Ani Obaanyɛ Ofee Babaoo Ni Okɛwo Yehowa Hiɛ Nyam?
1 Sanebimɔ ko ni he hiaa waa, ni sa akɛ wɔ fɛɛ wɔsusu he nɛ. Akɛ wɔ-Nuŋtsɔ, Yesu Kristo kaselɔi anɔkwafoi lɛ, wɔwoɔ wɔ-Nyɔŋmɔ lɛ hiɛ nyam ŋmɛnɛ kɛtsɔɔ egbɛi lɛ ni wɔjajeɔ wɔtsɔɔ yɛ faŋŋ mli lɛ nɔ. Kɛji wɔɔna Nyɔŋmɔ hiɛ duromɔ lɛ, no lɛ gbɛnaa nii ni esa akɛ wɔtsu he nii nɛ. (Mar. 13:10; Luka 4:18; Bɔf. 4:20; Heb. 13:15) Kwɛ hegbɛ ni anyɛŋ atsɔɔ bɔ ni eda ha—hɛɛ, woo diɛŋtsɛ—akɛ wɔkɛ nɛkɛ sanekpakpa nɛɛ ayaha “tooi” ni eshwɛ ni egbɛ eshwa, ni baanyɛ amɛbafee Yehowa jeŋ muu fɛɛ toikuu lɛ fa lɛ!—Yoh. 10:16.
2 Ani bo kɛ obii lɛ baanyɛ afee babaoo kɛwo Yehowa hiɛ nyam, kɛtsɔ nyɛgbɛfaŋnɔ ni nyɛaaha eya hiɛ yɛ shiɛmɔ mli lɛ nɔ? Nyɛnyɛmimɛi hii kɛ yei lɛ miibote gbɛgbamɔ sɔɔmɔ lɛ mli waa, ni amɛyifalɛ miiya hiɛ daa nɛɛ yɛ je lɛŋ fɛɛ. Yɛ April 1992 nyɔŋ lɛ nɔ lɛ, yibɔ ni fe fɛɛ ni ji 5,230 kɛ amɛhe wo gbɛgbalɔi krɛdɛɛ, daa gbɛgbalɔi, aloo gbɛgbalɔi awalɔi asɔɔmɔ lɛ mli yɛ Ghana Ani bo diɛŋtsɛ oje gbɛ osusu gbɛgbamɔ sɔɔmɔ lɛ he jogbaŋŋ? Ani owoɔ obii lɛ hewalɛ ni amɛdi be-fɛɛ sɔɔmɔ lɛ sɛɛ akɛ amɛwala be mli nitsumɔ?
3 Mɛni hewɔ osusuuu bɔ ni bo diɛŋtsɛ onuɔ gbɛgbamɔ sɔɔmɔ lɛ he ohaa lɛ he? Be fɛɛ be ni abaatsi nakai sane lɛ tã lɛ, ani okɛ oyaiyeli muɔ sane naa kuku kɛkɛ akɛ oshihilɛ eŋmɛŋ bo gbɛ ni osɔmɔ akɛ gbɛgbalɔ? Eji anɔkwale akɛ jeee mɔ fɛɛ mɔ baanyɛ asɔmɔ akɛ gbɛgbalɔ. Ŋmalɛ naa gbɛnaa nii kɛ naatsii nibii krokomɛi tsiɔ mɛi pii agbɛ ni amɛnyɛɛɛ amɛsɔmɔ kɛ amɛbe fɛɛ. (1 Tim. 5:8) Shi ani otsɔ sɔlemɔ nɔ osusu sane nɛɛ he yɛ bei nɛɛ amli?Ani nyɛsusu sane lɛ he akɛ weku, koni nyɛkwɛ akɛ ani ekolɛ nyɛteŋ mɔ kome baanyɛ afee gbɛgbalɔ? Buu-Mɔɔ ni je kpo yɛ July 1, 1983 lɛ wie nɛkɛ wiemɔ ni kanyaa niiahesusumɔ waa nɛɛ yɛ ebaafa 17 lɛ akɛ: “Yɛ anɔkwale mli lɛ, esa akɛ Kristofonyo sɔɔlɔ fɛɛ sɔɔlɔ kɛ sɔlemɔ asusu he akɛ ani eeenyɛ etsɔ gbɛgbalɔ aloo enyɛŋ efee nakai. South Afrika nyɛminuu ko kɛ eŋa ni amɛkɛ amɛhe ewo gbɛgbamɔ sɔɔmɔ lɛ mli afii nyɔŋma kɛ enumɔ lɛ kɛɛ: ‘Mɛni hewɔ wɔkɛ wɔhe ewo gbɛgbamɔ sɔɔmɔ lɛ mli? Ani wɔbaanyɛ wɔbu wɔhe bem yɛ Yehowa hiɛ eji wɔfeee nakai kulɛ?’ Mɛi pii ni jeee gbɛgbalɔi lɛ aaanyɛ abi sane ni fata he nɛɛ akɛ: ‘Ani gbɛgbalɔ ni mijeee lɛ baaha manyɛ maye bem yɛ Yehowa hiɛ?’”
