Ani Biblia Lɛ He Yɛ Sɛɛnamɔ Ŋmɛnɛ?

MƐI KOMƐI KƐƐ DABI. Datrɛfonyo ko kɛɛ akɛ, kɛ́ mɔ ko kɛ Biblia mli ŋaawoo tsu nii ŋmɛnɛ lɛ, etamɔ nɔ ni ekɛ jeŋ shikpamɔ wolo ko ni afee aaafee afi 1920 lɛ miitsɔɔ nii ŋmɛnɛ. Ekolɛ mɔ ko ni ebuuu Biblia lɛ po baabi akɛ, ani mɔ ko baakwɛ blema kɔmpiuta ko ni efite he manual nɔ kɛkase bɔ ni ekɛ kɔmpiuta hee ko ni afee yɛ wɔbeiaŋ lɛ baatsu nii ehã? Nɔ ni amɛtsɔɔ nɔŋŋ ji akɛ, Biblia lɛ be eho kwraa.

Mɛni hewɔ kwraa mɔ ko kɛ blema wolo ni tamɔ nɛkɛ baatsu nii ŋmɛnɛ yɛ jeŋ ni atee hiɛ yɛ tsɔji ahe nilee mli nɛɛ mli? Ejaakɛ wɛbsaitii pii yɛ ni kɛ ŋaawoi kɛ gbɛtsɔɔmɔi hãa be fɛɛ be. Woloŋlelɔi baa TV nɔ daa, ni amɛwoɔ ŋaa yɛ bɔ ni esa akɛ aba jeŋ kɛ bɔ ni esa akɛ ahi shi ahã lɛ he. Ni aahɔ̃ɔ woji pii ni mɛi baanyɛ akane ni ewa amɛ. Enɛ ehã mɛi ni feɔ woji kɛ mɛi ni hɔ̃ɔ lɛ miiná shika waa.

Akɛni anáa saji hei daa gbi hewɔ lɛ, mɛni hewɔ esa akɛ mɔ ko atao ŋaawoo kɛjɛ Biblia lɛ, ni ji wolo ni aŋma aaafee afii 2,000 ni eho nɛ lɛ mli? Ani mɛi ni ebuuu Biblia lɛ awiemɔ efeŋ anɔkwale akɛ, kɛ́ mɔ ko kɛ wolo ko ni tamɔ nakai tsu nii lɛ, etamɔ nɔ ni ekɛ jeŋ shikpamɔ wolo ko ni be eho miitsu nii loo ekɛ blema kɔmpiuta ko ni efite he manual miitsu nii ŋmɛnɛ? Shi susumɔ ni tamɔ nɛkɛ lɛ ejaaa kwraa. Jeŋ shikpamɔ kɛ tsɔji ahe nilee tsakeɔ oyayaayai, shi ani adesai ahiamɔ nii etsake? Mɛi kã he amɛmiitao amɛle nɔ hewɔ ni amɛyɔɔ shihilɛ mli, ni amɛmiitao amɛná miishɛɛ kɛ toiŋjɔlɛ, weku ni miishɛɛ yɔɔ mli, kɛ nanemɛi kpakpai.

Biblia lɛ etsɛ waa moŋ, shi etsuɔ hiamɔ nii nɛɛ ahe nii, ni efeɔ fe nakai po. Biblia lɛ diɛŋtsɛ kɛɔ hu akɛ, emli saji lɛ jɛ wɔ-Bɔlɔ lɛ ŋɔɔ, ni akɛ, ebaaye ebua wɔ yɛ shihilɛ mli nɔ fɛɛ nɔ mli, ni ebaawaje wɔ koni wɔkpee naagba fɛɛ naagba naa. (2 Timoteo 3:16, 17) Ekɛɔ hu akɛ, emli ŋaawoi lɛ abe hooo! Biblia lɛ diɛŋtsɛ wieɔ akɛ: “Nyɔŋmɔ wiemɔ lɛ hiɛ kã.”​—Hebribii 4:12.

Ani nibii ni Biblia lɛ kɛɔ lɛ yɛ mli lɛɛlɛŋ? Ani ebe eho, aloo eji wolo ni he yɔɔ sɛɛnamɔ fe woji krokomɛi fɛɛ, ni tsɔɔ akɛ eji wolo ni hiɛ kã? Buu-Mɔɔ nɛɛ, ni eji Buu-Mɔɔ krɛdɛi ni baaba kɛtsara nɔ lɛ ateŋ klɛŋklɛŋ nɔ lɛ, baawa bo ni oná sanebimɔi nɛɛ ahetoo.