2001 “Nyɔŋmɔ Wiemɔ lɛ Tsɔɔlɔi” Yehowa Odasefoi a-Kpokpaa Wulu nɔ Kpee
1 Gbalɔ Yesaia wie Yehowa he akɛ Tsɔɔlɔ Kpeteŋkpele, mɔ ni woɔ wɔ hewalɛ tamɔ bɔ ni tsɛ feɔ lɛ, akɛ: “Gbɛ lɛ nɛ! nyɛnyiɛa nɔ!” (Yes. 30:20, 21) Shi mɛɛ gbɛ nɔ wɔtsɔɔ wɔnuɔ Yehowa wiemɔi ní ewieɔ kɛha wɔsɛɛnamɔ lɛ? Yehowa tsɔɔ saji ni yɔɔ Biblia lɛ mli lɛ nɔ kɛ agbɛnɛ hu, Biblia kasemɔ woji, asafoŋ kpeei, kpokpaa bibii, kɛ kpokpaa wuji anɔ kpeei ní “tsulɔ anɔkwafo kɛ nilelɔ” lɛ toɔ he gbɛjianɔ lɛ anɔ ekɛ ewebii wieɔ. (Mat. 24:45) Wɔbaanyɛ wɔda Yehowa shi akɛ eyaa nɔ etsɔɔ wɔ gbɛ ní esa akɛ wɔnyiɛ nɔ.
2 Daa afi lɛ, kpokpaa wulu nɔ kpee lɛ haa wɔnáa hegbɛ ni wɔkɛ nanemɛi heyelilɔi buaa wɔhe naa kutuu ni wɔboɔ Yehowa gbɛtsɔɔmɔi atoi jogbaŋŋ. Nyɛsɛɛ afi lɛ, mɛi 166,102 tee “Nyɔŋmɔ Wiemɔ lɛ Nɔyelɔi” Kpokpaa Wulu nɔ Kpeei ní woɔ mɔ hewalɛ yɛ mumɔŋ lɛ yɛ Ghana. Yɛ afi 2001 mli lɛ, abaafee gbii etɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpeei lɛ yɛ maŋ nɛɛ mli he fɛɛ he. Wɔle akɛ nyɛmiikpa gbɛ akɛ nyɛbaato nyɛ gbɛjianɔ koni nyɛya kpee nɛɛ eko, no hewɔ lɛ wɔkɛ gbɛtsɔɔmɔi ní nyiɛ sɛɛ nɛɛ miiha koni eye ebua nyɛ.
3 Gbɛtsɔɔmɔi Kɛha Tsũ Taomɔ: Akɛ “Room Request” woji lɛ eko miimaje asafo fɛɛ asafo. Kɛji ootao wɔɔhe kɛtsɔ kpee shishi gbɛjianɔtoo lɛ nɔ lɛ, no lɛ ofainɛ ni oŋma “Room Request” wolo lɛ eko nɔ nii, koni okɛha asafoŋ woloŋmalɔ lɛ ni ema nɔ mi, koni no sɛɛ lɛ okɛmaje kpee ni obaaya lɛ. ESAAA ni akɛ “Room Request” woji kɛ kpee he woji krokomɛi ní aŋmalaa lɛ majeɔ nitsumɔhe nine ni yɔɔ Accra lɛ.
4 Abaaná wɔɔhei lɛ ekomɛi yɛ mɛi ashiai amli. Akɛ tsũi nɛɛ miiha kɛha kpee be lɛ PƐ. Mɛi ni nine shɛɔ wɔɔhei ni tamɔ nɛkɛ nɔ lɛ akwɛ koni amɛ kɛ amɛbii lɛ ajie bulɛ kpo amɛtsɔɔ amɛ gbɔfeelɔ lɛ shia lɛ, ní amɛkagbɛ́lɛ gbɔfeelɔ lɛ nibii amli aloo ní amɛkafite enɛɛmɛi, ní amɛkaya shia lɛ mli hei komɛi ni esaaa akɛ mɛi krokomɛi yaa jɛmɛ lɛ. Kɛ́ shiatsɛmɛi ná naagbai yɛ enɛ gbɛfaŋ lɛ, esa akɛ aha tsũ taomɔ nɔkwɛlɔ ni yɔɔ kpee lɛ shishi lɛ ale enɛ oya nɔŋŋ, ni ebaaná he miishɛɛ akɛ eeeye ebua.
