SANEYITSO LƐ MLITSƆƆMƆ | ANI SƐƐNAMƆ KO YƐ HE AKƐ ABAASƆLE?
Ani Mɔ Ko Boɔ Toi?
Mɛi komɛi susuɔ akɛ sɔlemɔ ji be fitemɔ kɛkɛ, ni akɛ, mɔ ko mɔ ko booo toi. Mɛi komɛi hu sɔleɔ, shi amɛsusuɔ akɛ amɛnáaa hetoo ko. Be ko lɛ, nuu ko ni eheee eyeee akɛ Nyɔŋmɔ yɛ lɛ fee mɔ ni esusuɔ akɛ Nyɔŋmɔ ji lɛ he mfoniri yɛ ejwɛŋmɔ mli, kɛkɛ ni esɔle akɛ: “Bo lɛ kɛɛmɔ mi nɔ ko kɛkɛ.” Shi ekɛɛ Nyɔŋmɔ “etswaaa esɛŋ po.”
Kɛ̃lɛ, Biblia lɛ maa nɔ mi kɛhãa wɔ akɛ, Nyɔŋmɔ ko yɛ ni boɔ sɔlemɔi atoi. Akɛɛ mɛi komɛi ni hi shi yɛ blema lɛ sane ni aŋma yɛ Biblia lɛ mli nɛɛ akɛ: “Duromɔ moŋ [Nyɔŋmɔ aaaduroo] yɛ obolɔmɔ gbee lɛ naa; amrɔ pɛ ní eeenu lɛ eeehereo nɔ!” (Yesaia 30:19) Ŋmalɛ kroko hu kɛɔ akɛ: “Jalɔi asɔlemɔ lɛ, enáa he miishɛɛ.”—Abɛi 15:8.
Yesu sɔle ehã e-Tsɛ lɛ, “ni abo lɛ toi.”—Hebribii 5:7
Biblia lɛ wieɔ mɛi komɛi ni abo amɛsɔlemɔi atoi lɛ hu ahe. Ŋmalɛ ko kɛɛ akɛ, Yesu ŋɔ ‘nibimɔi ehã mɔ ni baanyɛ ahere eyiwala lɛ,’ ni ekɛfata he akɛ, “abo lɛ toi hu.” (Hebribii 5:7) Nɔkwɛmɔnii krokomɛi hu yɛ Daniel 9:21 kɛ 2 Kronika 7:1.
Belɛ, mɛni hewɔ mɔ ni mɛi komɛi nuɔ he akɛ abooo amɛsɔlemɔi atoi lɛ? Dani abaabo wɔ toi lɛ, esa akɛ wɔsɔle wɔhã Yehowa,a ni ji Nyɔŋmɔ ni Biblia wieɔ ehe lɛ pɛ, shi jeee nyɔŋmɔ kroko ko loo blematsɛ ko. Nyɔŋmɔ miikpa gbɛ hu akɛ wɔbaabi nibii ni “kɛ esuɔmɔnaa nii kpãa gbee”—ni ji nibii ni ekpɛlɛɔ nɔ. Nyɔŋmɔ maa nɔ mi kɛhãa wɔ akɛ, kɛ́ wɔsɔle yɛ nɛkɛ gbɛ nɔ lɛ, “eboɔ wɔ toi.” (1 Yohane 5:14) No hewɔ lɛ, bɔ ni afee ni abo wɔsɔlemɔi lɛ atoi lɛ, esa akɛ wɔle Nyɔŋmɔ ni Biblia lɛ wieɔ ehe lɛ, ni wɔle nɔ ni esuɔmɔnaa nii ji hu.
Mɛi babaoo heɔ yeɔ akɛ, sɔlemɔ jeee jamɔŋ nifeemɔ ko kɛkɛ, shi moŋ lɛ Nyɔŋmɔ boɔ sɔlemɔi atoi, ni ehãa amɛ hetoo. Isaac, ni jɛ Kenya lɛ kɛɛ akɛ: “Misɔle koni Nyɔŋmɔ aye abua mi ni manu Biblia lɛ shishi. No sɛɛ etsɛɛɛ lɛ, mɔ ko ba miŋɔɔ ni ekɛɛ ebaaye ebua mi.” Hilda, ni jɛ Philippines lɛ miitao ekpa tawa shɛremɔ. Be ni ebɔ he mɔdɛŋ aahu ni enyɛɛɛ lɛ, ewu wo lɛ ŋaa akɛ, “Mɛni hewɔ osɔleee ohãaa Nyɔŋmɔ ni eye ebua bo?” Ekɛ ŋaawoo lɛ tsu nii, ni ekɛɛ akɛ: “Minaa kpɛ mihe yɛ bɔ ni Nyɔŋmɔ ye ebua mi lɛ he. Efee tamɔ nɔ ni shwelɛ ni miyɔɔ kɛhã tawashɛremɔ lɛ bɔi laajemɔ. Naagbee lɛ mikpa kwraa.”
Ani Nyɔŋmɔ baasumɔ ni etsu onibimɔi ni kɛ esuɔmɔnaa nii kpaa gbee lɛ ahe nii?
a Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.