Ani Ooto Otsui Shi?
1 “Mibɛ miishɛɛ ni fa fe enɛ . . . akɛ mibii lɛ nyiɛɔ anɔkwale mli lɛ.” (3 Yoh. 4) Yohane mumɔŋ bii lɛ atsuishitoo lɛ ha ená miishɛɛ babaoo diɛŋtsɛ. Kwɛ bɔ ni ebaaŋɔɔ wɔ ŋwɛi Tsɛ lɛ naa akɛ eeena akɛ mɛi ni baatsɔmɔ ebii lɛ ateŋ mɛi akpekpei abɔ lɛ “nyiɛɔ anɔkwale mli lɛ”!—Abɛi 23:15, 16; 27:11.
2 Yɛ be mli ni Nyɔŋmɔ webii lɛ yaa nɔ amɛkɛ amɛhe woɔ Kristofoi anitsumɔ lɛ mli kɛ ekãa ákɛ kuu lɛ, mɛi komɛi ebɔi shibaa fiofio. Eyɛ mli akɛ ekolɛ mɛnɛɛmɛi yɛ ekãa waa klɛŋklɛŋ kwraa beni amɛkase anɔkwale lɛ moŋ, shi beni afii lɛ hoɔ yaa lɛ, amɛbafee mɛi ni bei fioo komɛi amli pɛ amɛkɛ amɛhe woɔ kaselɔfeemɔ nitsumɔ lɛ mli loo amɛfɔɔɔ feemɔ.
3 Shishinumɔ yɛ he akɛ ekolɛ mɛi komɛi eba shi yɛ gbɔmɔtsoŋ gbɔjɔmɔi kɛ nibii ni gbɔlɛ kɛbaa fiofio lɛ hewɔ. Shi kɛlɛ, esa akɛ ajie amɛyi yɛ amɛ tsuishitoo lɛ hewɔ. Amɛmiifee bɔ ni amɛaanyɛ. Shi esa akɛ mɔ fɛɛ mɔ ni ejɔɔ ewala nɔ kɛha Nyɔŋmɔ lɛ abi ehe akɛ: ‘Ani miŋmɛ gbɛ ni mikɛ mihe éwo nibii ni mitiuɔ sɛɛ lɛ amli babaoo aahu akɛ Maŋtsɛyeli lɛ he nibii lɛ bajeɔ he ko fioo ko pɛ yɛ mishihilɛ mli? Ani mifee “kulɔkulɔ” fioo, aloo mikɛ ekãa ‘miipele’ lolo?’ (Kpoj. 3:15, 16; Luka 13:24) Eba akɛ wɔ fɛɛ wɔkɛ sɔlemɔ baasusu nɔ ni wɔfeɔ lɛ he ni wɔná hiɛyaa ni he hiaa lɛ, ní wɔha ahi wɔjwɛŋmɔ mli akɛ Yehowa ewo shi akɛ ekɛ “anunyam kɛ woo kɛ hejɔlɛ aaaba mɔ fɛɛ mɔ ni tsuɔ nikpakpai anii lɛ nɔ.”—Rom. 2:10.
4 Bɔ ni Afeɔ Atoɔ Tsui Shi: Mɛni ye ebua Yesu ni eto etsui shi? Paulo tsɔɔ mli akɛ: “Mɔ ni nyamɔ ni kã ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.” (Heb. 12:1-3) Nyamɔ ni akɛfɔ̃ Yesu hiɛ lɛ jara wa kwraa fe be kukuoo mli kaai ni ehe bahia ni ekɛkpe lɛ. Ní wɔɔha wɔjwɛŋmɔ ahi nyamɔ ni kã wɔhiɛ lɛ nɔ lɛ baanyɛ aye abua wɔ koni wɔ hu wɔto wɔtsui shi. (Kpoj. 21:4, 7; 22:12) Kɛ wɔkɛ wɔhiɛ fɔ̃ Yehowa nɔ koni eha wɔná hewalɛ kɛtsɔ teemɔŋ nikasemɔ, kpeeiyaa daa, kɛ sɔlemɔ ni wɔsɔleɔ daa lɛ nɔ lɛ, wɔbaanyɛ wɔfĩ shi yɛ nitsumɔ ni ekɛha wɔ ni wɔtsu lɛ mli.
5 Yehowa nyaa yɛ enɔkwafoi lɛ atsuishitoo lɛ hewɔ. No hewɔ lɛ nyɛhaa wɔhaa enyamɔ lɛ mli awaa kɛtsɔ ‘anɔkwale lɛ mlinyiɛmɔ’ daa nɔ.