Nyɛhaa Wɔfɛɛ Wɔwoɔ Yehowa kɛ E-Bi lɛ Hiɛ Nyam
Bɔ ni Mɛi Fɛɛ ni Baaya Kaimɔ lɛ Shishi yɛ April 8 lɛ Baanyɛ Afee ni Amɛná He Sɛɛ Kɛmɔ Shi
1 Namɛi awoɔ amɛhiɛ nyam ŋmɛnɛ? Mɛi ni je lɛ buɔ amɛnifeemɔi waa. Shi kɛlɛ, yɛ enɛɛmɛi ateŋ babaoo mli lɛ, etsɛɛɛ ni hiɛ kpaa amɛnifeemɔi lɛ anɔ. Shi nifeemɔi ni adesai fɛɛ náa he sɛɛ lɛɛlɛŋ lɛ hu? Wɔbaagbala wɔjwɛŋmɔ kɛya amɛteŋ nɔ ni da fe fɛɛ lɛ nɔ waa yɛ be mli ni wɔyeɔ Nuntsɔ lɛ Gbɛkɛnaashi Niyenii lɛ he gbi jurɔ lɛ yɛ April 8, 2001 beni hulu eyanyɔ shi sɛɛ lɛ.
2 Namɔ esa akɛ akɛ hiɛnyamwoo ni fe fɛɛ lɛ aha? Biblia lɛ haa hetoo akɛ: “[Yehowa, NW], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” (Kpoj. 4:11) Ákɛ Bɔlɔ lɛ, Yehowa ji Jeŋ Muu fɛɛ Nɔyelɔ. Hegbɛ ni eyɔɔ akɛ awo ehiɛ nyam lɛ, sɛɛ efoŋ kɔkɔɔkɔ!—1 Tim. 1:17.
3 Yesu Kristo, ni ji Nyɔŋmɔ Bi lɛ fee nibii ni sa ni kɛ naanɔ jɔɔmɔi baha adesai. Ekase e-Tsɛ lɛ jogbaŋŋ. (Yoh. 5:19) Toiboo ni yeɔ emuu ni efee, kɛ enɔkwayeli yɛ sɔɔmɔ nitsumɔ lɛ mli lɛ ha ebafee mɔ ni “sa akɛ eŋɔ hewalɛ kɛ nifalɛ kɛ nilee kɛ nyɛmɔ kɛ agbojee kɛ anunyam kɛ jɔɔmɔ.” (Kpoj. 5:12) E-Tsɛ wo ehiɛ nyam kɛtsɔ Maŋtsɛ ni ewo lɛ lɛ nɔ. (Lala 2:6-8) Shi wɔ lɛ, wɔná hegbɛ akɛ wɔwoɔ Tsɛ lɛ kɛ Bi lɛ fɛɛ hiɛ nyam yɛ be mli ni wɔyeɔ Nuntsɔ lɛ Gbɛkɛnaashi Niyenii lɛ he gbi jurɔ lɛ yɛ April 8, 2001.
4 Dɔlɛ sane ji akɛ, yɛ adesa yinɔsane mli lɛ, mɛi fioo pɛ kɛ hiɛnymawoo ni sa Yehowa kɛ e-Bi lɛ haa amɛ. Yɛ bei komɛi amli lɛ, Nyɔŋmɔ webii, ni ji Israelbii ni hi shi yɛ blema beaŋ lɛ sɔmɔɔɔ Yehowa kɛmɔɔɔ shi. Enɛ tsɔɔ bulɛ ni abɛ kwraa. (Mal. 1:6) Bulɛ ni sa biɔ ni akɛ anɔkwayeli ni damɔ suɔmɔ kɛ hiɛsɔɔ kɛha nibii fɛɛ ni Yehowa kɛ e-Bi lɛ efee eha wɔ lɛ nɔ lɛ aha. Nakai hiɛnyamwoo kɛ bulɛ ni wɔkɛaaha lɛ tsɔɔ akɛ wɔmiijie Nyɔŋmɔ gbeyeishemɔ kpo wɔmiitsɔɔ, ni wɔmiikpɛlɛ Yehowa kɛ Yesu nɔ yɛ wɔgbɛ̀i fɛɛ mli. Kristofoi asafo lɛ miibɔ mɔdɛŋ eetsɔɔ mɛi nii, ni eeye eebua mɛi krokomɛi koni amɛfee nakai nɔŋŋ.
5 Be Krɛdɛɛ ní Wɔkɛ Hiɛnyamwoo Baaha: Daa afi lɛ, Kaimɔ lɛ he gbijurɔyeli lɛ ji henaabuamɔ titri ko ni he hiaa Yehowa webii waa. Esa akɛ mɔ fɛɛ mɔ ni miisumɔ koni esɔmɔ Yehowa ni ewo ehiɛ nyam lɛ aya nifeemɔ lɛ shishi. (Luka 22:19) Wɔmiikpa gbɛ akɛ, kɛfata Odasefoi akpekpei 6 ni yɔɔ ekãa lɛ ahe lɛ, mɛi ni yɔɔ wiemɔ lɛ he miishɛɛ baaha mɛi ni baaba lɛ afa fe akpekpei 14. Mɛɛ hegbɛ ni fe fɛɛ wɔkɛwoɔ wɔŋwɛi Tsɛ lɛ hiɛ nyam nɛ! Eyɛ mli akɛ gbijurɔyeli lɛ gbalaa jwɛŋmɔ kɛyaa Yesu nɔ moŋ, shi, hiɛnyamwoo kɛ bulɛ kpo ni aaajie atsɔɔ nɔ ni efee lɛ woɔ Tsɛ lɛ ni tsu lɛ lɛ hiɛ nyam.—Yoh. 5:23.
