Kpeei Wuji—Be Kɛha Mlifilimɔ!
1 Yehowa Odasefoi akpeei wuji ji bei kɛha mlifilimɔ babaoo. Fe afii oha nɛ, ni nɛkɛ henaabuamɔi nɛɛ eye ebua nɔyaa ni yaa nɔ yɛ wɔ gbɛjianɔtoo lɛ mli lɛ. Wɔna Yehowa jɔɔmɔi babaoo yɛ wɔ jeŋ muu fɛɛ nitsumɔ lɛ nɔ, kɛjɛ shishijee bibii amli tɔ̃ɔ. Yɛ wɔ ŋmɛnɛŋmɛnɛ beaŋ klɛŋklɛŋ kpee ni wɔfee yɛ Chicago, Illinois, yɛ afi 1893 mli lɛ shishi lɛ, abaptisi mɛi 360 ni ba kpee lɛ shishi lɛ ateŋ mɛi 70 akɛfee amɛhenɔjɔɔmɔ kɛha Yehowa lɛ he okadi. Mɛi ni ba “Nyɔŋmɔ Wiemɔ lɛ Nɔyelɔi” Kpokpaa Wulu nɔ Kpeei ni wɔfee yɛ jeŋ fɛɛ lɛ shishi yɛ afi ni ho lɛ mli lɛ ji, mɛi 9,454,055, ni abaptisi amɛteŋ 129,367. Mɛni ni yɔɔ naakpɛɛ ni adamɔɔ nɔ anaa miishɛɛ po nɛ!
2 Kɛjɛ Biblia bei amli tɔ̃ɔ, ni Nyɔŋmɔ webii ahenaabuamɔi efee he ni ajɛɔ akɛ tsɔsemɔ ni he hiaa waa ni jɛ Yehowa dɛŋ haa. Yɛ Ezra kɛ Nehemia gbii lɛ amli lɛ, gbɔmɛi lɛ boɔ Mla lɛ kanemɔ toi “kɛjɛ leebi kɛyashi shwane fintĩi.” (Neh. 8:2, 3) Akɛni gbɔmɛi lɛ nuɔ Mla lɛ shishi jogbaŋŋ yɛ nakai beaŋ hewɔ lɛ, amɛfɛɛ amɛ ná “miishɛɛ babaoo.” (Neh. 8:8, 12) Wɔ hu wɔmli filiɔ wɔ akɛ kpeei wuji kɛ hegbɛ ni hi haa wɔ koni wɔnine ashɛ tsɔsemɔ kɛ mumɔŋ niyenii kpakpa nɔ “yɛ be ni sa nɔ” kɛjɛ Yehowa dɛŋ kɛtsɔ “tsulɔ anɔkwafo kɛ nilelɔ” lɛ nɔ. (Mat. 24:45) Akɛni Yesu kɛɛ akɛ esa akɛ gbɔmɔ ahi shi yɛ “wiemɔ fɛɛ wiemɔ ni jɛɔ Nyɔŋmɔ daaŋ lɛ” naa hewɔ lɛ, kpeei wuji he hiaa kɛha wɔmumɔŋ hilɛ-kɛhamɔ.—Mat. 4:4.
3 Mɔdɛŋ Fɛɛ ni Aaabɔ Koni Aya lɛ Sa: Esa akɛ wɔteŋ mɔ fɛɛ mɔ kɛfee oti ni ma ehiɛ akɛ eeeya afi nɛɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ gbii etɛ lɛ fɛɛ. Esa akɛ wɔto gbɛjianɔ koni wɔshɛ kpee lɛ shishi mra daa gbi, ni wɔhi shi kɛyashi be mli ni wɔɔfata he kɛkɛɛ akɛ “Amen!” beni asɔleɔ kɛkpaa lɛ. Bɔni afee ni wɔnyɛ nakai wɔfee lɛ, ekolɛ esa akɛ wɔtsake wɔbe he gbɛjianɔtoo mli. Ekolɛ ní wɔɔbi gbɛ kɛjɛ wɔ nitsumɔhe koni wɔya kpokpaa wulu nɔ kpee lɛ kɛ naagbai komɛi baaba. Ehe miihia ni wɔkɔ shidaamɔ ni yɔɔ shiŋŋ, ni wɔkaŋmɛɛ nɔ ko kwraa he wɔha hegbɛ ni aaaba. Kɛji akɛ wɔɔhei kɛ gbɛfaa tsɔnei ahe baahia wɔ lɛ, esa akɛ wɔjɛ mra wɔto gbɛjianɔi. Mɔdɛŋ fɛɛ ni wɔɔbɔ lɛ he baaba sɛɛnamɔ!
