Saamɔ Biblia Kaselɔi Kɛha Sɔɔmɔ Lɛ
1 Yiŋtoo kome ni yɔɔ Biblia kasemɔ sɛɛ ji ni afee kaselɔi heei, nitsulɔi ni baafata wɔhe ni wɔtsɔɔ mɛi krokomɛi anii. (Mat. 28:19, 20) No hewɔ lɛ nikasemɔ lɛ yiŋtoo jeee ni akɛ nilee aha kɛkɛ; esa akɛ etɛo hemɔkɛyeli ni jɛ tsuiŋ ewo wɔ nikaselɔi lɛ amli ni esaa amɛ koni amɛgba amɛ hiɛnɔkamɔ lɛ he sane amɛtsɔɔ mɛi krokomɛi. (2 Kor. 4:13) Mɛɛ gbɛi ni anyɛɔ akɛtsuɔ nii anɔ wɔɔnyɛ wɔtsɔ wɔye wɔbua amɛ ni amɛhe asa kɛha mɛi krokomɛi anitsɔɔmɔ?—2 Tim. 2:2.
2 Okɛ Sɔɔmɔ lɛ Ama Shi akɛ Oti ni Esa akɛ Ashɛ He: Ha efee faŋŋ kɛjɛ shishijee akɛ, anɔkwa jamɔ kɔɔ “naabu [ni] akɛjajeɔ kɛshɛɔ yiwalaheremɔ he” lɛ he. (Rom. 10:10) Wɔ gbɛi lɛ diɛŋtsɛ, Yehowa Odasefoi, tsɔɔ akɛ esa akɛ wɔwie wɔtsɔɔ mɛi krokomɛi. Ye obua amɛ ni amɛna akɛ nii ni atsɔɔ amɛ lɛ jeee kɛha amɛ pɛ amɛ yiwalaheremɔ. Kɛ amɛbatsɔmɔ tsɔɔlɔi lɛ, mɛi ni boɔ amɛ toi lɛ hu banaa hegbɛ kɛhaa yiwalaheremɔ.—1 Tim. 4:16.
3 Tii Nɔ Ni Akase lɛ Mli: Nii ni akase lɛ ni atiɔ mli yɛ be kɛ bei amli lɛ yeɔ buaa nitsɔɔmɔ babaoo. Eyeɔ ebuaa nikaselɔ lɛ koni eda yɛ mumɔŋ ejaakɛ ehaa anɔkwalei heei ni ekase lɛ kaa ejwɛŋmɔ kɛ etsui mli. Wɔ diɛŋtsɛ wɔkpa enɛ shi yɛ be mli ni wɔhaa sanebimɔi ni akɛtiɔ Buu-Mɔɔ Nikasemɔ lɛ mli lɛ ahetoo lɛ. Ha ohesaamɔ lɛ afee kuku ni emli aka shi, ha onikaselɔ lɛ aha hetoo yɛ lɛ diɛŋtsɛ ewiemɔ mli.
4 Osane-mlitii lɛ baanyɛ afee nɔ ni kɔɔ sɔɔmɔ nitsumɔ lɛ he. Bi sane ko loo tsɔɔmɔ shihilɛ ko ni akɛkpeɔ shii abɔ beni ayeɔ mɛi krokomɛi odase lɛ. Akɛni otsɔ ohe shiatsɛ hewɔ lɛ, ha onikaselɔ lɛ afee nɔ ni ebaawie lɛ he nɔkwɛmɔ nɔ. Jiemɔ eyi yɛ nɔ ni efee lɛ jogbaŋŋ lɛ he, ni okɛ ŋaawoi ni baaye abua lɛ ni ehe asa jogbaŋŋ be kroko mli aha. Tsɔsemɔ ni tamɔ nɛkɛ baatsɔɔ lɛ gbɛ ni eeetsɔ nɔ ni ekɛ nɔ ni ekase lɛ atsu nii ni ebaaha ehe asa ni eya ehiɛ yɛ Biblia lɛ ni ekɛtsuɔ nii lɛ mli.
5 Reasoning Wolo: Kwɛmɔ ni onikaselɔ lɛ ana Reasoning wolo lɛ ekome, ni otsɔɔ lɛ bɔ ni akɛtsuɔ nii ahaa. Tsɔɔmɔ lɛ bɔ ni ekɛ ŋaawoo ni kɔɔ bɔ ni ajeɔ sanegbaa shishi, bɔ ni ahaa Biblia mli sanebimɔi ahetoo, loo bɔ ni atsuɔ shitee-kɛ-woo he nii ahaa lɛ haa wɔ. Okɛ wolo lɛ atsu nii yɛ nikasemɔ lɛ mli ni okɛfee gbɛi ni atsɔɔ nɔ akɛ wiemɔ tsɔɔ mɛi ayiŋ lɛ he nɔkwɛmɔ nɔ. Wolo nɛɛ baanyɛ aha ena hekɛnɔfɔɔ, ebaaha ehesaa yɛ Maŋtsɛyeli sane lɛ jajemɔ mli lɛ aya hiɛ.
6 Maa Bɔ ni Kpeei lɛ Ahe Hiaa Ha lɛ nɔ Mi: Ato asafoŋ kpeei, titri lɛ Sɔɔmɔ Kpee lɛ kɛ Teokrase Sɔɔmɔ Skul lɛ ahe gbɛjianɔ koni esaa wɔ kɛha sɔɔmɔ nitsumɔ lɛ. Atiɔ shishijee nibii ni tsɔɔ odaseyeli ni mɔɔ shi jogbaŋŋ lɛ fɛɛ mli ni mɛi ni yɔɔ niiashikpamɔ ni he esa lɛ feɔ he nɔkwɛmɔ nɔ amɛtsɔɔ. Maa bɔ ni kpeei nɛɛ ahe hiaa ha lɛ nɔ mi, ni ofee bɔ ni ooonyɛ ni okɛye obua lɛ koni eba kpee lɛ. Kpeei baa daa baaha onikaselɔ lɛ ana kanyamɔ ni he hiaa lɛ ni baaha etsɔ Yesu anɔkwa kaselɔ.
7 Nɔ ni esaaa akɛ akuɔ hiɛ ashwieɔ nɔ hu ji bo diɛŋtsɛ onɔkwɛmɔ nɔ lɛ. Osuɔmɔ mli ni ojɛɔ okɛ ohe woɔ shiɛmɔ nitsumɔ lɛ mli daa lɛ tsɔɔ bɔ ni ohiɛ sɔɔ anɔkwale lɛ jogbaŋŋ ha. Gbɛ ni tamɔ nɛkɛ woɔ onikaselɔ lɛ hewalɛ koni efee babaoo yɛ ehemɔkɛyeli lɛ kpojiemɔ mli. (Luka 6:40) Enɛɛmɛi fɛɛ baanyɛ aye abua mɔ hee lɛ koni esusu sɔɔmɔ nitsumɔ lɛ he akɛ hegbɛ, koni eda shi akɛ eena mli gbɛfaŋnɔ.—1 Tim. 1:12.