Ye Odase yɛ He Fɛɛ He ni Gbɔmɛi Yɔɔ
1 Beni bɔfo Paulo yɔse gbɛfaŋnɔ ni Nyɔŋmɔ mumɔ lɛ tsuɔ yɛ eshiɛmɔ nitsumɔ lɛ mli lɛ, ekɛɛ: “Nyɔŋmɔ ha shwere.” Ekpɛlɛ nɔ hu akɛ: “Nyɔŋmɔ hefatalɔi nitsulɔi ji wɔ.” (1 Kor. 3:5-9) Hegbɛ ni yɔɔ naakpɛɛ nɛ. Te wɔɔfee tɛŋŋ wɔtsɔɔ yɛ faŋŋ akɛ wɔhiɛ sɔɔ Nyɔŋmɔ hefatalɔi nitsulɔi ni wɔji lɛ? Kɛtsɔ sanekpakpa lɛ ni wɔɔjaje wɔtsɔɔ mɛi fɛɛ ni wɔkɛkpeɔ yɛ shia-kɛ-shia nitsumɔ lɛ mli lɛ kɛ hei sɔrɔtoi fɛɛ lɛ nɔ.
2 Afã wɔ koni ‘wɔfee gbɔmɛi kaselɔi.’ (Mat. 28:19) Kɛ mɛi fioo pɛ wɔkɛgbaa sane beni wɔkɛ wɔhe woɔ shiɛmɔ nitsumɔ lɛ mli lɛ, ekolɛ wɔnijiaŋ baaje wui oya, ni wɔɔnu he akɛ nɔ ko fioo pɛ wɔtsu. Yɛ gbɛ kroko nɔ lɛ, wɔnáa wɔ shiɛmɔ nitsumɔ lɛ mli ŋɔɔmɔ waa diɛŋtsɛ, kɛ wɔnyɛ wɔná mɛi babaoo ni wɔkɛ amɛ gba sane lɛ. Enɛ baanyɛ afee kaa moŋ, akɛni ebiɔ ni wɔtsɔ hiɛ wɔya he fɛɛ he ni mɛi yɔɔ, bɔni afee ni wɔnyɛ wɔkɛ amɛ agba sane lɛ.
3 Nɔkwɛmɔ Nii Kpakpai: Wɔbaanyɛ wɔye mɛi odase yɛ jara nɔ, shwɛmɔhei, hejɔɔmɔhei kɛ tsɔnei adaamɔhei. Kɛ ota maŋbii atsɔne mli lɛ, ani ofee klalo akɛ oooye odase yɛ gbɛ lɛ nɔ? Odasefoi enyɔ ni ta bɔs ni mɛi babaoo yɔɔ mli lɛ mli kɛmiiya kpee kɛha shiɛmɔyaa lɛ gba Paradeiso he mfoniri ni yɔɔ Nilee wolo lɛ mli lɛ he sane, ni amɛgba wɔsɛɛ be he shiwoi ni Nyɔŋmɔ kɛha lɛ he sane. Taakɛ amɛkpa nɔ ni baajɛ mli aba lɛ gbɛ lɛ, obalanyo ko ni damɔ amɛmasɛi lɛ bo toi ni enya nɔ ni enu lɛ he waa. Dani ebaayi shi kɛjɛ bɔs lɛ mli lɛ, ehe wolo ni ebi ni mɔ ko aba eshia.
4 Shiɛlɔi babaoo amli efili amɛ yɛ trukaa odaseyelifeemɔ mli. Nyɛmi yoo ko tee nihɔɔmɔhe ko shwane, ni etee mɛi ni ehe amɛ nibii amɛgbe naa ni etamɔ nɔ ni amɛyeee oyai lɛ aŋɔɔ. Ekɛ woji ni yɔɔ ebaagi lɛ mli lɛ fɛɛ ha. Nuu ko ni mɛɔ yɛ ekar mli lɛ ná miishɛɛ akɛ ehe woji tɛtrɛbii kɛjɛ edɛŋ. Étee kpeei pɛŋ, ni amɛ sanegbaa lɛ tee emiishɛɛ shi.
5 Eji hegbɛ akɛ aaajie Yehowa gbɛi yi. Kɛ wɔjie ekãa ni wɔyɔɔ lɛ kpo wɔtsɔɔ yɛ shiɛmɔ nitsumɔ lɛ mli lɛ, belɛ wɔmiitsɔɔ akɛ wɔŋmɛɛko yiŋtoo ni yɔɔ Nyɔŋmɔ mɔbɔnalɛ ni esaaa wɔ lɛ sɛɛ lɛ he. Akɛni “be ni sa jogbaŋŋ nɛ” ni wɔkɛaaye wɔbua mɛi krokomɛi hewɔ lɛ, nyɛhaa wɔyaa he fɛɛ he ni gbɔmɛi yɔɔ ni wɔye amɛ Yehowa “walaheremɔ gbi” lɛ he odase.—2 Kor. 6:1, 2.