Nyɛhe Awaa Yɛ Mumɔŋ, Nyɛhia Shi Yɛ Hetsemɔ Mli Nyɛhaa Yehowa Sɔɔmɔ

¹ Yehowa kɛ shiwoo ko ni miiba mli yɛ wɔhiŋmɛiiaŋ ha yɛ Yesaia 60:22 akɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa. Kɛ eshɛ ebe lɛ, mi, Yehowa, maha afee oya!” Kɛ wɔsusu maŋ ko he lɛ, nɔ ni wɔfeɔ he mfoniri nɔŋŋ ji gbɔmɛi babaoo ko ni abua amɛ naa akɛ kuu ni nɔ kome ni amɛ fɛɛ amɛyɔɔ he miishɛɛ egbala amɛ ni miitsu nii yɛ nɔyeli gbɛjianɔtoo ko shishi.

² Sɔɔmɔ nitsumɔ akɔntaabuu kɛha 1991 lɛ tsɔɔ sanekpakpa lɛ he shiɛlɔi ayifalɛ ni fe fɛɛ ni ji 4,278,820 yɛ jeŋ fɛɛ, ni eji oha fɛɛ mli 6.5 nɔyaa fe nyɛsɛɛ afi lɛ nɔ. Lɛlɛŋ, Yehowa ebua gbɔmɛi anɔkwafoi babaoo ni miisumɔ ni amɛtsi amɛhe kɛjɛ yiwalɛ gbɛjianɔtoo nɛɛ he, ni amɛbatsɔmɔ Mesia Maŋtsɛyeli nɔyeli ni yɔɔ e-Bi, Yesu Kristo shishi lɛ shishibii anɔkwafoi lɛ anaa. Mɛi ni abua amɛnaa nɛɛ ayifalɛ yaa hiɛ daa afi. Wɔmli filiɔ wɔ akɛ wɔfata maŋ ni abaanyɛ atsɔɔ akɛ eji jeŋ hee asafo nɛɛ he diɛŋtsɛ. Mɛi ni ba 1991 Kaimɔ lɛ ni aye lɛ shishi ji 10,650,158, oha fɛɛ mli 7 nɔyaa fe 1990 yifalɛ lɛ. Enɛ tsɔɔ gbɔmɛi babaoo lolo ni baanyɛ abafata wɔhe akɛ Maŋtsɛyeli lɛ shishibii.

³ Shi, wɔyɔseɔ akɛ, jeee aŋkroaŋkroi ni fata yibɔ ni ba Kaimɔ lɛ shishi ni atsɔɔ yɛ yiteŋgbɛ nɛɛ he lɛ fɛɛ ji mɛi ni amɛtsi amɛhe kɛjɛ je nɛɛ he kɛyashɛ he ni abaanyɛ akpɛlɛ amɛnɔ kwraa akɛ Yehowa webii. Gbɔmɛi ni jɛ jeŋmaji fɛɛ mli ‘miiho yuu kɛmiiba Yehowa we lɛ,’ shi ehe miihia ni ‘atsɔɔ amɛ egbɛi lɛ’ jogbaŋŋ kɛmɔ shi, koni amɛnyɛ ‘amɛnyiɛ etempɔŋi lɛ anɔ.’ (Yes. 2:​2-4) Mɛi ni ba Kaimɔ lɛ shishi lɛ ateŋ mɛi fe akpekpei ejwɛ ekpɛlɛ Nyɔŋmɔ tsɔsemɔ nɔ, ni amɛna mumɔŋ hewalɛ, ni enɛ ekanya amɛ koni amɛhiɛ jeŋba ni he tse mli koni amɛhe asa akɛ mɛi ni baanyɛ ana Maŋtsɛyeli-shiɛmɔ nitsumɔ ni yaa nɔ bianɛ lɛ mli gbɛfaŋnɔ. (Mat. 24:14) Mɛi ni tamɔ nɛkɛ yɛ shidaamɔ kpakpa yɛ Yehowa hiɛ, ni amɛnaa sɛɛnamɔi ni jɛɔ gbɛjianɔtoi ni yɔɔ naakpɛɛ ni ekɛhaa amɛ lɛ mli baa lɛ fɛɛ mli ŋɔɔmɔ. Mɛni esa akɛ mɛi ni eshwɛ ni fe akpekpei ekpaa lɛ afee kɛji amɛ hu amɛbaanyɛ amɛfee mɛi ni he wa yɛ mumɔŋ ni amɛhe tse kɛha Yehowa sɔɔmɔ?

