Ŋmɛnɛ lɛ, mɛi pii ‘ŋɔɔ nɔ ko amɛtoɔ’ ni amɛkɛwoɔ oniatsumɔ adekai ni aŋmala yɛ he akɛ, “Jeŋ Muu Fɛɛ Nitsumɔ Lɛ” amli yɛ amɛsafoi lɛ amli. (1 Kor. 16:2) Daa nyɔɔŋ nɔ lɛ, asafoi lɛ fɛɛ kɛ oniai ni atsuɔ lɛ majeɔ Yehowa Odasefoi anitsumɔhe nine ni kwɛɔ shiɛmɔ nitsumɔ lɛ nɔ yɛ maŋ nɔ ni amɛyɔɔ lɛ. Obaanyɛ okɛ shika ni ootao okɛke lɛ hu amaje Yehowa Odasefoi tɛ̃ɛ kɛtsɔ nitsumɔhe ko ni asafo lɛ etsɔɔ akɛ ehe shika yɛ egbɛ́i mli lɛ nɔ. Kɛ́ ootao ole nitsumɔhe ni Yehowa Odasefoi ni yɔɔ omaŋ lɛ mli lɛ kɛtsuɔ nii lɛ gbɛ́i lɛ, ofainɛ tswaa amɛnitsumɔhe nine lɛ, loo ŋmaa amɛ wolo. Obaanyɛ ona nitsumɔhe nine lɛ tɛlifoŋ nɔmba kɛ adrɛs yɛ www.jw.org. Nibii ni obaanyɛ okɛhã tɛ̃ɛ lɛ ji nɔ ni nyiɛ sɛɛ nɛɛ:
NIBII NI OTAOƆ OKƐKE
Obaanyɛ ohã shikatoohe ko kɛ shika awo Yehowa Odasefoi afotro mli tɛ̃ɛ, loo ohã ajie kɛjɛ okaadi ni okɛjieɔ shika loo okɛwoɔ nibii ahe nyɔmɔ lɛ nɔ. Obaanyɛ otsɔ mobile money hu nɔ ofee nakai. Yɛ maji komɛi anɔ lɛ, obaanyɛ otsɔ jw.org wɛbsaiti lɛ loo wɛbsaiti kroko ko ni Yehowa Odasefoi etsɔɔ akɛ atsɔ nɔ ahã amɛ shika lɛ nɔ ofee nakai.
Obaanyɛ okɛ shika diɛŋtsɛ, jwinei, loo ojarawa nibii krokomɛi hu ake. Ofainɛ ŋmaa wolo kɛfata shika loo ojarawa nii ni otaoɔ okɛhã lɛ he kɛtsɔɔ akɛ okɛmiike.
NIBII NI OTAOƆ OKƐHÃ SHI JEEE NI OKƐMIIKE
Obaanyɛ okɛ shika ko ahã ni Yehowa Odasefoi kɛtsu nii, koni sɛɛ mli lɛ, akɛhã bo.
Ofainɛ ŋmaa wolo kɛfata shika lɛ he kɛtsɔɔ akɛ, okɛmiihã, shi okɛkeko.
EJURƆFEEMƆ HE GBƐJIANƆTOO
Yɛ shika kɛ ojarawa nibii ni obaanyɛ okɛke lɛ sɛɛ lɛ, naa gbɛi krokomɛi ni obaanyɛ otsɔ nɔ ofi Maŋtsɛyeli shiɛmɔ nitsumɔ ni atsuɔ yɛ jeŋ fɛɛ lɛ sɛɛ. Ofainɛ, dani okɛ gbɛi nɛɛ eko baatsu nii lɛ, bi gbɛtsɔɔmɔ kɛjɛ nitsumɔhe nine lɛ, koni ona amɛteŋ nɔ ni obaanyɛ okɛtsu nii yɛ maŋ nɔ he ni oyɔɔ lɛ. Akɛni esoro he fɛɛ he kɛ mlai ni akɛtsuɔ nii yɛ jɛmɛ kɛ toi srɔtoi ni awoɔ yɛ jɛmɛ hewɔ lɛ, ehe miihia ni okɛ mɔ ko ni le mla lɛ kɛ toi srɔtoi lɛ ahe nii jogbaŋŋ lɛ agba sane, koni ona gbɛi srɔtoi ni atsɔɔ lɛ ateŋ nɔ ni hi fe fɛɛ ni obaanyɛ okɛtsu nii.
Ŋshuɔransi: Obaanyɛ okɛ nitsumɔhe ko ni Yehowa Odasefoi etsɔɔ akɛ ebaanyɛ ehe shika yɛ egbɛ́i mli lɛ gbɛ́i awo ŋshuɔransi ko nɔ akɛ mɛi ni akɛ ŋshuɔransi lɛ ahã kɛji ogbo loo oba nitsumɔ mli hejɔɔmɔ.
