Suɔmɔ Kpo Ni Wɔɔjie Wɔtsɔɔ Nyɔŋmɔ Kɛ Wɔnaanyo
1 Beni Yesu haa mɔ ni bi lɛ akɛ: “Tsɔɔlɔ, te nɔ ni ji Mla lɛ mli kita wuluŋ?” lɛ hetoo lɛ, ekɛɛ akɛ: “‘Suɔmɔ Nuŋtsɔ [Yehowa] o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’”—Mat. 22:36-39.
2 Suɔmɔ ni mli kwɔ ni Yesu yɔɔ kɛha Nyɔŋmɔ lɛ je kpo faŋŋ yɛ bɔ ni ehi shi lɛ mli. Ekɛɛ akɛ: “Miŋmaa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.” (Yoh. 4:34) Suɔmɔ krɔŋŋ ni eyɔɔ kɛha enaanyo lɛ tsirɛ lɛ koni eshiɛ Yehowa Maŋtsɛyeli lɛ he sanekpakpa lɛ etsɔɔ kɛ ekaa. Etsa mɛi ahelai hu. Ni kwɛ suɔmɔ ni mli wa waa ni anaa yɛ ewala ni ekɛha akɛ kpɔmɔ nɔ yɛ adesai ahewɔ lɛ hu! Mɛɛ gbɛ nɔ wɔɔtsɔ wɔkase Yesu yɛ suɔmɔ ni wɔɔjie kpo wɔtsɔɔ Nyɔŋmɔ kɛ wɔnaanyo lɛ mli?
Gbɛ Ni Aaatsɔ Nɔ Ajie Suɔmɔ Kpo
3 Maŋtsɛyeli lɛ he sanekpakpa lɛ ni wɔɔjaje wɔtsɔɔ mɛi krokomɛi lɛ ji gbɛ titri ni wɔɔtsɔ nɔ wɔfee enɛ. Ehe miihia ni aha gbɔmɛi lɛ nɔdaamɔ nɔ kɛha hiɛnɔkamɔ kɛ adafitswaa ni baaye abua amɛ ni amɛtsu jaramɔ bei nɛɛ ahe nii. (2 Tim. 3:1) Esa akɛ hemɔkɛyeli ni wɔyɔɔ yɛ Nyɔŋmɔ Maŋtsɛyeli lɛ mli lɛ atsirɛ wɔ ni wɔkɛ suɔmɔ kɛ ekaa awie he ni wɔha mɛi fɛɛ ana hegbɛ ni amɛnu anɔkwale lɛ. Anɔkwale ni kɔɔ Nyɔŋmɔ Maŋtsɛyeli lɛ kɛ eyiŋtoo yɛ shikpɔŋ lɛ he lɛ he wiemɔ woɔ ehiɛ nyam. Ani wɔyɛ suɔmɔ ni tamɔ nɛkɛ kɛha Nyɔŋmɔ kɛ wɔnaanyo? Ani wɔmiina gbɛfaŋnɔ ni da yɛ Maŋtsɛyeli shiɛmɔ nitsumɔ lɛ mli? Ani wɔŋɔɔ hegbɛi ni wɔnaa ni wɔkɛaaye wɔwekumɛi, wɔnanemɛi, kɛ mɛi krokomɛi odase trukaa lɛ ni wɔkɛtsuɔ nii? Esa akɛ wɔteŋ mɔ fɛɛ mɔ ajie suɔmɔ ni eyɔɔ kɛha Nyɔŋmɔ kɛ enaanyo lɛ kpo ni ana enɛ yɛ faŋŋ mli.
4 Ekolɛ mɛi komɛi nuɔ he akɛ mɛi ni he esa kɛ mɛi ni amɛle woloŋ waa lɛ diɛŋtsɛ ji mɛi ni he saa akɛ amɛkɛ shɛɛ sane ni he hiaa nɛɛ ayaha. Yɛ no najiaŋ lɛ, wɔ hekɛnɔfɔɔ yɛ Yehowa mli lɛ ji nɔ ni he hiaa. (Luka 11:13; 1 Kor. 1:26, 29, 31) Suɔmɔ ni wɔyɔɔ kɛha Nyɔŋmɔ kɛ wɔnaanyo lɛ baaye abua wɔ ni wɔye henumɔi ni ejaaa lɛ anɔ ni wɔna miishɛɛ diɛŋtsɛ yɛ sɔɔmɔ lɛ mli. Kɛji wɔkai akɛ wɔmiiye wɔmiibua gbɔmɛi ni awie amɛhe akɛ “etɔ amɛ ni amɛfee yuuyaa tamɔ tooi ni bɛ kwɛlɔ lɛ,” no lɛ wɔsusuŋ wɔhe babaoo dɔŋŋ.—Mat. 9:35, 36.
