Sanebimɔ He
● Mɛɛ otii esa akɛ aha ehi jwɛŋmɔ mli yɛ be mli ni asafoi ni wieɔ wiemɔi enyɔ loo nɔ ni fa fe nakai tsuɔ shikpɔŋkuku kome mli nii lɛ?
Wɔ Maŋtsɛyeli Sɔɔmɔ ni je kpo yɛ September 1984 lɛ wie yɛ “Sanekpakpa lɛ Kɛhamɔ” shishi akɛ: “Shiɛlɔi ni yɔɔ asafoi sɔrɔtoi nɛɛ amli lɛ agbala amɛjwɛŋmɔ kɛya mɛi ni wieɔ amɛwiemɔi lɛ anɔ titri.” Nɔ hewɔ lɛ ji akɛ akɛ asafo shikpɔŋkuku ni ahaa yɛ hei ni awieɔ wiemɔi sɔrɔtoi yɛ lɛ haa yɛ wiemɔi lɛ anaa. Asafoi ni tsuɔ nii yɛ shikpɔŋkuku ni awieɔ wiemɔi sɔrɔtoi yɛ mli lɛ mli lɛ baana akɛ ebaahi jogbaŋŋ akɛ amɛaaŋmala shiai ni esaaa ni amɛshiɛlɔi lɛ yaa jɛmɛ lɛ fɛɛ amɛshwie shi. Eji asafoi ni enɛ kɔɔ amɛhe lɛ amli sɔɔmɔ nɔkwɛlɔi lɛ agbɛnaa nii akɛ amɛaato gbɛjianɔ ni hi jogbaŋŋ koni akɛtsu shikpɔŋkuku lɛ mli nii ni emɔ shi ni amɛtsɔɔ mɛi ni yɔɔ wiemɔ lɛ he miishɛɛ lɛ gbɛ kɛya asafo ni sa lɛ mli. Esa akɛ afee enɛ koni ekaba asafoi ni wieɔ wiemɔi sɔrɔtoi lɛ amli shiɛlɔi lɛ miigba shiatsɛmɛi lɛ anaa, ekolɛ yɛ nakai gbi lɛ leebi loo nakai shwane lɛ nɔŋŋ. Wɔmiisumɔ ni “wɔkatsi Kristo sanekpakpa lɛ gbɛ.”—1 Kor. 9:12.
Kɛji ehe miihia ni afee tsakemɔi komɛi akɛni mɛi efã kɛshi jɛmɛ hewɔ lɛ, no lɛ esa akɛ akɛ mɛi ni yɔɔ wiemɔi lɛ he miishɛɛ lɛ agbɛi kɛ amɛ adrɛs aha asafo ni sa lɛ mra. Enɛ baaye abua ni eha nibii ni aŋmala ashwie shi yɛ shikpɔŋkuku lɛ he lɛ aja pɛpɛɛpɛ be fɛɛ be. Suɔmɔ, mɛi ahe susumɔ, niiashishinumɔ, hiɛshikamɔ, kɛ ekomefeemɔ ni wɔkɛaatsu nii lɛ he miihia.—Fil. 4:5.
Yɛ be mli ni shiɛlɔi lɛ kɛ amɛhe woɔ gbɛjegbɛi anɔ nitsumɔ, trukaa odaseyeli, kɛ ekrokomɛi amli lɛ, amɛbaanyɛ amɛhiɛ woji yɛ wiemɔi sɔrɔtoi amli. Shi kɛlɛ, kɛ amɛmiiya shia kɛ shia yɛ shikpɔŋkuku ko ni asafoi enyɔ loo no ni fa fe nakai ni wieɔ wiemɔi sɔrɔtoi tsuɔ mli nii lɛ mli lɛ, no lɛ esaaa ni wɔkɛ woji haa yɛ wiemɔi krokomɛi amli ja wiemɔ ni wɔ asafo lɛ wieɔ lɛ pɛ mli. Nyɛhaa ehia nyɛjwɛŋmɔ mli akɛ ato shikpɔŋkukuji ni yɔɔ nɛkɛ hei nɛɛ anaa yɛ wiemɔi ni awieɔ yɛ mli lɛ naa, no hewɔ lɛ esa akɛ shiɛlɔi ni kɛ woji haa lɛ hu atsɔɔ shiatsɛ ni yɔɔ wiemɔ lɛ he miishɛɛ lɛ ni eya asafoŋ kpeei ni afeɔ yɛ wiemɔ ni enuɔ shishi jogbaŋŋ loo nɔ ni esumɔɔ lɛ mli.
Eka shi faŋŋ akɛ bei komɛi lɛ wɔ mɔdɛŋbɔɔ lɛ baabote mɛi krokomɛi anɔ mli. Shi taakɛ ajaje yɛ sane ni wɔtsɛ yisɛɛ yɛ yiteŋgbɛ lɛ mli lɛ, “ehi akɛ wɔɔha ahi wɔjwɛŋmɔ mli titri akɛ, yɛ be mli ni wɔshiɛɔ lɛ, wɔyiŋtoo ji ni wɔfee kaselɔi-ani wɔtsɔɔ anɔkwale lɛ. (Mat. 28:19, 20) Esa akɛ atsɔɔ nii yɛ wiemɔ ni gbɔmɛi lɛ nuɔ shishi jogbaŋŋ lɛ mli. (1 Kor. 14:9) ” Kɛ wɔkɛ wɔsɔɔmɔ nitsumɔ lɛ mli be titri tsu mɛi ni nuɔ wa wiemɔ aloo amɛsumɔɔ wiemɔ ni asafo ni wɔkɛbɔɔ lɛ wieɔ lɛ ahe nii lɛ, no lɛ sɛɛnamɔ babaoo baanyɛ ajɛ mli aba ni wɔɔye wɔbua mɛi babaoo lolo ni amɛbana yiwalaheremɔ.