Ani Yehowa Kaimɔi lɛ Miikanya Wɔ yɛ Mumɔŋ?
1 Lalatsɛ lɛ jie Yehowa yi, ni ekɛɛ: “Okaimɔi lɛ ahe mijwɛŋɔ.” (Lala 119:99, NW) Hebri wiemɔ kɛha “kaimɔi” lɛ hiɛ shishinumɔ akɛ Yehowa kaiɔ wɔ nibii ni aŋmala yɛ emlai, efamɔi, egbɛtsɔɔmɔi, ekitai, kɛ ekpɔi lɛ amli lɛ. Kɛ wɔbo toi lɛ, ebaakanya wɔ yɛ mumɔŋ ni ebaaha wɔna miishɛɛ.—Lala 119:2.
2 Akɛ Yehowa webii lɛ, wɔnine shɛɔ kamɔ kɛ ŋaawoo nɔ be fɛɛ be. Emli babaoo ji nɔ ni wɔnu dã. Eyɛ mli akɛ wɔhiɛ sɔɔ nɛkɛ hewalɛwoo nɛɛ moŋ, shi ebaa lɛ akɛ wɔhiɛ kpaa nɔ. (Yak. 1:25) Yehowa jɛɔ tsuishitoo mli ekɛ suɔmɔ kaimɔi haa wɔ. Bɔfo Petro ŋmala kaimɔi nɛɛ ekomɛi bɔni afee ni ‘etsĩɛ wɔjwɛŋmɔ krɔŋŋ lɛ hiɛ koni wɔkai Nuntsɔ lɛ kitai lɛ.’—2 Pet. 3:1, 2.
3 Akaiɔ wɔ bɔ ni mɔ diɛŋtsɛ teemɔŋ nikasemɔ kɛ kpeei yaa he hiaa waa ha lɛ shii abɔ. Afeɔ enɛ ejaakɛ nɛkɛ nifeemɔi nɛɛ ahe miihia waa kɛha wɔ mumɔŋ shihilɛ kpakpa namɔ.—1 Tim. 4:15; Heb. 10:24, 25.
4 Kaa kpele fe fɛɛ kɛha mɛi komɛi ji Kristofoi anitsumɔ akɛ ashiɛ lɛ he nitsumɔ. Ebiɔ mɔdɛŋbɔɔ, faishitswaa, kɛ hiɛmiamɔ. Eyɛ mli akɛ ebiɔ wɔ nibii babaoo moŋ, shi eyeɔ ebuaa wɔ ní “wɔdamɔ shi shiŋŋ” kɛtsɔ ‘sanekpakpa lɛ saamɔ-kɛ-too ni wɔkɛwoɔ wɔnaji’ lɛ nɔ.—Efes. 6:14, 15.
5 Esa akɛ nɔ ni kanyaa wɔsɔɔmɔ lɛ afe le ni wɔle Yehowa taomɔ nii yɛ wɔjwɛŋmɔŋ kɛkɛ. Bɔfo Paulo kaiɔ wɔ akɛ tsui lɛ ji nɔ ni haa wɔ kanyamɔ ni he hiaa wɔ koni ‘wɔkɛ wɔnaabu ajaje kɛshɛ yiwalaheremɔ he.’ (Rom. 10:10) Kɛ wɔyɛ hemɔkɛyeli ni mli wa ni wɔtsui hu shweɔ Yehowa kaimɔi lɛ, no lɛ ebaatsirɛ wɔ ni wɔwie he wɔtsɔɔ beni wɔjieɔ egbɛi lɛ yi lɛ.—Lala 119:36; Mat. 12:34.
6 Kɛ wɔkɛ mɔdɛŋbɔɔ tsu nitsumɔi kpakpai lɛ, wɔkpaa gbɛ yɛ gbɛ ni ja nɔ akɛ ebaaha wɔna miishɛɛ. (Jaj. 2:10) Paulo tsĩ miishɛɛ ta akɛ Yehowa mumɔ lɛ yibii lɛ eko, ni esa akɛ wɔsumɔ akɛ wɔɔteke nɔ yɛ ekpojiemɔ mli. (Gal. 5:22) Petro kɛfata he akɛ akɛ sɔɔmɔ nitsumɔ ni woɔ yibii, ni haa mɔ naa miishɛɛ, baawo “mɔdɛŋbɔɔ” lɛ he nyɔmɔ.—2 Pet. 1:5-8.
7 Kɛ wɔkɛ kaa ko kpe lɛ, esa akɛ wɔkai bɔfoi lɛ ashidaamɔ ni yɔɔ shiŋŋ beni amɛjaje akɛ: “Wɔnyɛŋ akɛ ja wɔwie nii ni wɔna kɛ nii ni wɔnu lɛ.” (Bɔf. 4:20) Kɛ wɔkai akɛ ‘kɛji wɔfee nibii nɛɛ, wɔbaahere wɔ diɛŋtsɛ kɛ mɛi ni boɔ wɔ toi lɛ ayiwala’ lɛ, ewoɔ wɔ hewalɛ waa koni wɔya nɔ.—1 Tim. 4:16.
8 Wɔmli fuuu aloo edɔɔɔ wɔ akɛ wɔnine shɛɔ kaimɔi anɔ be fɛɛ be. Shi moŋ, wɔhiɛ sɔɔ bɔ ni amɛjara wa waa diɛŋtsɛ lɛ. (Lala 119:129) Wɔdaa shi waa akɛ Yehowa yaa nɔ ekɛ kaimɔi haa wɔ yɛ jaramɔ bei nɛɛ amli, koni ehɛle wɔ shi yɛ mumɔŋ, ni ekanya wɔ hu ni wɔna ekaa yɛ nitsumɔi kpakpai amli!—2 Pet. 1:12, 13.