SANEYITSO LƐ MLITSƆƆMƆ | BƆ NI OOOFEE OKPEE YEYEEYEFEEMƆ NAA
Yeyeeyefeemɔ Yɛ He Fɛɛ He!
“Mitee niyenii taomɔ, shi akpaanɔɔ pɛ miyaná, shi no hu po lɛ, ejara wa fe nine! Enɔ jetsɛremɔ lɛ, shwapoi lɛ amli nibii lɛ fɛɛ tã.”—Paul, Zimbabwe.
“Miwu tsɛ mi eta shi ni ekɛɛ mi akɛ, ebaashi wɔ. Te mafee tɛŋŋ makpee shihilɛ nɛɛ naa lɛ? Te mibii lɛ baafee tɛŋŋ?”—Janet, United States.
“Be ni alam lɛ bɔi gbɛɛmɔ lɛ, mijo foi miyatee, kɛkɛ ni mikã shikpɔŋ shwɛtɛɛ be ni okplɛmii lɛ fɛlɛɔ lɛ. Eye ŋmɛlɛtswai abɔ ní miniji miikpokpo lolo.”—Alona, Israel.
Wɔyɛ bei ni yeyeeyefeemɔ miiya nɔ waa mli, anɔkwa eji “bei krɛdɛɛ ní jaraa.” (2 Timoteo 3:1) Shika he naagbai, weku ni fiteɔ, tai, gbele helai ni baa trukaa, kɛ adebɔɔ naa osharai loo osharai ni jɛɔ adesai ehã mɛi babaoo ehao. Yɛ enɛɛmɛi asɛɛ lɛ, nibii krokomɛi hu yɛ ni hãa wɔfeɔ yeyeeye, ni ehãa wɔbiɔ saji tamɔ: ‘Ani nɔ ni ana yɛ migbɔmɔtso lɛ mli lɛ baatsɔ kansa?’ ‘Mɛɛ je nɛkɛ minabii lɛ baada yɛ mli?’
Jeee yeyeeyefeemɔi fɛɛ ehiii. Bei komɛi lɛ, kɛ́ wɔyaaŋma skul kaa, wɔyaatsu nifeemɔ ko he nii, loo ayaabibii wɔ saji kɛ́ wɔmiitao nitsumɔ lɛ, wɔtsui fãa. Ni gbeyei ni wɔsheɔ akɛ nɔ ko fɔŋ ko baanyɛ aba wɔ nɔ lɛ hãa wɔtsiɔ wɔhe kɛjeɔ osharai ahe. Shi kɛ́ wɔfeɔ yeyeeye fe nine loo be fɛɛ be lɛ wɔfee yeyeeye lɛ, ebaaye wɔ awui. Mɛi ni fa fe 68,000 ni akɛfee niiamlitaomɔ nyɛsɛɛ nɛɛ lɛ hã ana akɛ, kɛ́ mɔ ko fee yeyeeye fioo po lɛ, ebaanyɛ ehã egbo mra. Belɛ, yɛ yiŋtoo kpakpa hewɔ lɛ, Yesu bi akɛ: “Nyɛteŋ namɔ baanyɛ ekɛ yeyeeyefeemɔ atsa ewalasɛɛkɛlɛ nɔ ninetalɔ kome?” Yɛ anɔkwale mli lɛ, yeyeeyefeemɔ hãaa mɔ ko wala sɛɛ atsɛ. No hewɔ lɛ, Yesu wo ŋaa akɛ: “Nyɛkpaa yeyeeye ni nyɛfeɔ” lɛ. (Mateo 6:25, 27) Shi te wɔɔfee tɛŋŋ wɔfee nakai lɛ?
Hetoo lɛ ji, ni wɔkɛ hiɛshikamɔ baatsu nii, wɔbaaná hemɔkɛyeli yɛ Nyɔŋmɔ mli, ni wɔná hiɛnɔkamɔ kɛhã wɔsɛɛ. Kɛ́ wɔkɛ shihilɛ ni jaraa ekpeee amrɔ nɛɛ po lɛ, ekolɛ wɔkɛ eko baakpe wɔsɛɛ. No hewɔ lɛ, nyɛhãa wɔkwɛa bɔ ni otii ni awie he nɛɛ eye ebua Paul, Janet, kɛ Alona ni amɛnyɛ amɛkpee yeyeeyefeemɔ naa.