SANEBIMƆI NI BIBLIA LƐ EHÃ HETOO
Ani wɔbaanyɛ wɔle anɔkwale ni kɔɔ Nyɔŋmɔ he?
Mɛni hewɔ Nyɔŋmɔ taoɔ ni wɔle anɔkwale lɛ? Kanemɔ Yohane 17:3
Kɛjɛ blema tɔ̃ɔ lɛ, Nyɔŋmɔ kɛ adesai wieɔ. Etsɔ emumɔ krɔŋkrɔŋ lɛ, loo ehewalɛ ni miitsu nii lɛ nɔ ekɛ esusumɔi wo mɛi ni ŋmala Biblia lɛ ajwɛŋmɔ mli. (2 Petro 1:20, 21) Kɛ́ wɔkane Biblia lɛ daa lɛ, wɔbaanyɛ wɔle anɔkwale ni kɔɔ Nyɔŋmɔ he.—Kanemɔ Yohane 17:17; 2 Timoteo 3:16.
Nyɔŋmɔ tsɔɔ Biblia lɛ nɔ ehãa aleɔ ehe saji. Ehãa aleɔ nɔ hewɔ ni ebɔ gbɔmɔ, nɔ ni ebaafee ehã adesai kɛ bɔ ni etaoɔ ni wɔhi shi wɔhã. (Bɔfoi 17:24-27) Yehowa Nyɔŋmɔ miisumɔ ni wɔle anɔkwale ni kɔɔ ehe.—Kanemɔ 1 Timoteo 2:3, 4.
Mɛni hewɔ Nyɔŋmɔ kpɛlɛɔ mɛi ni sumɔɔ anɔkwale lɛ nɔ lɛ?
Yehowa ji Nyɔŋmɔ ni sumɔɔ anɔkwale, ni etsu e-Bi Yesu koni ebatsɔɔ adesai anɔkwale lɛ. No hewɔ lɛ, Yesu sumɔɔ mɛi ni sumɔɔ anɔkwale lɛ. (Yohane 18:37) Nyɔŋmɔ sumɔɔ ni mɛi ni tamɔ nɛkɛ lɛ ajá lɛ.—Kanemɔ Yohane 4:23, 24.
Satan Abonsam etsi mɛi pii anaa koni amɛkale Nyɔŋmɔ, kɛtsɔ Nyɔŋmɔ he amale tsɔɔmɔi ni ehãa agbɛɔ ashwãa lɛ nɔ. (2 Korintobii 4:3, 4) Mɛi ni sumɔɔɔ nibii kpakpai lɛ nyaa amale tsɔɔmɔi nɛɛ ahe. (Romabii 1:25) Shi mɛi akpekpei abɔ miile anɔkwale ni kɔɔ Nyɔŋmɔ he lɛ kɛtsɔ Biblia lɛ ni amɛkaseɔ lɛ nɔ.—Kanemɔ Bɔfoi 17:11.