Tipɛŋfoi Anɔnyɛɛ kɛ Hegbɛ ni Oná akɛ Oshiɛ
1 Tipɛŋfoi anɔnyɛɛ ji nɔ ko ni náa mɔ nɔ hewalɛ waa—yɛ gbɛ kpakpa loo gbɛ fɔŋ nɔ. Nanemɛi Yehowa sɔɔlɔi náa hewalɛ kpakpa yɛ wɔnɔ, ni etsirɛɔ wɔ kɛhaa Kristofoi anitsumɔi kpakpai. (Heb. 10:24) Shi kɛlɛ, weku mli bii ni jeee Odasefoi, nanemɛi nitsulɔi, nanemɛi skulbii, akutsoŋbii, loo mɛi krokomɛi ni wɔle amɛ lɛ baanyɛ amɛkɛ nɔnyɛɛ aba wɔnɔ koni wɔkɔ gbɛ ni teɔ shi woɔ Kristofoi ashishitoo mlai lɛ. Ekolɛ ‘amɛbaagbe wɔjeŋba kpakpa ni yɔɔ Kristo mli lɛ he guɔ.’ (1 Pet. 3:16) Te wɔɔfee tɛŋŋ wɔhiɛ wɔfai shi ni wɔtswa akɛ wɔɔya nɔ wɔshiɛ lɛ mli yɛ tipɛŋfoi anɔnyɛɛ ni esaaa ni wɔkɛaakpe lɛ fɛɛ sɛɛ?
2 Weku Mli Bii: Bei komɛi lɛ, ekolɛ wu kɛ tsɛ ni jeee Yehowa Odasefonyo lɛ sumɔŋ ni eŋa kɛ ebii kɛ amɛhe awo maŋ shiɛmɔ nitsumɔ lɛ mli. Nɛkɛ ji bɔ ni shihilɛ lɛ yɔɔ ha yɛ shia ko mli yɛ Mexico. Nuu ko ŋa kɛ ebii kpawo lɛ ba anɔkwale lɛ mli. Klɛŋklɛŋ lɛ, ete shi ewo akɛni esumɔɔɔ ni eweku lɛ shiɛɔ ni amɛkɛ Biblia he woji haa yɛ shia kɛ shia hewɔ. Enu he akɛ nɛkɛ nitsumɔ nɛɛ baa shi tsɔ̃. Shi kɛlɛ, eŋa kɛ ebii lɛ damɔ shi shiŋŋ yɛ amɛyiŋ ni amɛkpɛ akɛ amɛaasɔmɔ Yehowa ni amɛkɛ amɛhe awo shiɛmɔ nitsumɔ lɛ mli daa lɛ mli. Etsɛɛɛ ni nuu lɛ na agbɛnɛ akɛ sɛɛnamɔ yɛ Nyɔŋmɔ gbɛjianɔtoo lɛ nɔkpɛlɛmɔ kɛha shiɛmɔ nitsumɔ lɛ he, ni lɛ hu ejɔɔ ehe nɔ eha Yehowa. Eŋɔ lɛ afii 15 dani ekpɛlɛ anɔkwale lɛ nɔ, shi eji eweku lɛ fĩii shi yɛ hegbɛ ni amɛná akɛ amɛaashiɛ lɛ mli kulɛ, ani gbi ko baaba ni ebaafee nakai?—Luka 1:74; 1 Kor. 7:16.
3 Nanemɛi Nitsulɔi: Ekolɛ nanemɛi nitsulɔi komɛi ekpɛlɛŋ mɔdɛŋ ni obɔɔ koni oye amɛ odase lɛ nɔ. Nyɛmi yoo ko kɛɛ akɛ, beni je lɛŋ naagbee lɛ he sanegbaa te shi yɛ ɔfis lɛ, aye ehe fɛo akɛni ewo ŋaa akɛ amɛkane Mateo yitso 24 lɛ hewɔ. Shi kɛlɛ, gbii fioo komɛi asɛɛ lɛ, enanemɛi nitsulɔi lɛ ateŋ mɔ kome kɛɛ lɛ akɛ ekane yitso lɛ ni ená he miishɛɛ. Eha lɛ wolo, ni ato gbɛjianɔ koni akɛ lɛ kɛ ewu lɛ afee Biblia mli nikasemɔ. Klɛŋklɛŋ nikasemɔ lɛ tee nɔ aahu kɛyashi leebi ŋmɛji enyɔ. Yɛ nikasemɔ ni ji etɛ lɛ sɛɛ lɛ, amɛbɔi kpeeiyaa, ni no sɛɛ lɛ, etsɛɛɛ ni amɛkpa tawa shɛremɔ ni agbɛnɛ amɛbɔi shiɛmɔyaa. Ani kulɛ enɛ baaba lɛ nakai, eji wɔnyɛmi yoo lɛ ebɔɔɔ mɔdɛŋ akɛ eeegba mɛi krokomɛi ehiɛnɔkamɔ lɛ he sane lɛ?