Bɔ Ni Ooofee Ona Mli Gbɛfaŋnɔ Yɛ March
5 Yɛ March nyɔŋ lɛ mli lɛ, wɔyɛ hegbɛ fɛfɛo ni wɔkɛaajie suɔmɔ ni wɔyɔɔ kɛha Nyɔŋmɔ kɛ wɔnaanyo lɛ kpo kɛtsɔ Asafo lɛ woji memeji lɛ ekomɛi ni wɔkɛaaha kɛha yelikɛbuamɔ ni ji ₵125 kɛha ekome lɛ nɔ. Nɛkɛ woji memeji nɛɛ wieɔ saneyitsei babaoo he, ni ŋwanejee ko bɛ he akɛ amɛteŋ ekomɛi baatee mɛi ni yɔɔ wɔshikpɔŋkuku lɛ mli lɛ akɔnɔ shi. Nɛkɛ woji nɛɛ etsɔɔ sɛɛnamɔ ni yɔɔ amɛhe lɛ yɛ bei pii amli kɛtsɔ mɛi babaoo ni etsɔ nomɛi anɔ amɛhere anɔkwale lɛ nɔ lɛ nɔ. No hewɔ lɛ kɛ wɔyɛ nɛkɛ woji nɛɛ ekomɛi yɛ wɔ wojiatoo he lɛ, aawo wɔ hewalɛ ni wɔkɛ ekaa atsu he nii ni wɔkɛha mɛi ni yɔɔ wiemɔ lɛ he miishɛɛ ni woji nɛɛ baanyɛ aye abua amɛ kɛba wala gbɛ lɛ nɔ lɛ.
6 Esa akɛ asafoi ni yɔɔ woji memeji nɛɛ ekomɛi yɛ amɛ wojiatoo hei lɛ aŋɔ hegbɛ ni jara fa tafaa be nɛɛ kɛhaa lɛ ni amɛkɛ woji nɛɛ fɛɛ aha moŋ fe ni amɛaabɔ mɔdɛŋ ni amɛkɛbaha Asafo lɛ ekoŋŋ. Nyɛbia asafoi ni bɛŋkɛ nyɛ lɛ akɛ aleee nɔ amɛbaaŋɔ fioo ko lo. Esa akɛ abɔ mɔdɛŋ fɛɛ ni aaanyɛ ni akɛ woji nɛɛ aha yɛ March nyɔŋ lɛ mli.
7 Nyɛkaia ni nyɛkɛ shia-kɛ-shia kadimɔ wolo ni aŋmala nɔ jogbaŋŋ atsua nii hu. Enɛ he bahiaa waa yɛ be mli ni wɔtsuɔ wɔshikpɔŋkuku lɛ mli nii shii abɔ lɛ. Kɛ ona mɔ ko ni yɔɔ wiemɔ lɛ he miishɛɛ lɛ, bɔɔ mɔdɛŋ ni ole mɔ lɛ gbɛi. Ŋmalamɔ woji fɛɛ ni okɛha lɛ kɛ miishɛɛ ni ejie kpo etsɔɔ lɛ kɛji eheee wolo ni okɛha lɛ lɛ po lɛ. Kadimɔ nɔ ni nyɛwie he lɛ yɛ owolo lɛ nɔ, kɛ nɔ ni mɔ lɛ na he miishɛɛ waa, kɛ be mli ni abaanyɛ ana lɛ yɛ shia. Agbɛnɛ hu, ŋmaa shiai amli ni otee ni onaaa mɔ ko yɛ jɛmɛ lɛ adrɛs lɛ hu jogbaŋŋ. Kɛ wɔto nibii ahe gbɛjianɔ yɛ enɛɛmɛi amli lɛ, ebaaye ebua wɔ ni wɔwo yibii babaoo yɛ sɔɔmɔ lɛ mli.
8 Kitai wuji enyɔ lɛ anɔyeli he miihia waa kɛha Kristofoi ni yɔɔ ŋmɛnɛ lɛ taakɛ eji yɛ klɛŋklɛŋ afi oha lɛ mli lɛ. Eba akɛ wɔ fɛɛ wɔɔbɔ mɔdɛŋ ni wɔjie suɔmɔ ni wɔyɔɔ kɛha Nyɔŋmɔ kɛ wɔnaanyo lɛ kpo kɛtsɔ Yehowa Maŋtsɛyeli lɛ he adafitswaa yɛ hegbɛ fɛɛ hegbɛ ni wɔɔna yɛ March mli lɛ nɔ!