Bɔ ni Ooofee Okɛ Sane Ato Sane He yɛ Gbɛ ni Ofeko Nakai Daŋ Nɔ

ANI obuɔ ohe akɛ oji Kristofonyo? Kɛ́ nakai ni lɛ, belɛ ofata mɛi ni fa fe akpekpe toi akpei enyɔ ni yɔɔ shikpɔŋ lɛ nɔ​—kɛhooo lɛ mɛi etɛ mli ekome​—ní kɛɔ akɛ amɛji Kristo sɛɛnyiɛlɔi lɛ ahe. Ŋmɛnɛ lɛ, ayɛ sɔlemɔi babaoo ni atsɛɔ amɛ Kristofoi, kɛ̃lɛ, amɛ fɛɛ amɛtsɔɔ tsɔɔmɔi srɔtoisrɔtoi, ni amɛhiɛ susumɔi srɔtoi yɛ saji ahe. No hewɔ lɛ, ekolɛ esoro nɔ ni oheɔ oyeɔ lɛ yɛ mɛi krokomɛi ni tsɛɔ amɛhe Kristofoi lɛ anɔ lɛ he. Ani nɔ ni oheɔ oyeɔ lɛ he miihia? Hɛɛ, ehe miihia​—kɛ́ oosumɔ ni ofee nibii ni Biblia lɛ etsɔɔ akɛ Kristofoi afee lɛ.

Atsɛ Yesu Kristo mra be mli sɛɛnyiɛlɔi lɛ akɛ, “Kristofoi.” (Bɔfoi 11:26) Ehe ehiaaa ni akɛ gbɛ́i kroko atsɛ amɛ dani ayɔse amɛ, ejaakɛ no mli lɛ Kristofoi lɛ fɛɛ hiɛ hemɔkɛyeli kome. Kristofoi lɛ kɛ ekomefeemɔ nyiɛ Yesu Kristo, ni ji mɔ ni to Kristofoi Ajamɔ lɛ shishi lɛ tsɔɔmɔi kɛ efãmɔi lɛ asɛɛ. Ni ojamɔ lɛ hu? Ani osusuɔ akɛ nɔ ni etsɔɔ lɛ kɛ nɔ ni Kristo tsɔɔ lɛ kɛ nɔ ni mra be mli Kristofoi lɛ he amɛye lɛ kpãa gbee? Te ooofee tɛŋŋ ole lɛ? Obaanyɛ otsɔ gbɛ kome pɛ nɔ​—no ji, Biblia lɛ ni okɛbaatsu nii.

Susumɔ enɛ he okwɛ: Yesu Kristo yɛ bulɛ ni mli kwɔ kɛhã Ŋmalɛi lɛ akɛ eji Nyɔŋmɔ Wiemɔ. Ekpɛlɛɛɛ mɛi ni buɔ adesai akusumii akɛ no he miihia kwraa fe Biblia tsɔɔmɔi lɛ anɔ. (Marko 7:9-13) No hewɔ lɛ, wɔbaanyɛ wɔkɛɛ kɛ nɔmimaa akɛ, mɛi tuuntu ni ji Yesu sɛɛnyiɛlɔi lɛ hãa amɛhemɔkɛyeli damɔɔ Biblia lɛ nɔ. No hewɔ lɛ, esa akɛ Kristofonyo fɛɛ Kristofonyo abi ehe akɛ, ‘Ani nɔ ni misɔlemɔ lɛ tsɔɔ lɛ kɛ nɔ ni Biblia lɛ tsɔɔ lɛ kpãa gbee?’ Bɔ ni afee ni wɔná sanebimɔ nɛɛ hetoo lɛ, mɛni hewɔ okɛ nɔ ni osɔlemɔ lɛ tsɔɔ lɛ etooo nɔ ni Biblia lɛ tsɔɔ diɛŋtsɛ lɛ he?

Yesu kɛɛ esa akɛ jamɔ ni wɔkɛhãa Nyɔŋmɔ lɛ adamɔ anɔkwalei ni yɔɔ Biblia lɛ mli lɛ anɔ. (Yohane 4:24; 17:17) Ni bɔfo Paulo hu kɛɛ wɔyiwalaheremɔ damɔ “anɔkwale lɛ he nilee krɔŋŋ lɛ” nɔ. (1 Timoteo 2:4) No hewɔ lɛ, ehe miihia ni wɔhã wɔhemɔkɛyeli lɛ adamɔ anɔkwalei ni yɔɔ Biblia lɛ mli lɛ anɔ. Mɛni hewɔ, ejaakɛ wɔyiwalaheremɔ lɛ damɔ nɔ!

BƆ NI WƆƆFEE WƆKƐ NIBII NI WƆHEƆ WƆYEƆ LƐ ATO NƆ NI BIBLIA LƐ KƐƆ HE

Wɔmiifɔ bo nine ni okane sanebimɔi ekpaa ni nyiɛ sɛɛ nɛɛ, ni okwɛ hetoi ni Biblia lɛ kɛhãa yɛ he. Kwɛmɔ ŋmalɛi ni atsɛ lɛ yɛ o-Biblia lɛ mli, ni ojwɛŋ hetoi lɛ anɔ. No sɛɛ lɛ, bi ohe akɛ, ‘Ani nɔ ni Biblia lɛ tsɔɔ lɛ kɛ nɔ ni misɔlemɔ lɛ tsɔɔ lɛ kpãa gbee?’

Sanebimɔi nɛɛ baanyɛ aye abua bo ni okɛ sane ato sane he yɛ gbɛ ni ofeko nakai daaŋ nɔ. Ani obaasumɔ ni okɛ nibii ni osɔlemɔ lɛ tsɔɔ lɛ ato nɔ ni Biblia lɛ tsɔɔ lɛ he? Yehowa Odasefoi lɛ baasumɔ ni amɛye amɛbua bo ni opɛi Biblia mli anɔkwalei lɛ amli jogbaŋŋ. Mɛni hewɔ obiii Odasefoi lɛ ateŋ mɔ ko ni ekɛ bo akase Biblia lɛ ni aheee shika? Aloo obaanyɛ oya wɔwɛbsaiti lɛ nɔ yɛ jw.org.