Shia-kɛ-Shia Nitsumɔ lɛ He Baa Sɛɛnamɔ Kɛhaa Mɔ
1 “Yaakpa shi kɛtsɔ maŋ lɛ teŋ, kɛtsɔ Yerusalem teŋ, ní okadi hii ni dɔmɔɔ ŋtsɔi ní amɛyeɔ ŋkɔmɔ yɛ nihiinii fɛɛ ni afeɔ yɛ eteŋ lɛ hewɔ lɛ ahiɛnaai!” Nakai ji bɔ ni esa akɛ nuu ni hiɛ woloŋmaa tɔ lɛ atsu nitsumɔ ni Yehowa kɛwo edɛŋ yɛ blema Yerusalem naagbee gbii lɛ amli lɛ he nii.—Ezek. 9:2-11.
2 Ŋmɛnɛ, Yehowa Odasefoi miitsu nitsumɔ ni tamɔ nakai nɔŋŋ yɛ je lɛŋ he fɛɛ he. Aatsɔ shia-kɛ-shia tafaa nitsumɔ ni akɛ ekãa miitsu lɛ nɔ akɛ sanekpakpa lɛ miiha gbɔmɛi fɛɛ. Shia-kɛ-shia shiɛmɔ lɛ yeɔ ebuaa wɔ ni wɔtaoɔ mɛi ni miisumɔ ni amɛkase anɔkwale lɛ, ni wɔbɔɔ mɛi krokomɛi ni sumɔɔɔ ni amɛbo toi lɛ kɔkɔ. Ani oŋɔ nɛkɛ wala yibaamɔ nitsumɔ nɛɛ ofɔ̃ onɔ? Ani ooná mli gbɛfaŋnɔ babaoo yɛ bɔ ni bo diɛŋtsɛ oshihilɛ ŋmɛɔ bo gbɛ lɛ naa?
3 Awoɔ mɔdɛŋ ni wɔbɔɔ yɛ nitsumɔ nɛɛ mli lɛ he nyɔmɔ be mli ni wɔyɔseɔ akɛ daa afi lɛ ayeɔ abuaa mɛi akpei abɔ koni amɛkase anɔkwale lɛ. Wɔ diɛŋtsɛ hu wɔnáa he sɛɛ babaoo kɛji wɔkɛ wɔhe wo shia-kɛ-shia shiɛmɔ nitsumɔ lɛ mli daa ni wɔtsu lɛ jogbaŋŋ kɛmɔ shi lɛ. Yɛ mɛɛ gbɛ nɔ? Susumɔ saji ni nyiɛ sɛɛ nɛɛ ahe okwɛ:
■ Ehaa hiɛsɔɔ ni wɔyɔɔ kɛha anɔkwale lɛ yaa hiɛ. Babaoo ni wɔkɛ wɔhe woɔ shia-kɛ-shia nitsumɔ lɛ mli lɛ, babaoo ni wɔyɔseɔ ‘ŋtsɔidɔɔmɔ kɛ ŋkɔmɔyeli yɛ nihiinii fɛɛ ni afeɔ lɛ ahe.’ Wɔyɛ nɔmimaa akɛ Biblia gbalɛ miiná emlibaa ni wɔle jogbaŋŋ akɛ adesai anaagbai anaa tsabaa pɛ ni yɔɔ ji Yehowa Maŋtsɛyeli lɛ kɛtsɔ Yesu Kristo nɔ.
■ Eyeɔ ebuaa wɔ ni wɔnáa mumɔ lɛ yibii ni wɔjieɔ amɛ kpo jogbaŋŋ kɛmɔɔ shi. Yɛ anɔkwale mli lɛ, dani wɔɔnyɛ wɔdamɔ shia-kɛ-shia nitsumɔ lɛ mli kaai lɛ anaa ni wɔya nɔ wɔtsu lɛ, ebiɔ ni wɔjie mumɔ lɛ yibii lɛ fɛɛ akpo—suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ.— Gal. 5:22-24.