5 Mɛi ní ŋmalaaa “Room Request” woji lɛ dani amɛyashɛɔ he ni afeɔ kpee lɛ yɛ lɛ kɛ naagbai haa kpee shishi gbɛjianɔtoo lɛ ejaakɛ ehe bahiaa ni akɛ be ni faaa atao wɔɔhe aha kpeeiyalɔi ni tamɔ nɛkɛ. Gbɛjianɔ ni atoɔ yɛ naagbee mli kwraa nɛɛ baanyɛ afite shika babaoo. No hewɔ lɛ, esa akɛ kpeeiyalɔi fɛɛ ni wɔɔhe he baahia amɛ kɛtsɔ kpee shishi gbɛjianɔtoo lɛ nɔ lɛ aŋmala “Room Request” woji lɛ anɔ nii koni akɛ enɛɛmɛi amaje kpee shishi gbɛjianɔtoo lɛ kɛtsɔ hiɛ kwraa. Amrɔ nɛɛ, nɔtsamɔ skulbii awɔɔhei komɛi ní anáa ahaa kpeeiyalɔi lɛ biɔ ni awo nyɔmɔ ni fa kɛha kpeeiyalɔ fɛɛ kpeeiyalɔ yɛ gbɛkɛ fɛɛ gbɛkɛ ni akɛaawɔ jɛmɛ lɛ hewɔ. No hewɔ lɛ, ehe miihia ni wɔsaa wɔhe koni wɔkɛ shika aye abua kɛha wɔɔhe lɛ, kɛ́ eji skulbii awɔɔhe loo wɔɔhe yɛ mɔ ko shia mli.
6 Gbeekpamɔ Tsɔɔ Toiboo ni Afeɔ Ahaa Asafo lɛ Gbɛtsɔɔmɔi: Esa akɛ oti nɛɛ afee saji ni wɔsusuɔ he waa diɛŋtsɛ lɛ ateŋ ekome. Hebribii 13:17 lɛ kɛɔ akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.” Abiɔ koni wɔfee toiboo yɛ sane nɛɛ mli gbii enyɔ loo gbii etɛ pɛ daa afi. Kɛ́ esoro nɔ ni wɔ diɛŋtsɛ wɔhalaa po lɛ, nɔkwɛmɔnɔ kpakpa ni wɔfeɔ, ní wɔnyɛmimɛi lɛ naa lɛ, haa suɔmɔ, ekomefeemɔ kɛ sɛɛfimɔ mumɔ shwereɔ. (Kwɛmɔ 1 Korintobii 16:16; Filipibii 2:1-4.) Nɛkɛ gbɛtsɔɔmɔ nɛɛ kɛ nitsumɔ haa wɔnáa hegbɛ koni wɔtsɔɔ suɔmɔ ni wɔyɔɔ kɛha wɔnyɛmimɛi Kristofoi lɛ, ní wɔkwa “mi klɛŋklɛŋ” subaŋ ni egbɛ eshwã je lɛ mli ŋmɛnɛ lɛ.—1 Kor. 10:24.
7 Mɛi ni Yɔɔ Hiamɔ Nii Krɛdɛɛ lɛ Ahesusumɔ: Ekolɛ yelikɛbuamɔ he baahia mɛi ni egbɔlɔ, mɛi ni bɛ gbɔmɔtsoŋ hewalɛ, mɛi ni yɔɔ be-fɛɛ sɔɔmɔ lɛ mli, loo mɛi krokomɛi koni amɛnyɛ amɛya kpee lɛ eko. Wekumɛi, onukpai, kɛ mɛi krokomɛi ní yɔɔ asafo lɛ mli ni le mɛi ni yɔɔ hiamɔ nii krɛdɛɛ nɛɛ ashihilɛi ni yɔɔ srɔto lɛ, baanyɛ ajɛ suɔmɔ mli amɛto gbɛjianɔ ní he hiaa lɛ amɛha amɛ. Esaaa akɛ atsiɔ weku lɛ kɛ asafo lɛ gbɛnaa nii lɛ afɔ̃ɔ kpee lɛ shishi gbɛjianɔtoo lɛ nɔ. (1 Tim. 5:4) Esa akɛ Asafoŋ Sɔɔmɔ Ajinafoi lɛ akwɛ mɔ fɛɛ mɔ ní tao tsũ lɛ gbɛbimɔ wolo lɛ mli jogbaŋŋ dani amɛkɛ wolo nɛɛ amaje Rooming Department lɛ. Esa akɛ asafoŋ woloŋmalɔ lɛ aŋma e-tɛlifoŋ nɔmba yɛ wolo lɛ nɔ koni Rooming Department nitsulɔi lɛ anine anyɛ ashɛ enɔ kɛji saji komɛi yɛ ní ehe miihia ní amɛbi lɛ. Esa akɛ akɛ woji ní akpɛlɛ nɔ lɛ amaje kɛya kpee shishi adrɛs ní atsɔɔ yɛ nɔ ní aŋma ahɔ mli nɛɛ baafa 6 lɛ.