Shika ni Akɛto Shikatoohe: Obaanyɛ ohã akɛ shika ko ni okɛto shikatoohe, shika ko ni okɛhã shikatoohe ko be kukuoo ko, loo shika ko ni okɛto shikatoohe ko koni kɛ́ oba nitsumɔ mli hejɔɔmɔ lɛ akɛhã bo lɛ ahã Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika yɛ amɛgbɛ́i mli lɛ nɔ. Kɛ́ oosumɔ lɛ, obaanyɛ oto gbɛjianɔ ni akɛ shikai nɛɛ ahã Yehowa Odasefoi yɛ ogbele sɛɛ.
Shika ni Akɛwo Nitsumɔ ko mli loo Akɛfa Shikatoohe: Obaanyɛ okɛ shika ni okɛwo nitsumɔ ko mli loo okɛfa shikatoohe ko lɛ ahã Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika yɛ amɛgbɛ́i mli lɛ nɔ.
Shikpɔji kɛ Tsũi: Obaanyɛ okɛ shikpɔji kɛ tsũi ni baahi hɔ̃ɔmɔ ake Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika loo nibii krokomɛi yɛ amɛgbɛ́i mli lɛ nɔ. Obaanyɛ okɛ bo diɛŋtsɛ oshĩa ko ni oyɔɔ mli lɛ hu ahã akɛ okɛmiike kwraa shi obaahi mli kɛyashi obaagbo.
Gift Annuity: Obaanyɛ okɛ shika loo nibii krokomɛi ahã Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika loo nibii krokomɛi yɛ amɛgbɛ́i mli lɛ nɔ kɛ gbɛkpamɔ akɛ, amɛbaahã bo shika pɔtɛɛ ko daa afi kɛyashi obaagbo. Kɛ́ okɛ Yehowa Odasefoi to gbɛjianɔ nɛɛ, ekolɛ, abaatse toi komɛi ni esa akɛ owo nakai afi lɛ nɔ.
Shamaŋsheo: Obaanyɛ oŋma shamaŋsheo yɛ mla naa, ni okɛ nibii loo shika ni oyɔɔ lɛ ake Yehowa Odasefoi kɛtsɔ nitsumɔhe ko ni amɛtsɔɔ akɛ ebaanyɛ ehe shika loo nibii krokomɛi yɛ amɛgbɛ́i mli lɛ nɔ. Gbɛjianɔtoo nɛɛ baanyɛ ahã bo kɛ asafo lɛ aye nyɛhe kɛjɛ toi komɛi ahe.
Taakɛ wiemɔ ni ji “ejurɔfeemɔ he gbɛjianɔtoo” lɛ tsɔɔ lɛ, ebaabi ni mɔ ko ni miitao ni ekɛ nibii ni atsĩ tã kɛtsɔ hiɛ lɛ eko ake lɛ ato he gbɛjianɔ. Afee broshuɔ ko ni yitso ji, Charitable Planning to Benefit Kingdom Service Worldwide lɛ, koni eye ebua mɛi fɛɛ ni miisumɔ ni amɛtsu onia kɛfi Yehowa Odasefoi ajeŋ muu fɛɛ nitsumɔ lɛ sɛɛ lɛ ni amɛna gbɛi srɔtoi ni amɛbaanyɛ amɛtsɔ nɔ amɛto he gbɛjianɔ. Enɛ baanyɛ afee gbɛjianɔtoo ko ni Yehowa Odasefoi baaná he sɛɛ amrɔ nɛɛ, loo nɔ ni amɛbaaná he sɛɛ sɛɛ mli, tamɔ be ni mɔ lɛ egbo nɛkɛ. Afee broshuɔ nɛɛ yɛ Blɔfo kɛ Spanish mli. Akɛni esoro he fɛɛ he kɛ mlai ni akɛtsuɔ nii yɛ jɛmɛ kɛ toi srɔtoi ni awoɔ yɛ jɛmɛ hewɔ lɛ, ekolɛ jeee saji fɛɛ ni yɔɔ broshuɔ nɛɛ mli lɛ obaanyɛ okɛtsu nii yɛ he ni oyɔɔ lɛ. Mɛi etsɔ gbɛi srɔtoi ni atsɔɔ yɛ broshuɔ nɛɛ mli lɛ anɔ amɛfi Yehowa Odasefoi asɛɛ yɛ amɛ-Biblia tsɔsemɔ kɛ ejurɔfeemɔ nitsumɔ ni amɛtsuɔ yɛ jeŋ fɛɛ lɛ mli ni aheee amɛ toi babaoo. Kɛ́ ayɛ broshuɔ nɛɛ eko yɛ maŋ nɔ he ni oyɔɔ lɛ, obaanyɛ obi ni asafoŋ woloŋmalɔ lɛ ahã bo eko.
Kɛ́ ootao ole saji babaoo lɛ, ofainɛ yaa www.jw.org/gaa ni okliki he ni kɛɛ “Tsu Onia ni Okɛye Obua Wɔ-Jeŋ Muu Fɛɛ Nitsumɔ Lɛ.” Eyɛ wɛbsaiti lɛ shishigbɛ kwraa. Aloo obaanyɛ otswa nitsumɔhe nine lɛ loo oŋma amɛ wolo.