Teemɔ Miishɛɛ Shi yɛ Nyɔŋmɔ Toiŋjɔlɛ Maŋtsɛyeli lɛ He
1 Yɛ February nyɔŋ lɛ mli lɛ, wɔkɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ baatsu nii. Esa akɛ oti ni ma wɔhiɛ lɛ afee akɛ wɔbaaye wɔbua mɛi ni tsui ja, ni yɔɔ wɔ shikpɔŋkuku lɛ mli lɛ ni amɛna hiɛsɔɔ amɛha Nyɔŋmɔ Maŋtsɛyeli lɛ kɛ nɔ ni ebaatsu lɛ hu. Saji ni wɔɔbi amɛ ni amɛtsɔɔ amɛjwɛŋmɔ lɛ baanyɛ aye abua wɔ ni wɔfee enɛ.
2 Kɛ okɛ miishɛɛ ŋa mɔ lɛ, obaanyɛ okɛɛ lɛ akɛ:
◼ “Tsakemɔi ni yɔɔ naakpɛɛ miiba yɛ nɔyelii amli yɛ je lɛŋ he fɛɛ he, ni bei pii lɛ awieɔ toiŋjɔlɛ ni ataoɔ aná lɛ he. Ani onuɔ he akɛ abaaná anɔkwa toiŋjɔlɛ gbi ko kɛ̃? [Ŋmɛɛ gbɛ ni ewie.] Eyɛ mli akɛ mɛi pii kɛ hiɛnɔkamɔ kwɛɔ adesai nɔyelɔi akɛ amɛkɛ toiŋjɔlɛ baaba moŋ, shi kadimɔ gbɛ ni Nyɔŋmɔ ewo shi akɛ ebaatsɔ nɔ ekɛ toiŋjɔlɛ aba lɛ, yɛ Lala 46:10. [Kanemɔ.] Mɛɛ tsakemɔi osusuɔ akɛ Nyɔŋmɔ nifeemɔ nɛɛ kɛbaaba shikpɔŋ nɔ?” [Bo shiatsɛ lɛ hetoo lɛ toi, koni no sɛɛ lɛ ogbele Obaanyɛ Ohi Shi Kɛya Naanɔ wolo lɛ baafa 156-8 ni nyɛsusu mfonirii lɛ ahe.] Yɛ no sɛɛ lɛ, obaanyɛ otsa nɔ okɛ wolo lɛ aha lɛ. Too gbɛjianɔ kɛha sɛɛsaramɔ ni nyɛkɛsusu sanebimɔ ni ji “Mɛni Nyɔŋmɔ Maŋtsɛyeli baanyɛ atsu?” lɛ he, kɛtsɔ Obaanyɛ Ohi Shi Kɛya Naanɔ wolo lɛ yitso 19 kɛ nitsumɔ nɔ. Kɛji shiatsɛ lɛ heee wolo lɛ, no lɛ okɛ Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ aha lɛ.
3 Aloo obaanyɛ okɛɛ akɛ:
◼ “Mɛi babaoo susuɔ naagbai ni haoɔ mɔ waa ni wɔ fɛɛ wɔkɛkpeɔ daa gbi lɛ ahe waa. Ani onuɔ he akɛ hiɛnɔkamɔ ko yɛ akɛ wɔɔye wɔhe kɛjɛ naagbai nɛɛ ahe be ko? [Ŋmɛɛ gbɛ ni ewie.] Ekolɛ mɛi komɛi nuɔ he akɛ jeee Nyɔŋmɔ he sane ko ji wɔnaagbai nɛɛ. Shi, kadimɔ nɔ ni ewo shi akɛ ebaafee, yɛ Kpojiemɔ 21:3, 4.” Kanemɔ ŋmalɛ lɛ. No sɛɛ lɛ, obaanyɛ okɛ Obaanyɛ Ohi Shi Kɛya Naanɔ wolo lɛ, aloo wolo tɛtrɛɛ hee, aloo Ani Je Nɛɛ Baaya nɔ Ahi Shi? dɛhiɛmɔ wolo lɛ aha lɛ. Kɛ́ okɛ dɛhiɛmɔ wolo ha lɛ lɛ, no lɛ nyɛbaanyɛ nyɛsusu saji ni yɔɔ baafa 3, yɛ yitso ni ji “Je Nɛɛ Wɔsɛɛ Be” shishi lɛ he. Obaanyɛ okpɛ oyiŋ yɛ wolo kroko ni obaasumɔ ni okɛha lɛ he. Kɛ okɛ Ani Nyɔŋmɔ Susuɔ Wɔhe Lɛlɛŋ? wolo bibioo lɛ ha lɛ, obaanyɛ obi akɛ: “Mɛni hewɔ Nyɔŋmɔ eŋmɛ amanehulu gbɛ lɛ?” Gbalamɔ ejwɛŋmɔ kɛya fa 6 nɔ yɛ wolo lɛ mli, ni oto gbɛjianɔ ni okɛ lɛ abasusu he be kroko.
4 Obaanyɛ ohala woji tɛtrɛbii heei ni eba lɛ eko mli sane ni okɛtsu nii kɛtsɔ sane ni ohala lɛ mli oti pɔtɛɛ ko ni ooowie he lɛ nɔ.
No sɛɛ lɛ, obaanyɛ okɛ wolo tɛtrɛɛ lɛ atsɔɔ lɛ, ni owie akɛ:
◼ “Sane nɛɛ gbalaa nakai saneyitso lɛ mli jogbaŋŋ. [Kanemɔ wiemɔ kome loo enyɔ ko kɛjɛ mli otsɔɔ lɛ.] Sane lɛ kɛ susumɔi krokomɛi ni baawo bo kɛ oweku lɛ hewalɛ waa hu haa. Wɔbaasumɔ ni wɔshi wolo nɛɛ kɛ ehefatalɔ wolo tɛtrɛɛ nɛɛ hu wɔha bo.” Kɛ shiatsɛ lɛ he woji tɛtrɛbii lɛ, no lɛ esa akɛ oto gbɛjianɔ kɛha sɛɛsaramɔ.
5 Bei pii lɛ, mɛi ayiŋ futuɔ amɛ ŋmɛnɛ kɛji ebalɛ akɛ aatao ale he ni abaaya kɛha naagbai ni adesai kɛkpeɔ lɛ anaa tsabaa namɔ. Wɔna hegbɛ akɛ wɔha amɛle hiɛnɔkamɔ ni mli ka shi faŋŋ kɛha wɔsɛɛ be. (Bɔf. 17:27) Eba akɛ wɔkɛ ekaa aaagbala gbɔmɛi ajwɛŋmɔ kɛba Nyɔŋmɔ Maŋtsɛyeli, ni ji toiŋjɔlɛ anɔkwa jɛɛhe lɛ nɔ.