⁴ Esa akɛ ‘amɛpele hemɔkɛyeli lɛ he waa.’ (Yuda 3) Kɛ amɛna amɛhala akɛ amɛaanyiɛ yɛ Yehowa gbɛ nɔ pɛ lɛ, amɛbajeɔ Abonsam nɔnyɛɛ shishi kɛtsɔɔ kaai kɛ su fɔŋ ni baanyɛ ana amɛnɔ hewalɛ lɛ nɔ. Ni taakɛ Paulo fee lɛ, esa akɛ amɛkɛ amɛhiɛ afɔ Yehowa nɔ kɛha hewalɛ ni baaha amɛnyɛ amɛŋmɛ amɛtsui shi yɛ mli. (Fil. 4:13) Yehowa tsɔɔ mɛi ni amɛhemɔkɛyeli mli ewa momo lɛ anɔ ekɛ hewalɛ haa mɛi ni tamɔ nɛkɛ. Paulo wo ŋaa akɛ “wɔ mɛi ni yɔɔ hewalɛ lɛ, esa akɛ wɔkpeeɔ mɛi ni bɛ hewalɛ lɛ kɛ amɛgbɔjɔmɔi lɛ.” (Rom. 15:​1, 2) Kɛ mɛi ni yɔɔ hewalɛ lɛ kɛ mɛi ni egbɔjɔ lɛ fee ekome lɛ, hewalɛ ni aaaha adamɔ shi shiŋŋ baa. “Mɛi enyɔ hi fe mɔ kome. . . . Kɛ mɔ ko batua amɛteŋ mɔ kome lɛ, mɛi enyɔ lɛ aaate shi awo lɛ”​—Jaj. 4:​9,12.

⁵ Enɛ tsɔɔ akɛ mɛi heei lɛ kɛ amɛhiɛ fɔɔ wɔ nɔ yɛ gbɛ ni ja nɔ akɛ mɛi ni amɛbaatsɔ amɛnɔ ni amɛnine ashɛ hewalɛ nɔ kɛjɛ Yehowa dɛŋ. Esa akɛ wɔteŋ mɛi ni wɔji Kristofoi ni wɔjɔɔ wɔhe nɔ lɛ aha wɔhe awa yɛ mumɔŋ kɛji wɔɔnyɛ wɔye wɔbua mɛi heei lɛ. Kristofoi ni he wa lɛ nyɛɔ amɛkɛ ‘mumɔŋ nikeenii haa,’ ni nɔ ni jɛɔ mli baa ji ‘hewalɛwoo ni akɛhaa he.’ (Rom. 1:​11, 12) Enɛ ji gbɛi titrii ni Yehowa kɛtsuɔ nii koni ekɛfee wɔ ekome ni eha wɔ fɛɛ ‘wɔfee shiŋŋ ni wɔhe awa’ lɛ ateŋ ekome.​—1 Pet. 5:​9-11.

⁶ Esa akɛ wɔha efee oti ni ma wɔhiɛ akɛ wɔɔye wɔbua nɛkɛ mɛi heei nɛɛ koni yɛ nakai beaŋ nɔŋŋ hu lɛ wɔhiɛ ahi wɔmumɔŋ hiamɔ nii anɔ. (Mat. 5:⁠3) Wɔmumɔŋ shihilɛ lɛ ji nɔ ni haa wɔnaa hewalɛ. Enɛ ji su ko ni esa akɛ wɔkwɛ ni efee ehee daa ni wɔwaje lɛ kɛtsɔ mumɔŋ niyenii ni wɔɔye daa nɔ. Yehowa tsɔɔ egbɛjianɔtoo lɛ nɔ ekɛ e-Wiemɔ lɛ kasemɔ he gbɛjianɔtoo ni ŋmɛɔ pɛpɛɛpɛ haa wɔ. Daa otsi asafoŋ kpeei enumɔ lɛ yeɔ ebuaa babaoo yɛ hewalɛ ni ewoɔ wɔ, ‘kɛ kanyamɔ ni ekanyaa wɔ kɛyaa suɔmɔ kɛ nitsumɔi kpakpai ahe’ lɛ mli.​—Heb. 10:​24.

