Sanebimɔi ni Jɛ Kanelɔi Adɛŋ

Te afeɔ tɛŋŋ aholeɔ asafoŋ onukpai kɛ asafoŋ sɔɔlɔi yɛ asafo fɛɛ asafo mli?

▪ Bɔfo Paulo kɛɛ asafoŋ onukpai ni sɔmɔ yɛ Efeso asafo lɛ mli yɛ klɛŋklɛŋ afii 100 Ŋ.B. lɛ akɛ: “Nyɛhiɛ ahia nyɛ diɛŋtsɛ nyɛhe kɛ tooku lɛ fɛɛ nɔ, mɛi ateŋ ni mumɔ krɔŋkrɔŋ lɛ ehole nyɛ nɔkwɛlɔi yɛ lɛ, koni nyɛkwɛ Nyɔŋmɔ asafo lɛ ní ekɛ lɛ diɛŋtsɛ e-Bi lɛ lá hé lɛ tamɔ tookwɛlɔi feɔ lɛ.” (Bɔf. 20:28, NW) Ŋmɛnɛ lɛ, mɛɛ gbɛ nɔ mumɔ krɔŋkrɔŋ lɛ yeɔ ebuaa kɛholeɔ asafoŋ onukpai kɛ asafoŋ sɔɔlɔi?

Klɛŋklɛŋ lɛ, mumɔ krɔŋkrɔŋ lɛ ji nɔ ni tsirɛ mɛi ni ŋma Biblia lɛ ni amɛŋmala taomɔ nii ni esa akɛ mɔ ko ashɛ he dani ahã esɔmɔ akɛ asafoŋ onukpa loo asafoŋ sɔɔlɔ. Atsɔɔ taomɔ nii 16 sɔŋŋ yɛ 1 Timoteo 3:1-7 ní esa akɛ mɔ ko ashɛ he dani ahã esɔmɔ akɛ asafoŋ onukpa. Taomɔ nii krokomɛi hu yɛ Tito 1:5-9 kɛ Yakobo 3:17, 18 lɛ. Atsɔɔ taomɔ nii ni esa akɛ mɔ ko ashɛ he dani ahã esɔmɔ akɛ asafoŋ sɔɔlɔ lɛ hu yɛ 1 Timoteo 3:8-10, 12, 13 lɛ. Nɔ ni ji enyɔ lɛ, mɛi ni jieɔ mɛi ayi koni ahole amɛ akɛ asafoŋ sɔɔlɔi loo asafoŋ onukpai lɛ sɔleɔ kɛbiɔ Yehowa mumɔ lɛ gbɛtsɔɔmɔ be ni amɛkwɛɔ kɛji nyɛmi nuu ko shɛɔ Ŋmalɛ naa taomɔ nii nɛɛ ahe bɔ ni sa lɛ. Nɔ ni ji etɛ lɛ, esa akɛ nyɛmi nuu ni ajieɔ eyi kɛhã sɔɔmɔ hegbɛ lɛ afee mɔ ko ni jieɔ Nyɔŋmɔ mumɔ krɔŋkrɔŋ lɛ yibii lɛ kpo yɛ eshihilɛ mli. (Gal. 5:22, 23) No hewɔ lɛ, Nyɔŋmɔ mumɔ krɔŋkrɔŋ lɛ yeɔ ebuaa kɛholeɔ asafoŋ onukpai kɛ asafoŋ sɔɔlɔi lɛɛlɛŋ.

Shi namɔ tuuntu holeɔ nyɛmimɛi hii nɛɛ akɛ asafoŋ onukpai kɛ asafoŋ sɔɔlɔi? Tsutsu ko lɛ, akɛ mɛi ni ajie amɛyi koni ahole amɛ akɛ asafoŋ onukpai kɛ asafoŋ sɔɔlɔi lɛ ahe saji majeɔ nitsumɔhe nine lɛ. Nyɛmimɛi hii ni Gbɛtsɔɔmɔ Kuu lɛ ehala lɛ baakwɛ yijiemɔ he saji nɛɛ amli yɛ jɛmɛ, ni mɛi ni sa lɛ, amɛbaahole amɛ. No sɛɛ lɛ, nitsumɔhe nine lɛ baahã onukpai akuu lɛ ale mɛi ni ahole lɛ. Kɛkɛ lɛ, asafoŋ onukpai lɛ hu ehã mɛi ni ahole lɛ ele. Asafoŋ onukpai lɛ baabi amɛteŋ mɔ fɛɛ mɔ kɛji eesumɔ ni esɔmɔ, ni enuɔ he akɛ ebaanyɛ esɔmɔ. Naagbee kwraa lɛ, abaatswa he adafi yɛ asafo lɛ mli.

