Susumɔ Mɛi Krokomɛi Ahe—Fa 1
1 Wɔmli filiɔ wɔ akɛ wɔmiina Yehowa webii amumɔŋ shweremɔ lɛ, ni nɔ ni ejɛ mli eba ji asafoi ni ayaa nɔ atoɔ lɛ. Yɛ hei komɛi lɛ, titri lɛ yɛ maŋtiasei wuji amli lɛ, akɛ Maŋtsɛyeli Asa lɛ mli nibii tsuɔ nii fe nine, ni bei komɛi lɛ ebiɔ ni asafoi babaoo akpe yɛ Maŋtsɛyeli Asa kome too lɛ nɔŋŋ mli.
2 Esa akɛ asafo fɛɛ asafo ni kpeɔ yɛ Maŋtsɛyeli Asa lɛ nɔ lɛ aha jɛmɛ atse ni ato nibii ahe gbɛjianɔ jogbaŋŋ dani amɛshi jɛmɛ amɛha nyɛmimɛi ni baa kpaako lɛ. Esa akɛ ato sɛii lɛ jogbaŋŋ, koni ajie woji fɛɛ ni jwere woji ahɔɔmɔ he lɛ yɛ jɛmɛ, ni esa akɛ ahala mɛi anibii fɛɛ ni ashi yɛ Maŋtsɛyeli Asa lɛ mli hei komɛi kɛkɛ lɛ kɛjɛ jɛmɛ. Esa akɛ aha nushwiemɔ hei, wamɔ hei, kɛ hejuu hei lɛ atse, koni akwɛ ni ato samala, papaŋi, kɛ niiaŋyaa he woji ni he baahia lɛ anajiaŋ koni ayatsi jwɛi lɛ hu ashwie dani aya shia.
3 Kɛ etsɛŋ ni abaaje kpee kroko shishi lɛ, esaaa akɛ mɛi ni ba kpee ni tsɔ hiɛ lɛ ni amɛshwɛ lɛ shashaoɔ shi bɔ ni esaaa kɛha tsu lɛ mli shimɔ, koni no akagba gbɛjianɔ ni atoɔ koni aje kpee ni baanyiɛ sɛɛ lɛ shishi lɛ naa. Eeenyɛ eba akɛ anaaa gbɛ yɛ Maŋtsɛyeli Asa lɛ masɛi ni akɛ tsɔnei aaamamɔ, ni ebaafee mlihilɛ akɛ aaashi jɛmɛ oya nɔŋŋ koni mɛi ni baa kpaako lɛ ana he ko ni amɛkɛ amɛtsɔnei lɛ amamɔ. Yɛ gbɛ kroko nɔ lɛ, esaaa akɛ mɛi ni baa kpee ni abaafee yɛ no sɛɛ lɛ baa mra tsɔ bɔ ni no haaa ana gbɛ.
4 Yɛ hei ni esaa asafoi babaoo he yɛ lɛ, ehe hiaa waa ni afee ekome koni ato gbɛjianɔ kɛha Maŋtsɛyeli Asa lɛ mli saamɔ daa otsi. Kɛ eshɛ asafo ni nyɛyɔɔ mli lɛ nɔ kɛha enɛ feemɔ lɛ, nyɛkwɛa koni afee jɛmɛ falefale jogbaŋŋ yɛ oyaiyeli mli hu.
5 Yɛ bei komɛi amli lɛ ehe bahiaa ni asafo fɛɛ asafo atsake ekpeebaa be lɛ, tamɔ be ni kpokpaa nɔkwɛlɔ lɛ baa lɛ nɛkɛ. Kɛ esa asafo kroko he lɛ, esa akɛ onukpai lɛ aha nakai asafo lɛ ale kɛtsɔ hiɛ kwraa, koni amɛ hu amɛnyɛ amɛkɛɛ amɛshiɛlɔi lɛ mra kɛtsɔ hiɛ. Agbɛnɛ hu, kɛ ato gbɛjianɔ ni afã akɛ afee nɔ ko pɔtɛɛ, tamɔ Gbɛgbalɔi Asɔɔmɔ Skul loo onukpai ni yɔɔ kpokpaa lɛ mli lɛ baafee kpee ko lɛ, esa akɛ akɛɛ asafoi krokomɛi lɛ kɛ kpokpaa nɔkwɛlɔi fɛɛ ni esaa amɛhe lɛ, kɛtsɔ hiɛ kwraa; no hewɔ lɛ amɛ hu amɛtoŋ gbɛjianɔ ni amɛkpe yɛ Maŋtsɛyeli Asa lɛ nɔ yɛ nakai be lɛ nɔŋŋ mli.
6 Asai pii yɛ ni asafoi ni kpeɔ yɛ mli lɛ jɛ kpokpai sɔrɔtoi amli. Ehe miihia ni kpokpaa nɔkwɛlɔi ni baaya ayasara asafoi nɛɛ agba amɛsaramɔi lɛ ahe sane amɛtsɔɔ amɛhe. Kɛ nɔkwɛlɔi gbɛfalɔi enyɔ to amɛsaramɔ he gbɛjianɔ yɛ nakai otsi lɛ nɔŋŋ mli lɛ enɛ baaha tsakemɔi ni abaafee lɛ akpe sɛɛ tsɔ loo ekɛ naagbai krokomɛi baaba.
7 Mɛi krokomɛi ahe susumɔ yɛ suɔmɔ mli, sanegbaa kpakpa, gbɛjianɔ ni atsɔɔ hiɛ atoɔ, kɛ ekomefeemɔ baaye abua ni wekukpaa ni yɔɔ miishɛɛ aya nɔ yɛ asafoi lɛ ateŋ ni ebaaha “afee nii fɛɛ bɔ ni yɔɔ fɛo kɛ gbɛnaa-gbɛnaa.”—1 Kor. 14:40.