SANEYITSO LƐ MLITSƆƆMƆ | OBAANYƐ OBƐŊKƐ NYƆŊMƆ
Shihilɛ Gbɛ Ko Bɛ ni Fe Enɛ
Mɛni obaanyɛ ofee koni otsɔ Nyɔŋmɔ naanyo? Wɔsusu gbɛi ni nyiɛ sɛɛ nɛɛ ni obaanyɛ otsɔ nɔ ni okɛ lɛ abɔ naanyo lɛ he:
Lé Nyɔŋmɔ gbɛ́i ni ji Yehowa lɛ, ni okɛtsu nii.
Okɛ lɛ agba sane daa kɛtsɔ sɔlemɔ kɛ e-Wiemɔ, ni ji Biblia lɛ ni oookase daa lɛ nɔ.
Yaa nɔ ofee nibii ni saa Yehowa hiɛ daa gbi.
Tsi obɛŋkɛ Nyɔŋmɔ kɛtsɔ egbɛ́i lɛ kɛnitsumɔ, sɔlemɔ ni ooosɔle ohã lɛ, e-Wiemɔ lɛ kasemɔ, kɛ nɔ ni sa ehiɛ ni ooofee lɛ nɔ
Yɛ taomɔnii nɛɛ anaa lɛ, ani obaanyɛ owie akɛ oofee nibii ni he hiaa ni baahã otsɔ Nyɔŋmɔ naanyo? Ani nibii komɛi yɛ ni onuɔ he akɛ obaanyɛ oya ohiɛ babaoo yɛ amɛfeemɔ mli? Eji anɔkwale akɛ, ebaabi ni omia ohiɛ, shi susumɔ nɔ ni baajɛ nakai feemɔ mli kɛba lɛ he.
Yoo ko ni jɛ United States ni atsɛɔ lɛ Jennifer lɛ wie akɛ, “Mɔdɛŋ fɛɛ ni mɔ ko bɔɔ ni ekɛ Nyɔŋmɔ abɔ naanyo lɛ he baa sɛɛnamɔ waa. Naanyobɔɔ nɛɛ kɛ jɔɔmɔi babaoo baa: ehãa wɔnáa hiɛkɛnɔfɔɔ babaoo yɛ Nyɔŋmɔ mli, wɔnuɔ lɛ shishi jogbaŋŋ, shi nɔ ni fe fɛɛ lɛ, ehãa wɔnáa suɔmɔ babaoo wɔhãa lɛ. Shihilɛ gbɛ ko bɛ ni fe enɛ!”
Kɛ́ oosumɔ ni okɛ Nyɔŋmɔ abɔ naanyo lɛ, Yehowa Odasefoi baaná he miishɛɛ waa akɛ amɛaaye amɛbua bo. Amɛbaanyɛ amɛto gbɛjianɔ ni amɛkɛ bo akase Biblia lɛ ni aheee nɔ ko. Wɔmiifɔ̃ bo nine hu ni oya he ni amɛkaseɔ Biblia lɛ yɛ, ni ji Maŋtsɛyeli Asa ni bɛŋkɛ bo lɛ nɔ. Kɛ́ otee jɛmɛ lɛ obaanyɛ okɛ mɛi ni buɔ amɛ kɛ Nyɔŋmɔ teŋ wekukpaa lɛ akɛ nɔ ko ni jara wa waa lɛ abɔ naanyo.a Kɛ́ ofee nakai lɛ, bo hu obaanu he tamɔ lalatsɛ lɛ nu he lɛ, ekɛɛ akɛ: “Mi lɛ, Nyɔŋmɔ ŋɔɔ hilɛ hi hã mi.”—Lala 73:28.
a Kɛ́ ootao ni akɛ bo akase Biblia lɛ loo ole he ni Maŋtsɛyeli Asa ko ni bɛŋkɛ bo yɔɔ lɛ, ofainɛ bi mɔ ni kɛ wolo tɛtrɛɛ nɛɛ hã bo lɛ, loo yaa wɔ-Wɛb saiti ni ji, www.jw.org/gaa, ni okwɛ he ni aŋma TAOMƆ WƆSƐƐGBƐ ni yɔɔ shishigbɛ lɛ.