4 Buu-Mɔɔ mli sane kroko ni je kpo yɛ sane nɛɛ he lɛ wie wiemɔ ni yɔɔ faŋŋ nɛɛ akɛ: “Esa akɛ wɔteŋ mɔ fɛɛ mɔ aye lɛ diɛŋtsɛ ehe anɔkwa. Ani okɛɔ akɛ, ‘Mumɔ lɛ miishwe, shi heloo lɛ egbɔjɔ”? Shi ani mumɔ lɛ miishwe lɛlɛŋ? Nyɛhaa wɔtsia wɔhe kɛjɛa heloo lɛ gbɔjɔmɔ ni wɔkɛaatsu nii akɛ naajiemɔ kɛha bɔ ni mumɔ lɛ sumɔɔɔ akɛ efeɔ nakai lɛ he.”—w78 8/15 bf. 23.
5 Fɔlɔi ni Taoɔ ni Amɛbii Aye Omanye: Abɛi 15:20 maa nɔ mi kɛhaa wɔ akɛ: “Bi nilelɔ haa etsɛ naa miishɛɛ.” Ŋwanejee ko bɛ he akɛ fɔlɔi ni sheɔ Nyɔŋmɔ gbeyei lɛ amii shɛɔ amɛhe kɛ amɛbihii kɛ amɛbiyei lɛ di shihilɛ gbɛ ni tsɔɔ amɛhe nɔ ni amɛjɔɔ amɛha Yehowa lɛ sɛɛ. Shi kɛlɛ, ebaŋ trukaa akɛ obii lɛ diɛŋtsɛ baahala nilee gbɛ nɛɛ. Je nɛɛ lakamɔ lɛ yɛ hewalɛ waa. Fɔlɔi, nyɛ diɛŋtsɛ nyɛsui kpakpai lɛ ji nɔ ni haa nyɛbii lɛ hu naa nakai sui lɛ eko. Kɛji owieɔ be-fɛɛ sɔɔmɔ lɛ mli sɛɛnamɔi ahe wiemɔi kpakpai be fɛɛ be, ni owoɔ obii obalaŋtai lɛ hewalɛ ni amɛtao akɛ amɛkɛ gbɛgbalɔi ni etuu amɛhe amɛha lɛ aaabɔ, ni oheɔ oyeɔ kɛ nɔmimaa akɛ be-fɛɛ sɔɔmɔ lɛ ji shihilɛ mli nitsumɔ ni woo yɔɔ mli fe fɛɛ ni obii lɛ aaanyɛ amɛtsu lɛ, no lɛ ŋwanejee ko bɛ he akɛ nɛkɛ su kpakpa ni ojieɔ lɛ kpo nɛɛ baana obii lɛ anɔ hewalɛ kpakpa. Ye obua amɛ ni amɛna sɛɛnamɔ ni yɔɔ gbɛi kpakpa ni amɛaana yɛ Yehowa hiɛ mɔŋ fe gbɔmɛi ahiɛ lɛ he.
