‘Yei ni Bɔɔ Mɔdɛŋ yɛ Nuntsɔ lɛ Mli’
1 Paulo kɛ wiemɔi ni yɔɔ yiteŋgbɛ lɛ tsɔɔ bɔ ni Trifaina kɛ Trifosa ni ji nyɛmimɛi yei ni yɔɔ Roma asafo lɛ mli lɛ bɔɔ mɔdɛŋ amɛhaa. Ewie yɛ mɔ kroko ni ji Persi he akɛ: “Etsu nii pii yɛ Nuntsɔ lɛ mli.” Ekɛ miishɛɛ tsĩ Foibe hu tã akɛ ‘mɛi pii ahefatalɔ.’ (Rom. 16:2, 12) Awie Dorka pɛ he yɛ Ŋmalɛi lɛ amli akɛ mɔ ni “eyi obɔ kɛ nitsumɔi kpakpai kɛ ejuji.” (Bɔf. 9:36) Mɛɛ jɔɔmɔ mumɔŋ yei ji kɛha asafo lɛ nɛkɛ!
2 Ani wɔhiɛ sɔɔ nyɛmimɛi yei ni bɔɔ mɔdɛŋ yɛ wɔsafo lɛ mli lɛ? Amɛtsuɔ shiɛmɔ nitsumɔ lɛ babaoo, amɛfeɔ Biblia mli nikasemɔi babaoo, ni amɛyeɔ amɛbuaa mɛi heei lɛ ateŋ mɛi babaoo. Amɛkɛ be babaoo hu yeɔ amɛbuaa gbekɛbii ní amɛya hiɛ yɛ mumɔŋ. Kristofoi yei tsuɔ amɛgbɛfaŋnɔ ní amɛkɛha mumɔ ni ji suɔmɔ, miishɛɛ, toiŋjɔlɛ, kɛ ekãa aya hiɛ yɛ asafo lɛ mli. Amɛyeɔ amɛbuaa yɛ gbɛ̀i babaoo nɔ bɔni afee ni amɛwumɛi kɛ weku mli bii krokomɛi lɛ anyɛ atsu babaoo yɛ Yehowa sɔɔmɔ mli.
3 Nyɛmimɛi Yei ni Yɔɔ Be-Fɛɛ Sɔɔmɔ lɛ Mli: Kɛfata mɛi ni bɔɔ mɔdɛŋ waa yɛ Nuntsɔ lɛ mli lɛ ahe ji nyɛmimɛi ni ji yei maŋsɛɛ sanekpakpa shiɛlɔi, ní amɛteŋ mɛi babaoo efata he ni akɛha nitsumɔ lɛ etee hiɛ yɛ maŋsɛɛ shikpɔji anɔ lɛ. Nɔkwɛlɔi gbɛfalɔi aŋamɛi lɛ tsuɔ nii waa yɛ shiɛmɔ nitsumɔ lɛ mli, ni amɛwoɔ nyɛmimɛi yei babaoo hewalɛ yɛ asafoi ni amɛwumɛi sɔmɔɔ yɛ mli lɛ amli. Mɛi ni esa akɛ akai amɛ hu ji Betel nyɛmimɛi yei lɛ ni kɛ ekãa tsuɔ sɔɔmɔ krɔŋkrɔŋ koni amɛkɛfĩ Yehowa gbɛjianɔtoo lɛ sɛɛ lɛ. Wɔnyɛmimɛi yei gbɛgbalɔi krɛdɛɛi kɛ daa gbɛgbalɔi lɛ miiye kɛmiibua mɛi akpei abɔ koni amɛkase anɔkwale lɛ yɛ nitsumɔ ni amɛtsuɔ yɛ anɔkwayeli mli kɛjieɔ Nyɔŋmɔ yi lɛ hewɔ.
4 Nɛkɛ yei anɔkwafoi nɛɛ atsui nyɔɔ amɛmli waa diɛŋtsɛ yɛ amɛ he-kɛ-afɔleshaa shihilɛ gbɛ lɛ mli. (1 Tim. 6:6, 8) Esa akɛ ajie amɛyi ni esa akɛ wɔkɛ hewalɛwoo kɛ yelikɛbuamɔ fɛɛ ni wɔbaanyɛ wɔkɛha amɛ lɛ aha amɛ.
5 Kristofoi yei lɛ ahe yɛ sɛɛnamɔ kɛha Yehowa gbɛjianɔtoo lɛ, ni amɛkɛ anɔkwa sɔɔmɔ haa ni efeɔ jɔɔmɔ kɛhaa mɛi fɛɛ. Eba akɛ wɔɔya nɔ wɔtsɔɔ hiɛsɔɔ wɔha yei ni tamɔ nɛkɛ ni wɔsɔle koni Yehowa ajɔɔ amɛ yɛ be mli ni amɛyaa nɔ ‘amɛbɔɔ mɔdɛŋ yɛ Nuntsɔ lɛ mli’ lɛ.