Sanebimɔ He

◼ Mɛni hewɔ sɛɛnamɔ yɔɔ he akɛ toibolɔi lɛ aaatao ŋmalɛi kɛ́ wielɔ ko ni miiha wiemɔ fɔ̃ nine etsɛ́ koni afee nakai lɛ?

Saji komɛi tamɔ saneyitso ni asusuɔ he lɛ kɛ agbɛnɛ kɛji Nyɔŋmɔ Wiemɔ lɛ fã ko mli ŋmalɛi kukuji komekomei ni tsara nɔ lɛ hesusumɔ fata he yɛ wiemɔ lɛ mli lɛ ji nɔ ni baatsɔɔ ŋmalɛi komekomei abɔ ni abaanyɛ afɔ̃ nine atsɛ́ koni toibolɔi lɛ atao.

Ehe miihia ni aha ehi jwɛŋmɔ mli akɛ, yiŋtoo kome hewɔ ni ataoɔ ŋmalɛi ji koni akɛma nɔ mi akɛ nɔ ni akɛɔ lɛ jɛ Biblia lɛ mli. (Bɔf. 17:11) Yiŋtoo kroko hu ji koni apɛi Ŋmalɛ naa odaseyeli ni fĩɔ nɔ ni asusuɔ he lɛ sɛɛ lɛ mli koni mɛi lɛ fɛɛ ahemɔkɛyeli mli awa. Ní aaana nɔ ni Biblia lɛ kɛɔ diɛŋtsɛ yɛ be mli ni akaneɔ ŋmalɛ ko ni he hiaa waa lɛ baaha eka jwɛŋmɔ lɛ mli jogbaŋŋ. Kɛfata ŋmalɛi ataomɔ he lɛ, saji fioo komɛi aŋmalamɔ kɛ saji ni akɛ emlitsɔɔmɔ haa ní aaaya nɔ abo toi lɛ he yɛ sɛɛnamɔ.

Yɛ be mli ni Asafo lɛ wiemɔ he wolo lɛ baanyɛ ekɛ Biblia mli ŋmalɛi babaoo ni aŋmalako mli wiemɔi aha kɛha saneyitso ko he gbɛjianɔtoo lɛ, akɛ enɛɛmɛi haa koni ehe aba sɛɛnamɔ kɛha wielɔ lɛ, ní eye ebua lɛ yɛ ehesaamɔ lɛ mli. Enɛɛmɛi baanyɛ aha lɛ saji ni kɔɔ he lɛ ni agbɛnɛ eye ebua lɛ koni ená Ŋmalɛ naa shishitoo mlai ni kɔɔ he lɛ jogbaŋŋ yɛ ejwɛŋmɔ mli koni enu bɔ ni sane lɛ yaa nɔ ehaa lɛ hu shishi. Wielɔ lɛ ji mɔ ni kwɛɔ koni ele ŋmalɛi ni he hiaa kɛha bɔ ni wiemɔ lɛ yaa nɔ ehaa, ni efɔ̃ɔ nine etsɛ́ɔ toibolɔi lɛ ní amɛfata ehe kɛkane beni ekaneɔ ŋmalɛi nɛɛ ní ekɛ emlitsɔɔmɔ haa lɛ. Abaanyɛ atsĩ ŋmalɛi krokomɛi ni fĩɔ sane lɛ sɛɛ lɛ atã ni atsɔɔ mli yɛ gbɛ kroko nɔ, shi yɛ shihilɛi ni tamɔ enɛɛmɛi amli lɛ, ehe ehiaaa ni toibolɔi lɛ atao.

Kɛ wielɔ lɛ miikane ŋmalɛi ni ehala lɛ, efeɔ nakai kɛjɛɔ Biblia lɛ mli tɛ̃ɛ, shi jeee ni eekane kɛmiijɛ nɔ ko ni akɛ kɔmpiuta eŋma lɛ nɔ. Kɛ wielɔ lɛ fɔ̃ nine etsɛ́ toibolɔi lɛ koni amɛfata he kɛkane lɛ, nɔ ni etsɛ́ɔ yɛ faŋŋ mli ji Biblia wolo lɛ, yitso lɛ, kɛ kuku(ji) lɛ. Kɛ emɛ fioo ni ebi sane loo ekɛ be kuku wie nɔ hewɔ ni esa akɛ ekane ŋmalɛ lɛ, ehaa toibolɔi lɛ náa be kɛtaoɔ ŋmalɛ lɛ. Ŋmalɛ lɛ ni eeesaa etsɛ́ he ni eyɔɔ ekoŋŋ lɛ hu yeɔ ebuaa toibolɔi lɛ koni amɛkai ŋmalɛ ni atsɛ́ lɛ. Shi kɛlɛ, ejeee nɔ ni sa akɛ aaatsɛ baafa mli ni ŋmalɛ lɛ yɔɔ, ejaakɛ srɔtofeemɔi yɛ enɛɛmɛi amli akɛni ekolɛ esoro Biblia shishitsɔɔmɔ pɔtɛɛ ni aŋkroaŋkroi ni yɔɔ toibolɔi lɛ ateŋ lɛ kɛtsuɔ nii hewɔ. Ŋmalɛi ni aaatao beni áfɔ̃ nine átsɛ koni afee nakai lɛ yeɔ ebuaa toibolɔi lɛ koni amɛná hewalɛ ni Nyɔŋmɔ Wiemɔ lɛ yɔɔ lɛ he sɛɛ yɛ be mli ni akɛ emlitsɔɔmɔ haa yɛ wiemɔ lɛ mli lɛ.—Heb. 4:12.