6 Obalaŋtai, Abɛi 22:1 maa nɔ ni sa akɛ nyɛhala lɛ nɔ mi, akɛ: “Gbɛi kpakpa hi fe nii babaoo, ni hiɛnyam hi fe jwiɛtɛi kɛ shika.” Mɛɛ gbɛi nɛkɛ obaafee oha ohe? Susumɔ hii kɛ yei ni wɔkaneɔ amɛhe saji yɛ Biblia lɛ mli, ni amɛna gbɛi kpakpa yɛ Nyɔŋmɔ hiɛ-kɛtsɔ sɔɔmɔ ni jɛ henɔjɔɔmɔ mli nɔ lɛ he okwɛ. Mɔ ko tamɔ Luka nɛkɛ, tsofatsɛ ni asumɔɔ esane waa lɛ, kɛ Henok, mɔ ni kɛ anɔkwa Nyɔŋmɔ lɛ nyiɛ lɛ. Samuel na tsɔsemɔ ni hi fe fɛɛ ni eeenyɛ ena, ni eje esɔɔmɔ shishi yɛ Yehowa sɔlemɔ we lɛ beni eji gbekɛ kwraa. Ani osusuɔ akɛ nɛkɛ tsuji anɔkwafoi nɛɛ shwa amɛhe yɛ be ko mli yɛ nɔ ni amɛhala nɛɛ hewɔ? Mɛni hewɔ amɛbaafee nakai? Amɛ fɛɛ amɛhi shihilɛ ni ŋɔɔ, ni wo yibii, ni yɔɔ miishɛɛ hu mli. Ni amɛna Yehowa hiɛ duromɔ ni hiɔ shi daa! —Lala 110:3; 148:12, 13; Abɛi 20:29a; 1 Tim. 4:8b.
7 Kɛ bii ye omanye yɛ shihilɛ mli lɛ, ehaa amɛfɔlɔi nuɔ he akɛ awo amɛnɔ waa. Awoɔ nii ni amɛkɛwo nɛkɛ “Yehowa gboshinii” nɛɛ atsɔsemɔ, amɛ kãmɔ, kɛ amɛnitsɔɔmɔ mli lɛ he nyɔmɔ shii abɔ kɛtekeɔ nɔ. (Lala 127:3) Mɛni baanyɛ aha fɔlɔ ko anu he akɛ awo enɔ waa, fe ni ebinuu loo ebiyoo miifee bɔ fɛɛ bɔ ni eeenyɛ ni ekɛwo Yehowa hiɛ nyam? Ŋmɛnɛŋmɛnɛ beaŋ obalaŋtai babaoo miinyiɛ gbɔmɛi tamɔ Luka, Henok, kɛ Samuel najifaamɔi asɛɛ, taakɛ wolo ko ni aŋma tsɔɔ mli lɛ: “Miye afii 16. Mibɔi daa gbɛgbamɔ . . . yɛ mibaptisimɔ sɛɛ nyɔji nɛɛhu mli, ni mina jɔɔmɔi babaoo kɛjɛ Yehowa dɛŋ kɛjɛ nakai beaŋ fɛɛ kɛbaa. . . . Gbɛgbamɔ hu yeɔ ebuaa mɔ yɛ skul. Kulɛ tsutsu ko lɛ, miklasbii lɛ kɛ Odasefonyo ni miji lɛ yeɔ mihe fɛo. Shi amrɔ nɛɛ, akɛni ebiɔ ni makase nii babaoo yɛ teemɔŋ hewɔ lɛ, ‘minyɛɔ ‘minaa hetoo mihaa mɔ ni bɔɔ mi ahora lɛ.’”
