Namɔ Ji Nyɔŋmɔ?

Mɛi pii kɛɔ akɛ amɛheɔ Nyɔŋmɔ nɔ amɛyeɔ. Shi kɛ́ obi amɛ akɛ namɔ ji Nyɔŋmɔ lɛ, amɛbaahã bo hetoi srɔtoisrɔtoi. Mɛi komɛi kɛɛ Nyɔŋmɔ ji kojolɔ ni yitsoŋ wa, ni miisumɔ ni kɛ́ mɔ ko fee efɔŋ ko nɔŋŋ lɛ, egbala etoi. Mɛi komɛi hu naa lɛ akɛ mɔ ko ni sumɔɔ mɔ ni kɛ eshai keɔ be fɛɛ be, ekɔɔɔ he eko esha ni obaafee. Ni mɛi krokomɛi hu susuɔ akɛ Nyɔŋmɔ kɛ wɔ teŋ jekɛ, ni esusuuu wɔhe. Akɛni mɛi hiɛ susumɔi srɔtoisrɔtoi yɛ Nyɔŋmɔ he hewɔ lɛ, ekolɛ mɛi babaoo baasusu akɛ anyɛŋ ale mɔ ni eji kɔkɔɔkɔ.

Ani ehe miihia ni ole mɔ ni Nyɔŋmɔ ji? Hɛɛ. Kɛ́ oná ole Nyɔŋmɔ jogbaŋŋ lɛ, oshihilɛ baahi fe bɔ ni eji bianɛ lɛ, ni omii baashɛ ohe hu. (Bɔfoi 17:26-28) Kɛ́ otsi obɛŋkɛ Nyɔŋmɔ kpaakpa lɛ, lɛ hu ebaasumɔ bo waa ni ebaaye ebua bo. (Yakobo 4:8) Nɔ ni fe fɛɛ lɛ, kɛ́ oná Nyɔŋmɔ he anɔkwa nilee lɛ, ebaanyɛ ehã oná naanɔ wala.​—Yohane 17:3.

Te obaafee tɛŋŋ ole Nyɔŋmɔ? Susumɔ mɔ ko ni ole lɛ waa lɛ he okwɛ, ekolɛ onaanyo kpaakpa ko. Te fee tɛŋŋ ebatsɔ onaanyo lɛ? Ekolɛ oná ole egbɛ́i, esubaŋ, nibii ni esumɔɔ kɛ nibii ni esumɔɔɔ, nibii ni efee kɛ nibii ni etaoɔ efee, kɛ ekrokomɛi. Yɛ gbɛ ko nɔ lɛ, okase ehe nii​—no ji nɔ ni hã obasumɔ esane lɛ.

Nakai nɔŋŋ wɔbaanyɛ wɔle Nyɔŋmɔ jogbaŋŋ kɛ́ wɔsusu saji ni nyiɛ sɛɛ nɛɛ ahe:

• MƐNI JI NYƆŊMƆ GBƐ́I?

• MƐƐ SUI EYƆƆ?

• MƐNI NYƆŊMƆ EFEE?

• MƐNI EBAAFEE?

• KƐ́ ONÁ OLE NYƆŊMƆ LƐ, MƐƐ SƐƐ OBAANÁ?

Magazin nɛɛ baaye ebua bo ni ona bɔ ni Biblia lɛ ehã sanebimɔi nɛɛ ahetoo. Emli saji lɛ baawa bo ni ole mɔ ni Nyɔŋmɔ ji, kɛ jɔɔmɔi ni obaaná kɛ́ okɛ lɛ fee onaanyo.