Shi yɛ klɛŋklɛŋ afii 100 lɛ mli lɛ, te aholeɔ asafoŋ onukpai kɛ asafoŋ sɔɔlɔi ahãa tɛŋŋ? Bei komɛi lɛ, bɔfoi lɛ diɛŋtsɛ ni holeɔ mɛi kɛhã nitsumɔi pɔtɛi komɛi. Akɛ nɔkwɛmɔnɔ lɛ, be ni ehe bahia ni aná mɛi ni baakwɛ niyenii jaa lɛ nɔ lɛ, bɔfoi lɛ diɛŋtsɛ ni hala hii kpawo ní atu nakai nitsumɔ lɛ awo amɛdɛŋ lɛ. (Bɔf. 6:1-6) Shi eeenyɛ efee akɛ, nakai beaŋ lɛ, hii nɛɛ miisɔmɔ akɛ asafoŋ onukpai momo dani akɛ nitsumɔ kroko nɛɛ wo amɛdɛŋ.

Eyɛ mli akɛ Ŋmalɛ lɛ etsɔɔɔ gbɛ ni atsɔ nɔ ahole mɛi ní akɛ nitsumɔ wo amɛdɛŋ yɛ klɛŋklɛŋ afii 100 lɛ mli lɛ mli fitsofitso moŋ, shi ewieɔ nibii komɛi ni hãa wɔnaa bɔ ni atsu enɛ he nii ahã. Biblia lɛ kɛɔ akɛ, be ni Paulo kɛ Barnaba kuɔ amɛsɛɛ kɛjɛɔ amɛ-klɛŋklɛŋ maŋsɛɛ sɔɔmɔ lɛ mli lɛ, “amɛhole onukpai amɛhã amɛ yɛ asafo fɛɛ asafo mli, ni amɛsɔle ni amɛhi ŋmaa, ni amɛtu amɛ amɛwo Yehowa, mɔ ni amɛhe enɔ amɛye lɛ dɛŋ.” (Bɔf. 14:23, NW) Afii komɛi asɛɛ lɛ, Paulo ŋma Tito, ni ji enaanyo ni ekɛfãa gbɛ lɛ akɛ: “Enɛ hewɔ mishio yɛ Kreta, koni oto nibii ni eshwɛ lɛ gbɛjianɔ pɛpɛɛpɛ, ní owowoo onukpai yɛ maŋ fɛɛ maŋ mli, taakɛ bɔ ni mikɛɛo momo lɛ.” (Tito 1:5) Etamɔ nɔ ni ahã Timoteo, ni kɛ bɔfo Paulo fã gbɛ waa lɛ hegbɛ ni tamɔ nakai nɔŋŋ. (1 Tim. 5:22) No hewɔ lɛ, eyɛ faŋŋ akɛ, nɔkwɛlɔi gbɛfalɔi ji mɛi ni hole asafoŋ onukpai kɛ asafoŋ sɔɔlɔi, jeee bɔfoi lɛ kɛ onukpai lɛ ni yɔɔ Yerusalem lɛ.

Enɛ hewɔ lɛ, Yehowa Odasefoi a-Gbɛtsɔɔmɔ Kuu lɛ etsake gbɛ ni atsɔɔ nɔ aholeɔ asafoŋ onukpai kɛ asafoŋ sɔɔlɔi lɛ, koni ekɛ nɔ ni yɔɔ Biblia lɛ mli lɛ anyiɛ pɛpɛɛpɛ. Kɛjɛ September 1, 2014 kɛbaa nɛɛ, bɔ ni aholeɔ asafoŋ onukpai kɛ asafoŋ sɔɔlɔi nɛ: Kpokpaa nɔkwɛlɔ fɛɛ kpokpaa nɔkwɛlɔ kwɛɔ saji ni kɔɔ mɛi srɔtoi ni ajie amɛyi yɛ ekpokpaa lɛ nɔ lɛ he lɛ amli jogbaŋŋ. Kɛ́ ebasara asafo lɛ, ebaabɔ mɔdɛŋ ni ele mɛi ni ajie amɛyi lɛ, ní kɛ́ eeehi lɛ, ekɛ amɛ aya shiɛmɔ. Kɛ́ ekɛ onukpai akuu ni yɔɔ asafo ni ebasara lɛ mli lɛ susu mɛi ni amɛjie amɛyi lɛ ahe egbe naa lɛ, eji esɔ̃ akɛ ehole mɛi ni sa lɛ akɛ asafoŋ onukpai kɛ asafoŋ sɔɔlɔi yɛ nakai asafo ni yɔɔ ekpokpaa lɛ nɔ lɛ mli. Enɛ baahã bɔ ni aholeɔ asafoŋ onukpai kɛ asafoŋ sɔɔlɔi ŋmɛnɛ lɛ kɛ bɔ ni afee lɛ yɛ klɛŋklɛŋ afii 100 lɛ mli lɛ akpa gbee.

