Sanekpakpa lɛ Jajemɔ ni Akpaaa
1 Mra be mli Kristofoi lɛ kɛ hiɛdɔɔ tsu amɛ shiɛmɔ nitsumɔ lɛ he nii waa. Luka hɔ amaniɛ akɛ: “Amɛfɔ̃ɔɔ nitsɔɔmɔ kɛ Yesu Kristo shiɛmɔ yɛ sɔlemɔwe lɛ kɛ shiai be fɛɛ be.” (Bɔf. 5:42) Nɔ ko kwraa bɛ, yiwaa ko po bɛ, ni baanyɛ atsi amɛnaa (Bɔf. 8:4) Amɛkɛ mɛi krokomɛi wie anɔkwale lɛ he daa gbi.
2 Ni wɔ hu? Bi ohe akɛ: ‘Ani minuɔ he akɛ hiamɔ eba bei lɛ ahe waa? Ani miisumɔ ni maya nɔ majaje sanekpakpa lɛ ni mikpaaa?’
3 Ŋmɛnɛŋmɛnɛ Beaŋ Shiɛmɔ ni Akpaaa lɛ He Nɔkwɛmɔ Nii: Akɛ tsɔne ni amuɔ kɔɔyɔɔ kɛtsɔɔ mli ni haaa mɔ anyɛ aya he ko lɛ ha nyɛmiyoo ko ni yeɔ kuumɔ hela koni emu kɛtsɔ mli. Enyɛɛɛ eya Maŋtsɛyeli Asa nɔ loo ni eeeya kpokpaa nɔ kpee. Shi ekɛ ehe wɔ sanekpakpa lɛ mli vii diɛŋtsɛ. Ye be ni ekɛhi shi yɛ he kome afii 37 lɛ fɛɛ mli lɛ, enyɛ eye ebuɔ mɛi 17 ni amɛkase anɔkwale le. Te efee lɛ eha tɛŋŋ? Eyɛ mli akɛ enyɛɛɛ eya shinaai anaa moŋ, shi etao gbɛ ni eeetsɔ nɔ eye mɛi ni eke amɛ kpeɔ lɛ odase trukaa.
4 Ehe bahia ni wɔ nyɛmimɛi ni yɔɔ Bosnia lɛ adamɔ ta kɛ amɛhe nɔ fee nɔ ni tã lɛ naa. Shi kɛlɛ, amɛtee nɔ amɛshiɛ daa amɛha mɛi krokomɛi. Kɛ aja mli lɛ, shiɛlɔi ni yɔɔ Sarajevo lɛ naa ŋmɛlɛtswai 20 daa nyɔŋ nɔ ni amɛkɛ mɛi krokomɛi miiwie sanekpakpa lɛ he, ni kɛ aja mli lɛ, amɛteŋ mɔ fɛɛ mɔ feɔ shia Biblia mli nikasemɔi enyɔ. Yɛ amɛshihilɛi ni mliwalɛ fɛɛ sɛɛ lɛ, amɛshiɛ, ni amɛtsɔɔ nii ni amɛkpaaa.
5 Gbekɛbii hu jieɔ ekãa kpo yɛ shiɛmɔ nitsumɔ lɛ mli. Akɛ Odasefoi aweku ko yawo tsu ko mli yɛ Rwanda ni asraafoi esaa amɛhe akɛ amɛbaagbe amɛ. Weku lɛ bi koni aŋmɛ amɛ gbɛ ni amɛsɔle dã. Akpɛlɛ enɛ nɔ, ni biyoo fioo lɛ, Deborah sɔle waa akɛ: “Yehowa, otsi nɛɛ Ataa kɛ mi fɛɛ ha mɛi woji tɛtrɛbii enumɔ. Te wɔbaafee tɛŋŋ wɔku wɔsɛɛ kɛya gbɔmɛi nɛɛ aŋɔɔ ni wɔyatsɔɔ amɛ anɔkwale lɛ ni wɔye wɔbua amɛ ni amɛna wala?’‘ Yɛ ehemɔkɛyeli ni mli wɔ kɛ suɔmɔ ni eyɔɔ kɛha shiɛmɔ nitsumɔ lɛ hewɔ lɛ, aŋmɛɛ weku muu lɛ fɛɛ he.
6 Ŋmɛnɛ, ehe miihia ni wɔtao hegbɛi ni wɔye mɛi krokomɛi odase ni wɔtao mɛi ni “hiɛ naanɔ wala he jwɛŋmɔ kpakpa lɛ.” (Bɔf. 13:48. NW) Asafoŋ onukpai toɔ gbɛjianɔ kɛha kutuu odaseyeli yɛ bei ni sa mli, kɛ́ yɛ leebi, shwane, loo gbɛkɛ koni ekɛ jɛmɛ shihilɛi lɛ akpa gbee. Saji ni yɔɔ Wɔ Maŋtsɛyeli Sɔɔmɔ lɛ mli kɛ Sɔɔmɔ Kpeei lɛ mli mi komɛi, kpokpaa nɔ kpeei, kɛ kpokpaa wulu nɔ kpeei kɛ ŋaawoi kɛ hewalɛwoo haa yɛ be ni sa mli, koni akɛ he awo Maŋtsɛyeli lɛ he odaseyeli lɛ fãi sɔrɔtoi amli. Kɛfata enɛ he lɛ, kpokpaa kɛ kpokpaa wulu nɔkwɛlɔi tsɔseɔ shiɛlɔi yɛ gbɛjegbɛ nɔ odaseyeli mli, amɛtsɔɔ amɛ bɔ ni amɛaafee amɛtsu nii yɛ nitsumɔ hei ashikpɔŋkukuji amli, ni amɛtsɔɔ gbɛi krokomɛi ni abaatsɔ nɔ aye odase yɛ he fɛɛ he ni aaana mɛi yɛ. Enɛɛmɛi fɛɛ maa nɔ mi akɛ akpaaa sanekpakpa lɛ jajemɔi.
7 Yesu bɔfoi lɛ kɛ ekaa jaje akɛ: “Wɔ lɛ wɔnyɛŋ akɛja wɔwie nii ni wɔna kɛ nii ni wɔnu lɛ.” Te fee tɛŋŋ ni amɛŋmɛ amɛtsui shi yɛ gbɛtsii nibii nɛɛ fɛɛ asɛɛ? Amɛbi ni Yehowa aye abua amɛ, ni efee nakai hu, ni ‘Mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekaa jaje Nyɔŋmɔ wiemɔ lɛ.’’ (Bɔf. 4: 20, 29, 31) Ekolɛ akɛ niiashikpamɔi ni ekaaa ejɔɔŋ mɔ fɛɛ mɔ yɛ shiɛmɔ nitsumɔ lɛ mli, shi kɛ wɔmiisumɔ ni wɔjaje sanekpakpa lɛ lɛlɛŋ ni wɔkpaaa, ni wɔbɔ mɔdɛŋ wɔfee nakai gbi fɛɛ gbi po lɛ, Yehowa baaye ebua wɔ.