Mɛni Obaakɛɛ Mɔ ni Kɛɔ akɛ Nyɔŋmɔ Bɛ?
1 Univɛsiti tsɔɔlɔ ko ni jɛ Poland lɛ kɛɛ maŋsɛɛ sanekpakpa shiɛlɔ ko yɛ Afrika akɛ: “Miheee miyeee akɛ Nyɔŋmɔ ko yɛ.” Shi kɛlɛ, nyɛmi yoo lɛ nyɛ ekɛ yoo lɛ gba sane, ni ekɛ wolo ni ji Life—How Did It Get Here? By Evolution or by Creation? lɛ ha lɛ. Beni maŋsɛɛ sanekpakpa shiɛlɔ lɛ ku sɛɛ etee enɔ otsi lɛ, tsɔɔlɔ lɛ kɛɛ lɛ akɛ: “Miheɔ miyeɔ agbɛnɛ akɛ Nyɔŋmɔ yɛ!” Ekane Creation wolo muu lɛ fɛɛ, ni amrɔ nɛɛ ébi ni akɛ lɛ afee Biblia mli nikasemɔ. Mɛni obaanyɛ ofee ní oye omanye yɛ be mli ni oyeɔ mɛi ni kɛɔ akɛ amɛheee Nyɔŋmɔ nɔ amɛyeee lɛ odase? Klɛŋklɛŋ lɛ, susumɔ yiŋtoi srɔtoi ahewɔ ni mɛi kɛɔ nɛkɛ lɛ he.
2 Nibii ni Haaa Amɛhe Enɔ Amɛye: Jeee mɛi ni kɛɔ akɛ Nyɔŋmɔ bɛ lɛ fɛɛ ji mɛi ni atsɔse amɛ nakai. Akɛ jamɔ ko tsɔse amɛteŋ mɛi babaoo ni yɛ be ko sɛɛ lɛ amɛhe Nyɔŋmɔ nɔ amɛye. Shi kɛlɛ, hela ni naa wa loo weku mli naagbai loo jalɛ sane ni ayeee ni amɛkɛkpe lɛ egbɔjɔ amɛhemɔkɛyeli. Yɛ mɛi krokomɛi agbɛfaŋ lɛ, nibii ni atsɔɔ amɛ yɛ skul srɔtoi ni akɛ wolokasemɔ ni yaa hiɛ waa tsɔseɔ mɛi yɛ jɛmɛ lɛ ená hewalɛ fɔŋ yɛ susumɔ ni amɛyɔɔ yɛ Nyɔŋmɔ he lɛ nɔ. Kadimɔ nɔkwɛmɔnii ni nyiɛ sɛɛ nɛɛ ní tsɔɔ mɛi ni kɛɔ akɛ Nyɔŋmɔ bɛ ni yɛ sɛɛ mli lɛ amɛná Yehowa Nyɔŋmɔ mli hemɔkɛyeli ni wa ni amɛbatsɔmɔ e-Dasefoi lɛ.
3 Afɔ́ yoo ko ni yɔɔ Paris lɛ akɛ mɔ ni yeɔ wui amli gbɔjɔmɔ hela. Eyɛ mli akɛ abaptisi lɛ akɛ Katoliknyo moŋ, shi ekɛɔ akɛ eheee eyeee akɛ Nyɔŋmɔ yɛ. Beni ebi mɔ kome shihilɔi ni ji yei lɛ nɔ hewɔ ni Nyɔŋmɔ eŋmɛ gbɛ akɛ akɛ gbɔmɔtsoŋ gbɔjɔmɔ ni tamɔ nɛkɛ afɔ́ lɛ lɛ, hetoo ni amɛha ji: “Ejaakɛ esumɔɔ bo.” Esumɔɔɔ ni ekpɛlɛɔ nakai susumɔ ni jwɛŋmɔ bɛ mli lɛ nɔ. Agbɛnɛ susumɔ oblanyo fioo ko ni yɔɔ Finland ni ana akɛ eyɛ fã mli hela ko ni ehiii tsamɔ ni etáa helatsɛmɛi ashwiili mli lɛ he okwɛ. Enyɛ kɛ lɛ tee Pentekostnyo ko ni kɛɔ akɛ etsáa helatsɛmɛi lɛ ŋɔɔ. Shi anyɛɛɛ atsá lɛ yɛ naakpɛɛ gbɛ nɔ. Enɛ hewɔ lɛ, oblanyo lɛ naaa Nyɔŋmɔ he miishɛɛ dɔŋŋ ni ebatsɔ mɔ ni kɛɔ akɛ Nyɔŋmɔ bɛ.
4 Atsɔse nuu ko ni yɔɔ Honduras lɛ akɛ Katoliknyo, shi ekase jeŋ nilee ni kɔɔ Maŋkwramɔ he lɛ he nii, kɛ Nyɔŋmɔ ni bɛ lɛ he nii. Univɛsiti nikasemɔ ni tsɔɔ akɛ adesai jɛ sutsakemɔ mli lɛ haaa ehe eye akɛ Nyɔŋmɔ yɛ dɔŋŋ. Nakai nɔŋŋ atsɔse yoo ko ni yɔɔ United States lɛ akɛ Methodisnyo. Beni eyaa kɔleji lɛ, ekase jwɛŋmɔ he nilee. Te enɛ sa ehemɔkɛyeli he eha tɛŋŋ? Ekɛɛ: “Yɛ hulutsoo be ko mli lɛ enɛɛmɛi fite hemɔkɛyeli fɛɛ ni miyɔɔ yɛ jamɔ mli lɛ kwraa.”