6 Mɛni wɔbaanyɛ wɔfee koni wɔkɛfi nɛkɛ be krɛdɛɛ nɛɛ sɛɛ? Wɔbaanyɛ wɔye wɔbua mɛi heei ni yɔɔ wiemɔ lɛ he miishɛɛ lɛ koni amɛná he sɛɛ kɛmɔ shi. Wó amɛ hewalɛ ni amɛya, ni kɛ ehe miihia lɛ, ojɛ suɔmɔ mli okɛ yelikɛbuamɔ ni he baahia amɛ koni amɛya jɛmɛ lɛ aha amɛ. Gbálamɔ yiŋtoo ni yɔɔ wiemɔ ni akɛbaaha lɛ mli otsɔɔ lɛ. Okɛ amɛ aŋa mɛi krokomɛi. Nɔ ni amɛnaa kɛ nɔ ni amɛnuɔ lɛ baanyɛ atsirɛ amɛ ni amɛkɛ wɔ afee ekome kɛwo Yehowa hiɛ nyam.
7 Kaabu hewalɛ ni gbɛjianɔtoo lɛ baanyɛ aná yɛ mɛi anɔ lɛ ákɛ eji nɔ ko bibioo. Univɛsiti nikaselɔ ko nu he yɛ nɛkɛ gbɛ nɔ: “Mitee sɔlemɔ ni mina ni aaye Kɔmiiniɔ shii abɔ, shi enɛ yɛ srɔto kwraa. Miina akɛ nakai pɛpɛɛpɛ ji bɔ ni Biblia lɛ kɛɛ lɛ, ni efeɔ mi akɛ nyɛ nyɛhiɛ anɔkwale lɛ.” Ebɔi kpeeiyaa daa, ni etsɛɛɛ ni abaptisi lɛ.
8 Ye Obua Mɛi Heei lɛ ni Amɛya Hiɛ: Kadimɔ mɛi heei ni baa Kaimɔ lɛ shishi lɛ, ni oyasra amɛ yɛ no sɛɛ nɔŋŋ, ni okɛ amɛ ati nibii kpakpai ni amɛkase ni amɛna lɛ mli. Ha amɛle kpeei krokomɛi ni afeɔ lɛ hu, ni ji he ni amɛbaanyɛ amɛná Biblia mli nilee babaoo kɛfata nɔ ni amɛyɔɔ momo lɛ he lɛ. Nilee wolo lɛ yitso 17 lɛ ni hiɛ yitso akɛ “Taomɔ Shweshweeshwe Shihilɛ yɛ Nyɔŋmɔ Webii Ateŋ” ni nyɛkɛ amɛ baati mli lɛ baatsɔɔ amɛ mumɔŋ gbɛjianɔ babaoo ni asafo lɛ eto ni yɔɔ be fɛɛ be kɛha amɛ lɛ mli. Too gbɛjianɔ koni amɛkwɛ vidio ni ji, Our Whole Association of Brothers (Wɔ Jeŋ Fɛɛ Nyɛmimɛi Anaanyobɔɔ Lɛ) koni amɛ diɛŋtsɛ amɛkɛ amɛhiŋmɛi ana ekomefeemɔ, miishɛɛ kɛ ekãa ni Yehowa webii lɛ yɔɔ lɛ!
9 Ehe miihia ni mɛi heei ni yɔɔ wiemɔ lɛ he miiishɛɛ lɛ akase bɔ ni amɛaafee ni amɛ diɛŋtsɛ amɛnyɛ amɛwo Yehowa hiɛ nyam ni amɛkɛ bulɛ aha lɛ lɛ he nii. Tsɔɔmɔ mli akɛ, tsuiŋ ni ajɛɔ asɔleɔ ahaa Yehowa lɛ saa ehiɛ ni ekɛ mumɔŋ nibii jɔɔ mɔ be fɛɛ be. (1 Yoh. 5:14) Okɛ nikasemɔ 8 kɛyashi 12 lɛ ni yɔɔ Taoɔ wolo bibioo lɛ mli lɛ atsu nii ni okɛtsɔɔ lɛ jeŋbai ni woɔ Yehowa hiɛ nyam. Kɛtsɔ nɔ ni agba he sane ni yɔɔ Yehowa Odasefoi awolo bibioo lɛ baafa 30-31 lɛ mli lɛ nɔ lɛ, nyɛwoa mɛi heei lɛ hewalɛ koni amɛsusu hegbɛ ni amɛyɔɔ ni amɛkɛaawo Yehowa hiɛ nyam amɛ diɛŋtsɛ lɛ he kɛtsɔ shiɛmɔ nitsumɔ lɛ nɔ.
10 Hiɛsɔɔ ni wɔɔná wɔha Yesu afɔleshaa lɛ, kɛ hegbɛ ni wɔná akɛ wɔɔsɔmɔ ákɛ ekaselɔi lɛ, woɔ Tsɛ lɛ hiɛ nyam, ni ekɛ jɔɔmɔi bahaa mɛi krokomɛi. Yesu wo shi akɛ: “Kɛji mɔ ko miisumɔ mi lɛ, mi-Tsɛ lɛ aaawo lɛ.”—Yoh. 12:26.