SANEBIMƆI NI BIBLIA LƐ EHÃ HETOO
Mɛni hewɔ esa akɛ wɔkai Yesu gbele lɛ?
Mɛɛ wɔsɛɛ shihilɛ yesu gbele lɛ baahã aná?—Yesaia 25:8; 33:24
Yɛ yinɔsane mli fɛɛ lɛ, Yesu gbele lɛ ji nifeemɔ ko ni he hiaa fe fɛɛ—egbo koni ehã adesai aná shihilɛ ni ŋmɛɛ amɛ lɛ ekoŋŋ. Abɔɔɔ gbɔmɔ ni efee nibii gbohii, hela amɔ lɛ, loo ni egbo. (1 Mose 1:31) Shi esha ba je lɛ mli kɛtsɔ klɛŋklɛŋ gbɔmɔ, Adam nɔ. Yesu kɛ ewala hã koni ekɛkpɔ̃ wɔ kɛjɛ esha kɛ gbele mli.—Kanemɔ Mateo 20:28; Romabii 6:23.
Nyɔŋmɔ jie suɔmɔ ni nɔ bɛ kpo kɛtsɔ e-Bi lɛ ní etsu kɛba shikpɔŋ lɛ nɔ koni ebagbo ehã wɔ lɛ nɔ. (1 Yohane 4:9, 10) Yesu kɛɛ esɛɛnyiɛlɔi lɛ ni amɛkai egbele lɛ kɛtsɔ gbi jurɔ ko ni bɛ haŋtsii ní amɛkɛ aboloo kɛ wein baaye lɛ nɔ. Daa afi kɛ́ wɔye gbi jurɔ nɛɛ, wɔkɛtsɔɔ akɛ wɔhiɛ sɔɔ suɔmɔ ni Nyɔŋmɔ kɛ Yesu jie lɛ kpo amɛtsɔɔ wɔ lɛ.—Kanemɔ Luka 22:19, 20.
Namɔ esa akɛ eye aboloo lɛ ni enu wein lɛ eko?
Be ni Yesu kɛɛ ekaselɔi lɛ klɛŋklɛŋ kwraa akɛ amɛkai egbele lɛ, ewie kpaŋmɔ ko he. (Mateo 26:26-28) Enɛ gbele gbɛ kɛhã Yesu kaselɔi lɛ kɛ mɛi fioo komɛi koni amɛyafata Yesu he akɛ maŋtsɛmɛi kɛ osɔfoi yɛ ŋwɛi. Eyɛ mli akɛ mɛi akpekpei abɔ yaa Yesu gbele lɛ Kaimɔ lɛ shishi moŋ, shi mɛi ni fata nakai kpaŋmɔ lɛ he lɛ pɛ yeɔ aboloo lɛ ni amɛnuɔ wein lɛ eko.—Kanemɔ Kpojiemɔ 5:10.
Aaafee afii 2,000 ni eho nɛ lɛ, Yehowa miihala mɛi ni baatsɔmɔ maŋtsɛmɛi lɛ. (Luka 12:32) Kɛ́ akɛ amɛ to mɛi ni baahi shikpɔŋ lɛ nɔ kɛya naanɔ lɛ ahe lɛ, amɛyi faaa kwraa.—Kanemɔ Kpojiemɔ 7:4, 9, 17.