5 Anɔkwafoi lɛ Atsuii ni Aaashɛ He: Aŋkroaŋkroi babaoo ni kɛɔ akɛ amɛheee Nyɔŋmɔ nɔ amɛyeee lɛ ahiɛ baasɔ akɛ amɛaale kɛ́ naagbai ni ji hela, weku mli béi, jalɛ sane ni ayeee, kɛ ekrokomɛi lɛ anaa tsabaa yɛ. Amɛyɛ he miishɛɛ waa akɛ amɛaaná hetooi amɛha sanebimɔi ni tamɔ enɛɛmɛi: ‘Mɛni hewɔ efɔŋfeemɔ yɔɔ?’ ‘Mɛni hewɔ gbɔmɛi kpakpai naa nɔ?’ ni ‘Mɛni ji shishinumɔ ni yɔɔ wala sɛɛ?’
6 Atsɔse nuu ko kɛ eŋa ni amɛyɔɔ Switzerland lɛ fɛɛ akɛ mɛi ni heee Nyɔŋmɔ nɔ amɛyeee. Klɛŋklɛŋ beni akɛ anɔkwale lɛ tee amɛŋɔɔ lɛ, amɛkpɛlɛɛɛ nɔ. Shi amɛná weku mli naagbai ni wa ni amɛka akɛ amɛaatse gbala. Beni Odasefoi lɛ tee amɛŋɔɔ ekoŋŋ lɛ, amɛkɛ Biblia lɛ tsu nii ni amɛkɛtsɔɔ gbalashihilɛ hefatalɔi lɛ bɔ ni amɛaafee amɛye amɛnaagbai anɔ kunim. Gbalashihilɛ hefatalɔi nɛɛ anaa kpɛ amɛhe waa yɛ ŋaawoo kpakpa ni yɔɔ Ŋmalɛi lɛ amli lɛ hewɔ, ni amɛkpɛlɛ koni akɛ amɛ afee Biblia mli nikasemɔ. Awaje amɛ gbalashihilɛ lɛ, ni amɛtee hiɛ yɛ mumɔŋ, ni abaptisi amɛ.
7 Nɔ ni Obaanyɛ Okɛɛ Mɔ ni Kɛɔ akɛ Nyɔŋmɔ Bɛ: Kɛ mɔ ko kɛɛ bo akɛ eji mɔ ko ni heee yeee akɛ Nyɔŋmɔ ko yɛ lɛ, bɔɔ mɔdɛŋ koni ole nɔ hewɔ ni ekɛɔ nakai. Ani wolokasemɔ ni ená hewɔ, naagbai ni ekɛkpe, loo jamɔŋ osatofeemɔ kɛ apasa tsɔɔmɔi ni ekɛkpe lɛ ahewɔ? Obaanyɛ obi lɛ akɛ: “Ani nɛkɛ ji bɔ ni onuɔ he daa?” aloo “Mɛɛ yiŋtoo hewɔ okɛɔ nakai?” Hetoo ni ekɛbaaha bo lɛ baaye ebua bo koni ole nɔ ni obaakɛɛ. Yɛ he ni ehe miihia ni akɛ naataamɔ saji ni mli wa atsu nii lɛ, wolo ni ji Is There a Creator Who Cares About You? lɛ nɔŋŋ baafee nɔ ni he hiaa.
8 Obaanyɛ okɛ mɔ ni kɛɔ akɛ Nyɔŋmɔ bɛ lɛ agba sane kɛtsɔ sanebimɔ nɛɛ nɔ:
◼ “Ani osusu he nɛkɛ pɛŋ: ‘Kɛ Nyɔŋmɔ ko yɛ lɛ, mɛni hewɔ ni piŋmɔ kɛ jalɛ sane ni ayeee efá yɛ je lɛŋ nɛkɛ?’ [Ŋmɛɛ gbɛ ni ewie.] Ani manyɛ matsɔɔ bo nɔ ni Biblia lɛ kɛɔ yɛ sane nɛɛ he?” Kanemɔ Yeremia 10:23. Kɛ okane ogbe naa lɛ, bi lɛ koni etsɔɔ bɔ ni esusuɔ yɛ ŋmalɛ lɛ he. No sɛɛ lɛ okɛ wolo bibioo ni ji Will There Ever Be a World Without War? lɛ baafai 16 kɛ 17 lɛ atsɔɔ lɛ. Aloo, yɛ no najiaŋ lɛ, obaanyɛ okɛ yitso 10 ni yɔɔ Creator wolo lɛ mli lɛ atsu nii. Ha ni ehe wolo lɛ ni ekane sane lɛ.—Kwɛmɔ Reasoning wolo lɛ baafai 150-151 kɛha gbɛ tsɔɔmɔi babaoo.
9 Eji anɔkwale akɛ, jeee mɛi fɛɛ ni kɛɔ akɛ amɛheee amɛyeee akɛ Nyɔŋmɔ ko yɛ baakpɛlɛ anɔkwale lɛ nɔ. Shi mɛi babaoo yɛ ni miisumɔ ni amɛsusu sane lɛ he yɛ gbɛ kroko nɔ. Okɛ ŋaalee, yiŋkɔnemɔ kɛ nɔ ni fe fɛɛ lɛ, hewalɛ ni yɔɔ Nyɔŋmɔ Wiemɔ lɛ mli lɛ atsu nii koni okɛye obua amɛ ni amɛna anɔkwale lɛ.—Bɔf. 28:23, 24; Heb. 4:12.