Bi Koni Aye Abua Bo
1 Wiemɔi ni jɛ mumɔŋ ni ji “ni naa wa” lɛ tsɔɔ bɔ ni jaramɔ bei ni wɔyɔɔ mli nɛɛ yɔɔ jogbaŋŋ ha. (2 Tim. 3:1, NW) No hewɔ lɛ, mɛni obaanyɛ ofee kɛ́ okɛ mumɔŋ naagbai ni mli wa kpe ni ekolɛ ona akɛ onyɛɛɛ odamɔ naa lɛ?
2 Ani oosumɔ ni okɛ asafo lɛ mlinyo ko ni eda yɛ mumɔŋ awie he? Ekolɛ mɔ ko tsuŋ he nii mra akɛni esusuɔ akɛ abaawo lɛ hiɛgbele lɛ hewɔ, ni esumɔɔɔ ni ekɛ ehe fɔ̃ɔ mɛi komɛi anɔ, aloo eleee kɛji mɔ ko baanyɛ aye abua lɛɛlɛŋ. Wɔkpɛlɛɔ nɔ akɛ, esa akɛ wɔbɔ mɔdɛŋ ni wɔtsu wɔ diɛŋtsɛ wɔ gbɛnaa nii ahe nii jogbaŋŋ diɛŋtsɛ bɔ ni wɔɔnyɛ moŋ, shi esa akɛ wɔjɛ wɔsuɔmɔ mli be fɛɛ be ni wɔbi ni aye abua wɔ yɛ saji ni kɔɔ wɔmumɔŋ hilɛ-kɛhamɔ he.—Gal. 6:2, 5.
3 He ni Obaaje Shishi Kɛjɛ: Ekolɛ obaasumɔ ni oya owoloŋ nikasemɔ nɔkwɛlɔ lɛ ŋɔɔ koni obi kɛji obaanyɛ okɛ lɛ atsu nii yɛ shiɛmɔ nitsumɔ lɛ mli. Enɛ baaha oná hegbɛ koni okɛɛ lɛ bɔ ni osumɔɔ ni oda yɛ mumɔŋ oha. Kɛ asafoŋ sɔɔlɔ ji lɛ lɛ, ha ele akɛ mumɔŋ yelikɛbuamɔ he miihia bo, ni ebaakɛɛ onukpai lɛ koni amɛye amɛbua bo. Aloo obaanyɛ oya onukpai lɛ ateŋ mɔ kome ŋɔɔ ni okɛɛ lɛ saji ni gbaa onaa.
4 Mɛɛ yelikɛbuamɔ nɛkɛ he hiaa bo? Ani nɔ ko eha ekãa ni oyɔɔ lɛ eba shi? Ani oji fɔlɔ kome mɔ ni miibɔ mɔdɛŋ ni oha obii lɛ ahi asafo lɛ mli? Ani oji mɔ ni egbɔ ní yelikɛbuamɔ he miihia bo? Aloo ani naagba ko miije onijiaŋ wui? Ekolɛ jaramɔ bei ni wɔyɔɔ mli nɛɛ he nitsumɔ baafee nɔ ni wa—shi jeee nɔ ni anyɛŋ he nɔ ko afee. Yelikɛbuamɔ yɛ.
5 Bɔ ni Hii Onukpai Yeɔ Amɛbuaa: Onukpai lɛ susuɔ mɔ he yɛ anɔkwayeli mli. Amɛbaabo onaagbai lɛ atoi. Kɛ shiɛlɔi krokomɛi kɛ gbɛtsii nii ni tamɔ nakai miikpe lɛ, onukpai lɛ baasusu enɛ he yɛ be mli ni amɛkwɛɔ asafo lɛ nɔ, ní amɛtsɔɔ asafo lɛ nii lɛ. Ákɛ “mɛi ni toɔ okadii amɛhaa asafoku lɛ,” amɛyɛ daa koni amɛfata ohe kɛtsu nii yɛ miishɛɛ mli. (1 Pet. 5:3) Nɛkɛ nyɛmimɛi ni he esa ni ooobo amɛ toi yɛ be mli ni amɛsusuɔ Biblia mli shishitoo mlai ahe lɛ, baanyɛ aha oshiɛmɔ nitsumɔ lɛ aya hiɛ ni amɛbaaye amɛbua bo yɛ bo diɛŋtsɛ oshihilɛ mli.—2 Tim. 3:16, 17.
6 Yesu kɛ “hii ni ji nikeenii” lɛ babaoo eduro wɔ. (Efe. 4:8, NW shishigbɛ niŋmaa) Enɛ tsɔɔ akɛ onukpai lɛ yɛ ni baaye abua bo. Amɛyɛ koni amɛye amɛbua bo. Yɛ nakai feemɔ mli lɛ, onukpai lɛ ji ‘nyɛnɔ̃.’ (1 Kor. 3:21-23) No hewɔ lɛ, yɛ nɔ najiaŋ ni oootsi ohe kɛaajɛ amɛhe moŋ lɛ, wiemɔ, kaaná gbeyeishemɔ su yɛ amɛ he. Bi amɛ koni amɛkɛ yelikɛbuamɔ ni he hiaa lɛ aha bo.