Sanebimɔ He

◼ Namɔ gbɛnaa nii ji Maŋtsɛyeli Asa lɛ nɔ falefalefeemɔ?

Maŋtsɛyeli Asa ni nɔ tse ni yɔɔ fɛo lɛ haa anáa shɛɛ sane ni wɔshiɛɔ lɛ he jwɛŋmɔ kpakpa. (Okɛto 1 Petro 2:12 he.) Ehe miihia ni aha asa lɛ nɔ atse ni efee falefale, ni mɔ fɛɛ mɔ baanyɛ aná enɔkwɛmɔ jogbaŋŋ lɛ mli gbɛfaŋnɔ. Esaaa akɛ wɔkpáa mɛi fioo pɛ gbɛ akɛ amɛji mɛi ni baatere jatsu muu lɛ fɛɛ. Bei pii lɛ, atoɔ falefalefeemɔ lɛ he gbɛjianɔ yɛ Asafoŋ Wolo Nikasemɔ kui anaa, ni ahaa nikasemɔ nɔkwɛlɔ lɛ loo mɔ ni yeɔ buaa lɛ lɛ nyiɛɔ hiɛ. Yɛ asai ni nɔ ni fá fe asafo kome kpeɔ yɛ nɔ lɛ nɔ lɛ, onukpai lɛ baatsu saji ahe nii bɔni afee ni asafoi lɛ fɛɛ aná enɔkwɛmɔ jogbaŋŋ lɛ mli gbɛfaŋnɔ.

Te wɔbaafee tɛŋŋ wɔtsu gbɛnaa nii nɛɛ he nii jogbaŋŋ kɛmɔ shi? Esa akɛ afee Maŋtsɛyeli Asa lɛ nɔ falefale yɛ gbɛjianɔtoo kpakpa ní ato lɛ naa daa. Esa akɛ nibii ni he hiaa kɛ nibii ni akɛtsuɔ nii lɛ ahi he ni abaanyɛ ana ni akɛtsu nii. Esa akɛ akɛ wolo ni tsɔɔ nibii ni ehe hiaa ni afee lɛ akpɛtɛ he ni nitsulɔi lɛ baanyɛ ana kɛ́ amɛmiitao gbɛtsɔɔmɔ. Ekolɛ abaaná woji srɔtoi enyɔ ni tsɔɔ nibii ni esa akɛ afee, ekome kɛha kanei lɛ fɛɛ ni abaatsumɔ he yɛ kpee fɛɛ kpee sɛɛ lɛ, kɛ ekroko hu kɛha daa otsi falefalefeemɔ diɛŋtsɛ. Esa akɛ woloŋ nikasemɔ nɔkwɛlɔ lɛ ato falefalefeemɔ diɛŋtsɛ lɛ he gbɛjianɔ kɛha gbi lɛ pɛ kɛ be ni hi kɛha mɛi fɛɛ ni akɛ nitsumɔ lɛ ewo amɛdɛŋ lɛ. Esa akɛ akwɛ jwɛi bibii ni tsaa, fɔfɔii, kɛ tsei bibii lɛ anɔ ojogbaŋŋ daa. Esa akɛ ajie jwɛi kɛjɛ nyiɛmɔhei kɛ hei ni akɛ tsɔnei mamɔɔ lɛ. Esa akɛ daa afi lɛ atsu falefalefeemɔ he nitsumɔ wulu, ekolɛ beni eshwɛ fioo ni abaaye Kaimɔ lɛ. Nɔ ni baanyɛ afata enɛ he ji samfɛji lɛ kɛ gbogboi ahe fɔmɔ, shikpɔŋhaa kuntu nɔ fɔmɔ, kɛ nibii ni akɛtsotsoroɔ shi lɛ ahe falefalefeemɔ.

Shi kɛlɛ, wɔteŋ mɔ fɛɛ mɔ baanyɛ aha jatsu lɛ afee nɔ ni etsiii kɛtsɔ amã ni ataa loo jwɛi ni wɔshɛrɛŋ wɔshwieŋ asa lɛ mli loo ehe lɛ nɔ. Wɔbaanyɛ wɔha nushwiemɔhe kɛ niiasɛɛyaahe lɛ atse be fɛɛ be ni wɔkɛaatsu nii wɔgbe naa koni jɛmɛ atse aha mɔ ni baaba yɛ sɛɛ lɛ. Kwɛmɔ jogbaŋŋ koni okaku nɔ ko loo okafite tsei ahe nibii ni yɔɔ tsũ lɛ mli lɛ. Kwɛmɔ nibii ni kpáa shikpɔŋhaa kuntu lɛ nɔ, sɛii ni efite, paipi he nibii ni efite, kanei ni egboi, kɛ ekrokomɛi lɛ jogbaŋŋ, ni obɔ enɛɛmɛi ahe amaniɛ amrɔ nɔŋŋ otsɔɔ nyɛmi ni tsuɔ Maŋtsɛyeli Asa lɛ nɔkwɛmɔ he nii lɛ.

Nyɛhaa wɔ fɛɛ wɔnáa suɔmɔ akɛ wɔɔtsu wɔ gbɛfaŋnɔ. Enɛ haa anáa shia ni sa ahaa jamɔ, ni ehaa wɔfeɔ srɔto akɛ gbɔmɛi ni he tse ni woɔ Yehowa Nyɔŋmɔ hiɛ nyam.—1 Pet. 1:16.