8 Kpee Kroko ni Aaaya: Ahaa asafo fɛɛ asafo yaa kpee lɛ yɛ he ní bɛŋkɛ lɛ fe fɛɛ. Kɛ́ abaafee kpeei enyɔ yɛ wiemɔ kome too lɛ nɔŋŋ mli yɛ maŋtiase ko mli lɛ, nyɛmimɛi komɛi baasumɔ ni amɛya kpeei enyɔ lɛ fɛɛ. Yɛ be mli ni ŋwanejee ko bɛ he akɛ enɛ baaha aná hegbɛ kɛha hewalɛwoo babaoo lɛ, kɛlɛ ekɛ naagbai baa yɛ nibii ni akɛtsuɔ nii ni akɛfeɔ kpee lɛ gbɛfaŋ, ni ehaaa yiŋtoo hewɔ ni asumɔɔ ni mɛi ayifalɛ lɛ afee nɔ ni sa lɛ aye omanye. Enɛ hewɔ lɛ, wɔmiibi ni nyɛmimɛi ni yɔɔ maŋtiasei amli lɛ aya kpee ni ato aha amɛ yɛ nakai maŋtiase lɛ mli lɛ pɛ. Kɛ́ amɛmiisumɔ ni amɛya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba kɛha wɔ. Yɛ nyɛmimɛi ni akɛ kpee shishi nitsumɔi komɛi ni he hiaa woɔ amɛdɛŋ ni amɛtsuɔ he nii ni no hewɔ lɛ amɛnáaa hegbɛ ni amɛbo wiemɔi lɛ fãi komɛi atoi lɛ agbɛfaŋ lɛ, aŋmɛɔ amɛ gbɛ ni amɛya kpee ni ji enyɔ ni abaafee yɛ nakai maŋtiase lɛ nɔŋŋ mli. Kɛfata he lɛ, kɛji wiemɔ he naagba ko hewɔ ni nyɛmimɛi komɛi baasumɔ ni amɛya kpee lɛ yɛ maŋtiase kroko mli fe he ni atsɔɔ akɛ amɛ asafo lɛ aya lɛ, aŋmɛɔ nakai feemɔ gbɛ.
9 Yɛ asafoi ni yɔɔ shɔŋŋ lɛ ekomɛi agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ, fe he ni ato ni amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛhalaa he ni amɛbaaya. Ehe ehiaaa ní amɛŋma Asafo lɛ wolo ní amɛbi gbɛ. Shi kɛlɛ, esa akɛ asafoi ni baakpɛ amɛyiŋ akɛ amɛbaaya kpee kroko ni jeee nɔ ni ato ni amɛya lɛ atswa kpokpaa nɔkwɛlɔ lɛ adafi kɛtsɔ hiɛ kwraa koni ekato amɛsaramɔ be he gbɛjianɔ kɛmiiha nakai otsi ni amɛbaaya kpee lɛ. Kɛ́ asafo lɛ baaya kpee ni ato akɛ amɛya loo amɛbaaya ekroko jio, esa akɛ nyɛmimɛi hii ni kwɛɔ tsɔne taomɔ gbɛjianɔtoi anɔ lɛ akwɛ koni tsɔne fɛɛ tsɔne ni amɛaato he gbɛjianɔ lɛ afee nɔ ni naagba bɛ he ni ekɛ nitsumɔ yɔɔ shweshweeshwe.
10 Tamale Kpee: Abaafee “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpeei lɛ ekome yɛ Tamale kɛjɛ January 4 kɛyashi January 6, 2002, yɛ Twi kɛ Frafra wiemɔ mli. Aawo nyɛmimɛi fɛɛ ni jɛ wuoyigbɛ ní baanyɛ aya lɛ hewalɛ ní amɛya kpee nɛɛ. Ekolɛ Asafo lɛ baato tsɔne he gbɛjianɔ krɛdɛɛ afi nɛɛ hu kɛha gbɛfaa lɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛ̃ɛ, ni amɛye trukaa odase hu beni amɛyɔɔ Tamale lɛ. Wɔmiiwo mɛi fɛɛ ni yɔɔ he miishɛɛ akɛ amɛaaya lɛ hewalɛ koni amɛbɔi amɛhe saamɔ bianɛ kɛha kpee lɛ.
