Yehowa Haa Hewalɛ
1 Mɛni ji nɔ ni osusuɔ yɛ bɔfo Paulo he? Yɛ be mli ni wɔkaneɔ Bɔfoi lɛ Asaji awolo lɛ, wɔnaa bɔ ni etsu nii waa yɛ Yehowa sɔɔmɔ lɛ mli. Te Paulo fee tɛŋŋ etsu nibii fɛɛ ni efee lɛ he nii lɛ? Ekɛɛ akɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.” (Fil. 4:13) Wɔ hu wɔbaanyɛ wɔná hewalɛ ní Yehowa kɛhaa lɛ he sɛɛ. Yɛ mɛɛ gbɛ nɔ? Kɛtsɔ nibii ekpaa ni ekɛhaa wɔ ní wajeɔ wɔ yɛ mumɔŋ lɛ ní wɔkɛaatsu nii jogbaŋŋ lɛ nɔ.
2 Nyɔŋmɔ Wiemɔ Lɛ: Taakɛ bɔ ni esa akɛ wɔye nii koni wɔná gbɔmɔtsoŋ hewalɛ lɛ, nakai nɔŋŋ esa akɛ wɔkɛ Nyɔŋmɔ Wiemɔ lɛ alɛ́ wɔhe bɔni afee ni wɔhiɛ akã yɛ mumɔŋ. (Mat. 4:4) Biblia lɛ haa wɔ hewalɛ koni wɔfi shi. Ehe miihia ni wɔkɛ wɔhe awo teemɔŋ nikasemɔ ni shishinumɔ yɔɔ mli kɛ enɔjwɛŋmɔ mli be fɛɛ be kɛ́ eeehi, bɔni afee ni wɔnyɛ wɔhiɛ ekãa ni wɔyɔɔ yɛ anɔkwale lɛ mli lɛ mli.—Lala 1:2, 3.
3 Sɔlemɔ: Ehe miihia ni wɔtsi wɔbɛŋkɛ Yehowa, titri lɛ yɛ hiamɔ bei krɛdɛɛ mli. Etsɔɔ emumɔ lɛ nɔ ekɛ hewalɛ haa mɛi ni biɔ lɛ yɛ sɔlemɔ mli lɛ. (Luka 11:13; Efe. 3:16) Ŋmalɛi lɛ woɔ wɔ hewalɛ ní ‘wɔhiɛ sɔlemɔ mli daa.’ (Rom. 12:12) Ani ofeɔ nakai?
4 Asafo Lɛ: Wɔnáa hewalɛ kɛ ekãa hu kɛjɛɔ asafoŋ kpeei kɛ naanyobɔɔ ni suɔmɔ yɔɔ mli ní wɔkɛ wɔnyɛmimɛi hii kɛ yei lɛ náa mli ŋɔɔmɔ yɛ jɛmɛ lɛ ashishi. (Heb. 10:24, 25) Kɛ́ wɔhao lɛ, amɛwoɔ wɔ hewalɛ ni amɛyeɔ amɛbuaa wɔ yɛ suɔmɔ mli.—Abɛi 17:17; Jaj. 4:10.
5 Shiɛmɔ Nitsumɔ Lɛ: Wɔhe ni wɔkɛwoɔ shiɛmɔ nitsumɔ lɛ mli daa lɛ haa wɔhiɛ hiɔ Maŋtsɛyeli lɛ kɛ emli jɔɔmɔi lɛ anɔ. Kɛ́ wɔye wɔbua mɛi krokomɛi ni amɛkase Yehowa he nii lɛ, wɔnáa miishɛɛ. (Bɔf. 20:35) Jeee wɔteŋ mɔ fɛɛ mɔ baanyɛ ayasɔmɔ yɛ he ni hiamɔ lɛ da yɛ loo ekɛ ehe awo be-fɛɛ sɔɔmɔ lɛ mli, shi wɔbaanyɛ wɔná shiɛmɔ nitsumɔ lɛ mli gbɛfaŋnɔ yɛ gbɛ̀i ni shishinumɔ yɔɔ mli nɔ.—Heb. 6:10-12.
6 Kristofoi Nɔkwɛlɔi: Wɔnáa hewalɛwoo kɛ yelikɛbuamɔ ní onukpai lɛ kɛhaa lɛ he sɛɛ. Yehowa kɛ nitsumɔ ewo amɛdɛŋ ni amɛlɛ́ Nyɔŋmɔ asafo kuu ni yɔɔ amɛkwɛmɔ shishi lɛ. (1 Pet. 5:2) Nɔkwɛlɔi gbɛfalɔi tswaa asafoi ni amɛsɔmɔɔ amɛ lɛ amɛmaa shi, taakɛ Paulo fee yɛ egbii lɛ amli lɛ.—Rom. 1:11, 12.
