Nyɛbaa Nyɛjeŋ Bɔ ni Sa Sanekpakpa Lɛ

¹ Akɛ Yehowa Odasefoi lɛ, wɔmiisumɔ ni wɔwo Yehowa gbɛi lɛ hiɛ nyam. Wɔle akɛ wɔjeŋba, wiemɔ, hesaamɔ, kɛ atadewoo baanyɛ ana bɔ ni mɛi krokomɛi buɔ anɔkwa jamɔ amɛhaa lɛ nɔ hewalɛ. Titri lɛ enɛ baa mli anɔkwale yɛ be mli ni wɔyɔɔ wɔ kpeei ashishi. Wɔmiisumɔ ni wɔkwɛ ni nɔ fɛɛ nɔ ni akɛɛɔ ni afeɔ yɛ kpeei ashishi lɛ afee nɔ ni sa sanekpakpa ni woɔ Yehowa hiɛ nyam lɛ.—Fil. 2:4.

² Tɛi ni je lɛ efolɔ eha atade kɛ hesaamɔ lɛ babaoo ehiii haaa Kristofoi. Enɛ ji sane ko ni esa akɛ sanekpakpa lɛ he sɔɔlɔi asusu he jogbaŋŋ. June 1, 1989 Blɔfo Buu-Mɔɔ lɛ baafa 20 kɛɛ akɛ: “Ehe ehiaaa ni wɔwo atadei ni jara wa, shi esa akɛ ehe atse, esa hiɛ, ni yɔɔ hiŋmɛi nɔ. Esa akɛ aspaatere ni wɔwo lɛ hu afee ekpakpa ni ehe tse. Nakai nɔŋŋ hu esa akɛ wɔ gbɔmɔtsei ahe atse, ni esa akɛ wɔfee mɛi ni esaa amɛhe fɛfɛo ni sa jogbaŋŋ hu be mli ni wɔyɔɔ kpeei lɛ fɛɛ eko shishi, ni Asafo Woloŋ Nikasemɔ hu fata he lɛ.”

³ Ní aaaya yɛ be naa lɛ ji mɛi ahesusumɔ kɛ jwɛŋmɔ ni ja ni suɔmɔ fata he lɛ he kadimɔ nii. Yɛ bei komɛi amli lɛ, ekolɛ shihilɛi komɛi ni wɔnyɛɛɛ wɔtsi naa lɛ haŋ wɔyashɛ mra kɛha kpee lɛ feemɔ. Shi ni aaakpe sɛɛ be fɛɛ be lɛ baanyɛ atsɔɔ hiɛsɔɔ ni abɛ kɛha yiŋtoo krɔŋkrɔŋ hewɔ ni afeɔ kpeei lɛ kɛ gbɛnaa nii ni ka mɔ nɔ akɛ akagba mɛi krokomɛi anaa lɛ he hiɛsɔɔ ni abɛ. Bei pii lɛ mɛi ni kpeɔ sɛɛ kɛbaa lɛ gbalaa mɛi krokomɛi ajwɛŋmɔ ni ehaaa amɛna nifeemɔ lɛ he sɛɛ kɛmɔ shi. Ní aaayashɛ mra lɛ tsɔɔ bulɛ ni wɔyɔɔ kɛhaa mɛi fɛɛ ni eba lɛ ahenumɔi kɛ amɛhe susumɔ.

⁴ Esa akɛ suɔmɔ kɛha wɔ nanemɛi aha wɔkwɛ jogbaŋŋ ni wɔkwa mɛi ajwɛŋmɔ gbalamɔ yɛ kpeei ashishi. Wiemɔi bibii, niyeli, amã ni ataa, woji ni agbeleɔ ni egbɛɛɔ, kɛ nushwiemɔ he lɛ yaa nɔtonɔto baanyɛ agba mɛi krokomɛi ni boɔ sane toi jogbaŋŋ lɛ anaa ni ebaafite bulɛ ni sa akɛ ehi Yehowa jamɔ hé lɛ. Ehiii akɛ mɔ ko aaatsu asafo lɛ he nitsumɔ ko loo ni ekɛ mɛi krokomɛi aaagba sane, ja nɔ ko eba trukaa ni baabi ni nyɛmimɛi lɛ ate shi yɛ amɛsɛii anɔ. Kɛ jeee nakai lɛ, no lɛ esa akɛ mɔ fɛɛ mɔ ata shi ni ebo wiemɔi ahe gbɛjianɔtoo lɛ toi bɔni afee ni amɛ kɛ amɛwekui lɛ ana he sɛɛ. Nifeemɔi ni esaaa bɛ gbɛfaŋnɔ ko yɛ Maŋtsɛyeli Asa lɛ nɔ, ejaakɛ “suɔmɔ . . . efeee nii ni esaaa.”—1 Kor. 13:4, 5; Gal. 6:10.

⁵ Wɔbii lɛ ajeŋba kpakpa yɛ kpeei ashishi lɛ hu kɛ yijiemɔ kɛ hiɛnyam baa Yehowa gbɛi lɛ nɔ. Fɔlɔi ni baakwɛ amɛ nɔ jogbaŋŋ lɛ he miihia. Esa akɛ awo gbekɛbii ahewalɛ ni amɛbo sane toi ni amɛkɛ amɛhe awo mli. Fɔlɔi babaoo ni yɔɔ gbekɛbii bibii lɛ sumɔɔ ni amɛtara he ko ni amɛbaanyɛ amɛje kpo amrɔ nɔŋŋ ni amɛtsu amɛ bii bibii lɛ ahiamɔ nii yɛ be mli ni amɛgbalaaa mɛi krokomɛi ajwɛŋmɔ bɔ ni esaaa.

⁶ Paulo wo ŋaa akɛ: “Nyɛbaa nyɛjeŋ bɔ ni sa . . . sanekpakpa lɛ.” (Fil. 1:27) Belɛ, nyɛhaa wɔbɔa mɔdɛŋ ni wɔbaa wɔjeŋ ni wɔsusu mɛi krokomɛi ahe yɛ be mli ni wɔyaa kpeei. Ekome ni wɔ fɛɛ wɔɔfee lɛ baaha “mɔ fɛɛ mɔ atsɔ mɔ kroko lɛ hemɔkɛyeli nɔ . . . kɛwowoo wɔhe hewalɛ.”—Rom. 1:12, NW.