɛ aye abua mɔ fɛɛ mɔ ni amrɔ nɛɛ ebɛ hemɔkɛyeli ni mli wa yɛ Yehowa mli lɛ.

18. Kɛ́ wɔjwɛŋ sane ni wɔsusu he nɛɛ nɔ lɛ, te ebaaye ebua wɔ tɛŋŋ wɔsɛɛ?

¹⁸ Be baashɛ ni ebaafee tamɔ nɔ ni wɔbɛ hebuu ko kwraa taakɛ eba lɛ yɛ Yerusalembii lɛ agbɛfaŋ yɛ Hezekia beaŋ lɛ. Kɛ́ nakai be lɛ shɛ lɛ, nyɛhaa wɔ fɛɛ wɔhaa Hezekia wiemɔi lɛ awajea wɔ. Nyɛhaa wɔkaia akɛ, wɔhenyɛlɔi lɛ, ‘heloo nine kɛ amɛ yɔɔ; shi wɔ lɛ, Yehowa, wɔ-Nyɔŋmɔ lɛ, kɛ wɔ yɔɔ, koni eye ebua wɔ, ní ewu wɔtai eha wɔ!’—2 Kron. 32:8.