Mɛɛ gbɛfaŋnɔ mɛi srɔtoi tsuɔ yɛ asafoŋ onukpai kɛ asafoŋ sɔɔlɔi aholemɔ mli? Sɔ̃ titri ni kã ‘nyɔŋ anɔkwafo kɛ hiɛshikalɔ’ lɛ nɔ ji ni elɛ Yesu webii lɛ, taakɛ efeɔ daa lɛ. (Mat. 24:45-47) Yɛ amɛsɔ̃ nɛɛ he nitsumɔ mli lɛ, amɛkpaa Ŋmalɛ lɛ mli, ni mumɔ krɔŋkrɔŋ lɛ yeɔ ebuaa amɛ ni amɛnaa Biblia mli shishitoo mlai ni tsɔɔ bɔ ni esa akɛ ato wɔjeŋ muu fɛɛ asafo lɛ he gbɛjianɔ ahã, ni amɛkɛ enɛ he gbɛtsɔɔmɔi hãa wɔ. Nyɔŋ anɔkwafo lɛ holeɔ kpokpaa nɔkwɛlɔi kɛ Nitsumɔhe Nine Ajinafoi Akuu mli bii hu. Nitsumɔhe nine fɛɛ nitsumɔhe nine hu yeɔ ebuaa ni akɛ gbɛtsɔɔmɔi nɛɛ tsuɔ nii. Eji onukpai akuu fɛɛ kuu sɔ̃ akɛ ekwɛ akɛ nyɛmimɛi hii ni abaajie amɛyi akɛ amɛsɔmɔ akɛ asafoŋ onukpai kɛ asafoŋ sɔɔlɔi yɛ Nyɔŋmɔ asafo lɛ mli lɛ shɛɔ Ŋmalɛ naa taomɔ nii lɛ ahe lɛɛlɛŋ lo. Eji kpokpaa nɔkwɛlɔ fɛɛ kpokpaa nɔkwɛlɔ sɔ̃ akɛ ekwɛ mɛi ni onukpai lɛ ejie amɛyi lɛ ahe saji lɛ amli jogbaŋŋ, esɔle yɛ he, ní no sɛɛ lɛ, ehole mɛi ni sa lɛ.

Kɛ́ wɔnu bɔ ni afeɔ aholeɔ asafoŋ onukpai kɛ asafoŋ sɔɔlɔi lɛ shishi lɛ, ebaahã wɔna gbɛfaŋnɔ ni mumɔ krɔŋkrɔŋ lɛ tsuɔ yɛ enɛ mli. No baahã wɔkɛ wɔhiɛ afɔ̃ mɛi ni ahole amɛ akɛ onukpai kɛ sɔɔlɔi yɛ Kristofoi asafo lɛ mli lɛ anɔ waa, ni wɔbaaná bulɛ kpele wɔhã amɛ.—Heb. 13:7, 17.

[Mfoniri kɛ ehe niŋmaa ni yɔɔ baafa 29]

GBƐFAŊNƆ NI MƐI SRƆTOI TSUƆ YƐ ONUKPAI KƐ SƆƆLƆI AHOLEMƆ MLI

[Mfoniri kɛ ehe niŋmaa ni yɔɔ baafa 29]

GBƐTSƆƆMƆ KUU:

Amɛkɛ Biblia mli shishitoo mlai ni tsɔɔ bɔ ni esa akɛ ato wɔjeŋ muu fɛɛ asafo lɛ he gbɛjianɔ ahã lɛ he gbɛtsɔɔmɔi hãa wɔ. Amɛholeɔ kpokpaa nɔkwɛlɔi kɛ Nitsumɔhe Nine Ajinafoi Akuu mli bii.

NITSUMƆHE NINE:

Eyeɔ ebuaa ni akɛ gbɛtsɔɔmɔi ni Gbɛtsɔɔmɔ Kuu lɛ kɛhãa lɛ tsuɔ nii.

ONUKPAI AKUU:

Amɛkwɛɔ akɛ nyɛmimɛi hii ni amɛbaajie amɛyi akɛ amɛsɔmɔ akɛ asafoŋ onukpai kɛ asafoŋ sɔɔlɔi lɛ shɛɔ Ŋmalɛ naa taomɔ nii lɛ ahe lɛɛlɛŋ lo.

KPOKPAA NƆKWƐLƆ:

Ekwɛɔ mɛi ni asafoŋ onukpai lɛ ejie amɛyi lɛ ahe saji lɛ amli jogbaŋŋ, esɔleɔ yɛ he, ni no sɛɛ lɛ, eholeɔ mɛi ni sa lɛ.

NYƐMIMƐI NI AJIE AMƐYI:

Esa akɛ amɛjie mumɔ lɛ yibii lɛ kpo, ni amɛshɛ Ŋmalɛ naa taomɔ nii lɛ ahe.

[Mfoniri kɛ ehe niŋmaa ni yɔɔ baafa 28]

Asafoŋ onukpai lɛ kɛ kpokpaa nɔkwɛlɔ lɛ miisusu nyɛmi nuu ko he kɛmiikwɛ akɛ eshɛɔ Ŋmalɛ naa taomɔ nii lɛ ahe lo

(Malawi)