Kasemɔ Amɛ Hemɔkɛyeli Lɛ
1 Bɔfo Paulo tsɔɔ hemɔkɛyeli shishi akɛ “nii ni mɛi ahiɛ ka nɔ lɛ anɔ hewalɛnamɔ, kɛ nii ni anaaa lɛ anɔmimaa.” Ekɛfata he akɛ, “kɛ hemɔkɛyeli bɛ lɛ, anyɛŋ Nyɔŋmɔ hiɛ asa.” (Heb. 11:1, 6) Paulo wo wɔ hewalɛ koni wɔjie hemɔkɛyeli kpo wɔtsɔɔ, ni wɔna ni eteke nɔ, ni wɔtiu sɛɛ.—2 Kor. 4:13; Kol. 2:7; 2 Tim. 2:22.
2 Agba hemɔkɛyeli he nɔkwɛmɔ nii ni ekaaa lɛ babaoo he saji yɛ Biblia lɛ mli. Paulo ŋmala odasefoi babaoo ni jie hemɔkɛyeli ni ma shi shiŋŋ kpo amɛtsɔɔ lɛ agbɛi, yɛ Hebribii yitso 11. Mɔ ni gbɛi fata nɔ ni aŋmala ashwie shi lɛ he ji Habel ni ji klɛŋklɛŋ mɔ ni agbe lɛ yɛ ehemɔkɛyeli lɛ hewɔ. Aŋma Noa gbɛi afata he, ejaakɛ etsɔ ehemɔkɛyeli lɛ nɔ ejie Nyɔŋmɔ gbeyeishemɔ ni he hiaa lɛ kpo etsɔɔ kɛha eshiabii lɛ ayiwalaheremɔ. Ajie Abraham yi yɛ ehemɔkɛyeli kɛ etoiboo hewɔ. Ajie Mose yi, ejaakɛ kɛtsɔ ehemɔkɛyeli nɔ lɛ, etee nɔ efi shi shiŋŋ tamɔ nɔ ni eena Mɔ ni anaaa lɛ lɛ. Mɛi ni fee nɔkwɛmɔ nii lɛ agbɛi ni aŋmala ashwie shi lɛ fa aahu akɛ Paulo kɛɛ enaŋ be ni ekɛaagba amɛ fɛɛ amɛhe sane. Kwɛ bɔ ni wɔdaa shi akɛ wɔbaanyɛ wɔha wɔ hemɔkɛyeli mli awa kɛtsɔ amɛ “jeŋbai krɔŋkrɔŋi kɛ Nyɔŋmɔjamɔi” ahe saji ni wɔɔtĩ mli wɔgba lɛ nɔ!—2 Pet. 3:11.
3 Yɛ klɛŋklɛŋ afii oha lɛ mli lɛ, Yesu bi sane nɛɛ akɛ: “Beni gbɔmɔ bi lɛ aaaba lɛ, ani eeebana hemɔkɛyeli yɛ shikpɔŋ lɛ nɔ?” (Luka 18:8) Ojogbaŋŋ, belɛ, ani wɔyɛ hemɔkɛyeli he nɔkwɛmɔ nii ni miiya nɔ yɛ wɔteŋ ŋmɛnɛ? Ani wɔnaa hii kɛ yei, gbekɛbii kɛ onukpai ni miijie hemɔkɛyeli ni hosooo kpo yɛ Yehowa mli amɛmiitsɔɔ taakɛ eji anɔkwale yɛ Nyɔŋmɔ webii ni yɔɔ yɛ Biblia beaŋ lɛ ahe lɛ?
4 Ŋmɛnɛŋmɛnɛ Beaŋ Hemɔkɛyeli He Nɔkwɛmɔ Nii: Esa akɛ ana hemɔkɛyeli he nɔkwɛmɔ nii ni sa kadimɔ lɛ yɛ he fɛɛ he ni wɔyɔɔ! Nɔkwɛlɔi ni nyiɛɔ wɔhiɛ lɛ ahemɔkɛyeli sa kasemɔ. (Heb. 13:7) Shi jeee mɛnɛɛmɛi pɛ feɔ hemɔkɛyeli he nɔkwɛmɔ nii. Mɛi ni kɛ asafo fɛɛ asafo bɔɔ lɛ ji anɔkwafoi ni kɛ anɔkwayeli esɔmɔ Yehowa aahu, ni bei pii lɛ amɛfee enɛ yɛ shihilɛi ni mli wawai amli.
5 Esa akɛ wɔhiɛ asɔ wɔ nyɛmimɛi yei anɔkwafoi ni kɛ afii babaoo eŋmɛ amɛtsui shi yɛ shitee-kɛ-woo ni amɛ wumɛi kɛba amɛnɔ lɛ mli lɛ. Ehe ebahia ni fɔlɔi ni bɛ hefatalɔi lɛ kome too pɛ adamɔ bii atsɔsemɔ he kaa lɛ naa. Okulafoi ni edara yɛ afii amli lɛ yɛ wɔteŋ, ni amɛkɛ amɛhe woɔ asafo lɛ nitsumɔi amli daa yɛ be mli ni ekolɛ amɛbɛ wekumɛi ni baaye abua amɛ. (Okɛto Luka 2:37 he.) Wɔnaa kpɛɔ wɔhe yɛ mɛi ni ŋmɛɔ amɛtsui shi yɛ helai ni ehiii tsamɔ hewɔ lɛ ahemɔkɛyeli he. Mɛi babaoo yaa nɔ amɛkɛ anɔkwayeli sɔmɔɔ yɛ be mli ni amɛyɔɔ gbɛtsii nii ni haaa anyɛ akɛ sɔɔmɔ hegbɛi krokomɛi aha amɛ. Gbekɛbii odasefoi yɛ, ni kɛ ekãa ejie hemɔkɛyeli kpo amɛtsɔɔ yɛ shitee-kɛ-woo ni akɛbaa amɛnɔ yɛ skul lɛ fɛɛ sɛɛ. Wɔ Nyɔŋmɔ jamɔ hetuu-kɛhamɔ lɛ yaa hiɛ yɛ be mli ni wɔnaa gbɛgbalɔi anɔkwafoi ni fiɔ shi afi fɛɛ afi, yɛ naagbai babaoo mli lɛ. Taakɛ Paulo ji lɛ, wɔnaŋ be, kɛ́ wɔbɔ mɔdɛŋ akɛ wɔɔgba niiashikpamɔi fɛɛ ni wɔnáa yɛ Maŋtsɛyeli sɔɔmɔ lɛ mli lɛ kɛ hemɔkɛyeli nitsumɔi ni nɛkɛ nyɛmimɛi hii kɛ yei nɛɛ ejie lɛ kpo amɛtsɔɔ lɛ ahe sane lɛ!
6 Nɛkɛ anɔkwafoi nɛɛ anɔkwɛmɔ nii nɛɛ shɛjeɔ wɔ mii ni ewoɔ wɔ hewalɛ. (1 Tes. 3:7, 8) Wɔbaafee jogbaŋŋ akɛ wɔɔkase amɛ hemɔkɛyeli lɛ ejaakɛ “mɛi ni yeɔ anɔkwa lɛ, [Yehowa] naa amɛhe miishɛɛ.”—Abɛi 12:22.