8 Woloŋlee ni Baawaje Mɔ yɛ Sɔɔmɔ Nitsumɔ Iɛ Mli: Amrɔ nɛɛ, wɔbaanyɛ wɔwa ni wɔsusu sane ni kɔɔ skul nikasemɔ he lɛ he. Biɛ ji he ko ni susumɔ ni ŋmɛɔ pɛpɛɛpɛ he miihia waa titri yɛ. November 1, 1992, Buu-Mɔɔ lɛ wie sane ni yitso ji “Wolo Kasemɔ ni Yiŋtoo Yɔɔ He” lɛ he. Ama nɛkɛ oti nɛɛ nɔ mi yɛ yitso bibioo ni ji “Wolo Kasemɔ ni Sa” lɛ shishi akɛ: “Eba akɛ Kristofoi anyɛ akwɛ amɛ diɛŋtsɛ amɛhe, kɛ amɛji be-fɛɛ gbɛgbalɔ sɔɔlɔi po. (2 Tesalonikabii 3:10-12) . . . Woloŋlee enyiɛ he hiaa Kristofonyo obalaŋta koni no aha ena bulɛ eha nɛkɛ Biblia mli Shishitoo mlai nɛɛ ni enyɛ etsu e-Kristofoi agbɛnaa nii ahe nii? . . . [Nyɔmɔwoo] enyiɛ abaanyɛ awie he akɛ ‘nɔ ni fa bɔ ni sa’ kɛha mɛi ni taoɔ amɛfee sanekpakpa lɛ he sɔɔlɔi gbɛgbalɔi‘? Bei pii lɛ ehe hiaa ni mɛi ni tamɔ nɛkɛ ana nitsumɔ ni akɛ be fa tsuɔ, koni amɛkɛ ‘jatsu’ akafɔ amɛnyɛmimɛi loo amɛwekui anɔ.—1 Tesalonikabii 2:9.”
9 Kɛji mɔ ko ni miisumɔ ni ekɛ ehe awo gbɛgbamɔ sɔɔmɔ lɛ mli lɛ nuɔ he akɛ woloŋlee ni yaa hiɛ saŋŋ he miihia lɛ, bɔni afee ni eye ebua ni enyɛ ekɛ ehe awo be-fɛɛ sɔɔmɔ lɛ mli lɛ, no lɛ November 1, 1992 Buu-Mɔɔ lɛ woɔ ŋaa akɛ: “Odasefonyo obalaŋta lɛ baafee jogbaŋŋ ni kɛji eeehi lɛ, ekase nii lɛ beni eyɔɔ shia, koni enyɛ etsɔ nakai feemɔ nɔ ehiɛ Kristofoi anikasemɔ sui amli daa, kɛ kpeeiyaa, kɛ shiɛmɔ nitsumɔ lɛ hu.”
10 Niiashikpamɔ nɛɛ jɛ Takoradi, ni ekɔɔ obalanyo ko ni eye afii 22 ni ehe bahia akɛ eya skul yɛ Takoradi Polytechnic, eyɛ mli akɛ etsui emɔ gbɛgbamɔ sɔɔmɔ lɛ, he. Beni eyɔɔ pɔlitɛknik lɛ, ekɛ ehe wo gbɛgbalɔi awalɔi sɔɔmɔ lɛ mli. Etipɛŋfoi lɛ ye ehe fɛo, ni amɛkɛɛ lɛ akɛ bɔ fɛɛ bɔ ni fee lɛ, eyeŋ omanye yɛ kaa ni amɛbaafee lɛ mli. Hetoo ni ehaa amɛ daa ji: “Taomɔ Nyɔŋmɔ Maŋtsɛyeli lɛ kɛ ejalɛ lɛ tsutsu.” Ekɛ he-tsɔsemɔ tsu nii waa, ni eteɔ shi mra daa leebi ni ekɛ ŋmɛlɛtswai enyɔ saa ehe kɛhaa eklas nikasemɔ, kɛkɛ lɛ kɛ akpa skul shwane lɛ, ekɛ ehe ewo shiɛmɔi nitsumɔ lɛ mli. Skul muu lɛ fɛɛ naa kpɛ amɛhe beni nɛkɛ obalaŋta nɛɛ ye gbɛhe ni ji etɛ yɛ kaa krɛdɛɛ ko ni afee koni akɛhala mɛi etɛ ni le nii fe fɛɛ ni aha amɛyatsa skul nɔ yɛ he kroko lɛ mli. Skul nikaselɔ ni ye gbɛhe ni ji enyɔ lɛ hu ji mɔ ko ni yɔɔ wiemɔ lɛ he miishɛɛ, ni wɔnyɛminuu gbɛgbalɔ nɛɛ kɛlɛ kaseɔ Biblia lɛ yɛ skul. Ni Odasefonyo obalaŋta kroko ni yɔɔ ekaa waa yɛ skul lɛ ji skul nikaselɔ ni ye klɛŋklɛŋ gbɛhe lɛ.
