Wɔ Sɔɔmɔ Nitsumɔ Lɛ—Eji Anɔkwa Suɔmɔ Kpojiemɔ
1 Wɔtsɔɔ wɔ sɔɔmɔ nitsumɔ lɛ nɔ wɔjieɔ bulɛ kpo wɔhaa kitai enyɔ ni fe fɛɛ lɛ. (Mat. 22:37-39) Suɔmɔ ni wɔyɔɔ kɛha Yehowa lɛ tsirɛɔ wɔ koni wɔwie ehe ekpakpa. Suɔmɔ ni wɔyɔɔ kɛha wɔnanemɛi gbɔmɛi tsirɛɔ wɔ koni wɔwo amɛ hewalɛ ni amɛtao nɔ ni Nyɔŋmɔ sumɔɔ kɛ eyiŋtoi ahe nilee sɛɛgbɛ, bɔni afee ni amɛnyɛ amɛbasumɔ Yehowa taakɛ wɔfeɔ lɛ, ni amɛbafata gbɔmɛi ni baaná jweremɔ ni ji naanɔ wala lɛ ahe. No hewɔ lɛ wɔtsɔɔ wɔsɔɔmɔ nitsumɔ lɛ nɔ wɔwoɔ Yehowa gbɛi lɛ hiɛ nyam, ni wɔgbaa wɔnanemɛi gbɔmɛi Maŋtsɛyeli lɛ he hiɛnɔkamɔ ni jara wa waa lɛ he sane. Hɛɛ, wɔsɔɔmɔ nitsumɔ lɛ ji anɔkwa suɔmɔ ni wɔyɔɔ kɛha Nyɔŋmɔ kɛ gbɔmɔ lɛ kpojiemɔ.
2 Suɔmɔ ni wɔyɔɔ lɛ kanyaa wɔ koni wɔwie wɔtsɔɔ gbɔmɛi sɔrɔtoi fɛɛ, yɛ shihilɛi sɔrɔtoi fɛɛ mli. (1 Kor. 9:21-23) Ákɛ nɔkwɛmɔnɔ lɛ: Kristofonyo onukpa ko yata Roma Katolik osɔfo ko masɛi yɛ kɔɔyɔŋ lɛlɛ ko mli. Kɛtsɔ saji fioo komɛi ni onukpa lɛ jɛ nilee mli ebi lɛ lɛ nɔ lɛ, eha osɔfo lɛ bɔi wiemɔ, kɛkɛ ni ekɛ sanegbaa lɛ to Maŋtsɛyeli lɛ he. Beni osɔfo lɛ yiɔ shi kɛjɛɔ kɔɔyɔŋ lɛlɛ lɛ mli lɛ, no mli lɛ ehe wɔ woji lɛ enyɔ. Kwɛ nɔ kpakpa ni jɛ anɔkwa suɔmɔ ni onukpa lɛ jie lɛ kpo etsɔɔ enaanyo gbɔmɔ lɛ mli ba!
3 Suɔmɔ Tsirɛɔ Wɔ Koni Wɔshiɛ: Mɛi ni kɛ amɛhe woɔ gbɛgbalɔi awalɔ kɛ be-fɛɛ gbɛgbamɔ nitsumɔ lɛ mli lɛ miijie anɔkwa suɔmɔ kɛha Nyɔŋmɔ kɛ naanyo gbɔmɔ kpo amɛmiitsɔɔ lɛɛlɛŋ. Gbɛgbalɔi kɛ amɛbe kɛ amɛhewalɛ miishã afɔle be fɛɛ be koni amɛye amɛbua mɛi krokomɛi yɛ mumɔŋ. Mɛni tsirɛɔ amɛ ni amɛfe enɛ? Gbɛgbalɔ ko kɛɛ akɛ: “Mile akɛ suɔmɔ ji Nyɔŋmɔ mumɔ lɛ yibii lɛ eko. No hewɔ lɛ, kɛ jeee no kulɛ mibɛ anɔkwale lɛ mli kwraa, kulɛ mibatsɔŋ gbɛgbalɔ ni miiye omanye. Suɔmɔ haa misumɔɔ gbɔmɛi asane, ni miyɔseɔ nibii ni he hiaa amɛ, ni mihiɛ sɔɔ akɛ gbɔmɛi naa suɔmɔ ni ajieɔ kpo atsɔɔ amɛ lɛ he miishɛɛ.” Yesu jie suɔmɔ ni tamɔ nakai kpo etsɔɔ gbɔmɛi. Be ko beni ekɛ ekaselɔi ni etɔ amɛ lɛ yaa he ko koni ‘amɛyajɔɔ amɛhe fioo’ lɛ, asafo babaoo lɛ tsɔ hiɛ amɛyashɛ jɛmɛ. Mɛni Yesu fee? “Emusuŋ tsɔ lɛ yɛ amɛhewɔ,” ekɛ nibii ni he hiaa lɛ lɛ fɔ̃ afã bɔni afee ni ‘etsɔɔ amɛ nibii pii.’—Mar. 6:30-34.
4 Kɛ gbɔmɛi kpoo sanekpakpa ni wɔkɛhaa amɛ lɛ po lɛ, wɔnáa mligbɛ miishɛɛ ko, akɛni wɔle akɛ suɔmɔ tsirɛ wɔ, ni wɔfee bɔ ni wɔɔnyɛ koni wɔye wɔbua amɛ ni ahere amɛyiwala lɛ hewɔ. Kɛ yɛ naagbee lɛ Kristo kojo wɔ fɛɛ lɛ, wɔbaana miishɛɛ waa akɛ wɔjie anɔkwa suɔmɔ kpo wɔtsɔɔ kɛtsɔ ‘wɔsɔɔmɔ lɛ naa kwraa ni wɔɔgbe’ lɛ nɔ.—2 Tim. 4:5.