Ani ‘Ŋmei ko yɛ Oheloo Mli’?
1 Wɔmiisumɔ waa koni wɔtsu nitsumɔ ni akɛwo wɔdɛŋ akɛ wɔshiɛ sanekpakpa lɛ bɔ ni wɔhewalɛ baanyɛ lɛ he nii. Shi kɛlɛ, ewaa kɛhaa wɔsuɔmɔ nyɛmimɛi hii kɛ yei lɛ ateŋ mɛi babaoo akɛ amɛkɛ amɛhe aaawo mli kɛmɔ shi yɛ gbɔmɔtsoŋ hela ni mli wa loo gbɔmɔtsoŋ kpá ni aje ni tsĩɔ amɛnaa lɛ hewɔ, ni efeɔ nɔ ni waa kɛhaa amɛ akɛ amɛaatsu bɔ ni kulɛ amɛsumɔɔ ni amɛtsu lɛ he nii. Yɛ amɛgbɛfaŋ lɛ, ebaanyɛ efee kaa kɛha amɛ akɛ amɛaadamɔ nijiaŋwujee henumɔi anaa, titri lɛ kɛ amɛna ni mɛi krokomɛi ni ebɔle amɛhe lɛ kɛ ekãa miitsu shiɛmɔ nitsumɔ lɛ waa lɛ.—1 Kor. 9:16.
2 Nɔkwɛmɔnɔ ko ni Sa Kasemɔ: Ehe bahia ni bɔfo Paulo kɛ ‘ŋmei ko ni yɔɔ eheloo mli’ ashi mple. Ekpa Yehowa fai shii etɛ sɔŋŋ koni ejie gbɛtsii nii ni haoɔ mɔ waa nɛɛ, nɔ ni etsɛ lɛ akɛ ‘Satan bɔfo’ ni gbálaa lɛ mai sɔŋŋ lɛ kɛjɛ jɛmɛ. Ni kɛlɛ, yɛ enɛ fɛɛ sɛɛ lɛ, Paulo ŋmɛ etsui shi ni etee ehiɛ waa yɛ esɔɔmɔ nitsumɔ lɛ mli. Énaaa ehe mɔbɔ loo ni eeewie nii ahe be fɛɛ be. Efee bɔ ni ebaanyɛ. Nɔ ni ha eye omanye yɛ enɛ naadaamɔ naa ji nɔmimaa nɛɛ ni ená kɛjɛ Nyɔŋmɔ ŋɔɔ akɛ: “Miduromɔ lɛ fa hao, ejaakɛ mihewalɛ lɛ, gbedeefeemɔ mli eyeɔ emuu yɛ.” Paulo gbɔjɔmɔ lɛ bafee ekãawoo beni enyɛ ekpɛlɛ eshihilɛ lɛ nɔ, ni ekɛ ehe fɔ̃ Yehowa kɛ mumɔ krɔŋkrɔŋ lɛ nɔ bɔni afee ni eŋmɛ etsui shi lɛ.—2 Kor. 12:7-10.
3 Bɔ ni Ooofee Oŋmɛ Otsui Shi: Ani adesa gbɔmɔtsoŋ gbɔjɔmɔ ko kɛ gbɛtsii nii baa sɔɔmɔ ni okɛhaa Nyɔŋmɔ lɛ nɔ? Kɛ nakai ni lɛ, kasemɔ bɔ ni Paulo susu nii ahe eha lɛ. Kɛ anyɛɛɛ atsa ohela loo gbɔmɔtsoŋ kpá lɛ kwraa kɛmɔ shi yɛ nɛkɛ nibii agbɛjianɔtoo nɛɛ mli po lɛ, obaanyɛ okɛ ohe afɔ̃ Yehowa nɔ kwraa kɛmɔ shi, mɔ ni nuɔ ohiamɔ nii lɛ ashishi ni ekɛ “hewalɛ —ní fa kɛteke nɔ” haa lɛ. (2 Kor. 4:7) Okɛ yelikɛbuamɔ ni onaa yɛ asafo lɛ mli lɛ atsu nii kɛmɔ shi, ni okatse ohe banee. (Abɛi 18:1) Kɛ ewa kɛha bo akɛ okɛ ohe aaawo shia-kɛ-shia nitsumɔ lɛ mli lɛ, taomɔ gbɛi ni anyɛɔ atsuɔ he nii ni okɛye trukaa odase loo tɛlifon nɔ odase.
4 Eyɛ mli akɛ ŋmei ni yɔɔ oheloo mli lɛ baanyɛ atsi nɔ ni obaanyɛ ofee yɛ sɔɔmɔ nitsumɔ lɛ mli lɛ naa moŋ, shi esaaa akɛ onuɔ he akɛ ashi bo. Taakɛ Paulo ji lɛ, bo hu obaanyɛ ‘oye Nyɔŋmɔ duromɔ sanekpakpa lɛ he odase faŋŋ,’ ni ofee nɔ ni ohewalɛ kɛ oshihilɛi baaŋmɛ gbɛ. (Bɔf. 20:24) Yɛ be mli ni obɔɔ mɔdɛŋ koni ogbe osɔɔmɔ nitsumɔ lɛ naa lɛ, ná olé akɛ Yehowa yɛ he miishɛɛ waa.—Heb. 6:10.