7 Anɔkwafoi lɛ Anɔkwɛmɔnii: Eji nɔ ni woɔ mɔ hewalɛ akɛ wɔɔsusu nanemɛi nitsulɔi anɔkwafoi, ní hi shi yɛ blema kɛ ŋmɛnɛŋmɛnɛ beaŋ fɛɛ lɛ anɔkwɛmɔnii kpakpai lɛ ahe. (Heb. 12:1) Kɛ́ oosumɔ ni oná hewalɛwoo hee lɛ, mɛni hewɔ okaneee wala shihilɛ mli saji ni woɔ mɔ hewalɛ ni yɔɔ wɔwoji tɛtrɛbii lɛ amli, amaniɛbɔi ni tswaa mɔ emaa shi ni yɔɔ Yearbook lɛ mli, loo ŋmɛnɛŋmɛnɛ beaŋ Yehowa Odasefoi ayinɔsane mli saji komɛi ni yɔɔ miishɛɛ ni yɔɔ Proclaimers wolo lɛ mli lɛ?
8 Nyɛmi nuu ko, ni amrɔ nɛɛ eye afii 90 kɛyaa lɛ kpɛlɛ anɔkwale lɛ nɔ beni eji gbekɛ nuu fioo. Beni eji gbekɛ lolo lɛ, aka ehemɔkɛyeli lɛ akwɛ. Klɛŋklɛŋ kwraa lɛ, mɛi komɛi ni be ko lɛ, amɛkɛ asafo lɛ bɔ́ gbagbalii lɛ kwa Yehowa gbɛjianɔtoo lɛ. No sɛɛ lɛ, shia kɛ shia nitsumɔ lɛ ní ewa kɛha lɛ lɛ hu yɛ jɛmɛ. Shi kɛlɛ, ekɛ ehe fɔ̃ Yehowa nɔ be fɛɛ be. Etsɛɛɛ nɔŋŋ ni ená shiɛmɔ nitsumɔ lɛ he miishɛɛ. Ni ŋmɛnɛ hu? Yɛ egbɔmɔtsoŋ hewalɛ ni baa shi lɛ fɛɛ sɛɛ lɛ, ekã he eji Brooklyn Betel weku lɛ mlinyo, ni eesɔmɔ yɛ Nɔyeli Kuu lɛ mli. Eshwako ehe akɛ ekɛ ehe ekpɛtɛ Yehowa gbɛjianɔtoo lɛ he.
9 Abaptisi nyɛmi yoo ko ni ji Britain Betel weku lɛ mlinyo beni eye afii 13. Ekɛ enyɛmi nuu bɔi gbɛgbamɔ nitsumɔ lɛ yɛ afi ni nyiɛ sɛɛ lɛ mli, ni yɛ afi ni nyiɛ no sɛɛ lɛ mli lɛ, awo etsɛ tsuŋ yɛ ehe ni ekɛwooo afã ko mli yɛ Jeŋ Ta II lɛ mli lɛ hewɔ. Etee nɔ ekwɛ Yehowa gbɛ koni ewo lɛ hewalɛ, ni etee nɔ esɔmɔ anɔkwa Nyɔŋmɔ lɛ. Yɛ be ni sa mli lɛ, ekɛ nyɛmi nuu anɔkwafo ko bote gbalashihilɛ mli, ni amɛ fɛɛ amɛ́tee nɔ amɛ́fee Yehowa suɔmɔnaa nii. Beni amɛkɛ afii 35 ehi gbalashihilɛ mli sɛɛ lɛ, ewu lɛ gbo kpatu. Shi kome ekoŋŋ lɛ, ená hewalɛ kɛjɛ Yehowa ŋɔɔ, ni étee nɔ ésɔmɔ kɛbashi ŋmɛnɛ, ni eekpa gbɛ akɛ ebaasɔmɔ akɛ Yehowa shikpɔŋ nɔ weku lɛ mlinyo kɛya naanɔ.
10 Yehowa yeɔ ebuaa enɔkwa tsuji lɛ ni ewoɔ amɛ hewalɛ. “Lɛ ehaa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ fáa.” Wɔbaanyɛ wɔná hewalɛ jɛɛhe ni bɛ naagbee nɛɛ eko kɛji wɔkɛ nibii ekpaa ni atsĩ tã yɛ ŋwɛigbɛ lɛ tsu nii jogbaŋŋ. Kaimɔ akɛ: “Mɛi ni hiɛ kã Yehowa nɔ lɛ náa hewalɛ hee, . . . amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.” (Yes. 40:29-31) Paulo kɛ ehe kpasa Yehowa gbagbalii kɛha hewalɛwoo, ni nakai esa akɛ wɔfee.