11 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatao wɔɔhei, kɛ nitsumɔi krokomɛi ni abaatsu. Wɔyɛ hiɛnɔkamɔ akɛ mɛi fɛɛ ni yɔɔ he ni abaafee kpee lɛ yɛ lɛ kɛ asafoi ni bɛŋkɛ jɛmɛ lɛ fɛɛ baato gbɛjianɔ koni amɛfata he kɛtsu nitsumɔ ni he hiaa nɛɛ kɛmɔ shi yɛ otsii lɛ anaagbee kɛ otsi lɛ mli gbii lɛ amli. Kɛ́ mɛi ni fá saŋŋ baanyɛ ato gbɛjianɔ koni amɛba jɛmɛ gbi kome loo gbii enyɔ ni tsɔɔ kpee fɛɛ kpee shishijee hiɛ koni ato nɔ fɛɛ nɔ he gbɛjianɔ lɛ, enɛ baaye ebua waa. Akɛni shika ni akɛyeɔ abuaa ji nɔ ni akɛtoɔ kpeei ahe gbɛjianɔ ni akɛfeɔ kpee lɛ hewɔ lɛ, kɛ́ wɔtee koni wɔyatsu nitsumɔ ni tsɔɔ kpee hiɛ lɛ, esaaa akɛ wɔkpaa gbɛ akɛ kpee shishi gbɛjianɔtolɔi lɛ baaha wɔ niyenii yaka. Mɛi pii ni kɛ amɛhe baawo voluntia nitsumɔ lɛ mli koni amɛye amɛbua lɛ hu ahe baahia yɛ kpee lɛ shishi, no hewɔ lɛ, okɛ oweku lɛ ato gbɛjianɔ koni nyɛfata he kɛtsu enɛ yɛ kpee ni nyɛbaaya lɛ shishi.
12 Niyenii He Nitsumɔ: Kaimɔ akɛ atoŋ niyenii he gbɛjianɔ ko kwraa yɛ kpeei lɛ ashishi. Akɛ nu ni mli ejɔ hu baŋ jɛmɛ. No hewɔ lɛ, okɛ nɔ ko ni obaaye beni akpa fioo shwane lɛ ajɛ shia kɛba. Yɛ nakai feemɔ mli lɛ, mɔ fɛɛ mɔ baanyɛ ekɛ ejwɛŋmɔ ama mumɔŋ nifeemɔ lɛ nɔ waa. Nyɛhaa wɔkwɛa jogbaŋŋ yɛ he fɛɛ he ni wɔɔtara ni wɔye nii beni akpa fioo lɛ, koni wɔkɛ nɔ ko akakpa sɛii lɛ anɔ loo ni wɔɔshi jwɛi wɔshwie jɛmɛ. Akɛ nibii baamamɔ shi yɛ kpeei lɛ eko fɛɛ eko shishi koni akɛ jwɛi awo mli. Esa akɛ akɛ nibii nɛɛ atsu nii.
13 Kpee Shishi Tsitsinaa-tsɛɛ Nii kɛ Nɔ ni Akɛhɔɔ Mli: Kɛjɛ September kɛyaa lɛ, akɛ kpokpaa wulu nɔ kpee he tsitsinaa-tsɛɛ nii ni yɔɔ Blɔfo wiemɔ mli lɛ baafata woji ni akɛmajeɔ lɛ ahe. Ehe ebahiaŋ ni ashɛ enɛɛmɛi. Akɛ tsitsinaa-tsɛɛ nii ni abua eko fɛɛ eko naa 25 lɛ baamaje asafoi lɛ yɛ mɛi ni yɔɔ asafo fɛɛ asafo mli lɛ ayibɔ naa. Kɛ́ tsitsinaa-tsɛɛ nii lɛ babaoo he baahia asafoi lɛ, no lɛ esa akɛ akɛ “Literature Request Form” (S-14) lɛ ashɛ eko. Nyɛfainɛ nyɛkadia akɛ akɛ plastik ni akɛwoɔ mli lɛ emajeŋ yɛ be mli ni ashɛko. Ehe miihia ni akɛ “Literature Request Form” (S-14) lɛ ashɛ enɛɛmɛi aha asafo lɛ mli bii ateŋ mɔ fɛɛ mɔ ni taoɔ eko. Nyɛhaa ehia nyɛjwɛŋmɔ mli akɛ akɛ tsitsinaa-tsɛɛ nii kɛ nɔ ni akɛhɔɔ mli lɛ eko eyaŋ kpeei lɛ ashishi.
