Bɔ ni Weku Mli Bii Feɔ Ekome Koni Amɛná Mli Gbɛfaŋnɔ Kɛmɔ Shi—Yɛ Asafoŋ Kpeei Ashishi
1 Esa akɛ Kristofoi awekui kɛ famɔ akɛ akpe kutuu yɛ asafoŋ kpeei ashishi lɛ atsu nii. (Heb. 10:24, 25) Kɛ́ gbeekpãamɔ kpakpa yɛ lɛ, mɔ fɛɛ mɔ baaye omanye yɛ hiɛ ní atsɔɔ asaa he kɛha kpeei lɛ mli, yɛ eyaa kɛ he ni akɛaawo mli lɛ mli. Ayɛ weku shihilɛi srɔtoi, shi nibii komɛi yɛ ni Kristofonyo wu, ŋa ni heɔ eyeɔ, aloo fɔlɔ kome lɛ baanyɛ afee koni eha ekomefeemɔ yɛ mumɔŋ saji amli lɛ aba, ní bii abɔ ni yɔɔ shia lɛ kɛ afii abɔ ni amɛye lɛ kɔɔɔ he eko.—Abɛi 1:8.
2 Nyɛnáa Be Nyɛkɛsaa Nyɛhe: Weku mli bii feɔ ekome ni amɛkwɛɔ akɛ mɔ fɛɛ mɔ esaa ehe jogbaŋŋ kɛha asafoŋ kpeei. Mɛi pii feɔ ekome kɛkaseɔ daa otsi Buu-Mɔɔ Nikasemɔ lɛ kutuu. Mɛi komɛi hu saa amɛhe kɛhaa Asafo Woloŋ Nikasemɔ lɛ loo amɛkaneɔ Biblia kanemɔ kɛha otsi lɛ kutuu ákɛ weku. Yiŋtoo lɛ ji ní aha otii ni he hiaa lɛ ahi jwɛŋmɔ mli dani aya kpeei lɛ. Yɛ nakai feemɔ mli lɛ, mɔ fɛɛ mɔ baaná nɔ ni amɛnuɔ lɛ he sɛɛ waa, ni ebaasaa amɛ koni amɛkɛ amɛhe awo mli kɛ́ hegbɛ lɛ ba.—1 Tim. 4:15.
3 Nyɛtoa Gbɛjianɔ ni Nyɛkɛ Nyɛhe Awoa Mli: Esa akɛ mɔ fɛɛ mɔ ni yɔɔ weku lɛ mli lɛ kɛ oti ama ehiɛ akɛ ebaajaje ehiɛnɔkamɔ lɛ etsɔɔ mɛi krokomɛi kɛtsɔ saji ahetoo ni eeeha yɛ kpeei ashishi lɛ nɔ. (Heb. 10:23) Ani yelikɛbuamɔ loo hewalɛwoo he miihia weku lɛ mlinyo ko bɔni afee ni etsu enɛ he nii? Mɛɛ yelikɛbuamɔ he hiaa mɔ fɛɛ mɔ bɔni afee ni esaa ehe kɛha Teokrase Sɔɔmɔ Skul lɛ mli nifeemɔi lɛ? Ŋamɛi náa hiɛsɔɔ kɛji akɛ amɛwumɛi jie miishɛɛ kpo ni ekolɛ amɛkɛ bɔ ni amɛsusuɔ ni akɛ nɔkwɛmɔnɔ kpakpa ko aaatsu nii aha loo yɛ bɔ ni esa akɛ afee lɛ aha lɛ ha. Esaaa akɛ fɔlɔi nuɔ he akɛ esa akɛ amɛfee ekomɛi amɛha amɛbii bibii lɛ. Nakai feemɔ baanyɛ aje gbekɛbii lɛ anijiaŋ wui yɛ miishɛɛ ni amɛyɔɔ yɛ he lɛ mli. Shi fɔlɔi baanyɛ aye abua amɛbii bibii lɛ, ni amɛbo amɛ toi yɛ be mli ni amɛfeɔ amɛtsɔɔ amɛ ni anu lɛ.—Efe. 6:4.
4 Nyɛtoa Gbɛjianɔ Koni Nyɛya: Abaanyɛ atsɔɔ gbekɛbii lɛ kɛjɛ amɛgbɛkɛbiiashi koni amɛle bɔ ni esa akɛ amɛsaa amɛhe ni amɛfee klalo koni ashi kɛya kpee lɛ yɛ be ni ato lɛ naa. Esa akɛ weku lɛ mli bii lɛ afee ekome kɛtsu shia nitsumɔi ahe nii, bɔni afee ni akakpe sɛɛ.—Kwɛmɔ ŋaawoi ni akɛha yɛ Weku Miishɛɛ wolo lɛ mli, yɛ baafã 112, kɛ Young People Ask wolo lɛ baafãi 316-317.
5 Fɔlɔi kɛ gbekɛbii fɛɛ baanyɛ asusu Yoshua ni hi shi yɛ blema lɛ wiemɔi lɛ ahe, mɔ ni kɛɛ akɛ: “Mi kɛ miwe lɛ, wɔɔsɔmɔ Yehowa!” Belɛ nyɛtswaa nyɛfai shi akɛ nyɛbaafee ekome koni nyɛná gbɛfaŋnɔ kɛmɔ shi yɛ asafoŋ kpeei ashishi.—Yosh. 24:15.