11 Onukpai Tsuɔ Amɛgbɛfaŋnɔ: Asafoŋ onukpai ni naa nitsumɔ ni gbɛgbalɔi lɛ tsuɔ lɛ he miishɛɛ waa lɛ kɛ hewalɛwoo kpele haa nɛkɛ sɔɔlɔi ni yɔɔ ekaa nɛɛ. Onukpai lɛ yɛ he miishɛɛ akɛ amɛaafee enɛ ejaakɛ amɛle akɛ gbɛgbalɔi ni tsuɔ nii waa, ni amɛwoɔ yibii babaoo lɛ ji jɔɔmɔ kpele kɛha amɛ asafo lɛ. Yɛ be mli ni amɛye afi loo nɔ yɛ daa gbɛgbamɔ sɔɔmɔ lɛ mli lɛ, nɛkɛ mɛi nɛɛ ahe basaa kɛhaa tsɔsemɔ babaoo namɔ yɛ ‘Gbɛgbamɔ Sɔɔmɔ Skul lɛ mli Nikasemɔ lɛ efee dɛŋdade ko ni he yɔɔ sɛɛnamɔ waa yɛ bɔ ni gbɛgbalɔi lɛ anitsumɔ baamɔ shi aha lɛ hiɛyaa mli. Eyɛ mli akɛ gbɛgbalɔi lɛ nyiɛɔ nitsumɔ lɛ hiɛ tuuŋtu moŋ, shi amɛ hu hewalɛwoo ni jɛ suɔmɔ mli he miihia amɛ, ni esa akɛ onukpai lɛ ahiɛ ahi amɛhe nɔ ni amɛtsu nɛkɛ hiamɔ nɛɛ he nii.—1 Pet. 5:1-3.
12 Mɛɛ gbɛ nɔ onukpai lɛ baatsɔ amɛwo gbɛgbamɔ nitsumɔ lɛ mli hewalɛ? Shishijee hé ni hi jogbaŋŋ ji ni amɛkwɛ yɛ be kɛ bei amli akɛ namɛi baanyɛ aya amɛhiɛ kɛyashɛ nɛkɛ hegbɛ nɛɛ he. Onukpai lɛ baanyɛ abɛŋkɛ aŋkroaŋkroi ni etamɔ nɔ ni amɛyɔɔ shihilɛ ni hi mli ni amɛbaanyɛ amɛfee gbɛgbalɔi lɛ, kɛ mɛi babaoo ni feɔ gbɛgbalɔi awalɔi daa lɛ, kɛ mɛi ni eba nitsumɔ mli hejɔɔmɔ, shianyɛmɛi, kɛ skulbii. Eyɛ mli akɛ esaaa ni ahaa mɔ ko nuɔ he akɛ sɔ̃ ka enɔ akɛ ekɛ ehe awo mli moŋ, shi kɛ akɛ hewalɛwoo ni anyɛɔ atsuɔ he nii fioo ko ha mɛi ni sumɔɔ akɛ amɛaafee eko, shi amɛshashaoɔ shi lɛ, ekolɛ amɛbaayoo akɛ amɛ hu amɛbaanyɛ amɛkɛ amɛhe awo mli.