14 Wiemɔi ni Amɔmɔɔ loo Vidio Mfoniri-Shamɔi: Esa akɛ aŋkroaŋkroi fɛɛ ni baamɔmɔ wiemɔi lɛ yɛ kpãai anɔ kɛha amɛhe lɛ afee nakai yɛ gbɛ ni egbaŋ mɛi krokomɛi ni eba kpee lɛ shishi lɛ anaa loo egbalaŋ amɛjwɛŋmɔ kɛjɛŋ wiemɔ lɛ nɔ. Titri lɛ, esaaa akɛ amɛtaa sarawa hewalɛ kpãa kɛ wiemɔ kpãai lɛ ahe. Wɔhiɛ baasɔ ekome ni nyɛkɛ wɔ baafee yɛ enɛ mli lɛ waa diɛŋtsɛ.
15 Te Hotɛl Nitsulɔi Nuɔ Yehowa Odasefoi Ahe Amɛhaa Tɛŋŋ? Beni hotɛl ko ní yɔɔ United States anaigbɛ teŋgbɛ lɛ nɔkwɛlɔ lɛ ewie Yehowa webii ajeŋba kpakpa lɛ he sɛɛ lɛ, ekɛɛ akɛ: “Kɛ́ mina akɛ Yehowa Odasefoi ebɔi biɛ baa kɛjɛ Soo lɛ, ‘mishiɔ biɛ’ ni mibaaa biɛ aahu kɛyashiɔ Ju leebi. Mile akɛ naagba fɛɛ naagba ní baaba lɛ baafee bibioo. Be fɛɛ be ní nyɛwebii lɛ batoɔ biɛ lɛ, mináa miishɛɛ waa.” Hotɛl mli nihɔ̃ɔlɔ ko kɛ miishɛɛ wie akɛ: “Amɛji kuu ní he yɔɔ miishɛɛ waa! Mɔ fɛɛ mɔ yaa nɔ ekɛɔ akɛ, ‘Oyiwala dɔŋŋ.’” Ani eŋɔɔɔ onaa waa akɛ awieɔ wɔnyɛmimɛi lɛ ahe yɛ nɛkɛ gbɛ nɔ? Kwɛ bɔ ni Yehowa Nyɔŋmɔ mii shɛɔ ehe ehaa kɛji ena akɛ wɔmiifee wɔnii yɛ gbɛ ní kɛ yijiemɔ haa egbɛi lɛ nɔ!
16 Naagbee: Yɛ be mli ni be ní okɛbaaya nyɛ kpokpaa wulu nɔ kpee lɛ bɛŋkɛɔ lɛ, okɛ sane lɛ afɔ̃ Yehowa hiɛ yɛ sɔlemɔ mli koni onyɛ oya kpeei lɛ yɛ bei srɔtoi lɛ fɛɛ mli kɛha gbii etɛ lɛ fɛɛ ní oná wiemɔ he gbɛjianɔtoo lɛ he sɛɛ jogbaŋŋ kɛmɔ shi. Ani obi gbɛ kɛjɛ onitsumɔhe lɛ momo kɛha gbii etɛ ní okɛbaaya kpee ní oto akɛ obaaya lɛ? Kɛji ofeko nakai lɛ, no lɛ feemɔ nakai mra bɔ ni ooonyɛ. Bei pii lɛ, kɛ́ omɛ kɛyashi be lɛ bɛŋkɛ kwraa dani obi gbɛ lɛ, afɔɔɔ gbɛŋmɛɛ. Tsulɔ anɔkwafo kɛ nilelɔ lɛ eto afi nɛɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ he gbɛjianɔ koni akɛha wɔ mumɔŋ gbɛtsɔɔmɔ, ní akɛtswa wɔhemɔkɛyeli lɛ ama shi. No hewɔ lɛ bɔimɔ ogbɛjianɔtoo bianɛ koni onyɛ oya, ní onyiɛ lalatsɛ lɛ ŋaawoo nɛɛ sɛɛ, akɛ: “Nyɛjiea Nyɔŋmɔ yi yɛ asafoi ateŋ”!—Lala 68:27.
[Akrabatsa ni yɔɔ baafa 3]
Nifeemɔ Bei
Sohaa kɛ Hɔɔ
Leebi 9:30 – Gbɛkɛ 5:00
Hɔgbaa
Leebi 9:30 – Gbɛkɛ 4:00