⁷ Kɛ akɛ aŋkroaŋkroi kɛ weku nikasemɔ mli sui kpakpai fata he lɛ, ehaa kpeei nɛɛ amli sɛɛnamɔi lɛ feɔ babaoo. Ákɛ shishijee oti ni ma wɔhiɛ lɛ, esa akɛ wɔ fɛɛ wɔkane ni wɔsusu daa gbi ŋmalɛ lɛ he, ni wɔkɛ Biblia kanemɔ he gbɛjianɔtoo ni atsɔɔ yɛ Teokrase Sɔɔmɔ Skul Gbɛjianɔtoo lɛ mli lɛ anyiɛ, ni wɔtsɔ hiɛ wɔsaa wɔhe kɛha Asafo Woloŋ Nikasemɔ kɛ Buu-Mɔɔ Nikasemɔ lɛ. Weku fɛɛ weku asusu bɔ ni amɛbaato enɛ he gbɛjianɔ amɛha lɛ he, ni akwɛ ni afee yɛ amɛbe naa pɛpɛɛpɛ. Agbɛnɛ, esa akɛ weku yitso lɛ akwɛ koni nikasemɔ gbɛjianɔtoo lɛ akɔ weku lɛ mumɔŋ hiamɔ nii pɔtɛɛ ko he. Yɛ nɛkɛ gbɛ nɔ lɛ, ‘akɛaatswa shia lɛ ama shi, . . . ni akɛaaha edamɔ shi.’ (Abɛi 24:⁠3) Kɛji wɔkɛ hiɛdɔɔ woɔ wɔ nikasemɔ sui amli akɛ aŋkroaŋkroi kɛ wekui lɛ, wɔbaanyɛ wɔna hekɛnɔfɔɔ akɛ Yehowa baajɔɔ wɔ, ni emumɔ lɛ baaye abua wɔ ni wɔŋmɛ wɔtsui shi yɛ kaai sɔrɔtoi amli yɛ omanyeyeli mli​—Yak. 1:​2, 3; 1 Pet 4:⁠11.

⁸ Ni Wɔɔhi Shi akɛ Mɛi ni He Tse ni Anaaa Wɔhe Sane Ko Ata: Yɛ be mli ni Yehowa kɛ miishɛɛ fɔɔ nine etsɛɔ wɔ ni wɔtsi wɔbɛŋkɛ lɛ lɛ, yɛ nakai beaŋ nɔŋŋ lɛ efeɔ lɛ faŋŋ akɛ, nɔ ni adamɔɔ nɔ afeɔ enɛ ji hemɔkɛyeli ni wɔɔna yɛ Yesu la ni efɔse eshwie shi “ni tsumɔɔ wɔhe kɛjɛɔ esha fɛɛ esha mli” lɛ mli. (1 Yoh. 1:7; kwɛmɔ Hebribii 9:14 hu.) Wɔbaanyɛ wɔya nɔ wɔwaje wɔhemɔkɛyeli kɛtsɔ Nyɔŋmɔ Wiemɔ lɛ ni wɔɔkase yɛ teemɔŋ kɛ nɔ ni wɔkaseɔ lɛ kɛ nitsumɔ nɔ. Mɛi komɛi ŋmɛɛɔ he yɛ sɛɛ mli, ekolɛ yɛ mumɔŋ niyenii lɛ ni amɛyeee dɔŋŋ loo yɛ mɔdɛŋ fioo ko pɛ ni amɛbɔɔ akɛ amɛkɛaatsu nii yɛ amɛshihilɛ mli lɛ hewɔ. Enɛ haa amɛbafeɔ mɛi ni Satan baanyɛ atutua amɛ be fɛɛ be. Mɛi komɛi egbɔjɔ yɛ mumɔŋ, ni amɛkpa shiɛmɔ. Nɔ ni yɔɔ mɔbɔ hu ji akɛ, mɛi komɛi eŋmɛɛ amɛhe amɛha efɔŋfeemɔ ni hiɛdɔɔ yɔɔ mli, ni no eha ashwie amɛ kɛjɛ asafo lɛ mli. Paulo bɔ kɔkɔ akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.” (1 Kor. 10:12) Kɛji wɔje gbɛ wɔku wɔhiɛ wɔshwie nikasemɔ, kpeeiyaa, kɛ shiɛmɔ nɔ lɛ, sui gbohii kɛ kaai baanyɛ atsɔ wɔ tsɔne yɛ gbɛ ni waaa kwraa nɔ.​—Heb. 2:1; 2 Pet. 2:​20-22