13 Kɛ akɛ hewalɛwoo miiha mɛi ni sumɔɔ ni amɛkɛ amɛhe awo mli lɛ, esa akɛ onukpai lɛ akai akɛ ehe ehiaaa ni mɔ ni taoɔ aŋma gbɛbimɔ wolo lɛ kɛ nyɔji babaoo atsu nii yɛ gbɛgbalɔi awalɔi asɔɔmɔ lɛ mli dani eŋma gbɛbimɔ wolo akɛ daa gbɛgbalɔ (kmGA 9/86 nɔ ni hɔ mli lɛ, kkj. 24-26) Shi kɛlɛ, onukpai lɛ baakwɛ ni amɛna nɔmimaa akɛ mɔ ni taoɔ ekɛ ehe awo mli lɛ baanyɛ ashɛ ŋmɛlɛtswaa taomɔ nii lɛ he.
14 Kɛji asafo lɛ Sɔɔmɔ Ajinafoi Akuu lɛ kwɛ gbɛbimɔ wolo lɛ mli amɛgbe naa ni woloŋmalɔ lɛ kwɛ mli fɛɛ jogbaŋŋ akɛ aha sanebimɔi lɛ fɛɛ ahetoo sɛɛ lɛ, esa akɛ akɛmaje Asafo lɛ oya nɔŋŋ.
15 Esa akɛ woloŋmalɔ lɛ atswa onukpai lɛ adafi yɛ naagbai ni ekolɛ gbɛgbalɔi lɛ eko kɛmiikpe lɛ he. Enɛ he miihia waa, titri lɛ yɛ asafoi ni gbɛgbalɔi babaoo yɔɔ mli lɛ amli. Kɛfata gbɛgbalɔi lɛ anitsumɔ mli ni aaati yɛ sɔɔmɔ afi lɛ naagbee lɛ he, taakɛ abiɔ ni afee yɛ Congregation Analysis Report (S-10) wolo lɛ nɔ lɛ, aakpa woloŋmalɔ lɛ gbɛ akɛ ebaafɔ sɔɔmɔ nɔkwɛlɔ lɛ’ nine ni ekɛ lɛ akpe yɛ March shishijee mli ni amɛkwɛ akɛ ani mɔ ko miigbee shi yɛ ŋmɛlɛtswaa taomɔ nii lɛ he, ni yelikɛbuamɔ ko he miihia lɛ lo. (Kwɛmɔ April 1993 Wɔ Maŋtsɛyeli Sɔɔmɔ lɛ, Adafitswai.) Kɛ akɛ yelikɛbuamɔ ha mra lɛ, no lɛ ekolɛ eeeha gbɛgbalɔ lɛ anyɛ agbe sɔɔmɔ afi lɛ naa yɛ omanyeyeli mli.
16 Gbɛgbalɔi heei lɛ ateŋ mɛi babaoo darako yɛ afii amli ni amɛji mɛi heei hu yɛ anɔkwale lɛ mli. Eka shi faŋŋ mumɔ ni haa amɛkɛ amɛhe haa lɛ haa wɔmli filiɔ wɔ! Shi tsɔsemɔ he miihia nɛkɛ mɛi heei nɛɛ lolo koni amɛna hesaa yɛ shia-kɛ-shia nitsumɔ lɛ mli, ni amɛfee sɛɛsaramɔi ni mɔɔ shi, ni amɛtsɔɔ nii hu yɛ Biblia kasemɔ mli. Kɛ amɛnine shɛɛɛ tsɔsemɔ nɛɛ nɔ lɛ, ekolɛ eeeha mɛi heei nɛɛ anijiaŋ aje wui yɛ afi loo nɔ sɛɛ, ni yɛ naagbee lɛ amɛbaakpa gbɛgbamɔ sɔɔmɔ lɛ yɛ nibii kpakpai ni jɛɛɛ amɛsɔɔmɔ nitsumɔ lɛ mli baaa lɛ hewɔ. Onukpai ni kpaa nii ashi oya lɛ baanyɛ amɛna naagbai bibii po aloo amɛnitsumɔ lɛ shibaa.Kɛ atsu he nii oya ni aye abua gbɛgbalɔ lɛ kɛ enaagba lɛ he nitsumɔ lɛ, no lɛ ekolɛ eeenyɛ etsu nii kɛ afii babaoo ni woɔ yibii.
