Okɛ Sɔɔmɔ Krɔŋkrɔŋ Aha Shwane kɛ Nyɔɔŋ
1 Akɛ hegbɛ ko ni yɔɔ sɔrɔto kwraa eha wɔ. No ji Yehowa Odasefoi ni wɔji lɛ. Wɔji sanekpakpa jajelɔi ajeŋ muu fɛɛ gbɛjianɔtoo ni Yehowa kɛtsuɔ nii koni ekɛtsu Maŋtsɛyeli lɛ he shiɛmɔ nitsumɔ ni da fe fɛɛ eko ni átsu pɛŋ lɛ fã! (Mar. 13:10) Akɛni hiamɔ eba wɔbei nɛɛ ahe hewɔ lɛ, ani wɔkɛ wɔhe miiwo nitsumɔ nɛɛ mli waa kɛmiimɔ shi bɔ ni wɔɔnyɛ?
2 Wɔleee mɛi abɔ ni yɛ naagbee lɛ amɛbaahere wɔ shiɛmɔ lɛ nɔ. Yehowa maa nɔ mi kɛhaa wɔ akɛ amɛbaafee “asafo babaoo,” ni “sɔɔmɔ krɔŋkrɔŋ ni amɛkɛhaa lɛ shwane kɛ nyɔɔŋ” lɛ kadiɔ amɛ fɛɛ lɛ. (Kpoj. 7:9, 15, NW) Jeee akɛ Odasefoi ni fa fe akpekpei enumɔ ni kɛ hiɛdɔɔ miitsu nii bianɛ yɛ Nyɔŋmɔ sɔɔmɔ mli lɛ ji toibolɔi ni yɔɔ miishɛɛ kɛkɛ, ni asaŋ amɛjeee mɛi ni baa kpee kɛkɛ. Amɛji nitsulɔi ni jajeɔ sanekpakpa lɛ yɛ jeŋ fɛɛ!
3 Daa nɛɛ, hegbɛi yɛ ni aaatsɔ nɔ ajie Yehowa yi, kɛ́ yɛ shiɛmɔ nitsumɔ mli loo yɛ trukaa odaseyeli mli. Susumɔ odase ni yɔɔ nyam ni abaanyɛ aye, kɛ́ wɔteŋ mɔ fɛɛ mɔ tsɔ hiɛ ekɛ mɔ kome pɛ kɛkɛ gba anɔkwale lɛ he sane gbi fɛɛ gbi lɛ he okwɛ. Esa akɛ hiɛsɔɔ ni wɔyɔɔ kɛha Yehowa lɛ atsirɛ wɔ ni wɔkɛ miishɛɛ awie ehe.—Lala 92:2, 3.
4 Ye Obua Mɛi Krokomɛi ni Amɛkɛ Sɔɔmɔ Krɔŋkrɔŋ Aha: Yehowa yaa nɔ ekɛ yifalɛ jɔɔ wɔ. (Hag. 2:7) Yɛ sɔɔmɔ afi ni ho lɛ mli yɛ Ghana lɛ, kɛ aja mli lɛ afee shia Biblia mli nikasemɔi 90,867 daa nyɔŋ nɔ. Oti ni ma wɔhiɛ yɛ nɛkɛ gbɔmɛi nɛɛ ni wɔkɛ amɛ kaseɔ nii lɛ mli ji ni wɔye wɔbua amɛ ni amɛbatsɔmɔ Yesu kaselɔi. (Mat. 28:19, 20) Amɛteŋ mɛi pii etee hiɛ jogbaŋŋ kɛtsɔ kpeei ni amɛyaa daa lɛ nɔ. Amɛbɔi amɛnanemɛi “Nyɔŋmɔ niwuji” ni amɛkase lɛ gbaa momo. (Bɔf. 2:11) Ani abaanyɛ afɔ amɛnine agbɛnɛ koni amɛkɛ amɛhe awo shiɛmɔ nitsumɔ lɛ mli?
5 Esa akɛ wɔbɔ mɔdɛŋ krɛdɛɛ ko yɛ April ni wɔkɛfɔ̃ mɛi heei ni sa lɛ anine, koni amɛbafata wɔhe yɛ shiɛmɔ nitsumɔ lɛ mli. Ani onikaselɔ lɛ etsɔɔ suɔmɔ ni eyɔɔ akɛ eeefee enɛ? Kɛ nakai ni lɛ, ani eshɛɔ Ŋmalɛ naa taomɔ nii lɛ ahe? (Kwɛmɔ Our Ministry wolo, baafai 97-9.) Kɛ nikaselɔ lɛ miisumɔ ni ena shiɛmɔ nitsumɔ lɛ mli gbɛfaŋnɔ lɛ, okɛ onukpai asɛinɔtalɔ lɛ agba egbɛkpamɔi lɛ ahe sane, ni ebaato gbɛjianɔ ni onukpai enyɔ akwɛ sane lɛ mli. Kɛ nikaselɔ lɛ he esa akɛ aaakpɛlɛ enɔ akɛ shiɛlɔ ni abaptisiko lɛ lɛ, no lɛ fɔ̃ɔ lɛ nine ni efata ohe yɛ shiɛmɔ nitsumɔ lɛ mli. Esa akɛ sɔɔmɔ nɔkwɛlɔi kɛ woloŋ nikasemɔ nɔkwɛlɔi lɛ titri ale koni amɛye amɛbua mɛi ni amɛhe aaasa akɛ amɛaaje shiɛmɔ shishi yɛ April lɛ.
6 Fɔlɔi baanyɛ asusu he amɛkwɛ akɛ amɛbii lɛ ahe esa akɛ amɛaatsɔmɔ shiɛlɔi ni abaptisiko amɛ lo. (Lala 148:12, 13) Kɛ obi lɛ sumɔɔ ni ewie yɛ Maŋtsɛyeli shiɛmɔ mli ni eyɛ jeŋba kpakpa lɛ, obaanyɛ obɛŋkɛ sɔɔmɔ ajinafoi akuu lɛŋ onukpai lɛ eko ni okɛ lɛ asusu shihilɛ lɛ he. Kɛ ekɛ bo kɛ gbekɛ lɛ kpe egbe naa lɛ, onukpai enyɔ baatsɔɔ kɛji ehe esa akɛ abuɔ lɛ shiɛlɔ. Yiŋtoo krɛdɛɛ ko yɛ ni aaadamɔ nɔ ana miishɛɛ kɛ́ gbekɛbii bafata wɔhe kɛjie Nyɔŋmɔ yi!
7 Yehowa pɛ sa wɔsɔɔmɔ krɔŋkrɔŋ lɛ. (Luka 4:8) Eba akɛ wɔteŋ mɔ fɛɛ mɔ kɛ wɔ hegbɛ ni yɔɔ naakpɛɛ ni wɔkɛaajie eyi “babaoo” lɛ atsu nii.—Lala 109:30; 113:3.