⁹ Ehe miihia ni wɔha wɔhe atse yɛ gbɛ fɛɛ gbɛ nɔ: yɛ gbɔmɔtsoŋ, jwɛŋmɔŋ, mumɔŋ, kɛ jeŋba mli. (2 Kor. 7:⁠1) Je ni ebɔle wɔhe lɛ miifite ni eeba shi daa gbi. Abonsam kɛ ŋaatsɔɔ gbɛi babaoo miiba koni ekɛtsɔ wɔ tsɔne. Mumɔŋ hewalɛ mli ni wɔɔhi be fɛɛ be lɛ haŋ wɔfee ‘mɛi ni akɛ ejwɛŋmɔi lɛ etee wɔ.’ (2 Kor. 2:11) Tsɔsemɔ kɛ ŋaawoo ni wɔnine shɛɔ nɔ kɛjɛɔ Yehowa gbɛjianɔtoo lɛ dɛŋ lɛ yeɔ ebuaa wɔ koni wɔyoo ni wɔte shi wɔwo sui gbohii lɛ.

¹⁰ Gbɛnaa nii ka mɛi ni nyiɛɔ hiɛ yɛ asafo lɛ mli lɛ anɔ akɛ amɛto okadi kpakpa amɛfɔ shi amɛha mɛi krokomɛi kɛtsɔ amɛhe ni aaawa ni amɛhi shi yɛ hetsemɔ mli lɛ nɔ. Paulo ma gbɛnaa nii nɛɛ nɔ mi beni ekɛɛ: “Nyɛkaia nyɛtsɔɔlɔi lɛ, . . . nyɛkwɛa amɛjeŋba lɛ naagbee ni nyɛkasea amɛhemɔkɛyeli lɛ.” (Heb. 13:⁠7) Ehe miihia waa ni onukpai kɛ asafoŋ sɔɔlɔi ni ahala amɛ lɛ afee mɛi ni toɔ okadi kpakpa yɛ amɛ diɛŋtsɛ amɛjeŋba mli kɛ agbɛnɛ amɛgbɛnaa nii anɔkwɛmɔ akɛ weku yitsei lɛ hu mli. Eba akɛ amɛbɔ mɔdɛŋ ni amɛtamɔ obalanyo Timoteo, ni awo lɛ hewalɛ akɛ “okɛ ohe ato okadi . . . yɛ wiemɔ mli, yɛ jeŋba mli, yɛ suɔmɔ mli, yɛ hemɔkɛyeli mli, yɛ hetsemɔ mli” lɛ. (1 Tim. 4:​12; 1 Pet. 5:⁠3) Gbɛnaa nii ka wɔteŋ mɛi fɛɛ ni eshwɛ lɛ hu nɔ akɛ wɔto okadi kpakpa kɛtsɔ jeŋba kpakpa mlihiɛmɔ nɔ. Bei pii lɛ, mɛi heei tsɔɔ nɔ ni amɛnaa yɛ wɔmli lɛ anɔ amɛkojoɔ anɔkwale lɛ kɛ agbɛnɛ Yehowa gbɛjianɔtoo lɛ. Wɔmiisumɔ ni wɔna nɔmimaa akɛ nɔ ni amɛnaa lɛ woɔ amɛ hewalɛ koni amɛbatao gbɛhe yɛ Yehowa gbɛjianɔtoo ni he tse lɛ mli.

¹¹ Naabuamɔ kɛmiiha yibaamɔ kɛmiitsɔ “amanehulu kpeteŋkpele” lɛ mli lɛ miiya hiɛ lolo kɛ foi (Kpoj. 7:14) Mɛi ni he bawaa yɛ mumɔŋ ni amɛhiɔ shi yɛ hetsemɔ mli lɛ pɛ baaje mli yɛ naagbee. Babaoo damɔ nɛkɛ nibii nɛɛ anɔ: (1) teemɔŋ nikasemɔ sui kpakpai ni aaahiɛ mli kɛ Nyɔŋmɔ Wiemɔ lɛ nɔjwɛŋmɔ; (2) mɛi ahe miishɛɛ diɛŋtsɛ ni wɔɔna kɛ bɔ ni wɔshweɔ akɛ wɔɔwo mɛi krokomɛi hewalɛ; kɛ (3) ni wɔɔtsu nii yɛ ekomefeemɔ mli ni wɔkɛhiɛ jeŋba ni he tse ni baawo Yehowa gbɛi lɛ hiɛ nyam mli. Nibii nɛɛ ni wɔɔfee lɛ baaha wɔna nɔmimaa akɛ Yehowa baajɔɔ wɔ ni ebaabu wɔhe beni je nɛɛ baa enaagbee lɛ. Wɔbaanyɛ wɔna hekɛnɔfɔɔ akɛ wɔbaafata ‘anɔkwafoi ni Yehowa baa amɛyi’ lɛ ahe.​—Lala 31:⁠24.