17 Ani Obaanyɛ Oyasha Loo yɛ Nui ni Yɔɔ Shɔŋŋ Mli? Yesu kaselɔi lɛ ateŋ mɛi komɛi lɛ, wolɛi ni. Bei komɛi lɛ, amɛhɛɔ nyɔɔŋ-nyɔɔŋ fɛɛ, shi amɛyaai lɛ eduuu nɔ ko kwraa. (Yoh. 21:3) Yɛ maŋ nɛɛŋ hei komɛi, he ni ‘gbɔmɛi ahɛɛ’ lɛ etee nɔ aahu afii babaoo lɛ, ekolɛ gbɛgbalɔi lɛ ekomɛi baamu sane naa akɛ “looi” fioo ko pɛ eshwɛ yɛ amɛ asafo lɛ “nui” lɛ amli. (Mat. 4:19) Nɔ ni tamɔɔɔ nakai lɛ, ani wɔnaaa miishɛɛ kɛji wɔkane amaniɛbɔi ni jɛɔ maŋ nɛɛŋ hei krokomɛi kɛ je lɛŋ fɛɛ kɛbaa, he ni shiɛlɔi kɛ gbɛgbalɔi lɛ miifee Biblia mli nikasemɔ babaoo yɛ lɛ? Miishɛɛ ni gbɛgbalɔi kɛ maŋsɛɛ sanekpakpa shiɛlɔi naa mli ŋɔɔmɔ yɛ nɛkɛ shikpɔji nɛɛ anɔ lɛ yɛ faŋŋ. (wGA 92 9/1 bf. 20 kk. 15) No hewɔ lɛ, kɛji hegbɛ yɛ ni gbɛgbalɔi ni tsuɔ nii waa lɛ ateŋ mɛi komɛi baanyɛ aya maŋ nɛɛŋ hei krokomɛi ni hiamɔ babaoo yɔɔ lɛ, no lɛ esa akɛ amɛkɛ amɛ nitsumɔ he nine lɛ asusu enɛ he dani amɛfee nakai.
18 Ekolɛ mɛi komɛi je gbɛgbamɔ shishi klɛŋklɛŋ kwraa ejaakɛ amɛle akɛ no ji nɔ ni ja gbɛ akɛ amɛfee, shi amɛsusuɔ he akɛ ani amɛbaaa nyɛ amɛyɛ omanye lo. Ekolɛ amɛŋmala gbɛbimɔ wolo lɛ kɛ yiŋkɔshikɔshi-feemɔ fioo. Kɛjɛ shishijee lɛ, ekolɛ nɔ ko bibioo pɛ jɛɔ amɛshiɛmɔ nitsumɔ lɛ mli baa. Shi, yɛ be ko sɛɛ lɛ, amɛhesaa tee hiɛ, ni ana Yehowa jɔɔmɔ he odaseyeli yɛ amɛnitsumɔ lɛ nɔ. No hewɔ lɛ, amɛmiishɛɛ kɛ hekɛnɔfɔɔ lɛ bada. Yɛ mɛi komɛi agbɛfaŋ lɛ, gbɛgbamɔ ebafee nɔ ni amɛdamɔɔ nɔ amɛnaa hegbɛ kɛhaa Betel sɔɔmɔ, Gilead tsɔsemɔ kɛ maŋsɛɛ sanekpakpa shiɛmɔ nitsumɔ lɛ, kɛ gbɛfaa nitsumɔ lɛ po.
