Ani Obaanyɛ Osɔmɔ Yehowa akɛ Gbɛgbalɔ
1 Wielɔ ko bi yɛ “La Hiɛlɔi” Kpokpaa Wulu nɔ kpee lɛ shishi akɛ: “Ani obaanyɛ ofee gbɛgbalɔ? Ani obaafee gbɛgbalɔ?” Eyɔse akɛ nɛkɛ sanebimɔi nɛɛ ahe hiaa ejaakɛ Harmagedon ebɛŋkɛ kpaakpa, ni enɛ haa shiɛmɔ nitsumɔ lɛ bafeɔ nɔ ni he hiaa fe be fɛɛ.—1 Kor. 7:29a.
2 Ŋwanejee ko bɛ he akɛ gbɛgbamɔ ji nitsumɔ ko ni wa waa. Ebiɔ he-tsɔsemɔ kɛ gbɛjianɔtoo kpakpa. Ni kɛlɛ, wɔ deŋmegbomɔ lɛ “efeee yaka” yɛ sɔɔmɔ nitsumɔ lɛ mli. (1 Kor. 15:58) Ani abaanyɛ awie nakai nɔŋŋ yɛ nitsumɔi krokomɛi ni wɔhalaa akɛ wɔɔdi sɛɛ, ni nomɛi heɔ wɔbe kɛ wɔhewalɛ lɛ ahe? Suɔmɔ ni Kristofoi yɔɔ amɛhaa Yehowa lɛ nyɛɔ amɛnɔ ni amɛkɛ ekaa tsuɔ nii yɛ esɔɔmɔ mli, ni ekaa ni ayɔɔ yɛ Yehowa sɔɔmɔ mli lɛ eha mɛi pii ebote gbɛgbamɔ nitsumɔ lɛ mli.—1 Yoh. 5:3: Kpoj. 4:11
3 Yehowa sɔɔlɔi obalaŋtai pii ni gbeɔ nɔtsamɔ skul naa yɛ bei nɛɛ amli lɛ miisusu gbɛgbamɔ nitsumɔ lɛ he kɛ hiɛdɔɔ. Enɛ sa jogbaŋŋ diɛŋtsɛ. Mɛɛ wala be fɛɛ mli nitsumɔ kroko he hiaa fe be-fɛɛ sɔɔmɔ nitsumɔ Iɛ? (Mat. 6:33) Esa akɛ ashiɛ Nyɔŋmɔ Maŋtsɛyeli lɛ he sanekpakpa lɛ atsɔɔ; Yehowa nitsumɔ nɛ, ni mɛɛ hegbɛ po eji nɛkɛ, akɛ mɔ ko kɛ ehe fɛɛ aaawo mli kɛjɛ egbekɛbiiashi tɔŋŋ!—Mat. 24:14.
4 Ani nyɛ fɔlɔi lɛ nyɛwoɔ nyɛbii lɛ hewalɛ ni amɛkɛ amɛhe awo be-fɛɛ sɔomɔ lɛ mli? Ani obii lɛ nuɔ shishi faŋŋ akɛ oosumɔ ni amɛkɛ amɛtsui, amɛsusuma, amɛjwɛŋmɔ, kɛ amɛhewalɛ fɛɛ atsu nii yɛ nɛkɛ nitsumɔ ni sa waa nɛɛ mli? (Mar. 12:30) Shiɛlɔi obalaŋtai pii saa amɛhe amɛnaa daa gbɛgbamɔ nitsumɔ lɛ kɛtsɔ gbɛgbalɔi awalɔi asɔɔmɔ lɛ mli gbɛfaŋnɔ ni amɛnaa lɛ nɔ, yɛ hegbɛ fɛɛ hegbɛ ni amɛnaa lɛ mli beni amɛyaa skul lɛ. Eka shi faŋŋ akɛ he ni atuɔ ahaa Yehowa nɛkɛ lɛ haa etsui nyaa!—Abɛi 27:11.
5 Eji anɔkwale akɛ, jeee mɔ fɛɛ mɔ yɔɔ hegbɛi ni ŋmɛɔ gbɛ kɛhaa gbɛgbamɔ sɔɔmɔ lɛ. Shi kɛlɛ, kɛ óbote gbalashihilɛ mli loo oji oshijafonyo jio, obalaŋta loo oda yɛ afii amli jio, ani okɛ hiɛdɔɔ kɛ sɔlemɔ esusu sɔɔmɔ ni ooosɔmɔ Yehowa akɛ sanekpakpa lɛ he gbɛgbalɔ sɔɔlɔ lɛ he? (Kol. 3:23) Obalaŋtai ni ebote gbalashihllɛ mli lɛ ateŋ mɛi pii miitsu nii waa ni amɛkɛlɛɛ amɛsɔɔmɔ lɛ mli koni amɛteŋ mɔ kome loo amɛyi enyɔ lɛ fɛɛ amɛfee gbɛgbalɔi.
6 Kɛ oshihilɛ eŋmɛŋ bo gbɛ ni ofee daa gbɛgbalɔ amrɔ nɛɛ, ani obaanyɛ ofee gbɛgbalɔ awalɔ? Eka shi faŋŋ ekolɛ shiɛlɔi pii yɛ nyɛ asafo lɛ mli ni miito gbɛjianɔ ni amɛfee nakai yɛ April mli. Ani obaanyɛ ofata amɛhe? Eyɛ mli akɛ Yehowa anɔkwa sɔɔlɔi fɛɛ naa jɔɔmɔi babaoo moŋ, shi jɔɔmɔi krokomɛi babaoo miimɛ mɛi ni yɔɔ hegbɛ ni amɛkɛ be babaoo aaatsu nii yɛ Maŋtsɛyeli sɔɔmɔ lɛ mli ni amɛkɛtao gbɔmɛi ni tamɔ gwantɛŋi lɛ.—Bɔf. 20:35.