4 Yehowa webii damɔɔɔ shika nɔ amɛsusuuu jɔɔmɔi ni amɛaaná kɛaajɛ kpokpaa wulu nɔ kpee lɛ ni amɛaaya hewɔ lɛ he. Kadimɔ mɛi ni tswa amɛfai shi akɛ amɛbaaya afi 1958 Nyɔŋmɔ Suɔmɔnaa Nifeemɔ Majimaji Ateŋ Kpee ni Yehowa Odasefoi fee yɛ New York City lɛ mli lɛ anɔkwɛmɔnii lɛ. Nyɛmi nuu ko ŋã etsumaa nitsumɔ lɛ naa otsii enyɔ, koni ekɛ eyelikɛbuamɔ aha ni eya kpee lɛ. Nyɛmi nuu ko ni jɛ Virgin Islands hɔ̃ɔ eshikpɔŋ heka enumɔ koni eweku muu ni feɔ mɛi ekpaa lɛ fɛɛ anyɛ aya. Oblanyo kɛ oblayoo gbalashihilɛ mli hefatalɔi hɔ̃ɔ amɛ ŋshɔ hiɛ lɛlɛ bibioo ko koni amɛkɛ amɛbii etɛ lɛ fɛɛ, ní amɛye kɛjɛ nyɔji enyɔ kɛyashi afii kpawo lɛ aya kpee lɛ. Akɛɛ heloonaa nyɛmimɛi hii etɛ ni jɛ California, U.S.A. lɛ akɛ, kɛji akɛ amɛshi amɛnitsumɔ lɛ, amɛbaninaŋ nakai nitsumɔi lɛ beni amɛaaku amɛsɛɛ amɛba. Shi no etsĩii amɛ gbɛ koni amɛkaya nakai kpee ni amɛhiɛ kpaŋ nɔ gbi ko gbi ko lɛ.
5 Yehowa Woɔ Wɔ Mɔdɛŋbɔɔ yɛ Anɔkwayeli Mli lɛ He Nyɔmɔ: Yehowa naa ni ejɔɔ ewebii lɛ amɔdɛŋbɔi anɔ. (Heb. 6:10) Ákɛ nɔkwɛmɔnɔ lɛ, yɛ afi 1950 Teokrase Nɔyaa Kpee lɛ shishi lɛ, mɛi ni ba lɛ bo wiemɔ ni sa kadimɔ ni ji “Nibii Agbɛjianɔtoo Hee” lɛ toi. Nyɛminuu Frederick Franz kanya ni etée mɛi fɛɛ ni ba lɛ amiishɛɛ shi kɛtsɔ sane ni ebi nɛɛ nɔ, akɛ: “Ani mɛi ni yɔɔ majimaji ateŋ kpee nɛɛ shishi lɛ baaná miishɛɛ akɛ amɛaale akɛ, mɛi ni akpaa gbɛ akɛ amɛbaatsɔmɔ lumɛi yɛ shikpɔŋ hee lɛ nɔ lɛ ateŋ mɛi komɛi yɛ biɛ, yɛ wɔteŋ, gbɛkɛ nɛɛ?” Nɔ ni fe afii 50 sɛɛ lɛ, wɔmli filiɔ wɔ lolo yɛ Lala 45:17 shishinumɔ ni aha efee faŋŋ lɛ hewɔ.
6 Beni weku yitso ko ni hiɛ sɔɔ nii lɛ tee nyɛsɛɛ afi lɛ kpokpaa wulu nɔ kpee lɛ egbe naa sɛɛ lɛ, eŋma wolo ni nyiɛ sɛɛ nɛɛ: “Nyɛmimɛi, nyɛnyɛŋ nyɛle yiwalaheremɔ ni nɛkɛ kpokpaa wulu nɔ kpee nɛɛ kɛba. Miweku lɛ fa kɛyahi maŋtiase lɛ mli yɛ nitsumɔ taomɔ hewɔ, shi amrɔ nɔŋŋ kɛkɛ ni wɔna akɛ wɔkɛ naagba miikpe yɛ wɔmumɔŋ shidaamɔ he. . . . Wɔŋmɛɛ wɔ Kristofoi agbɛnaa nii lɛ ahe. Wɔkpa kpeei ni wɔyaa lɛ kɛ wɔhe ni wɔkɛwoɔ shiɛmɔ nitsumɔ lɛ mli kutuu lɛ po. . . . Kpokpaa wulu nɔ kpee nɛɛ ewo wɔ hewalɛ hee, ni wɔkɛ mumɔŋ otii miimamɔ wɔhiɛ ekoŋŋ, ni wɔmiito gbɛjianɔ koni wɔtsu enɛɛmɛi ahe nii.”
7 Yehowa kɛ mumɔŋ niyenii ni he hiaa wɔ lɛ miiha wɔ. Eŋmɛɔ niyenii kpakpa he okpɔlɔ yɛ kpokpaa wuji anɔ kpeei ashishi. Esa akɛ hiɛsɔɔ ni wɔyɔɔ kɛha gbɛjianɔtoo nɛɛ aha wɔnyɛ wɔkɛɛ nɔ ni Kornelio kɛɛ beni bɔfo Petro yasara lɛ lɛ, akɛ: “Agbɛnɛ wɔ fɛɛ wɔyɛ biɛ yɛ Nyɔŋmɔ hiɛ, koni wɔbo nibii fɛɛ ni Nyɔŋmɔ ekɛɛo eto lɛ atoi.” (Bɔf. 10:33) Nyɛhaa wɔkɛfea oti ni ma wɔhiɛ, akɛ ‘wɔɔhi Nyɔŋmɔ hiɛ’ yɛ afi nɛɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ gbii etɛ henaabuamɔ lɛ shishi leebi kɛ shwane, koni wɔmli afili wɔ!