19 Ekolɛ enyɛŋ eba lɛ akɛ obaafa kɛyahi shikpɔŋ kroko nɔ aloo ni ona hegbɛ kɛha Gilead tsɔsemɔ, shi hegbɛi yɛ lolo kɛha bo ni okɛaasha loo yɛ nui krokomɛi amli yɛ maŋ nɛɛŋ, kɛji shikpɔŋkuku ni otsuɔ mli nii amrɔ nɛɛ wooo yibii kwraa lɛ. Ekolɛ nɛkɛ he kroko hilɛ nɛɛ baabi tsakemɔi komɛi yɛ oshihilɛ mli, shi mumɔŋ sɛɛnamɔi lɛ baafee sɛɛnamɔi kpele diɛŋtsɛ.—Mat. 6:19-21.
20 Aloo kɛji oshihilɛ ŋmɛɔ gbɛ lɛ, obaanyɛ oyaye Obua asafo ko ni bɛŋkɛ nyɛ, yɛ nyɛkpokpaa lɛ mli. Kɛji osa lɛ, no lɛ nyɛ kpokpaa nɔkwɛlɔ lɛ baana he miishɛɛ akɛ ekɛ ŋaawooi ni kɔɔ asafoi ni yɔɔ kpokpaa lɛ mli, ni gbɛgbalɔ kroko he baaba sɛɛnamɔ aha amɛ lɛ ahe lɛ baaha bo.
21 Gbɛgbalɔi kɛ shiɛlɔi komɛi enyɛ amɛtsu hiamɔ ni yɔɔ hei ni amɛyɔɔ lɛ ahe nii yɛ be mli ni amɛyɔɔ amɛ diɛŋtsɛ amɛshia. Ekolɛ amɛnuɔ wiemɔ kroko hu. Ani onaa akɛ mɛi ni yɔɔ oshikpɔŋkuku lɛ mli lɛ ateŋ mɛi babaoo ji mɛi ni wieɔ wiemɔ kroko kwraa? Mɛi ni wieɔ wiemɔ kroko lɛ baanyɛ afee yelikɛbuamɔ kpele yɛ mɛi fɛɛ ni aaaha Maŋtsɛyeli lɛ he sane lɛ ashɛ amɛŋɔɔ lɛ gbɛfaŋ. Eyɛ mli akɛ enɛ baanyɛ afee kaa diɛŋtsɛ moŋ, shi ehe baanyɛ aba sɛɛnamɔ babaoo.—1 Tim. 2:4; Tito 2:11.
22 Kɛji amrɔ nɛɛ oofee nɔ fɛɛ nɔ ni ooonyɛ ni okɛwo Yehowa hiɛ nyam lɛ, no lɛ omli afili bo yɛ sɔɔmɔ hegbɛi ni oyɔɔ amrɔ nɛɛ lɛ ahe. Kɛ onuɔ he akɛ obaanyɛ ofee babaoo lɛ, no lɛ okɛ sane lɛ afɔ Yehowa hiɛ yɛ sɔlemɔ mli. Okɛ jwɛŋmɔ kpakpa apɛi tsakemɔi ni oshihilɛ baaŋmɛ bo gbɛ ni ofee lɛ amli okwɛ. Okɛ onukpa ko ni yɔɔ gbɛgbamɔ mumɔ aloo kpokpaa nɔkwɛlɔ lɛ asusu ogbɛjianɔtoo lɛ he. Agbɛnɛ kɛji otsɔ sɔlemɔ nɔ okpɛ oyiŋ, bɔ ni obaanyɛ otsu he nii lɛ, dii sɛɛ ni otsu he nii pɛpɛɛpɛ, kɛ hekɛnɔfɔɔ yɛ Yehowa shiwoo nɛɛ mli akɛ ebaawo mɛi ni woɔ ehiɛ nyam lɛ hu ahiɛ nyam.—Heb. 13:5, 6; 1 Sam. 2:30.