■ Eyeɔ ebuaa wɔ ni wɔyeɔ gbɔmɔ gbeyeishemɔ nɔ. Ani okaiɔ bɔ ni onu he oha yɛ klɛŋklɛŋ gbi ni okɛ ohe wo shia-kɛ-shia nitsumɔ lɛ mli lɛ nɔ lɛ? Shi, fiofio lɛ, nakai gbeyeishemɔ lɛ ba shi kwraa beni wɔbayɔse akɛ sanekpakpa lɛ ni wɔɔshiɛ kɛ kɔkɔbɔɔ ni kɛ yiwalaheremɔ haa mɛi ni boɔ toi lɛ he adafi ni wɔɔtswa lɛ ji nɔ ni he hiaa fe fɛɛ. Wɔsheee hefɛoyeli ni gbɔmɛi kɛbaa wɔnɔ lɛ kɛ kpoomɔ ni amɛkpooɔ wɔwiemɔ lɛ gbeyei. Taakɛ Yeremia ji lɛ, wɔnáa Yehowa sɛɛfimɔ lɛ mli hekɛnɔfɔɔ, ni enɛ tswaa wɔhemɔkɛyeli lɛ emaa shi.— Yer. 1:17-19.
■ Ehaa wɔnáa heshibaa su be fɛɛ be. Etsɛɛɛ ni wɔnaa akɛ wɔnyɛŋ wɔtsu nitsumɔ nɛɛ yɛ wɔ diɛŋtsɛ wɔhewalɛ kɛ wɔnyɛmɔ naa. Yɛ no najiaŋ lɛ, shii abɔ ni wɔbaa wɔhe shi ni ‘wɔkuuu wɔsɛɛ’ lɛ, Yehowa baaha wɔ “nikaselɔi alilɛi” bɔni afee ‘wɔle bɔ ni wɔɔha mɛi ni wɔkɛkpeɔ lɛ hetoo.’—Yes. 50:4-6.
■ Ehaa nyɛmɔ ni wɔyɔɔ ni wɔkɛfãa anɔkwale lɛ he lɛ mli waa. Kɛji akɛ wɔɔnyɛ wɔkɛ klante kɛ enaa ŋta ni naa ba, ni ji Nyɔŋmɔ Wiemɔ lɛ atsu nii jogbaŋŋ lɛ, ehe miihia ni wɔfɔ ekɛ nitsumɔ. Beni wɔyaa nɔ wɔkɛ Biblia lɛ tsuɔ nii yɛ shia-kɛ-shia nitsumɔ lɛ mli lɛ, wɔnaa akɛ ‘ehiɛ kã ni eyɛ hewalɛ.’—Heb. 4:12.
■ Ehaa wɔnáa ekãa yɛ mumɔŋ kɛ gbɔmɔtsoŋ. Shia-kɛ-shia nitsumɔ lɛ ni wɔkɛ wɔhe woɔ mli daa lɛ yeɔ ebuaa ni wɔhiɛ hiɔ wɔhe nɔ yɛ mumɔŋ, wɔnáa henilee kpakpa, ni ehaa wɔmiishɛɛnamɔ yaa hiɛ. Yɛ mɛi babaoo agbɛfaŋ lɛ, gbɔmɔtsoŋ kanyamɔ, kɛ kpɔiaŋgbɔlemɔ ni yɔɔ mli lɛ eha amɛgbɔmɔtsoŋ hewalɛnamɔ etee hiɛ.
4 Kɛji akɛ wɔkwɛ sɛɛnamɔi babaoo ni jɛɔ shia-kɛ-shia nitsumɔ lɛ mli kɛbahaa wɔ kɛ mɛi ni boɔ wɔ toi lɛ, eka shi faŋŋ akɛ wɔyɛ yiŋtoi ni wɔɔdamɔ nɔ ‘wɔya nɔ wɔfee enɛ,’ no ji akɛ, ni wɔkɛ wɔhe awo mli kɛmɔ shi ni wɔfee lɛ daa.— 1 Tim. 4:16.