“Áka Amɛ Akwɛ”—Yɛ Mɛɛ Gbɛ Nɔ?

¹ Akɛni Yehowa gbɛjianɔtoo lɛ miishwere waa hewɔ lɛ, ehe miihia be fɛɛ be koni aná nyɛmimɛi hii ni he esa ni baasɔmɔ akɛ asafoŋ sɔɔlɔi. Nyɛmimɛi hii babaoo ni ahalako amɛ lolo, ni mɛi ni yeko afii nyɔŋmai enyɔ fata he lɛ miisumɔ koni amɛsɔmɔ yɛ asafo lɛ mli. Kɛ akɛ nitsumɔ kroko wo amɛdɛŋ kɛfata he lɛ, amɛnuɔ he akɛ amɛhe yɛ sɛɛnamɔ ni amɛnuɔ he akɛ amɛmiisumɔ ni amɛná nɔ ko amɛtsu. Amɛhiɛ ni amɛaaya ekoŋŋ lɛ damɔ ‘ka ni akaa amɛ akwɛɔ’ lɛ nɔ. (1 Tim. 3:10) Te atsuɔ enɛ he nii ahaa tɛŋŋ?

² Nɔ ni Onukpai lɛ Tsuɔ: Kɛfata asafoŋ sɔɔlɔi a-Ŋmalɛ naa taomɔ nii ni yɔɔ 1 Timoteo 3:8-13 lɛ ni akɛkwɛɔ kɛji nyɛmi nuu ko he esa lɛ he lɛ, onukpai lɛ baaka nyɛmi nuu ko akwɛ akɛ ebaanyɛ etsu gbɛnaa nii ahe nii lo. Ekolɛ amɛkɛ nitsumɔ baawo edɛŋ koni etsu nitsumɔi ni he baa sɛɛnamɔ ni kɔɔ woji tɛtrɛbii kɛ woji wuji ni akɛhaa mɛi lɛ he, wiemɔ gbɛɛmɔ tsɔnei ni akɛhaa, Maŋtsɛyeli Asa lɛ nɔ saamɔ, kɛ ekrokomɛi ahe nii. Onukpai lɛ baakwɛ bɔ ni efeɔ enii yɛ nitsumɔi ni akɛwo edɛŋ lɛ he ehaa kɛ bɔ ni etsuɔ lɛ ehaa. Amɛbaatao hesaai ni tsɔɔ he ni anyɛɔ akɛfɔ̃ɔ mɔ nɔ, nii ni afeɔ yɛ be naa, ekãa ni afeɔ kɛha nitsumɔ, hiɛshikamɔ, suɔmɔ ni ayɔɔ kɛha nitsumɔ, kɛ nyɛmɔ ni ayɔɔ akɛ akɛ mɛi krokomɛi aaaye jogbaŋŋ. (Fil. 2:20) Ani efeɔ nɔkwɛmɔnɔ kpakpa yɛ etadewoo kɛ ehesaamɔ mli? Ani eyɛ suɔmɔ akɛ ebaatsu gbɛnaa nii ahe nii? Amɛmiisumɔ ni amɛna akɛ ‘ekɛ jeŋba kpakpa aaajie lɛ diɛŋtsɛ enitsumɔi akpo yɛ nilee kpoofeemɔ mli.’ (Yak. 3:13) Ani eeya ehiɛ koni enyɛ eye ebua yɛ asafo lɛ mli? Ani eetsu fãmɔ ni Yesu kɛha koni ‘ayafee mɛi kaselɔi’ lɛ he nii, kɛtsɔ ehe ni ekɛwoɔ shiɛmɔ nitsumɔ lɛ mli kɛ ekãa lɛ nɔ?—Mat. 28:19; kwɛmɔ September 1, 1990 Buu-Mɔɔ lɛ baafai 18-28.

³ Yɛ be mli ni atsɔɔko afii pɔtɛɛ ni kɛ hoo lɛ esa akɛ mɔ ko aye dani ahala lɛ akɛ asafoŋ sɔɔlɔ lɛ, Biblia lɛ wieɔ nyɛmimɛi ni tamɔ nakai ahe akɛ “hii ni sɔmɔɔ.” Ebaafee nɔ ni wa akɛ wɔɔkpa gbɛ akɛ amɛfee mɛi ni eye kɛjɛ afii 13 kɛmiishɛ afii 17, titri lɛ akɛni atsĩ tã akɛ eeenyɛ efee mɔ ni yɔɔ ŋa kɛ bii lɛ hewɔ. (1 Tim. 3:12, 13, NW) Esaaa akɛ hii ni tamɔ nɛkɛ lɛ ŋmɛɛɔ amɛhe amɛhaa “oblahiiaŋ sɛɛdii lɛ,” shi esa akɛ amɛfee mɛi ni hiɛ tsii, ní yɔɔ shidaamɔ kpakpa kɛ henilee ni mli tse yɛ Nyɔŋmɔ kɛ gbɔmɛi ahiɛ.—2 Tim. 2:22.

⁴ Yɛ be mli ni nyɛmɔi ni akɛfɔ mɔ lɛ he hiaa lɛ, bɔ ni mɔ lɛ feɔ enii yɛ nɔ ko he kɛ suɔmɔ ni eyɔɔ kɛha nɔ ko tsumɔ lɛ ji nɔ ni he hiaa diɛŋtsɛ. Ani nyɛmi nuu ko kɛ heshibaa sumɔɔ koni ejie Nyɔŋmɔ yi ni esɔmɔ enyɛmimɛi lɛ? Kɛ nakai ni lɛ, Yehowa baajɔɔ mɔdɛŋ ni ebɔɔ koni eya ehiɛ yɛ asafo lɛ mli lɛ nɔ.