4 Nanemɛi Skulbii: Ejeee nɔ ni efɔɔɔ kaa akɛ Odasefoi oblahii kɛ oblayei aaaná tipɛŋfoi anɔnyɛɛ yɛ skul ní amɛshe gbeyei akɛ oblahii kɛ oblayei krokomɛi baaba amɛ shi yɛ shiɛmɔ nitsumɔ lɛ ni amɛkɛ amɛhe woɔ mli lɛ hewɔ lɛ. Kristofonyo ko ni yeko afii nyɔŋmai enyɔ ni eyɔɔ United States lɛ kɛɛ akɛ: “Kulɛ misheɔ gbeyei akɛ maye oblahii kɛ oblayei krokomɛi odase akɛni misheɔ gbeyei akɛ amɛbaaye mihe fɛo lɛ hewɔ.” No hewɔ lɛ, ekɛ hegbɛi ni enáa kɛyeɔ etipɛŋfoi odase lɛ tsuuu nii dɔŋŋ yɛ skul kɛ shikpɔŋkuku lɛ mli. Te ooofee tɛŋŋ oná nyɛmɔ ni okɛaadamɔ shi shiŋŋ yɛ tipɛŋfoi anɔnyɛɛ naa? Okɛ ohiɛ afɔ̃ Yehowa nɔ, ní otao enɔkpɛlɛmɔ ŋmɔlɔ. (Abɛi 29:25) Ná miishɛɛ waa akɛ onyɛɔ okɛ Nyɔŋmɔ Wiemɔ lɛ tsuɔ nii yɛ osɔɔmɔ nitsumɔ lɛ mli. (2 Tim. 2:15) Oblayoo ni awie ehe sane etsɛko lɛ bɔi sɔlemɔ eha Yehowa, ni ebi koni eye ebua lɛ ni ená he miishɛɛ akɛ ekɛ eskul nanemɛi lɛ aaagba sane. Ebɔi odaseyeli trukaa yɛ skul, ni ewo yibii kpakpai, ni etsɛɛɛ ni ekɛ mɔ fɛɛ mɔ ni ele lɛ bɔi sanegbaa. Emu sane naa akɛ: “Wɔsɛɛ be he hiɛnɔkamɔ he miihia nakai gbekɛbii lɛ ni amɛmiisumɔ ni amɛnine ashɛ nɔ, ni Yehowa kɛ wɔ miitsu nii kɛmiiye kɛmiibua amɛ.”
5 Akutsoŋbii: Ekolɛ wɔyɛ akutsoŋbii loo mɛi krokomɛi ni wɔle amɛ ni náaa wɔhe miishɛɛ yɛ mɛi ni wɔji kɛ hemɔkɛyelii ni wɔhiɛ lɛ hewɔ. Kɛ ooshe gbeyei akɛ amɛmiisusu nɔ ko lɛ, bi ohe akɛ: ‘Ani amɛle anɔkwale ni kɛ mɔ yaa naanɔ wala mli lɛ? Mɛni manyɛ mafee ni mikɛshɛ amɛtsuii ahe?’ Kpokpaa nɔkwɛlɔ ko na akɛ awoɔ yibii kpakpai kɛ́ aye akutsoŋbii odase fiofio lɛ. Kpa Yehowa fai koni eha bo nyɛmɔ kɛ nilee ni okɛaaya nɔ otao mɛi ni hiɛ tsui ni ja lɛ.—Fil. 4:13.
6 Kɛ wɔŋmɛɛ wɔhe wɔha tipɛŋfoi anɔnyɛɛ ni esaaa lɛ, ebaanyɛ eŋɔɔ shitee-kɛ-wolɔi anaa, shi ani nakai feemɔ baafee nɔ ni hi fe fɛɛ kɛha amɛ—aloo kɛha wɔ? Yesu diɛŋtsɛ akutsoŋbii te shi wo lɛ. Eŋmɛ etsui shi po yɛ wiemɔi ni naa wawai ni etsɛ bii lɛ wie amɛshi lɛ lɛ hewɔ. Shi ele akɛ ebaanyɛ eye ebua amɛ kɛ́ etee nɔ enyiɛ gbɛ ni Nyɔŋmɔ eto eha lɛ lɛ pɛ nɔ. No hewɔ lɛ, Yesu “ŋmɛ etsui shi eha naashai ni eshafeelɔi ŋmɛ lɛ” lɛ. (Heb. 12:2, 3) Esa akɛ wɔfee nakai nɔŋŋ. Tswaa ofai shi akɛ okɛ hegbɛ ni oná akɛ oooshiɛ Maŋtsɛyeli lɛ he shɛɛ sane lɛ aaatsu nii jogbaŋŋ. Yɛ nakai feemɔ mli lɛ, “ooohere bo diɛŋtsɛ kɛ mɛi ni boɔo toi lɛ fɛɛ yiwala.”—1 Tim. 4:16.